Magdiretso sa kaundan

Magdiretso sa listahan sang kaundan

Labi Pa nga Dapat Kita Magbantay Karon

Labi Pa nga Dapat Kita Magbantay Karon

 Labi Pa nga Dapat Kita Magbantay Karon

“Busa, magpadayon kamo sa pagbantay, kay wala kamo makahibalo kon sa ano nga adlaw magakari ang inyo Ginuo.”​​—⁠MATEO 24:42.

1, 2. Ano ang nagapakita nga nagakabuhi na kita sa katapusan sang karon nga sistema sang mga butang?

“ANG labi nga nakaimpluwensia sa ikabeinte nga siglo amo ang inaway,” siling sang awtor nga si Bill Emmott. Bisan pa ginabaton niya nga nabatyagan sa bug-os nga maragtas sang tawo ang mabug-at nga epekto sang mga inaway kag kasingki, nagdugang sia: “Indi tuhay ang ikabeinte nga siglo kon tuhoy sa sahi sang inaway, tuhay ini sa kadakuon sang inaway. Ang bug-os kalibutan nga inaway una nga natabo sa sini nga siglo . . . Kag, agod ipadaku pa ang punto, indi lamang isa kundi duha ka bug-os kalibutan nga inaway ang natabo.”

2 Gintagna ni Jesucristo ang mga inaway sang ‘pungsod batok sa pungsod kag ginharian batok sa ginharian.’ Apang, isa lamang ini ka bahin sang ‘tanda sang presensia ni Cristo kag sang katapusan sang sistema sang mga butang.’ Sa sining daku nga tagna, ginsambit man ni Jesus ang mga tiggulutom, mga piste, kag mga linog. (Mateo 24:​3, 7, 8; Lucas 21:​6, 7, 10, 11) Sa madamo nga mga paagi, ini nga mga kalamidad nagdugang sa kasangkaron kag kadakuon. Ang kalainan sang tawo bugana, subong makita sa iya panimuot sa Dios kag sa iya isigkatawo. Dayag ang pagkalusod sang moralidad kag ang pagdugang sang krimen kag kasingki. Ang mga tawo nangin mahigugmaon sa kuarta sa baylo nga mahigugmaon sa Dios, nga nagasalimuang sa pagpangalipay. Ini tanan nagapamatuod nga nagakabuhi na kita sa “makahalanguyos nga mga tion.”​​—⁠2 Timoteo 3:​1-5.

3. Paano kita dapat maapektuhan sang “mga tanda sang mga tion”?

3 Paano mo ginatamod ang nagalain nga nagakatabo sa mga tawo karon? Madamo ang wala nagasapak, kabalan na, sa makapahuol nga mga nagakatabo karon. Wala mahantop sang impluwensiado kag maalam nga mga tawo sang kalibutan ang kahulugan sang “mga tanda sang mga tion”; ang relihioso nga mga lider wala nagahatag sing nagakaigo nga panuytoy sa sini nga butang. (Mateo 16:​1-3) Apang si Jesus naglaygay sa iya mga sumulunod: “Busa, magpadayon kamo sa pagbantay, kay wala kamo makahibalo kon sa ano nga adlaw magakari ang inyo Ginuo.” (Mateo 24:42) Ginapalig-on kita diri ni Jesus nga indi lamang kita magbantay kundi ‘magpadayon sa pagbantay.’ Agod padayon kita nga nagabantay, dapat kita magpabilin nga alisto kag nagabantay. Dapat naton kilalahon nga indi lamang nagakabuhi na kita sa katapusan nga mga adlaw kag mabudlay ang mga tion. Dapat gid kita magpati nga “ang katapusan sang tanan nga butang malapit na.” (1 Pedro 4:7) Nian ang aton pagbantay may pagkahilingagawon. Busa, ang pamangkot nga dapat naton binagbinagon amo: ‘Ano ang makabulig agod mapabakod naton ang aton pagpati nga malapit na ang katapusan?’

4, 5. (a) Ano ang magapabakod sang aton pagpati nga malapit na ang katapusan sining malaut nga sistema, kag ngaa? (b) Ano ang isa ka pag-anggid sang adlaw ni Noe kag sang presensia sang Anak sang tawo?

