Mga Pamangkot Gikan sa mga Bumalasa

Sa modelo nga pangamuyo ni Jesus, ginapahangop bala niya nga ang kabubut-on sang Dios ginahimo na sa langit bisan wala pa matabog gikan didto ang malaut nga mga anghel?

Subong narekord sa Mateo 6:​10, si Jesus nagsiling: “Kabay nga himuon ang imo kabubut-on, kon paano sa langit, subong man sa duta.” Ini nga pangabay mahimo hangpon diin man sa duha ka paagi. Una, bilang isa ka pangabay agod ang kabubut-on sang Dios himuon sa duta subong nga ginahimo na ini sa langit ukon, ikaduha, bilang isa ka pangabay nga himuon ini sing bug-os sa langit kag sa duta.⁠ * Ang kahulugan sang nauna nga mga tinaga ni Jesus nga, “pakariha ang imo ginharian,” nagapakita nga ang ikaduha nga paghangop mas nagasibu sa Kasulatan. Kag ginapakita sini ang kahimtangan sang si Jesus yari pa sa duta kag sa malawig nga tion pagkatapos sadto. Paano?

Ginapatalupangod sang tulun-an sang Bugna ang duha ka magkatuhay nga resulta sang pagtukod sing Ginharian sang Dios sa langit. Ang una may epekto sa langit mismo, kag ang ikaduha, sa duta. Ang Bugna 12:​7-9, 12 nagsiling: “Nagdabdab ang inaway sa langit: Si Miguel kag ang iya mga anghel nagpakig-away batok sa dragon, kag ang dragon kag ang mga anghel sini nagpakig-away apang wala ini magdaug, ni may nakita pa nga duog para sa ila sa langit. Gani gintagbong ang daku nga dragon, ang orihinal nga man-ug, ang ginatawag nga Yawa kag Satanas, nga nagapatalang sa bug-os napuy-an nga duta; gintagbong sia sa duta, kag ang iya mga anghel gintagbong upod sa iya. Bangod sini magkalipay kamo, kamo nga mga langit kag kamo nga nagapuyo sa sini! Kailo sa duta kag sa dagat, kay ang Yawa nagpanaug sa inyo, nga may daku nga kaakig, kay nahibaluan niya nga malip-ot na lamang ang iya tion.”

Ang langit nahilway na gikan sa tanan nga rebelde nga espiritu sang si Satanas kag ang mga demonyo gintabog gikan sa langit sang 1914, nga ginkalipay sing daku sang matutom nga anghel nga mga anak ni Jehova, nga nagatiglawas sa kadamuan sang iya espiritu nga tinuga. (Job 1:​6-​12; 2:​1-7; Bugna 12:10) Busa, kon tuhoy sa langit, natuman ang pangabay sa modelo nga pangamuyo ni Jesus. Ang tanan nga nabilin sa sinang langitnon nga duog mga matutom kay Jehova kag nagapasakop sing bug-os sa iya pagkasoberano.

Dapat man ipadaku nga antes sina, sang ang malauton nga mga anghel makabalikbalik pa sa langit, ginsikway na sila gikan sa pamilya sang Dios kag napaidalom sa pat-od nga mga pagdumili. Halimbawa, ginpakita sang Judas 6 nga sang unang siglo C.⁠E. pa, ‘gintigana na sila sa mga gapos nga dayon sa idalom sang mangitungito nga [espirituwal nga] kadudulman para sa paghukom sa dakung adlaw.’ Sing kaanggid, ang 2 Pedro 2:4 nagasiling: “Ang Dios wala magpaiway sa pagsilot sa nakasala nga mga anghel, kundi, paagi sa paghaboy sa ila sa Tartaro [isa ka ginpakanubo gid nga kahimtangan], nagtagbong sa ila sa mangitungito nga [espirituwal nga] kadudulman agod itigana sa paghukom.”⁠ *

Kabaliskaran gid sa ila sinikway nga kahimtangan samtang didto pa sila sa langit, ang malaut nga mga anghel may daku nga awtoridad sa duta. Sa katunayan,  ang Pulong sang Dios nagatawag kay Satanas nga “manuggahom sining kalibutan,” kag ini nagatawag sa mga demonyo nga “mga manuggahom sang kalibutan sining kadudulman.” (Juan 12:31; Efeso 6:​11, 12; 1 Juan 5:19) Bangod sang iya awtoridad, matanyagan sang Yawa si Jesus sang ‘tanan nga ginharian sang kalibutan kag sang ila himaya’ kabaylo sang isa ka buhat sang pagsimba sa iya. (Mateo 4:​8, 9) Nian, maathag nga kon tuhoy sa duta, ang ‘pagkari’ sang Ginharian sang Dios magapahanabo sing dalagku nga mga pagbag-o.

Kon tuhoy diri sa duta, ang ‘pagkari’ sang Ginharian sang Dios magaresulta sa isa ka bag-o gid nga sistema sang mga butang. Ang Ginharian magadugmok sang tanan nga himo-​tawo nga mga pagginahom kag ini mangin solo nga gobierno sa duta. Sa amo man nga tion, ang mahinadlukon-sa-Dios nga katawhan nga mga sakop sini mangin “isa ka bag-ong duta.” (2 Pedro 3:​13; Daniel 2:44) Pagadulaon man sang Ginharian ang sala gikan sa matinumanon nga katawhan kag sa ulihi himuon sini ang duta nga isa ka tugob-globo nga paraiso, busa ginapanas ang tanan nga agi sang paggahom ni Satanas.​​—⁠Roma 8:​20, 21; Bugna 19:⁠17-​21.

Sa hingapusan sang Milenyo, kon matuman na sang Mesianikong Ginharian ang kabubut-on sang Dios para sa sini, “ang Anak man magapasakop sa Isa nga nagpasakop sang tanan nga butang sa iya, agod ang Dios mangin tanan nga butang sa tagsatagsa.” (1 Corinto 15:28) Nian, may katapusan nga pagtilaw, nga pagkatapos sini si Satanas, ang iya mga demonyo, kag ang bisan sin-o nga tawo nga malimbungan nga magrebelde sa Dios pagadulaon sing permanente sa “ikaduha nga kamatayon.” (Bugna 20:​7-​15) Pagkatapos sini, ang tanan nga intelihente nga tinuga sa langit kag sa duta malipayon nga magapasakop sa mahigugmaon nga soberanya ni Jehova tubtob sa walay katubtuban. Sa tanan nga kahulugan, amo ini ang bug-os nga katumanan sang mga pulong sa modelo nga pangamuyo ni Jesus.​​—⁠1 Juan 4:⁠8.

[Mga nota]