Lucas 22:1-71
22 Itan ti piesta dagiti di pinaalsa a tinapay, ti maaw-awagan iti Paskua,+ ket umas-asidegen.
2 Kasta met, sinapsapul ti panguluen a papadi ken dagiti eskriba ti epektibo a pamay-an a panangpukawda kenkuana,+ ta agbutengda idi kadagiti tattao.+
3 Ngem ni Satanas simrek ken Judas, daydiay naawagan ti Iscariote, a naibilang iti sangapulo ket dua;+
4 ket napan ket nakisarita iti panguluen a papadi ken kadagiti kapitan iti templo maipapan iti epektibo a pamay-an a panangliputna kenkuana agpaay kadakuada.+
5 Ala ket, nagrag-oda ket immanamongda nga isu ikkanda iti pirak a kuarta.+
6 Gapuna immannugot, ket nangrugi nga agsapul iti nasayaat a gundaway a panangliput kenkuana agpaay kadakuada nga awan bunggoy iti aglawlaw.+
7 Ti aldaw dagiti di pinaalsa a tinapay dimteng itan, a ti naparti iti paskua masapul a maisakripisio;+
8 ket imbaonna da Pedro ken Juan, a kunkunana: “Inkayo ket isaganayo ti paskua+ maipaay kadatayo tapno mangantayo.”
9 Kinunada kenkuana: “Sadino ti kayatmo a pangisaganaanmi iti dayta?”
10 Kinunana kadakuada:+ “Adtoy! Inton sumrekkayo iti siudad sumabetto kadakayo ti maysa a tao a siaawit iti dinamili a basehas ti danum. Sumurotkayo kenkuana iti balay a serkanna.+
11 Ket masapul a kunaenyo iti makinkukua iti balay, ‘Kuna kenka ti Mannursuro: “Sadino ti ayan ti siled ti sangaili a sadiay ti panganak iti paskua a kaduak dagiti adalak?”’+
12 Ket dayta a tao ipakitananto kadakayo ti dakkel a makinngato a siled nga addaanen kadagiti masapsapul. Isaganayo dayta sadiay.”+
13 Gapuna napanda ket nasarakanda dayta a kas iti kinunana kadakuada, ket insaganada ti paskua.+
14 Iti kamaudiananna idi dimteng ti oras, nagsadag iti panganan, ket kaduana dagiti apostol.+
15 Ket kinunana kadakuada: “Tinarigagayak unay ti makipangan kadakayo iti daytoy a paskua sakbay nga agsagabaak;
16 ta ibagak kadakayo, Saanakto a mangan manen iti dayta agingga a matungpal dayta iti pagarian ti Dios.”+
17 Ket, idi inawatna ti maysa a kopa,+ nagyaman ket kinunana: “Alaenyo daytoy ket iyallawatyo iti maysa ken maysa kadakayo;
18 ta ibagak kadakayo, Manipud ita saanakto nga uminum manen iti nagtaud iti ubas agingga a dumteng ti pagarian ti Dios.”+
19 Kasta met, nangala iti tinapay,+ nagyaman, pinispisina, ket intedna kadakuada, a kunkunana: “Daytoy kaipapananna ti bagik+ a maited maigapu kadakayo.+ Itultuloyyo nga aramiden daytoy kas panglaglagip kaniak.”+
20 Kasta met, ti kopa+ iti isu met laeng a pamay-an kalpasan ti panangrabiida, a kunkunana: “Daytoy a kopa kaipapananna ti baro a tulag+ babaen ti bileg ti darak,+ a maiparukpok maigapu kadakayo.+
21 “Ngem, adtoy! ti ima ti mangliput kaniak+ kaduak iti panganan.+
22 Agsipud ta ti Anak ti tao mapan sigun iti naikeddeng;+ nupay kasta, asi pay dayta a tao a babaen kenkuana isu maliputan!”+
23 Gapuna rinugianda a pagsasaritaan iti nagtetengngaanda ti saludsod no siasino kadakuada a pudpudno daydiay dandanin mangaramid iti daytoy.+
24 Nupay kasta, adda met timmaud a nabara a supiat iti nagtetengngaanda no siasino kadakuada ti kasla kadakkelan.+
25 Ngem kinunana kadakuada: “Ti ar-ari ti nasnasion iturayanda ida, ket dagidiay addaan autoridad kadakuada naawaganda iti Managparabur.+
26 Nupay kasta, saankay nga agbalin a kasta.+ No di ket ti kadakkelan kadakayo agbalin koma a kas ti kaubingan,+ ket daydiay agak-akem a kas panguluen kas koma iti daydiay agserserbi.+
27 Ta siasino ti dakdakkel, daydiay sisasadag iti panganan wenno daydiay agserserbi? Saan aya a daydiay sisasadag iti panganan? Ngem addaak iti tengngayo a kas daydiay agserserbi.+
28 “Nupay kasta, dakayo dagidiay nagtalinaed+ kaniak kadagiti pannakasusuotko;+
29 ket mangaramidak iti tulag kadakayo, kas iti panangaramid ni Amak iti maysa a tulag+ kaniak, maipaay iti maysa a pagarian,+
30 tapno mabalinyo ti mangan+ ken uminum iti lamisaanko idiay pagariak,+ ket agtugawkayo kadagiti trono+ tapno ukomenyo ti sangapulo ket dua a tribu ti Israel.