4 Binagbinaga ang mga kahimtangan nga nagluntad antes sang isa ka pinasahi nga hitabo sa maragtas sang tawo​​—⁠ang daku nga Anaw sang adlaw ni Noe. Ang mga tawo sadto malain gid amo nga si Jehova ‘nasaklaw sa iya tagipusuon.’ Sia nagsiling: “Papason ko ang mga tawo nga gintuga ko gikan sa kadaygan sang duta.” (Genesis 6:​6, 7) Kag amo matuod ang ginhimo niya. Sa pagpaanggid sang kahimtangan sadto kag sang karon, si Jesus nagsiling: “Subong sang mga adlaw ni Noe, mangin amo man ang presensia sang Anak sang tawo.”​​—⁠Mateo 24:37.

5 Makatarunganon hunahunaon nga ang ginbatyag ni Jehova tuhoy sa kalibutan antes sang  Anaw amo man ang ginabatyag niya tuhoy sa kalibutan karon. Sanglit ginlaglag niya ang di-diosnon nga kalibutan sang adlaw ni Noe, pat-od nga laglagon man niya ang malaut nga kalibutan karon. Ang maathag nga paghangop sa pag-anggid sadto nga tion kag sang aton adlaw karon dapat magpabakod sang aton pagpati nga malapit na ang katapusan sang karon nga kalibutan. Ano, nian, ang mga pagkaanggid? May lima sa di-magkubos. Ang una amo ang maathag nga paandam tuhoy sa nagapakari nga kalaglagan.

Ginpaandaman Tuhoy sa “mga Butang nga Wala Pa Makita”

6. Ano ang gindesisyon ni Jehova nga himuon sang adlaw ni Noe?

6 Sang adlaw ni Noe, si Jehova nagsiling: “Ang akon espiritu indi magsumpong sing dayon sa tawo kay sia man unod. Gani ang iya mga adlaw mangin isa ka gatos kag duha ka pulo ka tuig.” (Genesis 6:3) Ini nga desisyon sang Dios sang 2490 B.⁠C.⁠E. nagtanda sang pagsugod sang katapusan para sa sadtong di-diosnon nga kalibutan. Hunahunaa lamang kon ano ang kahulugan sini para sa mga nagakabuhi sadto! Siento beinte ka tuig na lang kag magapadala si Jehova “sang anaw sang mga tubig sa ibabaw sang duta sa paglaglag sa tanan nga unod nga may puwersa sang kabuhi gikan sa idalom sang mga langit.”​​—⁠Genesis 6:⁠17.

7. (a) Ano ang ginhimo ni Noe sa paandam tuhoy sa Anaw? (b) Ano ang dapat himuon naton sa mga paandam tuhoy sa katapusan sining sistema?

7 Nabaton ni Noe ang paandam tuhoy sa nagapakari nga kalaglagan mga dekada sa wala pa, kag maalamon nga gingamit niya ang tion sa paghanda para sa kaluwasan. “Pagkatapos ginhatagan sing paandam sang Dios nahanungod sa mga butang nga wala pa makita,” siling ni apostol Pablo, “nagpakita [si Noe] sing diosnon nga kahadlok kag nagtukod sing arka agod maluwas ang iya panimalay.” (Hebreo 11:7) Kamusta naman kita? Mga 90 ka tuig na ang nagligad halin sang nagsugod ang katapusan nga mga adlaw sining sistema sang mga butang sang 1914. Maathag gid nga yari na kita sa “tion sang katapusan.” (Daniel 12:4) Ano ang dapat naton himuon sa mga paandam nga ginhatag sa aton? “Sia nga nagahimo sang kabubut-on sang Dios nagapabilin sing dayon,” siling sang Biblia. (1 Juan 2:17) Busa, karon na ang tion nga himuon ang kabubut-on ni Jehova upod ang pagbatyag nga ang tion hilingagawon gid.

8, 9. Ano nga mga paandam ang ginahatag sa modernong mga tion, kag paano ini ginabantala?

