Mateo 26:1-75
26 Ita idi a ni Jesus nalpasnan amin dagitoy a sasao, kinunana kadagiti adalanna:
2 “Ammoyo a dua nga aldaw manipud ita mapasamak ti paskua,+ ket ti Anak ti tao mayawat tapno mailansa.”+
3 Idin ti panguluen a papadi ken ti lallakay dagiti umili naguurnongda a sangsangkamaysa iti paraangan ti nangato a padi a naawagan iti Caifas,+
4 ket nagnunumuanda+ a kemmegen ni Jesus babaen iti nasikap a pamuspusan ken papatayenda.
5 Nupay kasta, kinunkunada: “Saan nga iti piesta, tapno awan ti derraaw a tumaud kadagiti tattao.”+
6 Bayat a ni Jesus adda idi idiay Betania+ iti balay ni Simon nga agkukutel,+
7 immasideg kenkuana ti maysa a babai nga addaan prasko nga alabastro ti nangina a bangbanglo a lana,+ ket rinugianna nga ibukbok dayta iti ulona bayat nga isu sisasadag iti panganan.
8 Idi makitada daytoy nagrurod dagiti adalan ket kinunada: “Apay daytoy a panangsayang?+
9 Ta mabalin koma a nailako daytoy iti dakkel a gatad ket naited iti napanglaw+ a tattao.”
10 Yantangay ammona daytoy,+ kinuna kadakuada ni Jesus: “Apay a padasenyo a riribuken ti babai? Ta nangaramid kaniak iti nasayaat nga aramid.+
11 Ta kankanayon nga adda kadakayo dagiti napanglaw,+ ngem saanto a kankanayon nga addaak kadakayo.+
12 Ta idi a daytoy a babai inkabilna daytoy bangbanglo a lana iti bagik, inaramidna dayta a panangisagana kaniak iti pannakaitabon.+
13 Pudno kunak kadakayo, Sadinoman a pakaikasabaan daytoy naimbag a damag iti intero a lubong, ti inaramid daytoy a babai maisaritanto met kas pakalaglagipan kenkuana.”+
14 Idin maysa kadagiti sangapulo ket dua, daydiay naawagan ti Judas Iscariote,+ napan iti panguluen a papadi
15 ket kinunana: “Ania ti itedyonto kaniak tapno isu liputak maipaay kadakayo?”+ Nangitulagda kenkuana iti tallopulo a kapisi a pirak.+
16 Gapuna manipud idin isu nagsapsapul iti nasayaat a gundaway a panangliput kenkuana.+
17 Iti umuna nga aldaw dagiti di pinaalsa a tinapay+ immay ken Jesus dagiti adalan, a kunkunada: “Sadino ti kayatmo a pangisaganaanmi ti panganam ti paskua?”+
18 Kinunana: “Mapankayo idiay siudad ken ni Kastoy-a-kua+ ket kunaenyo kenkuana, Kuna ti Mannursuro, ‘Ti naituding a tiempok asidegen; rambakakto ti paskua a kaduak dagiti adalak iti pagtaengam.’”+
19 Ket dagiti adalan inaramidda a kas iti imbilin kadakuada ni Jesus, ket insaganada ti bambanag a maipaay iti paskua.+
20 Itan, idi a rumabiin,+ isu sisasadag iti panganan agraman ti sangapulo ket dua nga adalan.+
21 Bayat a mangmanganda, kinunana: “Pudno kunak kadakayo, Maysa kadakayo ti mangliputto kaniak.”+
22 Yantangay malmaldaanganda iti kasta unay iti daytoy, rinugianda tunggal maysa a kunaen kenkuana: “Apo, saan a siak, di ngamin?”+
23 Kas sungbat kinunana: “Ti makiraman kaniak a mangisawsaw ti imana iti malukong isu ti mangliputto kaniak.+
24 Pudno, ti Anak ti tao mapan, kas iti adda a naisurat+ maipapan kenkuana, ngem asi pay+ dayta a tao a babaen kenkuana maliputan ti Anak ti tao!+ Nasaysayaat koma kenkuana no dayta a tao saanen a nayanak.”
25 Kas sungbat kinuna ni Judas, a ngannganin mangliput kenkuana: “Siak kadi dayta, Rabbi?” Kinunana kenkuana: “Sinaom a mismo dayta.”
