Mateo 16:1-28
16 Ditoy immasideg kenkuana dagiti Fariseo+ ken dagiti Saduceo ket, tapno sulisogenda, kiniddawda kenkuana a mangipakita kadakuada iti pagilasinan manipud langit.+
2 Kas sungbat kinunana kadakuada: “[[No dumteng ti rabii nakayugalianyo a kunaen, ‘Nasayaatto ti paniempo, ta ti tangatang lumabaga a kas iti apuy’;
3 ket iti bigat, ‘Nalam-ekto, natutudo a panawen ita, ta ti tangatang lumabaga a kas iti apuy, ngem nalulem ti buyana.’ Ammoyo no kasano nga itarusan ti langa ti tangatang, ngem dagiti pagilasinan dagiti tiempo saanyo a kabaelan nga itarusan.]]+
4 Ti nadangkes ken mannakikamalala a kaputotan agtultuloy nga agsapul iti pagilasinan, ngem awanto ti pagilasinan a maited iti dayta+ malaksid ti pagilasinan ni Jonas.”+ Gapuna isu pimmanaw, a binaybay-anna ida.+
5 Ita bimmallasiw dagiti adalan iti sabali a bangir ket nalipatanda ti mangitugot kadagiti tinapay.+
6 Kinuna kadakuada ni Jesus: “Pagtalinaedenyo a silulukat dagiti matayo ket siputanyo ti lebadura dagiti Fariseo ken dagiti Saduceo.”+
7 Gapuna rinugianda nga irason iti nagtetengngaanda, a kunkunada: “Saantay a nangitugot iti aniaman a tinapay.”
8 Yantangay ammona daytoy, kinuna ni Jesus: “Apay a kastoy ti irasrasonyo iti bagbagiyo, gapu ta awan tinapayyo, dakayo a bassitan pammati?+
9 Saanyo kadi pay a makita ti punto, wenno saanyo kadi a malagip ti lima a tinapay no kadagidiay lima ribu ken no mano a labba ti naurnongyo?+
10 Wenno ti pito a tinapay no kadagidiay uppat a ribu ken no mano a labba ti taraon ti naurnongyo?+
11 Kasano a saanyo a mailasin a diak nagsao kadakayo maipapan kadagiti tinapay? No di ket siputanyo ti lebadura dagiti Fariseo ken dagiti Saduceo.”+
12 Idin natarusanda a kinunana a siputanda, saan a ti lebadura dagiti tinapay, no di ket ti sursuro+ dagiti Fariseo ken dagiti Saduceo.
13 Ita idi nakagteng kadagiti paset ti Cesarea Filipos, inim-imtuod ni Jesus kadagiti adalanna: “Siasino ti Anak ti tao sigun iti panagkuna dagiti tattao?”+
14 Kinunada: “Ti sumagmamano kunada a ni Juan a Mammautisar,+ ti dadduma ni Elias,+ kaskasdi a ti sabsabali ni Jeremias wenno maysa kadagiti mammadto.”
15 Kinunana kadakuada: “Dakayo, nupay kasta, siasinoak iti panagkunayo?”+
16 Kas sungbat kinuna ni Simon Pedro: “Sika ti Kristo,+ ti Anak ti sibibiag a Dios.”+
17 Kas sungbat kinuna kenkuana ni Jesus: “Naragsakka, Simon nga anak ni Jonas, agsipud ta saan nga impalgak kenka dayta ti lasag ken dara, no di ket ni Amak nga adda iti langlangit.+
18 Kasta met, kunak kenka, Sika Pedroka,+ ket iti daytoy a dakkel a bato+ bangonekto ti kongregasionko, ket dagiti ruangan ti Hades+ saandanto a maringbawan dayta.+
19 Itedkonto kenka dagiti tulbek ti pagarian ti langlangit, ket aniaman a galutam ditoy daga isunto ti banag a nagalutan iti langlangit, ket aniaman a warwaram ditoy daga isunto ti banag a nawarwaran iti langlangit.”+
20 Kalpasanna siiinget a binilinna dagiti adalan a saanda a sawen iti asinoman nga isu ti Kristo.+
21 Manipuden iti dayta a tiempo rinugian ni Jesu-Kristo nga impakita kadagiti adalanna nga isu masapul a mapan idiay Jerusalem ket agsagaba iti adu a banag manipud kadagiti lallakay ken iti panguluen a papadi ken kadagiti eskriba, ket mapapatay, ket iti maikatlo nga aldaw maibangon.+
22 Gapu itoy isu impakni ni Pedro ket rinugianna a binabalaw, a kunkunana: “Kaasiam ta bagim, Apo; saanto a pulos mapasamak kenka daytoy a pagtungpalan.”+
23 Ngem, idi sinangona, kinunana ken Pedro: “Inka iti likudak, Satanas!+ Maysaka a pakaitibkolak, agsipud ta pampanunotem, saan a ti pampanunot ti Dios,+ no di ket ti pampanunot ti tattao.”
24 Idin kinuna ni Jesus kadagiti adalanna: “No ti asinoman kayatna ti sumurot kaniak, paglikudanna koma ti bagina ket bagkatenna ti kayona a pagtutuokan ket agtultuloy+ a surotennak.
25 Ta siasinoman nga agtarigagay a mangisalakan iti kararuana mapukawnanto dayta; ngem siasinoman a makapukaw iti kararuana maigapu kaniak masarakannanto dayta.+
26 Ta ania ti magunggonanto ti maysa a tao no magun-odna ti intero a lubong ngem mapukawna ti kararuana?+ wenno anianto ti ited ti maysa a tao a kasukat+ ti kararuana?
27 Ta ti Anak ti tao naikeddeng nga umay iti dayag ni Amana agraman dagiti anghelna, ket kalpasanna supapakannanto ti tunggal maysa sigun iti panagtigtignayna.+
28 Pudno kunak kadakayo nga adda sumagmamano kadagidiay sitatakder ditoy a saandanto a pulos maramanan ni patay agingga nga umuna pay a makitada ti Anak ti tao nga um-umay iti pagarianna.”+