8 Sa modernong mga tion, natun-an sang sinsero nga mga estudyante sang Biblia gikan sa inspirado nga Kasulatan nga laglagon ining sistema. Nagapati bala kita sa sini? Talupangda ang maathag nga ginsiling ni Jesucristo: “May dakung kapipit-an, nga ang subong sini wala pa mahanabo kutob sa ginsuguran sang kalibutan tubtob karon, wala, kag indi na gid mahanabo.” (Mateo 24:21) Nagsiling man si Jesus nga magakari sia subong ang gintangdo sang Dios nga Hukom kag painpainon niya ang mga tawo subong sang manugbantay nga nagapain sang mga karnero gikan sa mga kanding. Ang masapwan nga indi takus ‘magakadto sa walay katapusan nga kalaglagan, apang ang mga matarong sa kabuhi nga walay katapusan.’​—⁠Mateo 25:31-​33, 46.

9 Padayon nga ginapahanumdom ni Jehova ini nga mga paandam sa iya katawhan paagi sa sibu sa tion nga espirituwal nga pagkaon nga  ginaaman sang “matutom kag mainandamon nga ulipon.” (Mateo 24:45-​47) Dugang pa, ang tagsa ka pungsod, tribo, hambal, kag katawhan ginapalig-on nga ‘magkahadlok sa Dios kag hatagan sia sing himaya, kay nag-abot na ang oras sang iya paghukom.’ (Bugna 14:​6, 7) Ang isa ka bahin sang mensahe sang Ginharian nga ginabantala sa bug-os nga duta sang mga Saksi ni Jehova amo ang paandam nga sa indi madugay dulaon sang Ginharian sang Dios ang paggahom sang tawo. (Daniel 2:44) Ini nga paandam indi dapat pasapayanan. Ginatuman pirme sang Labing Gamhanan nga Dios ang iya pulong. (Isaias 55:​10, 11) Ginhimo na niya ini sang adlaw ni Noe, kag himuon man niya ini sa aton adlaw.​​—⁠2 Pedro 3:​3-7.

Lapnag ang Imoral nga Sekso

10. Ano ang masiling sa imoral nga sekso sang adlaw ni Noe?

10 Ang aton tion kaanggid sa adlaw ni Noe sa ikaduha nga paagi. Ginsugo ni Jehova ang una nga lalaki kag babayi nga ‘pun-on ang duta’ sang ila sahi, nga ginagamit ang ginhatag sa ila sang Dios nga seksuwal nga ikasarang sing dungganon subong mag-asawa. (Genesis 1:28) Sang adlaw ni Noe, gindagtaan sang malalison nga mga anghel ang katawhan sing di-kinaugali nga sekso. Nagpanaug sila sa duta, nagpakatawo, kag naghulid sa matahom nga mga babayi, kag nangin amay sang mga anak nga tunga tawo, tunga demonyo​​—⁠ang mga Nefilim. (Genesis 6:​2, 4) Ang sala sining imoral nga mga anghel ginpaanggid sa pagkaimoral sang Sodoma kag Gomorra. (Judas 6, 7) Busa, ang imoral nga sekso lapnag sadto.

11. Ano nga moralidad sa aton tion ang kaanggid sa mga adlaw ni Noe?

11 Kamusta naman ang moralidad sa karon? Sa sining hingapusan nga mga adlaw, madamo ang mahuyugon sa sekso. Maathag nga ginlaragway ni Pablo ini nga mga tawo subong “nawad-an sang tanan nga igbalatyag sa moral”; madamo ang nagpaduyog “sa malaw-ay nga paggawi sa pagbuhat sang tanan nga sahi sang kahigkuan nga may kakagod.” (Efeso 4:19) Kinaandan na ang pornograpiya, sekso antes sang kasal, seksuwal nga pag-abuso sa mga bata, kag ang homoseksuwalidad. ‘Nabaton na sang iban ang bug-os nga silot’ sa porma sang mga balatian nga ginapaliton paagi sa sekso, pagkalusod sang pamilya, kag iban pa nga mga problema sang katilingban.​​—⁠Roma 1:​26, 27.

