Lucas 11:1-54
11 Ita iti kaaddana nga agkarkararag iti maysa a lugar, idi nagsardeng, kinuna kenkuana ti maysa kadagiti adalanna: “Apo, isurom kadakami no kasano ti agkararag,+ kas iti panangisuro met ni Juan kadagiti adalanna.”+
2 Idin kinunana kadakuada: “No agkararagkayo,+ kunaenyo, ‘Ama, masantipikar koma ti naganmo.+ Umay koma ti pagariam.+
3 Itedmo kadakami ti tinapaymi+ maipaay iti daytoy nga aldaw sigun ti kasapulan iti daytoy aldaw.
4 Ket pakawanennakami iti basbasolmi,+ ta pakawanenmi met ti tunggal maysa a nakautang+ kadakami; ket saannakami nga iyeg iti pannakasulisog.’”+
5 Kanayonanna, kinunana kadakuada: “Asino kadakayo ti maaddaan iti gayyem ket mapanto kenkuana iti tengnga ti rabii ket kunana kenkuana, ‘Gayyem, pautangannak iti tallo a tinapay,
6 agsipud ta ti maysa a gayyemko kasangsangpetna kaniak iti panagbaniaga ket awan ti maidasarko kenkuana’?
7 Ket dayta a tao manipud iti uneg kunana kas sungbat, ‘Sumardengka a mangrirriribuk kaniak.+ Napunitanen ti ruangan, ket dagiti ubbing nga annakko addadan a kaduak iti pagiddaan; saanko a mabalin ti bumangon ket mangted kenka iti aniaman.’
8 Ibagak kadakayo, Uray no saan a bumangon ken mangted kenkuana iti aniaman gapu ta gayyemna, pudno unay gapu iti natured a kinapingetna+ bumangonto ket mangted kenkuana iti bambanag a kasapulanna.
9 Mayanatup unay kunak kadakayo, Itultuloyyo ti agdawat,+ ket maitedto dayta kadakayo; itultuloyyo ti agsapul,+ ket makasarakkayto; itultuloyyo ti agtuktok, ket mailukatto dayta kadakayo.
10 Ta ti tunggal maysa nga agdawdawat umawat,+ ken ti tunggal maysa nga agsapsapul makasarak, ket iti tunggal maysa nga agtuktuktok mailukatto dayta.
11 Kinapudnona, siasino kadakayo ti ama a, no ti anakna+ dumawat iti ikan, nalabit iyawatnanto kenkuana ti maysa a serpiente imbes nga ikan?
12 Wenno no dumawat met iti itlog, iyawatnanto kenkuana ti maysa a manggagama?
13 Gapuna, no dakayo, nupay nadangkeskayo, ammoyo no kasano ti mangted iti naimbag a sagsagut iti annakyo,+ anian a nangnangruna pay a ti Ama sadi langit mangtedto iti nasantuan nga espiritu+ kadagidiay agdawdawat kenkuana!”
14 Idi agangay isu nangparuar iti maysa a sairo nga umel.+ Kalpasan a rimmuar ti sairo, ti umel a lalaki nagsao. Ket nagsiddaaw dagiti bunggoy.
15 Ngem kinuna ti sumagmamano kadakuada: “Paruarenna dagiti sairo babaen ken Beelzebub nga agturay kadagiti sairo.”+
16 Nupay kasta, ti dadduma, tapno isu sulisogenda, nangrugida a nagsapul kenkuana iti pagilasinan+ manipud langit.
17 Yantangay ammona dagiti pampanunotenda+ kinunana kadakuada: “Tunggal pagarian a nabingbingay maibusor kenkuana met laeng dumteng iti pannakalangalang, ket ti balay a nabingbingay maibusor kenkuana met laeng marba.+
18 Gapuna no ni Satanas nabingbingay met a maibusor iti bagina, kasanonto a makapagtakder ti pagarianna?+ Agsipud ta kunaenyo a paruarek dagiti sairo babaen ken Beelzebub.
