Lucas 13:1-35
13 Iti dayta met laeng a panawen adda sumagmamano a siiimatang a nangipadamag kenkuana ti maipapan kadagiti taga Galilea+ a ti darada ket inlaok ni Pilato kadagiti sakripisioda.
2 Gapuna kas sungbat kinunana kadakuada: “Pagarupenyo aya a dagitoy a taga Galilea napaneknekanda a nakarkaro a managbasol+ ngem iti amin a dadduma pay a taga Galilea agsipud ta sinagabada dagitoy a banag?
3 Ay, saan, ibagak kadakayo; ngem, malaksid no agbabawikayo, madadaelkayto met amin.+
4 Wenno dagidiay sangapulo ket walo a natupakan ti torre ti Siloam, iti kasta pinapatayna ida, pagarupenyo kadi a napaneknekanda nga ad-adda a nakautang ngem iti amin a dadduma pay a tattao nga agnanaed idiay Jerusalem?
5 Ay, saan, ibagak kadakayo; ngem, malaksid no agbabawikayo, madadaelkayto amin iti isu met laeng a pamay-an.”+
6 Idin imbagana daytoy a pangngarig: “Ti maysa a tao addaan idi iti kayo a higos a naimula iti kaubasanna,+ ket immay nga agsapsapul iti bunga iti dayta,+ ngem awan nasarakanna.+
7 Idin kinunana iti agay-aywan iti kaubasan, ‘Adtoy tallo a tawen+ nga immayak nga agsapsapul iti bunga iti daytoy a kayo a higos, ngem awan nasarakak. Pukanem dayta!+ Apay ketdi a pagtalinaedenna nga awan serserbina ti daga?’
8 Kas sungbat kinunana kenkuana, ‘Apo, bay-am pay dayta+ iti daytoy a tawen, agingga a kaliak ti aglawlawna ken mangikabilak iti ganagan;
9 ket no ngarud mangpataud iti bunga iti masanguanan, nasayaat ken naimbag; ngem no saan, pukanemto dayta.’”+
10 Itan isu mangisursuro idi iti maysa kadagiti sinagoga iti sabbath.
11 Ket, adtoy! maysa a babai nga addaan espiritu+ ti kinakapuy iti sangapulo ket walo a tawenen, ket nakaro ti kubbona ken saanna a pulos kabaelan nga unnaten ti bagina.
12 Idi isu nakitana, nagsao kenkuana ni Jesus ket kinunana kenkuana: “Babai, maluk-atankan+ iti kinakapuymo.”
13 Ket impatayna kenkuana dagiti imana; ket dagus a naglinteg,+ ket rinugianna nga idaydayaw ti Dios.
14 Ngem ti mangidadaulo nga opisial iti sinagoga, a nagrurod agsipud ta inaramid ni Jesus ti panangagas iti sabbath, rinugianna a kunaen iti bunggoy kas sungbat: “Adda innem nga aldaw a rebbeng a panangaramid iti trabaho;+ kadagita, ngarud, umaykayo ket maagasankayo, ket saan nga iti aldaw ti sabbath.”+
15 Nupay kasta, ti Apo simmungbat kenkuana ket kinunana: “Managinsisingpet,+ saan kadi a ti tunggal maysa kadakayo iti sabbath warwaranna ti torona wenno ti asnona manipud iti kulluong ket iturongna tapno painumenna?+
16 Saan kadi a maiparbeng, ngarud, a daytoy a babai nga anak ni Abraham,+ ken pinarautan ni Satanas, adtoy! iti sangapulo ket walo a tawen, maluk-atan iti daytoy a pannakabalud iti aldaw ti sabbath?”