31 “Simon, Simon, adtoy! kinalikaguman ni Satanas+ nga ikutannakayo tapno yakayakennakayo a kas iti trigo.+
32 Ngem immararawakon+ maipaay kenka tapno saan nga agkapuy ti pammatim; ket sika, apaman a nakasublikan, pabilgem+ ti kakabsatmo.”
33 Idin kinunana kenkuana: “Apo, sisasaganaak a makikuyog kenka agpadpada idiay pagbaludan ken iti ipapatay.”+
34 Ngem kinunana: “Ibagak kenka, Pedro, Ti maysa a kawitan saanto nga agtaraok ita nga aldaw agingga a mamitlo a nailibakmo nga am-ammonak.”+
35 Kinunana pay kadakuada: “Idi imbaonkayo+ nga awanan supot ti kuarta ken supot ti taraon ken kadagiti palloka, saankayo a nagkirang iti aniaman a banag, di ngamin?” Kinunada kenkuana: “Saan!”
36 Iti kasta kinunana kadakuada: “Ngem itatta daydiay addaan iti supot ti kuarta alaenna koma dayta, kasta pay met ti supot ti taraon; ket daydiay awanan iti kampilan ilakona koma ti makinruar a kawesna ket gumatang iti maysa.
37 Ta ibagak kadakayo a daytoy adda a naisurat masapul a matungpal kaniak, nga isu ti, ‘Ket isu naibilang a kadua dagiti nakillo.’+ Ta daydiay a maipapan kaniak matungtungpalen.”+
38 Idin kinunada: “Apo, adtoy! adda ditoy ti dua a kampilan.” Kinunana kadakuada: “Umanayen.”
39 Idi rimmuar isu napan idiay Bantay dagiti Olibo kas nakayugalianna; ket simmurot met kenkuana dagiti adalan.+
40 Idi dimteng iti dayta a lugar kinunana kadakuada: “Agtultuloykayo nga agkararag, tapno saankayo a sumrek iti pannakasulisog.”+
41 Ket isu immadayo kadakuada iti agarup sangapalladawan ti bato, ket nagparintumeng ket nangrugi nga agkararag,
42 a kunkunana: “Ama, no kayatmo, ikkatem kaniak daytoy a kopa. Nupay kasta, saan koma a ti pagayatak,+ no di ket ti pagayatam ti maaramid.”+
43 Idin ti nagparang kenkuana ti maysa nga anghel manipud langit ket isu pinabilegna.+
44 Ngem idi matutuok intultuloyna ti nagkararag nga ad-adda a sipapasnek;+ ket ti ling-etna nagbalin a kas kadagiti tedted ti dara nga agtinnag iti daga.+
45 Ket timmakder manipud panagkararagna, napan kadagiti adalan ket nasarakanna ida a nakaridep gapu iti ladingit;+
46 ket kinunana kadakuada: “Apay a matmaturogkayo? Bumangonkayo ket agtultuloykayo nga agkararag, tapno saankayo a sumrek iti pannakasulisog.”+
47 Bayat nga agsasao pay laeng, adtoy! maysa a bunggoy, ket adda nga immun-una kadakuada ti tao a naawagan Judas,+ a maysa kadagiti sangapulo ket dua; ket inasitganna ni Jesus tapno agepanna.+
48 Ngem kinuna kenkuana ni Jesus: “Judas, liputam kadi ti Anak ti tao babaen iti maysa nga agep?”+
49 Idi makita dagidiay adda iti aglikmutna no ania ti mapasamak, kinunada: “Apo, kumabilkami kadi babaen iti kampilan?”+
50 Maysa kadakuada kinabilna pay ti adipen ti nangato a padi ket piningasna ti makannawan a lapayagna.+
