Lucas 23:1-56
23 Iti kasta timmakder ti umariwekwek kadakuada, isuda amin, ket isu impanda ken Pilato.+
2 Idin rinugianda nga akusaren,+ a kunkunada: “Daytoy a tao nasarakanmi nga iluluodna+ ti nasionmi ken iparparitna ti panagbayad kadagiti buis+ ken Cesar ket kunkunana nga isu ti Kristo nga ari.”+
3 Ita ni Pilato inyimtuodna kenkuana ti saludsod: “Sika kadi ti ari dagiti Judio?” Kas sungbat kenkuana kinunana: “Sika ti agkunkuna iti dayta.”+
4 Idin kinuna ni Pilato iti panguluen a papadi ken kadagiti bunggoy: “Awan masarakak a krimen iti daytoy a tao.”+
5 Ngem nangrugida a mangipapilit, a kunkunada: “Riribukenna dagiti tattao babaen ti panangisurona iti intero a Judea, a nangrugi pay manipud Galilea agingga ditoy.”
6 Idi mangngegna dayta, inimtuod ni Pilato no ti tao ket taga Galilea,
7 ket, kalpasan a nasinunuona nga isu naggapu iti masakupan ni Herodes,+ imbaonna ken ni Herodes, nga adda met a mismo idiay Jerusalem kadagidi nga aldaw.
8 Idi a ni Herodes nakitana ni Jesus isu nagrag-o iti kasta unay, ta iti las-ud ti adu a tiempo tinartarigagayanna a makita+ gapu iti pannakangngegna+ iti maipapan kenkuana, ket in-inanamaenna idi ti makakita iti pagilasinan nga aramidenna.
9 Ita rinugianna ti agsaludsod kenkuana iti adu a sasao; ngem awan insungbatna kenkuana.+
10 Nupay kasta, ti panguluen a papadi ken dagiti eskriba nagtalinaedda a sitatakder ken sipipinget a mangak-akusar kenkuana.+
11 Idin isu linais ni Herodes agraman dagiti soldado a guardiana,+ ket nagang-angawanna+ babaen ti panangkawesna kenkuana iti nasileng a kawes ket pinaisublina ken Pilato.
12 Agpadpada a da Herodes ken Pilato+ naggayyemda itan iti dayta met laeng nga aldaw; ta sakbay dayta nagtultuloyda a nagbinnusor.
13 Ni Pilato kalpasanna pinaguummongna ti panguluen a papadi ken dagiti agtuturay ken dagiti tattao
14 ket kinunana kadakuada: “Inyegyo kaniak daytoy a tao kas maysa a manggargari kadagiti tattao tapno umalsada, ket, adtoy! inusigko iti sanguananyo ngem awan nasarakak iti daytoy a tao a pangibatayan+ kadagiti pammabasol nga idatdatagyo a maibusor kenkuana.
15 Kinapudnona, uray met ni Herodes, ta pinaisublina kadatayo; ket, adtoy! awan naaramidanna a maikari iti ipapatay.+
16 Dusaekto+ ngarud ket isu luk-atak.”
17 —
18 Ngem iti intero a kaaduda inyikkisda, a kunkunada: “Ipanawmo daytoy a tao,+ ngem ibulosmo kadakami ni Barabas!”+
19 (Dayta a tao naipisok iti pagbaludan gapu iti maysa nga iyaalsa a napasamak iti siudad ken gapu iti panangpapatay.)
20 Manen nagpukkaw kadakuada ni Pilato, agsipud ta tinarigagayanna a luk-atan ni Jesus.+
21 Iti kasta nangrugida nga aglaaw, a kunkunada: “Ilansam! Isu ilansam!”+
22 Iti maikatlo a daras kinunana kadakuada: “Apay, ania aya ti dakes a banag nga inaramid daytoy a tao? Awan nasarakak kenkuana a maikari iti ipapatay; dusaekto ngarud ket isu luk-atak.”+
23 Gapu itoy nangrugida nga agipapilit, buyogen dagiti natbag a timek, a kalkalikagumanda a mailansa; ket nangrugi a rumingbaw dagiti timekda.+
24 Gapuna nangipaay ni Pilato iti sentensia tapno matungpal ti kalikagumda:+
25 linuk-atanna+ ti tao a naipisok iti pagbaludan gapu iti iyaalsa ken panangpapatay ken isu a kinalkalikagumanda, ngem insukona ni Jesus iti pagayatanda.+
26 Itan idi nga impanawda, tinengngelda ni Simon, maysa a katutubo iti Cirene, a naggapu iti away, ket impabaklayda kenkuana ti kayo a pagtutuokan tapno awitenna dayta iti likudan ni Jesus.+
27 Ngem sumursurot idi kenkuana ti dakkel nga umariwekwek dagiti tattao ken dagiti babbai a nangkabkabil iti bagbagida gapu iti ladingit ken nangdungdung-aw kenkuana.