19 No babaen ken Beelzebub a paruarek dagiti sairo, babaen iti siasino a paruaren ida ti annakyo?+ Gapu itoy agbalindanto nga uk-ukom kadakayo.
20 Ngem no babaen iti ramay ti Dios+ a paruarek dagiti sairo, ti pagarian ti Dios pudno a nagtengnakayon.+
21 No ti maysa a napigsa a tao,+ a naarmasan a naimbag, bantayanna ti palasiona, agtalinaed a sitatalna dagiti sanikuana.
22 Ngem no ti maysa a nabilbileg+ ngem isu umay a bumusor kenkuana ket parmekenna,+ alaenna ti isuamin nga igamna a pagkamkammatalkanna, ket bingbingayenna ti bambanag a sinamsamna kenkuana.
23 Daydiay awan iti dasigko bumusor kaniak, ket daydiay saan a makipagurnong kaniak agiwara.+
24 “No ti maysa a narugit nga espiritu rummuar manipud iti maysa a tao, lumasat dayta kadagiti namagmagan a disso iti panagbirok iti lugar a paginanaan, ket, kalpasan nga awan masarakanna, kunaenna, ‘Agsubliakto iti balay a pimmanawak.’+
25 Ket iti idadatengna masarakanna dayta a nasagadan a nadalus ken naarkosan.
26 Kalpasanna mapan ket mangikuyog iti pito+ a naiduma nga espiritu a dakdakes ngem isu, ket, kalpasan a makastrekda, agnaedda sadiay; ket ti kamaudianan a kasasaad dayta a tao agbalin a dakdakes ngem ti immuna.”+
27 Ita bayat a sasawenna idi dagitoy a banag maysa a babai manipud iti bunggoy impigsana ti timekna ket kinunana kenkuana: “Naragsak ti aanakan+ a nangawit kenka ken dagiti suso a sinusuam!”
28 Ngem kinunana: “Saan, imbes ketdi, Naragsak dagidiay dumdumngeg iti sao ti Dios ken mangsalsalimetmet iti dayta!”+
29 Idi nagaaribungbong dagiti bunggoy, rinugianna a kunaen: “Daytoy a kaputotan ket nadangkes a kaputotan; agsapul iti pagilasinan.+ Ngem awanto ti pagilasinan a maited iti dayta malaksid ti pagilasinan ni Jonas.+
30 Ta no kasano a ni Jonas+ nagbalin a maysa a pagilasinan kadagiti taga Nineve, kastanto met laeng ti Anak ti tao iti daytoy a kaputotan.
31 Ti reyna+ ti abagatan maibangonto iti panangukom agraman kadagiti tattao iti daytoy a kaputotan ket kondenarennanto ida; agsipud ta immay manipud kadagiti ungto ti daga tapno dumngeg iti sirib ni Solomon, ngem, adtoy! maysa a nangnangruna+ ngem ni Solomon ti adda ditoy.
32 Dagiti tattao a taga Nineve tumakderdanto iti panangukom agraman iti daytoy a kaputotan ket kondenarendanto dayta; agsipud ta nagbabawida gapu iti inkasaba ni Jonas;+ ngem, adtoy! maysa a nangnangruna+ ngem ni Jonas ti adda ditoy.
33 Kalpasan ti pananggangatna iti pagsilawan, ti maysa a tao ikabilna dayta, saan nga iti pagilemmengan wenno iti sirok ti pagsukat a labba, no di ket iti pagsaadan ti silaw,+ tapno dagidiay sumrek makitada ti lawag.
34 Ti pagsilawan ti bagi isu ti matam. No ti matam simple, ti intero a bagim naraniag met;+ ngem no nadangkes dayta, ti bagim nasipnget met.