12. Ngaa dapat naton palambuon ang dumot sa kon ano ang malain?

12 Sang adlaw ni Noe, nagpadala si Jehova sing daku nga Anaw kag ginlaglag yadtong nagasalimuang sa sekso nga kalibutan. Indi gid naton pagkalipatan nga ang aton mga adlaw karon subong gid sang mga adlaw ni Noe. Dulaon sa duta sang nagapakari nga “dakung kapipit-an” ang ‘mga makihilawason, mga makihilahion, mga lalaki nga ginagamit ang kaugalingon para sa di-kinaugali nga mga katuyuan, kag mga lalaki nga nagahulid sa mga lalaki.’ (Mateo 24:21; 1 Corinto 6:​9, 10; Bugna 21:8) Daw ano ka hilingagawon nga palambuon naton ang dumot sa kon ano ang malain kag magpalayo sa mga kahimtangan nga makadul-ong sa imoralidad!​​—⁠Salmo 97:10; 1 Corinto 6:⁠18.

Napun-an sing Kasingki” ang Duta

13. Sang adlaw ni Noe, ngaa ang duta “napun-an sing kasingki”?

13 Nagapatuhoy sa ikatlo nga kahimtangan sang adlaw ni Noe, ang Biblia nagasiling: “Ang duta dunot sa itululok sang matuod nga Dios kag ang duta napun-an sing kasingki.” (Genesis 6:11) Ang matuod, ang kasingki indi bag-o. Ginpatay sang anak ni Adan nga si Cain ang iya matarong  nga utod. (Genesis 4:8) Nagapakita sang masingki nga espiritu sang iya adlaw, nagkomposo si Lamec sing isa ka binalaybay nga nagapabugal kon paano niya napatay ang isa ka pamatan-on nga lalaki, sa pagdepensa kuno sa iya kaugalingon. (Genesis 4:​23, 24) Ang tuhay sang adlaw ni Noe amo ang kadakuon sang kasingki. Sang nagpangasawa ang malalison nga anghel nga mga anak sang Dios sing mga babayi sa duta kag nangin amay sang mga anak nga gintawag mga Nefilim, nagdugang ang kasingki tubtob sa kadakuon nga wala pa sing tupong sadto. Ginapakita sang New World Translation nga ang orihinal nga Hebreong tinaga nga nagapatuhoy sa sining masingki nga mga higante nagakahulugan sing ‘mga Manugpukan’​​—⁠‘sila nga nagapukan sa iban.’ (Genesis 6:4) Subong resulta, ang duta “napun-an sing kasingki.” (Genesis 6:13) Handurawa ang mga problema nga mahimo naatubang ni Noe sa pagpadaku sa iya pamilya sa sini nga palibot! Apang, si Noe nangin ‘matarong sa atubangan ni Jehova sa tunga sining kaliwatan.’​​—⁠Genesis 7:1.

14. Paano ang duta karon “napun-an sing kasingki”?

14 Ang kasingki madugay na nga nagakatabo sa bug-os nga maragtas sang tawo. Apang subong sang mga adlaw ni Noe, nasaksihan man ini sang aton tion sa isa ka walay tupong nga kasangkaron. Pirme kita makabati tuhoy sa kasingki sa sulod sang pamilya, mga buhat sang terorismo, mga kampanya sa pagpapas sa isa ka rasa, kag walay namunamo nga pagpamatay sang armado nga mga tawo. Idugang pa sa sini ang mga pagpatulo sing dugo sa tion sang mga inaway. Ang duta napun-an liwat sing kasingki. Ngaa? Ano ang isa ka kabangdanan sining pagsingki pa sang kahimtangan? Ginapakita sang sabat sa sini ang isa pa ka pagkaanggid sa adlaw ni Noe.

15. (a) Ano ang isa ka kabangdanan sang pagdugang sang kasingki sa katapusan nga mga adlaw? (b) Ano nga resulta ang mapat-od naton?

15 Sang gintukod ang Mesianikong Ginharian sang Dios sa langit sang 1914, naghimo ang ginpalingkod sa trono nga Hari, si Jesucristo, sing importante nga buhat. Si Satanas nga Yawa kag ang iya mga demonyo gintagbong sa duta gikan sa langit. (Bugna 12:​9-​12) Antes sang Anaw, kinabubut-on nga ginbiyaan sang malalison nga mga anghel ang ila posisyon sa langit; apang, sa aton modernong mga tion, pilit sila nga gintabog. Dugang pa, wala na sila karon sing ikasarang nga magpakatawo sa duta agod himuon ang ginadumilian nga pagpangalipay sa unod. Gani sa kaugot, kaakig, kag kahadlok sa nagahilapit nga paghukom, ginaimpluwensiahan nila ang mga tawo kag ang mga organisasyon sa paghimo sing sapatsapaton nga mga krimen kag kasingki nga daku pa sangsa natabo sang adlaw ni Noe. Ginpapas ni Jehova ang kalibutan antes sang Anaw sa tapos ini ginpun-an sang malalison nga mga anghel kag sang ila mga anak sing kalainan. Pat-od nga amo man  ang himuon niya sa aton adlaw! (Salmo 37:10) Apang, nahibaluan sang mga nagabantay gihapon tubtob karon nga malapit na ang ila kaluwasan.

