Lucas 6:1-49
6 Ita iti maysa a sabbath napasamak nga isu lumaslasat idi iti kataltalonan, ket dagiti adalanna agrurruros+ ken mangmanganda kadagiti dawa ti binukel, a lidlidlidenda ida iti im-imada.+
2 Gapu itoy kinuna ti sumagmamano kadagiti Fariseo: “Apay nga ar-aramidenyo ti di nainkalintegan+ iti sabbath?”+
3 Ngem kas sungbat kadakuada kinuna ni Jesus: “Saanyo pay kadi a pulos nabasa ti mismo a banag nga inaramid ni David+ idi isu ken dagiti lallaki a naikuyog kenkuana nagbisinda?+
4 No kasano nga isu simrek iti balay ti Dios ket inawatna dagiti tinapay ti panangidiaya+ ket nangan ken nangted ti sumagmamano kadagiti lallaki a naikuyog kenkuana, a dagita ket saan a nainkalintegan a kanen ti asinoman no di ti papadi laeng?”+
5 Ket intultuloyna a kunaen kadakuada: “Ti Anak ti tao ket Apo ti sabbath.”+
6 Kabayatan ti sabali pay a sabbath+ isu simrek iti sinagoga ket nangrugi a mangisuro. Ket adda idi ti maysa a lalaki a nagango ti makannawan nga imana.+
7 Dagiti eskriba ken dagiti Fariseo sinipsiputanda+ itan a siiinget tapno kitaenda no isu mangagas iti sabbath, tapno makasarakda iti pamay-an a panangakusar kenkuana.+
8 Nupay kasta, ammona dagiti panagrasrasonda,+ kaskasdi a kinunana iti lalaki a nagango ti imana: “Tumakderka ket agpuestoka iti tengnga.” Ket isu timmakder ket nagpuesto.+
9 Idin kinuna kadakuada ni Jesus: “Imtuodek kadakayo, Nainkalintegan kadi iti sabbath ti agaramid iti naimbag+ wenno agaramid iti pakadangran, ti mangisalakan wenno mangdadael iti kararua?”+
10 Ket kalpasan a kimmita kadakuada amin iti aglikmut, kinunana iti lalaki: “Unnatem ta imam.” Inaramidna ti kasta, ket immimbag ti imana.+
11 Ngem napnoda iti rungsot, ket inrugida a pagsasaritaan iti maysa ken maysa no ania ti aramidenda ken Jesus.+
12 Kabayatan dagitoy nga aldaw rimmuar a napan iti bantay tapno agkararag,+ ket agpatpatnag a nagkararag iti Dios.+
13 Ngem idi bumigaten inayabanna dagiti adalanna ket nangpili kadakuada iti sangapulo ket dua, a ninagananna met iti “apostol”:+
14 Ni Simon, a ninagananna met iti Pedro,+ ken ni Andres a kabsatna, ken Santiago ken Juan,+ ken Felipe+ ken Bartolome,
15 ken Mateo ken Tomas,+ ken ni Santiago nga anak ni Alfeo, ken ni Simon a maaw-awagan “daydiay naregta,”+
16 ken ni Judas nga anak ni Santiago, ken ni Judas Iscariote, a nagbalin a traidor.+
17 Ket simmalog a kaduada ket nagsaad iti disso a nasimpa, ket adda idi dakkel a bunggoy dagiti adalanna, ken dakkel nga umariwekwek dagiti tattao+ manipud iti intero a Judea ken Jerusalem ken iti igid ti baybay a pagilian ti Tiro ken Sidon, nga immay tapno dumngegda kenkuana ken tapno mapaimbagda kadagiti sakitda.+
18 Uray dagidiay riniribuk dagiti narugit nga espiritu naagasanda.
19 Ket isu tinarigagayan a sagiden+ ti intero a bunggoy, agsipud ta ti pannakabalin+ rumrummuar idi kenkuana ken mangpapaimbag kadakuada amin.
20 Ket intannawagna dagiti matana kadagiti adalanna ket inrugina a kunaen:+
“Naragsakkayo a napanglaw,+ agsipud ta kukuayo ti pagarian ti Dios.
21 “Naragsakkayo a mabisbisin+ ita, agsipud ta mapennekkayto.+
“Naragsakkayo nga agsangsangit ita, agsipud ta agkatawakayto.+
22 “Naragsakkayo inton guraendakayo+ dagiti tattao, ken inton laksidendakayo ken umsiendakayo ken laksidenda+ ti naganyo a kas nadangkes maigapu iti Anak ti tao.
23 Agragsakkayo iti dayta nga aldaw ken aglagtokayo, ta, adtoy! dakkel ti gunggonayo idiay langit, ta dagidiay met laeng a bambanag ti inar-aramid dagidi ammada kadagiti mammadto.+
24 “Ngem asikay pay a nabaknang a tattao,+ agsipud ta laklak-amenyon a naan-anay ti liwliwayo.+
25 “Asikay pay a nabsogen ita, agsipud ta agbisinkayto.+
“Asikay pay, dakayo nga agkatkatawa ita, agsipud ta agsaibbek ken agsangitkayto.+
26 “Asikay pay, inton amin a tattao agsaoda iti naimbag maipapan kadakayo, ta ti bambanag a kas kadagitoy ti inaramid dagidi ammada kadagiti ulbod a mammadto.+
27 “Ngem kunak kadakayo nga agim-imdeng, Itultuloyyo nga ayaten dagiti kabusoryo,+ nga aramiden ti naimbag+ kadagidiay manggurgura kadakayo,
28 a bendisionan dagidiay mangilunlunod kadakayo, nga ikararagan dagidiay mangin-insulto kadakayo.+
29 Kenkuana a mangtungpa kenka iti maysa a pingping,+ itukonmo pay ti bangir; ket kenkuana a mangala+ iti makinruar a kawesmo, dika igawid uray pay ti makin-uneg a kawes.