35 Agalibtakka, ngarud. Amangan no ti lawag nga adda kenka ket kinasipnget.+
36 Gapuna, no ti intero a bagim naraniag nga awan a pulos pasetna a nasipnget, isuamin dayta naraniagto+ a kas no ti pagsilawan mangipaay kenka iti lawag babaen kadagiti sinamarna.”
37 Idi naisaonan daytoy, maysa a Fariseo ti nagkiddaw a makipangan+ kenkuana. Gapuna simrek ket nagsadag iti panganan.
38 Nupay kasta, nagsiddaaw ti Fariseo idi makitana a saan a nagbuggo nga umuna+ sakbay ti pannangan.
39 Ngem kinuna kenkuana ti Apo: “Ita dakayo a Fariseo, dalusanyo ti ruar ti kopa ken pinggan, ngem ti unegyo+ napno iti samsam ken kinadangkes.+
40 Di nainkalintegan a tattao! Saan kadi a ti nangaramid iti ruar+ inaramidna met ti uneg?
41 Nupay kasta, ti bambanag nga adda iti uneg itedyo kas sagsagut ti asi,+ ket, adtoy! amin a dadduma pay a banag nadalusda kadakayo.
42 Ngem asikay pay a Fariseo, agsipud ta itedyo ti apagkapullo+ ti yerbabuena ken ti ruda ken ti tunggal dadduma pay a nateng, ngem labsanyo ti kinahustisia ken ti ayat iti Dios! Dagitoy a banag pagrebbenganyo nga aramiden, ngem dagidiay dadduma a banag saanyo a maliwayan.+
43 Asikay pay a Fariseo, agsipud ta ayatenyo dagiti makinsango a pagtugawan kadagiti sinagoga ken dagiti kablaaw kadagiti plasa!+
44 Asikay pay, agsipud ta umaspingkayo kadagidiay pakalaglagipan a tanem a di mailasin, iti kasta magna dagiti tattao iti rabawda ket saanda nga ammo dayta!”+
45 Kas sungbat kinuna kenkuana ti maysa kadagidiay nalaing+ iti Linteg: “Mannursuro, iti panangisaom kadagitoy a banag insultuennakami met.”
46 Idin kinunana: “Asikay met a nalalaing iti Linteg, agsipud ta paawitanyo dagiti tattao kadagiti awit a narigat nga ibaklay, ngem dakayo saanyo a sagiden dagiti awit iti maysa kadagiti ramayyo!+
47 “Asikay pay, agsipud ta bangonenyo dagiti pakalaglagipan a tanem dagiti mammadto, ngem pinapatay ida dagidi ammayo!+
48 Pudno unay a saksikayo iti ar-aramid dagidi ammayo ket kaskasdi a kumanunongkayo kadakuada,+ agsipud ta dagitoy pinapatayda+ dagiti mammadto ngem bangbangonenyo dagiti tanemda.
49 Gapu itoy kinuna met ti sirib+ ti Dios, ‘Mangibaonakto kadakuada kadagiti mammadto ken apostol, ket papatayen ken idadanesdanto ti sumagmamano kadakuada,
50 iti kasta ti dara dagiti amin a mammadto+ a naibuyat manipud pannakabangon ti lubong masingirto iti daytoy a kaputotan,+
51 manipud iti dara ni Abel+ agingga iti dara ni Zacarias,+ a napapatay iti nagbaetan ti altar ken ti balay.’+ Wen, ibagak kadakayo, masingirto dayta iti daytoy a kaputotan.
52 “Asikay pay a nalalaing iti Linteg, agsipud ta inikkatyo ti tulbek ti pannakaammo;+ dakayo saankayo a simrek, ket laplapdanyo dagidiay sumsumrek!”+
53 Gapuna idi isu rimmuar manipud sadiay rinugian dagiti eskriba ken dagiti Fariseo a riribuken unay ket saanda nga inggaan a salsaludsodan maipapan iti ad-adu pay a banag,
54 nga agdadaanda+ kenkuana, tapno adda matiliwda+ manipud iti ngiwatna.