26 Bayat a nagtultuloyda a nangan, ni Jesus nangala iti tinapay+ ket, kalpasan ti panangisaona iti pamendision, pinispisina+ ket, idi intedna kadagiti adalan, kinunana, “Alaenyo, kanenyo. Daytoy kaipapananna ti bagik.”+
27 Kasta met, nangala iti kopa+ ket, idi nakapagyamanen, intedna kadakuada, a kunkunana: “Uminumkayo manipud iti dayta, dakayo amin;+
28 ta daytoy kaipapananna+ ti bukodko a ‘dara+ ti tulag,’+ a maiparukpok maigapu iti adu+ maipaay iti pannakapakawan dagiti basol.+
29 Ngem ibagak kadakayo, manipud ita saanakto a pulos uminumen iti aniaman itoy a nagtaud iti ubas agingga iti dayta nga aldaw inton uminumak iti baro a kaduakayo idiay pagarian ni Amak.”+
30 Kamaudiananna, kalpasan ti panagkantada kadagiti pangidaydayaw,+ rimmuarda a napan idiay Bantay dagiti Olibo.+
31 Idin kinuna kadakuada ni Jesus: “Dakayo amin maitibkolkayto mainaig kaniak itoy a rabii, ta adda a naisurat, ‘Kabilekto ti pastor, ket mawarawaranto dagiti karnero iti arban.’+
32 Ngem kalpasan a maibangonak, mapanakto nga umun-una ngem dakayo idiay Galilea.”+
33 Ngem ni Pedro, kas sungbat, kinunana kenkuana: “Uray no maitibkol amin dagiti dadduma mainaig kenka, saanakto a pulos maitibkol!”+
34 Kinuna kenkuana ni Jesus: “Pudno kunak kenka, Iti daytoy a rabii, sakbay nga agtaraok ti maysa a kawitan, paglikudannakto iti mamitlo.”+
35 Kinuna kenkuana ni Pedro: “Uray no masapul a matayak a maikanunong kenka, saankanto a pulos paglikudan.” Amin dagiti dadduma nga adalan kinunada ti isu met laeng a banag.+
36 Idin dimteng ni Jesus agraman kadakuada iti disso+ a naawagan ti Getsemani, ket kinunana kadagiti adalan: “Agtugawkayo ditoy bayat a mapanak sadiay ket agkararagak.”+
37 Ket idi inkuyogna ni Pedro ken ti dua nga annak+ ni Zebedeo, isu nangrugi a maldaangan ken mariribukan unay.+
38 Idin kinunana kadakuada: “Maldaangan unay ti kararuak, uray agingga iti ipapatay.+ Agyankayo ditoy ket agtultuloykayo a makipagbantay kaniak.”+
39 Ket idi immadayo pay bassit, inruknoyna ti rupana, a nagkarkararag+ ket kunkunana: “Amak, no mabalin, daytoy a kopa+ lumabas koma kaniak. Nupay kasta, saan a kas iti pagayatak,+ no di ket kas iti pagayatam.”+
40 Ket immay kadagiti adalan ket nasarakanna ida a matmaturog, ket kinunana ken Pedro: “Saanyo aya a kabaelan ti uray makipagbantay laeng kaniak iti maysa nga oras?+
41 Agtultuloykayo nga agbantay+ ken agkararagkayo+ nga agpatpatuloy, tapno saankayo a sumrek iti pannakasulisog.+ Ti espiritu, siempre, sigagagar, ngem ti lasag nakapuy.”+
42 Manen, iti maikadua a daras,+ napan ket nagkararag, a kunkunana: “Amak, no saan a mabalin a lumabas daytoy malaksid nga inumek, maaramid koma ti pagayatam.”+
43 Ket immay manen ket nasarakanna ida a matmaturog, ta dagiti matada ket nadagsen.+
44 Gapuna idi pinanawanna ida, napan manen ket nagkararag iti maikatlo a daras,+ a naminsan pay nga insaona ti isu met laeng a sao.
45 Kalpasanna immay kadagiti adalan ket kinunana kadakuada: “Iti tiempo a kas itoy matmaturog ken agin-inanakayo! Adtoy! Ti oras immasidegen tapno ti Anak ti tao maliputan a mayawat iti im-ima dagiti managbasol.+
46 Bumangonkayo, mapantayon. Adtoy! Ti mangliput kaniak asidegen.”+
47 Ket bayat nga agsasao pay laeng, adtoy! ni Judas,+ a maysa kadagiti sangapulo ket dua, immay ket naikuyog kenkuana ti maysa a dakkel a bunggoy nga addaan kadagiti kampilan+ ken pang-or manipud iti panguluen a papadi ken lallakay dagiti umili.+
48 Ita ti mangliput kenkuana inikkanna ida iti pagilasinan, a kunkunana: “Siasinoman nga agepak, isu daydiayen; tiliwenyo.”+
