Lucas 15:1-32
15 Ita nagtultuloy nga immasideg kenkuana dagiti amin nga agsingsingir iti buis+ ken dagiti managbasol+ tapno dumngegda kenkuana.
2 Gapu itoy agpadpada a dagiti Fariseo ken dagiti eskriba nagdaydayamudomda, a kunkunada: “Daytoy a tao abrasaenna dagiti managbasol ket makipangan kadakuada.”+
3 Idin sinaona kadakuada daytoy a pangngarig, a kunkunana:
4 “Asino ti tao kadakayo nga addaan iti sangagasut a karnero, a no mapukawna ti maysa kadakuada, saannanto a panawan ti siam a pulo ket siam idiay let-ang ket mapan a maipaay iti napukaw agingga a masarakanna?+
5 Ket inton nasarakannan iparabawna kadagiti abagana ket agrag-o.+
6 Ket inton makaawid ayabanna dagiti gagayyemna ken dagiti kaarrubana a sangsangkamaysa, a kunkunana kadakuada, ‘Makipagrag-okayo kaniak, agsipud ta nasarakak ti karnerok a napukaw.’+
7 Ibagak kadakayo a kasta met nga ad-addanto ti rag-o sadi langit gapu iti maysa a managbasol nga agbabawi+ ngem iti siam a pulo ket siam a nalinteg a saanda a kasapulan ti panagbabawi.+
8 “Wenno asino ti babai nga addaan iti sangapulo a sinsilio a drakma, a no mapukawna ti maysa a sinsilio a drakma, saanna a gangtan ti pagsilawan ket sagadanna ti balayna ken birokenna a siaannad agingga a masarakanna?
9 Ket inton nasarakannan ayabanna dagiti babbai a gagayyemna ken dagiti kaarrubana a sangsangkamaysa, a kunkunana, ‘Makipagrag-okayo kaniak, agsipud ta nasarakak ti sinsilio a drakma a napukawko.’
10 Ngarud, ibagak kadakayo, adda panagrag-o kadagiti anghel ti Dios gapu iti maysa a managbasol nga agbabawi.”+
11 Idin kinunana: “Maysa a tao ti addaan dua nga annak a lallaki.+
12 Ket ti ub-ubing kadakuada kinunana iti amana, ‘Ama, itedmo kaniak ti paset ti sanikua nga agpaay a pannakabagik.’+ Iti kasta biningayna kadakuada dagiti pagbibiagna.+
13 Idi agangay, kalpasan ti saan nga adu nga aldaw, ti ub-ubing nga anak inurnongna a sangsangkamaysa ti amin a bambanag ket nagdaliasat iti sabali a daga iti adayo a pagilian, ket sadiay binusbosna a sibubuslon ti sanikuana babaen ti panagbiag iti kinagaramugam.+
14 Idi nabusbosnan ti isuamin, napasamak ti nakaro a panagbisin iti intero dayta a pagilian, ket isu nangrugi nga agkasapulan.
15 Napan pay ket nakikadua iti maysa kadagiti umili iti dayta a pagilian, ket isu imbaonna kadagiti talonna tapno agtaraken kadagiti baboy.+
16 Ket tinartarigagayanna ti mabsog kadagiti bunga ti algarroba a kankanen dagiti baboy, ket awan mangted kenkuana iti aniaman a banag.+
17 “Idi a nakapagpampanunot, kinunana, ‘Nagadu a tattao a tangtangdanan ni amak ti aglaplapusanan iti tinapay, idinto ta matmatayak ditoy iti bisin!
18 Tumakderakto ket agbaniagaak+ a mapan ken amak ket kunaek kenkuana: “Ama, nagbasolak a maikaniwas iti langit ken maikaniwas kenka.+
19 Saanakon a maikari a maawagan iti anakmo. Aramidennak a kas maysa kadagiti patangtangdanan a tattaom.”’
20 Gapuna timmakder ket napan ken amana. Bayat nga isu adayo pay laeng, nakita ni amana ket simnek ti asina, ket timmaray ket inapungolna ti tengngedna ken inagkanna a sidudungngo.
21 Idin kinuna kenkuana ti anak, ‘Ama, nagbasolak a maikaniwas iti langit ken maikaniwas kenka.+ Saanakon a maikari a maawagan iti anakmo. Aramidennak a kas maysa kadagiti patangtangdanan a tattaom.’+
22 Ngem kinuna ti ama kadagiti adipenna, ‘Darasenyo! mangiruarkayo iti pagan-anay, ti kasayaatan, ket kawesanyo+ iti dayta, ket mangikabilkayo iti singsing+ iti imana ken palloka kadagiti sakana.
23 Ket iyegyo ti pinalukmeg+ nga urbon a toro, partienyo ket mangantayo ken agragragsaktayo,
24 agsipud ta daytoy nga anakko natay ket nagbiag+ manen; napukaw ket nasarakan.’ Ket nangrugida nga agragragsak.
25 “Ita ti in-inauna nga anakna+ adda idi iti talon; ket bayat nga um-umay ken umas-asideg iti balay nakangngeg iti konsierto ti musika ken panagsasala.
26 Gapuna inayabanna ti maysa kadagiti adipen ket inimtuodna no ania ti kaipapanan dagitoy a banag.
27 Kinunana kenkuana, ‘Dimteng ti kabsatmo,+ ket pinarti ni amam+ ti pinalukmeg nga urbon a toro, agsipud ta isu napasublina a nasayaat ti salun-atna.’
28 Ngem nagpungtot ket saanna a kinayat ti sumrek. Iti kasta rimmuar ti amana ket nangrugi nga agpakaasi kenkuana.+
29 Kas sungbat kinunana iti amana, ‘Adtoy nakaad-adun a tawen a nagpaadipenak kenka ket uray naminsan diak pulos sinalungasing ti bilinmo, ket kaskasdi a saannak a pulos inikkan uray naminsan iti urbon a kalding tapno agragragsakak agraman dagiti gagayyemko.+
30 Ngem apaman a dimteng daytoy nga anakmo+ a nangibus kadagiti pagbibiagmo a kadua dagiti balangkantis,+ pinartim ti pinalukmeg nga urbon a toro maipaay kenkuana.’+
31 Idin kinunana kenkuana, ‘Anak, addaka a kankanayon kaniak, ket amin a bambanag a kukuak ket kukuam;+
32 ngem masapul nga agragragsak ken agrag-otayo, agsipud ta daytoy a kabsatmo natay ket nagbiag, ken isu napukaw ket nasarakan.’”+