17 Ala ket, idi nasaona dagitoy a banag, nangrugi a mabainan dagiti amin a bumusbusor kenkuana;+ ngem ti intero a bunggoy nangrugi nga agrag-o iti amin a nadayag a bambanag nga inaramidna.+
18 Gapuna intultuloyna a kunaen: “Ania ti kaasping ti pagarian ti Dios, ket iti ania ti pangipadisak iti dayta?+
19 Umasping dayta iti bukel ti mustasa nga innala ti maysa a tao ket inkabilna iti minuyonganna, ket dimmakkel ken nagbalin a maysa a kayo, ket dagiti tumatayab iti langit+ nagaponda kadagiti sangana.”+
20 Ket manen kinunana: “Iti ania ti pangipadisak iti pagarian ti Dios?
21 Umasping dayta iti lebadura, nga innala ti maysa a babai ket inlemmengna iti tallo a dadakkel a sukat ti arina agingga nga immalsa ti intero a masa.”+
22 Ket isu nagbaniaga a limmasat iti siniudansiudad ken iti pinuronpurok, a mangisursuro ken mangitultuloy iti panagbaniagana nga agturong idiay Jerusalem.+
23 Ita kinuna kenkuana ti maysa a tao: “Apo, bassit kadi dagidiay maisalakan?”+ Kinunana kadakuada:
24 “Umagawakayo+ a sipipinget a sumrek iti akikid a ruangan,+ agsipud ta, ibagak kadakayo, adu ti agtarigagayto a sumrek ngem saandanto a kabalinan,+
25 apaman a nakabangonen ti bumalay ket pinunitannan ti ruangan, ket rugianyo ti agtakder iti ruar ken agtuktok iti ruangan, a kunkunayo: ‘Apo, ilukatannakami.’+ Ngem kas sungbat kunaennanto kadakayo, ‘Diak ammo no sadino ti naggapuanyo.’+
26 Iti kasta rugianyonto a kunaen, ‘Nangan ken imminumkami iti sanguanam, ket nangisuroka kadagiti akaba a dalanmi.’+
27 Ngem agsaonto ket kunaenna kadakayo, ‘Diak ammo no sadino ti naggapuanyo. Umadayokayo kaniak, dakayo amin a managaramid iti kinakillo!’+
28 Sadiay nga agsangitkayto ken agngaretngetto dagiti ngipenyo,+ inton makitayo ni Abraham ken ni Isaac ken ni Jacob ken dagiti amin a mammadto iti pagarian ti Dios,+ ngem dakayo a mismo naibellengkayo iti ruar.
29 Kanayonanna pay, umayto dagiti tattao manipud iti makindaya a paspaset ken makinlaud, ken manipud amianan ken abagatan,+ ket agsadagdanto iti panganan iti pagarian ti Dios.+
30 Ket, adtoy! adda dagidiay maudi nga isudanto ti umuna, ken adda dagidiay umuna nga isudanto ti maudi.”+
31 Iti dayta met laeng nga oras immasideg ti dadduma kadagiti Fariseo, a kunkunada kenkuana: “Rummuarka ket inkan manipud ditoy, agsipud ta kayatnaka a papatayen ni Herodes.”
32 Ket kinunana kadakuada: “Mapankayo ket ibagayo iti dayta a sora,+ ‘Adtoy! Mangparparuarak kadagiti sairo ken mangar-aramidak iti panangpaimbag ita nga aldaw ken inton bigat, ket iti maikatlo nga aldaw malpasakton.’+
33 Nupay kasta, masapul a mapanak ita nga aldaw ken inton bigat ken iti sumuno nga aldaw, agsipud ta saan a maipalubos a ti maysa a mammadto madadael iti ruar ti Jerusalem.+
34 Jerusalem, Jerusalem, ti mammapatay+ kadagiti mammadto ken manangubor+ kadagidiay naibaon kenkuana—anian a namin-adu a kinayatko nga ummongen a sangsangkamaysa ti annakmo kas iti panangummong ti maysa nga upa iti pangen dagiti piekna iti sirok dagiti payakna,+ ngem dakayo saanyo a kinayat dayta!+
35 Adtoy! Ti balayyo+ mabaybay-an kadakayo. Ibagak kadakayo, Saandakton a pulos makita agingga a kunaenyo, ‘Bendito daydiay umay iti nagan ni Jehova!’”+