30 Ikkam ti tunggal maysa a dumawdawat kenka,+ ket daydiay mangala kadagiti sanikuam dika ipaisubli ida.
31 “Kasta met, kas iti kayatyo nga aramiden kadakayo dagiti tattao, isu met laeng ti aramidenyo kadakuada.+
32 “Ket no ayatenyo dagidiay mangay-ayat kadakayo, ania ti pagimbaganna kadakayo? Ta uray pay dagiti managbasol ayatenda dagidiay mangay-ayat kadakuada.+
33 Ket no agaramidkayo iti naimbag kadagidiay agar-aramid iti naimbag kadakayo, pudno nga ania ti pagimbaganna kadakayo? Uray dagiti managbasol aramidenda ti isu met laeng.+
34 Kasta met, no agpautangkayo nga awanan patubo+ kadagidiay namnamaenyo nga umawatanyo, ania ti pagimbaganna kadakayo? Uray dagiti managbasol agpautangda nga awanan patubo kadagiti managbasol tapno mapasublida ti isu met la a kaadu.+
35 Iti kasupadina, itultuloyyo nga ayaten dagiti kabusoryo ken aramiden ti naimbag ken agpautang+ nga awanan patubo, a saan a mangnamnama iti aniaman a supapak; ket dakkelto ti gunggonayo, ket agbalinkayto nga annak ti Kangatuan,+ agsipud ta isu manangngaasi+ kadagiti awanan panagyaman ken nadangkes.
36 Itultuloyyo ti agbalin a naasi, a kas ken ni Amayo a naasi.+
37 “Mainayon pay, isardengyo ti mangukom, ket saankayto a pulos maukom;+ ken isardengyo ti mangkonkondenar, ket saankayto a pulos makondenar. Itultuloyyo ti mangluk-at, ket maluk-atankayto.+
38 Iyugaliyo ti mangted, ket mangtedto kadakayo dagiti tattao.+ Ibukbokdanto kadagiti saklotyo ti nasayaat a rukod, nasedsed, nayegyeg ken agliplippias. Ta ti rukod a pangrukrukodyo, pangrukoddanto met kadakayo.”+
39 Kalpasanna sinaona met kadakuada ti maysa a pangngarig: “Ti bulsek a tao mabalinna kadi nga idalan ti bulsek a tao? Saan kadi nga agpadpadadanto a matnag iti abut?+
40 Ti agad-adal saan a nangatngato ngem iti mannursurona, ngem tunggal maysa a naan-anay a nasursuruan agbalinto a kas iti mannursurona.+
41 Apay, ngarud, a matmatam ti garami nga adda iti mata ni kabsatmo, ngem saanmo a mapaliiw ti pasanggir nga adda iti bukodmo a mata?+
42 Kasano a maikunam ken kabsatmo, ‘Kabsat, palubosannak a mangikkat iti garami nga adda iti matam,’ idinto ta sika saanmo a kitkitaen ti pasanggir iti bukodmo a mata?+ Managinsisingpet! Umuna nga ikkatem ti pasanggir manipud iti bukodmo a mata,+ ket kalpasanna makitamto a silalawag no kasano nga ikkaten ti garami nga adda iti mata ni kabsatmo.+
43 “Ta awan ti nasayaat a kayo a mangpataud iti rinuker a bunga; manen awan ti rinuker a kayo a mangpataud iti nasayaat a bunga.+
44 Ta ti tunggal kayo maammuan babaen iti bukodna a bunga.+ Kas pagarigan, dagiti tattao saanda nga agburas iti higos manipud kadagiti sisiitan, saanda met nga agpuros iti ubas iti siitan a bassit a kayo.+
45 Ti naimbag a tao mangiruar iti naimbag manipud iti naimbag a gameng+ ti pusona, ngem ti nadangkes a tao iruarna ti dakes manipud iti nadangkes a gamengna; ta manipud iti naruay iti puso agsao ti ngiwatna.+
46 “Apay, ngarud, nga awagandak iti ‘Apo! Apo!’ ngem saanyo nga aramiden ti bambanag nga ibagak?+
47 Tunggal maysa nga umay kaniak ket dumngeg iti sasaok ken aramidenna ida, ipakitak kadakayo no asino ti kaaspingna:+
48 Umasping iti tao a mangbangbangon iti maysa a balay, a nagkali ket pinaunegna ket nangisaad iti pamuon iti rabaw ti dakkel a bato. Iti kasta, idi naadda ti layus,+ ti karayan dinalapusna dayta a balay, ngem saan nga umdas ti pigsana a manggunggon iti dayta, gapu iti pannakaibangonna a naimbag.+
49 Iti sabali a bangir, ti dumngeg ket saan nga agaramid,+ umasping iti tao a nangibangon iti maysa a balay iti daga nga awanan pamuon. Dinalapus dayta ti karayan, ket dagus a narpuog, ket nakaro+ ti pannakadadael+ dayta a balay.”