49 Ket idi immasideg a dagdagus ken Jesus kinunana: “Naimbag nga aldawmo, Rabbi!”+ ket inagkanna+ a sidudungngo unay.
50 Ngem kinuna kenkuana ni Jesus:+ “Kadua, ania ti panggep ti kaaddam?” Idin immasidegda ket iniggamanda ni Jesus ket tiniliwda.+
51 Ngem, adtoy! maysa kadagidiay naikuyog ken Jesus inyunnatna ti imana ket inasutna ti kampilanna ket kinabilna ti adipen ti nangato a padi ket piningasna ti lapayagna.+
52 Idin kinuna kenkuana ni Jesus: “Ipulangmo ta kampilanmo iti lugarna,+ ta amin dagidiay mangaramat iti kampilan mataydanto iti kampilan.+
53 Wenno pagarupem kadi a saanko a mabalin ti agkiddaw ken Amak tapno mangipaay kaniak ita a kanito iti nasurok a sangapulo ket dua a lehion dagiti anghel?+
54 Ta no kasta, kasanonto ti pannakatungpal ti Kasuratan a dayta ket masapul a maaramid iti kastoy a pamay-an?”
55 Iti dayta nga oras kinuna ni Jesus kadagiti bunggoy: “Rimmuarkayo aya nga addaan kadagiti kampilan ken pang-or a kas maibusor iti maysa a mannanakaw tapno arestuendak?+ Iti inaldaw-aldaw nagtugtugawak idiay templo+ a mangisursuro, ket kaskasdi a saandak a tiniliw.
56 Ngem amin daytoy ket naaramid tapno matungpal dagiti kasuratan dagiti mammadto.”+ Idin isu binaybay-an dagiti amin nga adalan ket nagtalawda.+
57 Dagidiay nangtiliw ken Jesus impanda isuna ken Caifas+ a nangato a padi, a sadiay ti nakaurnongan dagiti eskriba ken ti lallakay.+
58 Ngem ni Pedro nagtultuloy a simmurot kenkuana iti kalalainganna a kaadayo, agingga iti paraangan+ ti nangato a padi, ket, kalpasan a simrek iti uneg, nakikatkatugaw kadagiti agserserbi iti balay tapno kitaenna ti pagbanaganna.+
59 Kabayatanna ti panguluen a papadi ken ti intero a Sanhedrin nagsapsapulda iti ulbod a pangsaksi a maibusor ken Jesus tapno papatayenda,+
60 ngem awan ti nasarakanda, nupay adu dagiti ulbod a saksi nga immasideg.+ Kalpasanna dua ti immasideg
61 ket kinunada: “Daytoy a tao kinunana, ‘Kabaelak a rebbaen ti templo ti Dios ket bangonek dayta iti tallo nga aldaw.’”+
62 Gapu iti dayta ti nangato a padi timmakder ket kinunana kenkuana: “Awan kadi ti sungbatmo? Ania ti pampaneknekan dagitoy maibusor kenka?”+
63 Ngem ni Jesus nagtalinaed a siuulimek.+ Gapuna kinuna kenkuana ti nangato a padi: “Babaen iti sibibiag a Dios pagsapataenka+ nga ibagam kadakami no sika ti Kristo+ nga Anak ti Dios!”
64 Kinuna kenkuana ni Jesus:+ “Sinaom a mismo dayta.+ Ngem kunak kadakayo, Manipud ita+ makitayonto ti Anak ti tao+ a situtugaw iti makannawan+ ti pannakabalin ken um-umay a buyogen dagiti ulep ti langit.”+
65 Idin ti nangato a padi rinay-abna dagiti makinruar a kawesna, a kunkunana: “Isu nagtabbaaw!+ Ania pay ti kanayonan a pakasapulantayo kadagiti saksi?+ Kitaenyo! Ita nangngegyo ti tabbaaw.+
66 Ania ti kapanunotanyo?” Insungbatda: “Isu maikari iti ipapatay.”+
67 Idin tinupraanda ti rupana+ ken dinanogda.+ Tinungpa ti dadduma ti rupana,+
68 a kunkunada: “Agipadtoka kadakami, sika a Kristo.+ Asino ti nangkabil kenka?”+
69 Ita ni Pedro agtugtugaw idi iti ruar idiay paraangan; ket immasideg kenkuana ti maysa nga adipen a babai, a kunkunana: “Sika, met, kaduanaka idi ni Jesus a taga Galilea!”+
70 Ngem inlibakna iti sanguananda amin, a kunkunana: “Diak ammo ti sasawem.”
71 Kalpasan nga isu rimmuar nga agturong iti ruangan a balay, sabali pay a babai ti nakadlaw kenkuana ket kinunana kadagidiay adda sadiay: “Daytoy a tao naikadua idi ken Jesus a Nazareno.”+
72 Ket manen isu inlibakna dayta, a buyogen iti sapata: “Diak am-ammo ti tao!”+
73 Kalpasan ti bassit a kanito immasideg dagidiay agtaktakder iti aglawlaw ket kinunada ken Pedro: “Pudno a maysaka met kadakuada, ta, iti kinapudnona, ti pagsasaom ipadlawnaka.”+
74 Idin rinugianna nga ilunod ken isapata: “Diak am-ammo ti tao!” Ket dagus a nagtaraok ti maysa a kawitan.+
75 Ket nalagip ni Pedro ti sasao nga insawang ni Jesus, nga isu ti: “Sakbay nga agtaraok ti maysa a kawitan, paglikudannakto iti mamitlo.”+ Ket rimmuar ket nagsangit a sipapait unay.+
