Yayandikwaga na Luka 9:1-62
-
Balala 12 bamahabwa obwerekezi oku bilolere akasi k’okuhubiri (1-6)
-
Herode amavurugika eju ya Yesu (7-9)
-
Yesu amalisa balume 5 000 (10-17)
-
Petro amaderha oku Yesu ye Kristu (18-20)
-
Yesu amaleba oku bilolere olufu lwage (21, 22)
-
Eby’omwanafunzi w’okuli akwanene kujira (23-27)
-
Yesu amahindamulwa eshusho (28-36)
-
Omusole waliri m’omuzimu amafuma (37-43a)
-
Yesu amashuba leba oku bilolere olufu lwage (43b-45)
-
Abanafunzi bamajira obuhaka oku bilolere inde oli mukulu ahagarhi kabo (46-48)
-
Orhali warhupinga ey’ali oku lunda lwerhu (49, 50)
-
Yesu amalahirwa mu vilaje nguma y’Abasamariya (51-56)
-
Okuntu omuntu akakulikira Yesu (57-62)
9 Yesu ava ahamagala balala 12, abaha obuhashe n’emisi y’okufukuza abazimu n’okufumya endwala.
2 Abarhuma baje kuhubiri Obwami bwa Mungu n’okufumya.
3 Ababwira: “Inta chintu muchiyikirage omu lugenzi, murhahekaga chiro n’enkoni, empamba, omugati, changwa efuranga; murhahekaga chiro na myambaro ebiri.
4 Aliko nk’omuntu abakaribisize omu mwage, muberemo kugera amango mwagaluka.
5 N’ahantu hoshi barhabakaribisize, amango mwamarhenga mw’eyola vile, mukungurhe oluchuchu luli oku magulu menyu yi buba buhamirizi kubo.”
6 Bava bagenda omu teritware yoshi vilaje oku yindi, eyi bali bahubiri emyazi minja n’okufumya amalwala buli hoshi.
7 Herode waliri guvernere we Galilaya ayunva oku bilolere byoshi bili byaba, byamuvuruga bwenene bulala abantu baliri baderha oku Yowane yi wafukire,
8 aliko abandi baliri baderha oku Eliya yi warhengerere, n’abandi oku muguma omu balebi ba mira yi wafukire.
9 Herode aderha: “Nalichire Yowane erhwe. Inde wakaja aba ey’ali ajira ebila byoshi indi nayunva?” Alonza gurhe akabonana naye.
10 Abanafunzi bagalukire, babalira Yesu byoshi bajirire. Yesu ava abaheka omu vile eyirikwa Betsaida, ahantu baba bonyine.
11 Aliko abantu babere bamenya, bamukulikira. Yesu abakaribisa bwinja, ababwira oku bilolere Obwami bwa Mungu, afumya n’abalilwere.
12 Bwabere buli hofi kuyira, balala 12 bayinja emunda Yesu ali, bamubwira: “Obwire abala bantu bagende omu mavilaje n’omu mashwa mali hofi balole ech’okulya n’ahabalala, bulala hanola rhuli hali hale n’abantu.”
13 Aliko ababwira: “Mwabo mubahe ebi balya.” Bamushubiza: “Ntacho rhuherhe olekere migati erhano na fi ebiri, nkabaga nka rhujire kugulira abala bantu boshi ebilyo lyoki byakashobokana.”
14 Kweri, ahola haliri hofi balume 5 000. Aliko abwira abanafunzi bage ntya: “Mubayikaze bigusho-bigusho bya bantu hofi 50.”
15 Bajira ntyo, n’abantu boshi bayikala.
16 Arhola eyola migati erhano n’ezola fi ebiri, alola embingu abigisha. Naho abichagulanga, abiha abanafunzi bage babigabire abola bantu.
17 Nantyo boshi balya bayugurha, barhalagula n’ebichirachira basigazaga, bayunjuza rhurhanda 12.
18 Buzinda abere ali yenyine yasalira, abanafunzi bage bayinja ah’ali, naye ababaza: “Abantu yibaderha oku ndi nde?”
19 Omu kumushubiza baderha: “Yowane Mubatiza, aliko abandi yibaderha mpu Eliya, n’abandi yibaderha mpu muguma w’omu balebi ba mira yi wafukire.”
20 Nabo ababaza: “Bobuno mwabo muli mwaderha oku indi nde?” Petro ashubiza: “Kristu wa Mungu.”
21 Ava abakomereza oku nta muntu n’omuguma babibwirage,
22 Ayongera: “Mwen’omuntu akwanene agere mu malibuko manene, analahirwa n’abashamuka, abakulu b’abadahwa n’abandisi, n’okuyirhwa, n’olusiku lwa kasharhu anafuka.”
23 Abwira abantu boshi ntya: “Nk’omuntu yeshi-yeshi alonzeze kunkulikira akwanene achilahire, anaheka omurhi gwage gw’amateso lusiku oku lwindi n’okugenderera kunkulikira.
24 Bulala owalonza kufumya akalamo kage akaheza, aliko owaheza akalamo kage eju yani oyola yi nji wakafumya.
25 Omu bukweri, bichi omuntu akaba ey’ayungukire nk’apatire ebintu byoshi bili omu gulu aliko akaheza akalamo kage changwa akakashereza?
26 Bulala buli muntu wanyunvira eshoni akayunvira n’ebinwa byani eshoni, Mwen’omuntu naye nj’amuyunvira eshoni amango nj’ayinja omu bukuze bwage, obwa Darha n’obwa bamalayika bachesibwa.