Ginabantala ang Mensahe

16, 17. Ano ang ikap-at nga pag-anggid sang mga adlaw ni Noe kag sang aton adlaw?

16 Ang ikap-at nga punto sang pagkaanggid sa ulot sang karon nga adlaw kag sang kalibutan antes sang Anaw amo ang hilikuton nga ginpahimo kay Noe. Nagtukod si Noe sing isa ka daku nga arka. Isa man sia ka “manugbantala.” (2 Pedro 2:5) Ano nga mensahe ang ginbantala niya? Mahimo gid nga ang pagbantala ni Noe naglakip sing panawagan nga maghinulsol ang katawhan kag sing paandam tuhoy sa nagapakari nga kalaglagan. Si Jesus nagsiling nga ang mga tawo sang adlaw ni Noe ‘wala magsapak tubtob nga nag-abot ang anaw kag nag-anod sa ila tanan.’​​—⁠Mateo 24:​38, 39.

17 Sing kaanggid, samtang maukod nga ginatuman sang mga Saksi ni Jehova ang sugo sa ila nga magbantala, ang mensahe sang Ginharian sang Dios ginawali sa bug-os nga kalibutan. Sa halos tanan nga bahin sang kalibutan, mabatian kag mabasa sang mga tawo ang mensahe sang Ginharian sa ila lenguahe. Ang magasin nga Ang Lalantawan, nga nagabantala sang Ginharian ni Jehova, may sirkulasyon nga kapin sa 25,000,000 kag ginaimprinta sa kapin sa 140 ka lenguahe. Sa pagkamatuod, ang maayong balita sang Ginharian sang Dios ginabantala “sa bug-os napuy-an nga duta subong panaksi sa tanan nga kapungsuran.” Kon matapos na ini nga hilikuton suno sa luyag sang Dios, ang katapusan pat-od nga magaabot.​​—⁠Mateo 24:14.

18. Ano ang reaksion sang madamo nga tawo sa aton pagbantala nga hilikuton kon ipaanggid sa reaksion sang kalabanan nga mga tawo sang adlaw ni Noe?

18 Bangod sang pagkawalay interes sa espirituwal nga mga butang kag sang pagnubo sang moralidad sang mga adlaw antes sang Anaw, indi makatilingala nga ang pamilya ni Noe nangin kaladlawan sa ila maduhaduhaon nga mga isigkatawo nga nagyaoyao kag nagyubit sa ila. Apang, nag-abot ang katapusan. Sing kaanggid, ang ‘mga mayubiton nga may pagyubit’ nagabugana sa katapusan nga mga adlaw. “Apang ang adlaw ni Jehova magaabot subong sang kawatan,” siling sang Biblia. (2 Pedro 3:​3, 4, 10) Magaabot gid ini sa gintalana nga tion. Indi ini magpalantang. (Habacuc 2:3) Maalamon gid kita kon magpadayon kita sa pagbantay!

Pila Lamang ang Naluwas

19, 20. Ano nga pag-anggid ang makita naton sa ulot sang Anaw kag sang pagkalaglag sang karon nga sistema sang mga butang?

