Mateo 2:1-23
2 Kalpasan a nayanak ni Jesus idiay Betlehem+ ti Judea idi kaaldawan ni Herodes+ nga ari, adtoy! dagiti astrologo+ manipud makindaya a paspaset immayda sadi Jerusalem,
2 a kunkunada: “Sadino ti ayan daydiay nayanak nga ari+ dagiti Judio? Ta nakitami ti bituenna+ idi addakami idiay daya, ket immaykami agruknoy kenkuana.”
3 Idi mangngegna daytoy naglagaw ni Ari Herodes, ket ti intero a Jerusalem naibuyog kenkuana;
4 ket idi maurnongna a sangsangkamaysa ti amin a panguluen a papadi ken dagiti eskriba dagiti umili rinugianna nga imtuoden kadakuada no sadino ti pakayanakan idi ti Kristo.
5 Kinunada kenkuana: “Idiay Betlehem+ ti Judea; ta kastoy ti pannakaisuratna babaen iti mammadto,
6 ‘Ket sika, O Betlehem+ iti daga ti Juda, nikaanoman saanka a kanunumuan a siudad iti tengnga dagiti gobernador ti Juda; ta manipud kenka rummuarto ti manarawidwid,+ a mangipastorto+ iti ilik, nga Israel.’”
7 Idin sililimed a pinaayaban ni Herodes dagiti astrologo ket siaannad nga inamadna kadakuada ti tiempo a panagparang ti bituen;
8 ket, idi ibaonna ida idiay Betlehem, kinunana: “Inkayo biroken a siaannad ti ubing, ket inton nasarakanyon ipakaammoyo kaniak, tapno makapanak met ket agruknoyak iti dayta.”+
9 Idi nangngegandan ti ari, napandan; ket, adtoy! ti bituen a nakitada idi addada idiay daya+ napan nga immun-una kadakuada, agingga a nagsardeng iti ngatuen ti ayan ti ubing.
10 Idi makitada ti bituen pudno a nagrag-oda iti kasta unay.
11 Ket idi simrekda iti balay nakitada ti ubing agraman ni Maria nga inana, ket, idi nagkurnoda, nagruknoyda iti dayta. Linuktanda met dagiti gamengda ket indiayada dayta agraman sagsagut, balitok ken olibano ken mirra.
12 Nupay kasta, gapu ta naipaayanda iti nadibinuan a pakdaar+ iti maysa a tagtagainep a saanda nga agsubli ken Herodes, nagsublida iti pagilianda babaen iti sabali a dalan.
13 Kalpasan a nakapanawdan, adtoy! ti anghel ni Jehova+ nagparang ken Jose iti tagtagainep, a kunkunana: “Bumangonka, alaem ti ubing ken ti inana ket agkamangka idiay Egipto, ket agyankayo sadiay agingga a mangtedak kenka iti bilin; ta ni Herodes dandaninan biroken ti ubing tapno dadaelenna.”
14 Gapuna bimmangon ket innalana ti ubing ken ti inana iti rabii ket napan idiay Egipto,
15 ket nagyan sadiay agingga iti ipupusay ni Herodes, tapno matungpal+ daydiay sinao ni Jehova babaen iti mammadtona, a kunkunana: “Manipud idiay Egipto+ inayabak ti anakko.”
16 Idin ni Herodes, idi makitana a sinikapan dagiti astrologo, nagpungtot iti napalalo, ket nagbaon ket pinapapatayna amin dagiti ubbing a lallaki idiay Betlehem ken kadagiti amin a distritona, manipud dua ti tawenna ken agpababa, sigun iti tiempo a siaannad nga inamadna kadagiti astrologo.+
17 Iti kasta natungpal daydiay naisao babaen ken Jeremias a mammadto, a kunkunana:
18 “Nangngeg ti maysa a timek idiay Rama,+ panagsangit ken kasta unay a panagdung-aw; ni Raquel+ sangsangitanna ti annakna, ket saanna a kayat ti paliwliwa, gapu ta awandan.”
19 Idi pimmusayen ni Herodes, adtoy! ti anghel ni Jehova nagparang ken Jose iti maysa a tagtagainep+ idiay Egipto
20 ket kinunana: “Bumangonka, alaem ti ubing ken ti inana ket inkan iti daga ti Israel, ta natayen dagidiay mangsapsapul iti kararua ti ubing.”
21 Gapuna bimmangon ket innalana ti ubing ken ti inana ket simrek iti daga ti Israel.
22 Ngem idi mangngegna a ni Arquelao ti agturay kas ari iti Judea imbes a ni Herodes nga amana, nagbuteng a pumanaw a mapan sadiay. Mainayon pay, yantangay naipaayan iti nadibinuan a pakdaar iti maysa a tagtagainep,+ napan iti teritoria ti Galilea,+
23 ket dimteng ken nagnaed iti siudad a managan Nazaret,+ tapno matungpal ti naisao babaen kadagiti mammadto: “Isu maawaganto iti Nazareno.”+