27 Omu bukweri, imbabwirire hali baguma omu bayumangire hanola barhakahonja olufu barhanaza kubona Obwami bwa Mungu.”
28 Hofi siku munane enyuma w’okuderha ebyola binwa, Yesu arhola Petro, Yowane na Yakobo, bashonera oku musozi kusalira.
29 Oku Yesu anali asalira eshusho ly’amalanga mage lyahindamuka, n’emyambaro yage yaba mweru-mweru yarhondera kubaraganya.
30 Ahola han’aho, habonekana balume babiri bali baganira naye. Haliri Musa na Eliya.
31 Abola balume barhengereraga eyi bali babaraganya, barhondera kuganira oku bilolere okugenda kwage kwaliri hofi kuyenerera e Yerusalemu.
32 Petro n’ababo aliri nabo balihondoberere omu ro, aliko bazukire babona obukuze bwa Yesu n’abola balume babiri baliyumangire haguma naye.
33 Okw’abola balume babiri bali hofi kuleka Yesu, Petro amubwira ntya: “Mwalimu, kuli kwinja okuba hanola. Leka rhuyumbake mahema masharhu, elyawe, elya Musa n’elya Eliya.” Arhalimenyere eby’ali aderha.
34 Akw’anachili aderha, echichu charhengerera chabashukulira, bajire mw’echola chichu bayubaha.
35 Omulenge gwava gwarhenga mw’echola chichu gwaderha: “Oyula ali Mugala wani, eyi nachishogere. Mumuyunvirize.”
36 Ok’ogola mulenge gunali gwaderha babona Yesu akala ali yenyine. Aliko bayorha basirire, na mw’ezola siku ntaye babwirire echintu ne chiguma omu bi babonaga.
37 Olusiku lwakulikiragaho, bayandagere barhenga oku musozi, abantu kamama babuganana na Yesu.
38 Ahola han’aho mulume muguma mw’abola bantu kamama aderha ntya: “Mwalimu, inkuhemere oyinje olole omwana wani, bulala yenyine ye mwana njira.
39 Aliko ololage! Omuzimu anazigana kumufarha, n’ahola han’aho anabanda endulu, anamushaganya-shanganya, anarhenga olufula omu bunu, arhanamuleka buzira kumukoromesa.
40 Nalihemere abanafunzi bawe bamufukuze aliko barhagalire.”
41 Omu kushubiza Yesu aderha: “Ego chizazi chibi chirhanagwerhe bwemere, nagenderera kuba nenyu n’okubalembera kugera mangochi? Lerha mugala wawe hanola.”
42 Okw’anali amuyegera, oyola muzimu abanda oyola mwana ahashi, arhondera kumushaganya-shaganya bwenene aliko Yesu akalihira oyola muzimu, afumya oyola mwana amugalulira eshe.
43 Boshi basomezwa n’emisi minene ya Mungu.
Oku banali basomerwa na byoshi aliri ajira, abwira abanafunzi bage ntya:
44 “Muyunvirize munayibuke ebila binwa, Mwen’omuntu alenganywa anahirwa omu fune z’abantu.”
45 Aliko barhayunvaga bichi aliri aderha. Kweri byalibishirwe yi barhabiyunva bwinja. Aliko bayubaha kumubaza oku bilolere ebyaliri aderha.
46 Hava harhengerera obuhaka oku bilolere inde oli mukulu ahakagarhi kabo.
47 Yesu amenyere amawazo mali omu mirhima yabo, orhola omwana mudorho amuyumanza ahaburhambi bwage,
48 ababwira: “Buli yeshi wakaribisa oyula mwana mudorho eju y’ezino lyani, aba eyi nani ankaribisize; na buli yeshi wankaribisize, ey’akaribisize n’owantumaga. Bulala owachigendesa nka mwana mudorho ahakagarhi kenyu ye mukulu.”
49 Yowane aderha: “Mwalimu, rhwalibwene omuntu oli wafukuza abazimu omu kukolesa ezino lyawe, rhwamapima kumubuza bulala arhali akukulikira haguma nerhu.”
50 Aliko Yesu amushubiza: “Murhapimaga mwamubuza, bulala orhali wabapinga ey’ali oku lunda lwenyu.”
51 Bulala esiku zage z’okuhekwa zaliri hofi, abona okw’aje e Yerusalemu.
52 Ava arhuma abarhumwa embere zage. Bagenda, baja omu vilaje y’Abasamariya omu kuntu babe barheganya gurhe ayinja.
53 Bafunda kumukaribisa bulala baliyunvirhe okw’ali agera aja e Yerusalemu.
54 Abanafunzi, Yowane na Yakobo babwene ntyo, babaza: “Waliha, olonzeze rhuhamagale omuliro gurhenge embingu gubasingonyole?”
55 Aliko Yesu ahindamuka abakalihira.
56 Bava baja omu yindi vilaje.
57 Oku banali omu njira, muntu muguma abwira Yesu ntya: “Nakukulikira buli hoshi wakaja.”
58 Aliko Yesu amushubiza: “Banyambwe bajira olukunda, n’enyunyi z’omu chanya zijira enyogo, aliko Mwen’omuntu yewe arhajira chiro ahakalaza erhwe lyage.”
59 Abwira owindi ntya: “Yinja obe mwanafunzi wani.” Oyola muntu ashubiza: “Waliha, orhange ompe oruhusa inje kuhamba darha.”
60 Aliko Yesu amubwira: “Oleke abafu bahambe abafu babo, aliko woyo genda otangaze Obwami bwa Mungu efasi yoshi.”
61 N’owindi muntu abwira Yesu ntya: “Waliha, nakukulikira, aliko orhange ondeke inje kusezera abantu b’omulala gwani.”
62 Yesu amushubiza: “Inta muntu wakaba ali akolesa amashini m’okuhinga akalola enyuma zage, wakaba akwanene Obwami bwa Mungu.”