51 Ngem kas sungbat kinuna ni Jesus: “Bay-anyo a makagteng agingga iti daytoy.” Ket sinagidna ti lapayag ket isu pinaimbagna.+
52 Idin kinuna ni Jesus iti panguluen a papadi ken kadagiti kapitan ti templo ken kadagiti lallakay nga immay sadiay gapu kenkuana: “Rimmuarkayo kadi nga addaan kadagiti kampilan ken pang-or a kas maibusor iti maysa a mannanakaw?+
53 Bayat nga addaak idi kadakayo idiay templo+ iti inaldaw-aldaw saanyo nga inunnat ti im-imayo maibusor kaniak.+ Ngem daytoy ti orasyo+ ken ti autoridad+ ti kinasipnget.”+
54 Kalpasanna inarestoda ket impanda+ ken inserrekda iti balay ti nangato a padi;+ ngem ni Pedro sumursurot idi iti adayo.+
55 Idi nangpasgedda iti apuy iti tengnga ti paraangan ket nagtugawda a sangsangkamaysa, ni Pedro nakikatkatugaw kadakuada.+
56 Ngem maysa nga adipen a babai ti nakakita kenkuana a situtugaw iti asideg ti narangrang nga apuy ket miningminganna ket kinunana: “Daytoy a tao nakikuyog met kenkuana.”+
57 Ngem inlibakna,+ a kunkunana: “Diak am-ammo, babai.”+
58 Ket kalpasan ti apagbiit a tiempo kinuna ti sabali pay a tao a nakakita kenkuana: “Maysaka met kadakuada.” Ngem kinuna ni Pedro: “Lalaki, saan a siak.”+
59 Ket kalpasan ti panaglabas ti agarup maysa nga oras sabali pay a tao rinugianna nga impapilit unay: “Masigurado a daytoy a tao nakikuyog met kenkuana; ta, iti kinapudnona, isu ket taga Galilea!”+
60 Ngem kinuna ni Pedro: “Lalaki, diak ammo no ania ti sasawem.” Ket giddato, bayat nga agsasao pay laeng, nagtaraok ti maysa a kawitan.+
61 Ket ti Apo timmaliaw ket minatmatanna ni Pedro, ket nalagip ni Pedro ti sao ti Apo idi a kinunana kenkuana: “Sakbay nga agtaraok ti maysa a kawitan ita nga aldaw paglikudannakto iti mamitlo.”+
62 Ket rimmuar ket nagsangit a sipapait unay.+
63 Itan dagiti lallaki a nangaywan kenkuana rinugianda a pagang-angawan,+ nga isu+ kinabkabilda;+
64 Ket kalpasan ti panangabbungotda kenkuana agimtuodda ket kunaenda: “Agipadtoka. Asino daydiay nangkabil kenka?”+
65 Ket nangisasaoda iti adu a sabsabali pay a banag a pangtabbaaw+ maibusor kenkuana.
66 Iti kamaudiananna idi bumigaten, ti ummong ti lallakay dagiti umili, agpadpada ti panguluen a papadi ken dagiti eskriba, naguurnongda a sangsangkamaysa,+ ket insaklangda idiay siled ti Sanhedrinda, a kunkunada:+
67 “No sika ti Kristo,+ ibagam kadakami.” Ngem kinunana kadakuada: “Uray no ibagak kadakayo, saanyo a pulos patien dayta.+
68 Mainayon pay, no agsaludsodak kadakayo, saankayo a pulos sumungbat.+
69 Nupay kasta, manipud ita agtugawto ti Anak ti tao+ iti mannakabalin a makannawan+ ti Dios.”+
70 Gapu itoy kinunada amin: “Sika kadi, ngarud, ti Anak ti Dios?” Kinunana kadakuada: “Dakayo ti agkunkuna+ a siak.”
71 Kinunada: “Apay a kasapulantayo ti kanayonan a pangsaksi?+ Ta datayo nangngegtayo dayta manipud iti bukodna a ngiwat.”+