19 Indi lamang sa kalainan sang mga tawo kag sa ila kalaglagan magkaanggid ang adlaw ni Noe kag ang aton adlaw. Subong nga may naluwas sa Anaw, may maluwas man kon laglagon ang karon nga sistema sang mga butang. Ang mga naluwas sa Anaw amo ang mga mahagop nga tuhay sa katawhan sa kabilugan sa ila pagkabuhi. Ginpamatian nila ang paandam sang Dios kag nagpain gikan sa malaut nga kalibutan sadtong tion. “Si Noe kalahamut-an sa mga mata ni Jehova,” siling sang Biblia. ‘Si Noe nagpamatuod sang iya kaugalingon nga walay kasawayan sa iya mga kadungan.’ (Genesis 6:​8, 9) Gikan sa tanan nga katawhan, isa lamang ka pamilya, “pila ka tawo, nga amo, walo ka kalag, ang naluwas sa tubig.” (1 Pedro 3:20) Kag ginsugo sila ni Jehova nga Dios nga nagasiling: “Magmabungahon kag magbuad kag pun-a ang duta.”​​—⁠Genesis 9:1.

20 Ginapasalig kita sang Pulong sang Dios nga “isa ka dakung kadam-an” ang ‘magagua sa dakung kapipit-an.’ (Bugna 7:​9, 14) Daw ano kadamo ang dakung kadam-an? Si Jesus mismo nagsiling: “Makitid ang gawang kag masipot ang dalan nga nagapadulong sa kabuhi, kag pila lamang ang mga nakatultol sini.” (Mateo 7:​13, 14) Kon ipaanggid sa binilyon nga nagakabuhi sa duta karon, diutay lamang ang maluwas sa nagapakari nga dakung kapipit-an. Apang mahimo nga hatagan sila sing kahigayunan nga kaanggid sa ginhatag  sa mga naluwas sa Anaw. Mahimo nga sa sulod sang pila ka tion tugutan ang mga maluwas nga makatigayon sing mga anak subong bahin sang isa ka bag-ong katilingban sa duta.​​—⁠Isaias 65:23.

“Magpadayon Kamo sa Pagbantay”

21, 22. (a) Paano ikaw nakabenepisyo sa pagbinagbinag sang natabo sa tion sang Anaw? (b) Ano ang tuigan nga teksto para sa 2004, kag ngaa dapat naton pamatian ang ginalaygay sini?

21 Bisan pa madugay na nga natabo ang Anaw, nagahatag ini sing isa ka maathag nga paandam nga dapat naton pamatian. (Roma 15:4) Ang mga pag-anggid sang adlaw ni Noe kag sang aton adlaw dapat labi pa nga magpahanumdom sa aton sang kahulugan sang nagakatabo karon kag magpaalisto sa aton sa tulad-kawatan nga pag-abot ni Jesus agod maghukom sa mga malaut.

22 Sa karon, ginatuytuyan ni Jesucristo ang isa ka daku nga pagtukod sa espirituwal. Para sa kalig-unan kag kaluwasan sang matuod nga mga sumilimba, isa ka tulad-arka nga espirituwal nga paraiso ang nagaluntad. (2 Corinto 12:​3, 4) Agod maluwas kita sa dakung kapipit-an, dapat kita magpabilin sa sini nga paraiso. Sa gua sang espirituwal nga paraiso amo ang kalibutan ni Satanas, nga handa sa paglamon sa bisan sin-o nga ginatuyo sa espirituwal. Kinahanglanon gid nga ‘magpadayon kita sa pagbantay’ kag pamatud-an ang aton kaugalingon nga handa para sa adlaw ni Jehova.​​—⁠Mateo 24:​42, 44.

Madumduman Mo Bala?

• Ano ang ginlaygay ni Jesus tuhoy sa iya pagkari?

• Sa ano ginpaanggid ni Jesus ang tion sang iya presensia?

• Sa anong mga paagi kaanggid ang aton tion sa mga adlaw ni Noe?

• Ang aton pagbinagbinag sang mga pag-anggid sang adlaw ni Noe kag sang aton adlaw dapat may ano nga epekto sa aton pagtamod sa pagkahilingagawon sang tion?

[Mga Pamangkot sa Pagtinuon]

[Blurb sa pahina 18]

Ang tuigan nga teksto para sa 2004 amo: “Magpadayon kamo sa pagbantay . . . Pamatud-i man ninyo ang inyo kaugalingon nga handa.”​​—⁠Mateo 24:​42, 44, NW.

[Retrato sa pahina 15]

Ginpamatian ni Noe ang paandam sang Dios. Amo man bala kita?

[Mga retrato sa pahina 16]

“Subong sang mga adlaw ni Noe, mangin amo man ang presensia sang Anak sang tawo”