Lucas 24:1-53
24 Nupay kasta, iti umuna nga aldaw ti lawas, napanda a nakasapsapa iti tanem, nga inkuyogda dagiti especia nga insaganada.+
2 Ngem nasarakanda a ti bato naitulid manipud iti pakalaglagipan a tanem,+
3 ket idi simrekda saanda a nasarakan ti bagi ni Apo Jesus.+
4 Bayat a nariribukanda maipapan itoy, adtoy! nagtakder iti sibayda ti dua a lallaki a sumilsilap ti pagan-anayda.+
5 Idi a nagbuteng dagiti babbai ket pinagtalinaedda a sidudumog dagiti rupada iti daga, kinuna kadakuada dagiti lallaki: “Apay a sapsapulenyo kadagiti natay Daydiay sibibiag?
6 [[Awan ditoy, no di ket naibangonen.]]+ Lagipenyo no kasano a nagsao kadakayo bayat nga adda pay laeng idi idiay Galilea,+
7 a kinunkunana a ti Anak ti tao masapul a mayawat iti im-ima dagiti managbasol a tattao ken mailansa ket kaskasdi nga iti maikatlo nga aldaw bumangon.”+
8 Gapuna nalagipda ti sasaona,+
9 ket nagawidda manipud iti pakalaglagipan a tanem ket amin dagitoy a banag impadamagda kadagiti sangapulo ket maysa ken iti amin a sabsabali.+
10 Isuda idi da Maria Magdalena, ken Juana,+ ken Maria nga ina ni Santiago. Kasta met, ti sabsabali kadagiti babbai+ a kaduada ibagbagada dagitoy a banag kadagiti apostol.
11 Nupay kasta, dagitoy a sasao nagparang a kasla awan kaes-eskanna kadakuada ket saanda a patien+ dagiti babbai.
12 [[Ngem timmakder ni Pedro ket nagtaray a napan iti pakalaglagipan a tanem, ket, idi nagrukob, dagiti laeng patapat ti nakitana. Gapuna pimmanaw, nga agsidsiddaaw iti unegna maipapan iti napasamak.]]
13 Ngem, adtoy! iti dayta met laeng nga aldaw dua kadakuada ti agbambaniaga nga agturong iti maysa a purok nga agarup sangapulo ket maysa a kilometro ti kaadayona manipud Jerusalem ken managan Emmaus,
14 ket nagpatpatanganda maipapan kadagitoy amin a banag+ a napagteng.
15 Itan bayat nga agpatpatang ken agsarsaritada idi, ni Jesus a mismo immasideg+ ket nangrugi a nagna a makikuyog kadakuada;
16 ngem nakullaapan dagiti matada a makailasin kenkuana.+
17 Kinunana kadakuada: “Ania dagitoy a banag a pagdebdebateanyo bayat a magmagnakayo?” Ket nagintekda a naliday dagiti rupada.
18 Kas sungbat kinuna kenkuana ti maysa a managan Cleopas: “Agtataengka kadi a siksika laeng kas ganggannaet idiay Jerusalem ket iti kasta saanmo nga ammo ti bambanag a napasamak kenkuana kadagitoy nga aldaw?”
19 Ket kinunana kadakuada: “Ania a bambanag?” Kinunada kenkuana: “Ti bambanag maipapan ken Jesus a Nazareno,+ a nagbalin a mammadto+ a mannakabalin iti aramid ken sao iti sanguanan ti Dios ken ti amin a tattao;
20 ken no kasano a ti panguluentayo a papadi ken agtuturaytayo isu inyawatda iti sentensia nga ipapatay ket inlansada.+
21 Ngem namnamaenmi idi a daytoy a tao isu daydiay naikeddeng a mangispal iti Israel;+ wen, ket malaksid kadagitoy amin a banag, daytoy ti maikatlo nga aldaw nanipud idi napasamak dagitoy a banag.
22 Mainayon pay, sumagmamano a babbai+ nga adda kadakami pinagmalmalangadakami met, agsipud ta nasapada a napan iti pakalaglagipan a tanem
23 ngem saanda a nasarakan ti bagina ket immayda a kunkunada a nakakitada met iti karkarna a buya dagiti anghel, a nagkuna nga isu sibibiag.
24 Kanayonanna, dadduma kadagidiay kakaduami napanda iti pakalaglagipan a tanem;+ ket nasarakanda a kasta, kas iti kinuna dagiti babbai, ngem isu saanda a nakita.”