28 Ni Jesus timmaliaw kadagiti babbai ket kinunana: “Annak a babbai ti Jerusalem, isardengdak a sangsangitan. Iti kasupadina, sangitanyo ti bagbagiyo ken ti annakyo;+
29 agsipud ta, adtoy! um-umay dagiti aldaw a kunaento dagiti tattao, ‘Naragsak dagiti lupes a babbai, ken dagiti aanakan a saan a nagipasngay ken dagiti barukong a saan a nagpasuso!’+
30 Ket rugiandanto a kunaen kadagiti bantay, ‘Agtinnagkayo kadakami!’ ken kadagiti turod, ‘Gaburandakami!’+
31 Agsipud ta no aramidenda dagitoy a banag no naata ti kayo, anianto ti mapasamak no nagango dayta?”+
32 Ngem dua a sabali pay a lallaki, a managaramid iti dakes, ti maiturturong met idi a mapapatay a kaduana.+
33 Ket idi nakadanonda iti lugar a naawagan ti Bangabanga,+ sadiay isu inlansada ken dagiti managaramid iti dakes, maysa iti makannawanna ken maysa iti makannigidna.+
34 [[Ngem kinunkuna ni Jesus: “Ama, pakawanem+ ida, ta saanda nga ammo ti ar-aramidenda.”]] Kanayonanna pay, tapno mabingbingay dagiti kawesna, nagbibinnunotda.+
35 Ket dagiti tattao nagtakderda a kumitkita.+ Ngem inuy-uyongan dagiti agtuturay, a kunkunada: “Ti dadduma insalakanna; bay-anyo nga isalakanna+ ti bagina, no isu daytoy ti Kristo ti Dios, Daydiay Napili.”+
36 Isu nagang-angawan+ met dagiti soldado, nga immas-asidegda ken nangituktukonda kenkuana iti naalsem nga arak+
37 ken kinunkunada: “No sika ti ari dagiti Judio, isalakanmo ta bagim.”
38 Adda met maysa a surat iti ngatuenna: “Daytoy ti ari dagiti Judio.”+
39 Ngem maysa kadagiti naibitin a managaramid iti dakes rinugianna a kunaen a sibabassawang+ kenkuana: “Saan kadi a sika ti Kristo? Isalakanmo ta bagim ken dakami.”
40 Kas sungbat binabalaw daydi sabali ket kinunana: “Saanmo aya a pulos kabuteng ti Dios, ita ta addaka iti isu met laeng a pannakaukom?+
41 Ket, kinapudnona, nainkalintegan laeng a kastata, ta aw-awatenta a naan-anay ti maikari kadata gapu iti bambanag nga inaramidta; ngem daytoy a tao awan inaramidna a di umiso.”+
42 Ket intultuloyna a kunaen: “Jesus, laglagipennak inton makagtengka iti pagariam.”+
43 Ket kinunana kenkuana: “Pudno ibagak kenka ita nga aldaw, Makikaduakanto kaniak+ idiay Paraiso.”+
44 Ala ket, itan agarup maikanem nga orasen, ket kaskasdi nga immapay ti kinasipnget iti intero a daga agingga iti maikasiam nga oras,+
45 agsipud ta nagpukaw ti lawag ti init; idin ti kortina+ ti santuario napisang iti tengnga.+
46 Ket ni Jesus immawag a buyogen ti natbag a timek ket kinunana: “Ama, kadagita imam italekko ti espirituk.”+ Idi naisaonan daytoy, nauyos ti biagna.+
47 Gapu iti pannakakitana iti napasamak nangrugi ti opisial ti buyot a mangidayaw iti Dios, a kunkunana: “Pudno a nalinteg daytoy a tao.”+
48 Ket amin dagiti bunggoy a naguurnong a sangsangkamaysa sadiay maipaay itoy a bubuyaen, idi nakitada ti bambanag a napasamak, nangrugida nga agawid, a dandanogenda dagiti barukongda.
49 Mainayon pay, amin dagidiay makaam-ammo kenkuana sitatakderda idi iti adayo.+ Kasta met, dagiti babbai, a sangsangkamaysa a simmurot kenkuana manipud Galilea, sitatakderda idi a mangkitkita kadagitoy a banag.+
50 Ket, adtoy! maysa a lalaki a managan Jose, a kameng ti Konseho, maysa a naimbag ken nalinteg a lalaki+—
51 daytoy a lalaki saan a bimmutos kas pannakikanunong iti gakat ken tignayda+—isu ket manipud Arimatea, maysa a siudad dagiti taga Judea, ket ur-urayenna idi ti pagarian ti Dios;+
52 daytoy a lalaki napan ken Pilato ket dinawatna ti bagi ni Jesus.+
53 Ket imbabana dayta+ ket binalkutna iti napino a lienso, ket impaiddana iti tanem+ a naikungkong iti bato, a sadiay awan pay ti tao a naipaidda.+
54 Itan aldaw idi ti Panagsagana,+ ket ti lawag iti rabii ti sabbath+ umad-adanin.
55 Ngem dagiti babbai, a nakikuyog kenkuana manipud Galilea, simmurotda ket kinitada ti pakalaglagipan a tanem+ ken no kasano a naipaidda ti bagina;+
56 ket nagsublida tapno mangisaganada kadagiti especia ken kadagiti bangbanglo a lana.+ Ngem, siempre, naginanada iti sabbath+ sigun iti bilin.