25 Gapuna kinunana kadakuada: “O nakukuneng ken nabannayat ti panagpuspusona a mamati iti amin a bambanag a sinao dagiti mammadto!+
26 Saan kadi a nasken a ti Kristo sagabaenna+ dagitoy a banag ket sumrek iti dayagna?”+
27 Ket nangrugi ken Moises+ ken kadagiti amin a Mammadto+ imbuksilanna kadakuada ti bambanag maipapan iti bagina kadagiti amin a Kasuratan.
28 Kamaudiananna asidegdan iti purok a papananda idi, ket isu nagtignay a kasla agbaniaga iti ad-adayo pay.
29 Ngem pinilitda, a kunkunada: “Makipagyanka kadakami, agsipud ta rumabiin ket nagngudon ti aldaw.” Gapuna isu simrek tapno makipagyan kadakuada.
30 Ket bayat a sisasadag idi a kaduada iti panganan innalana ti tinapay, binendisionanna, pinispisina ket rinugianna nga iyawat kadakuada.+
31 Iti kasta nalukatan a naan-anay dagiti matada ket isu nailasinda; ket isu nagpukaw manipud kadakuada.+
32 Ket kinunada iti maysa ken maysa: “Saan kadi a rumayrayray ti pusota bayat nga agsasao idi kadata iti dalan, bayat a lukluktanna idi a naan-anay kadata dagiti Kasuratan?”
33 Ket iti dayta met laeng nga oras timmakderda ket nagsublida idiay Jerusalem, ket nasarakanda a naguurnong dagiti sangapulo ket maysa ken dagidiay naikuyog kadakuada,
34 a kunkunada: “Iti kinapudnona ti Apo naibangon ket nagparang ken Simon!”+
35 Ita isuda insalaysayda ti paspasamak iti dalan ken no kasano nga isu nailasinda babaen ti panangpispisi iti tinapay.+
36 Bayat nga agsasaoda maipapan kadagitoy a banag isu nagtakder iti tengngada [[ket kinunana kadakuada: “Maaddaankayo koma iti talna.”]]
37 Ngem gapu ta napagkullayawda, ken nagbutengda,+ impagarupda a nakakitada iti maysa nga espiritu.
38 Gapuna kinunana kadakuada: “Apay a mariribukankayo, ken apay a rumsua dagiti panagduadua iti puspusoyo?
39 Kitaenyo dagiti imak ken dagiti sakak, ta siak daytoy; arikapendak+ ket kitaenyo, agsipud ta ti maysa nga espiritu awanan lasag ken tultulang+ a kas iti makitayo nga adda kaniak.”
40 [[Ket idi sinaona daytoy impakitana kadakuada dagiti imana ken dagiti sakana.]]
41 Ngem bayat a saanda pay laeng a mamati+ gapu iti bin-ig a rag-o ken agsidsiddaawda idi, kinunana kadakuada: “Addaankay kadi dita iti aniaman a makan?”+
42 Ket inyawatda kenkuana ti maysa a tinuno nga ikan;+
43 ket innalana dayta ket kinnanna+ iti imatangda.
44 Kinunana ita kadakuada: “Dagitoy ti sasaok a sinaok kadakayo bayat nga addaak pay laeng idi kadakayo,+ a ti amin a bambanag a naisurat maipapan kaniak iti linteg ni Moises ken kadagiti Mammadto+ ken kadagiti Salmo+ masapul a matungpal.”
45 Idin linuktanna a naan-anay ti pampanunotda tapno matarusanda ti kaipapanan dagiti Kasuratan,+
46 ket kinunana kadakuada: “Iti kastoy a pamay-an adda a naisurat a ti Kristo agsagaba ken bumangon manipud kadagiti natay iti maikatlo nga aldaw,+
47 ket maibatay iti naganna maikaskasabanto kadagiti amin a nasion+ ti panagbabawi a maipaay iti pannakapakawan dagiti basol+—mangrugi manipud Jerusalem,+
48 agbalinkayo a saksi+ kadagitoy a banag.
49 Ket, adtoy! ibaonko kadakayo daydiay inkari ni Amak. Nupay kasta, agnaedkayo iti siudad agingga a makawesankayo iti pannakabalin manipud iti ngato.”+
50 Ngem inruarna ida agingga idiay Betania, ket intag-ayna dagiti imana ket binendisionanna ida.+
51 Bayat a bembendisionanna ida isu naisina kadakuada ket nangrugi a mayuli sadi langit.+
52 Ket nagruknoyda kenkuana ket nagsublida idiay Jerusalem buyogen ti dakkel a rag-o.+
53 Ket nagtultuloyda nga adda idiay templo a bembendituenda ti Dios.+
