Yayandikwaga na Luka 2:1-52
2 Mw’ezola siku, Kayizari Ogisto ahaana erhegeko okw’abantu boshi balamire oku gulu baje kuchiyandikisa.
2 (Elyola lisansima lyabaga ob’oburhanzi eyi Kireniyo ye guvernere we Siriya.)
3 Na buli muntu aja kuchiyandikisiza omu vile y’emunda aburhwaga.
4 Eju y’echola Yosefu naye arhenga e Galilaya omu vile ye Nazareti aja e Yudeya omu vile ya Daudi enayirikwa Betlehemu, bulala aliri w’omu mulala n’omu buko bwa Daudi.
5 Yosefu ajaga kuchiyandikisa na Mariya walikala ali mukage ey’anali hofi kuburha.
6 Oku banali eyola munda, akasanzi ka Mariya k’okuburha kahika.
7 Aburha omwana w’oburhabana, omwana wage w’efula, amuzingira omu birezi, amulyamikiza omu chintu ebirhungano binaliramo; bulala nta fasi balibwene omu nju y’abageni.
8 Mw’eyola teritware mwaliri abangeri baliri embuga ebudufu eyi bali balanga ebirhungano byabo.
9 Ahola han’aho malayika wa Yehova ayimanga embere zabo, n’obukuze bwa Yehova bwabakolezeza enyunda zoshi, bayubaha bwenene.
10 Aliko malayika ababwira ntya: “Murhayubahaga! Bulala indi nabamenyesa emyazi minja yalerhera abantu boshi obusime bunene.
11 Bulala zene omuchunguzi wenyu aburhirwe omu vile ya Daudi. Ye Waliha Kristu.
12 Echimenyeso mwamumenyerako che chinola: Mwabugana enjolyana* ezingirwe omu birezi, elyamikizwe omu chintu ebirhungano binaliramo.”
13 Ahola han’aho bamalayika banene baba haguma n’oyola malayika, barhondera kusingiza Mungu omu kuderha ntya:
14 “Obukuze emwa Mungu oli enyanya bwenene, n’omurhula oku gulu omu bantu bayemererwe naye.”*
15 Oku bamalayika banagaluka embingu ntya, abola bangeri barhondera kubwirana ntya: “Rhugende e Betlehemu rhulole kw’ebyola byabere, ebi Yehova amarhumenyesa.”
16 Bava bagenda juba-juba, babugana Mariya, Yosefu, n’eyola njolyana* elyamikizwe omu chintu ebirhungano binaliramo.
17 Babwene ebyola, barhondera kubala ebi malayika ababwiraga oku bilolere oyola mwana.
18 Na boshi bayunvaga ebinwa by’abola bangeri basomerwa.
19 Aliko Mariya arhondera kubika ebyola binwa omu bwenge n’okubiwazako omu murhima gwage.
20 Naho abangeri bagaluka eyi bali bakuza Mungu bwenene n’okumusingiza eju y’ebibayunvirhe n’ebibabwene. Byaliri bwinja-bwinja nk’oku banababwiraga.
21 Enyuma wa siku munane amango olusiku l’okumukata* lugeraho, bamuha ezino lya Yesu, ezino malayika amuhaga embere Mariya aheke obukule.
22 Kandi, amango olusiku l’okucheswa lugeraho nk’oku Amarhegeko ma Musa maliderhere, Yosefu na Mariya baheka Yesu e Yerusalemu yi baja kumuyerekana embere za Yehova,
23 nk’oku binayandikirwe omu Marhegeko ma Yehova: “Buli murhabana w’efula, akwanene kuyirikwa muchesibwa wa Yehova.”
24 Bahana enterekero nk’oku Amarhegeko ma Yehova malihemere: “Nyunyi ebiri z’entungulu* changwa byana bibiri by’epijo.”*
25 Omu Yerusalemu mwaliri mulume muguma waliyirikirwe Simeoni. Aliri munyakunali, aliyubahire Mungu, aliri alindira amango Mungu arhuliriza Izraeli, n’eroho lichesibwa lyalimuliko.
26 Kandi Mungu aly’amufunulire kugerera eroho lichesibwa okw’arhakafa buzira kubona Kristu wa Yehova.
27 Kugerera obwerekezi bw’eroho lichesibwa, Simeoni aja omu hekalu. N’abazere ba Yesu babere bamulerha omu hekalu omu kuntu bamukolere nk’okw’emigenzo y’Amarhegeko yalihemere,
28 Simeoni arhola oyola mwana omu fune, asingiza Mungu omu kuderha ntya:
29 “Waliha Namahanga, omuja wawe akaja afa omu murhula nk’oku wanaderhaga,
30 bulala nachibwenere n’amesho mani owalerha obuchunguke,
31 eyi wabaga warheganyize embere z’abantu boshi,
32 ali mwangaza gwakula echitambara oku mesho m’amashanja, anali bukuze bw’abantu bawe Izraeli.”
33 Ebyaliri byaderhwa oku bilolere oyola mwana byasomeza eshe na nyina.
34 Kandi Simeoni abagisha n’okubwira Mariya nyina w’oyola mwana ntya: “Tala! Oyula mwana arhuma banene bachikuba* n’abandi banayimanga omu Izraeli. N’abantu bamuderha kubi
35 (nechi, engorho elehere yakurhula), y’amawazo mali omu mirhima ya banene mamenyikana.”
36 Haliri n’omulebikazi waliyirikirwe Ana, mwali wa Fanuweli w’omu buko bwa Asheri. Oyola mukazi alimalire n’eba omu buhya myaka mushanvu yonyine, alikala mugekulu,
37 analiri mushumbakazi* wa myaka 84. Arhagendaga abulwa omu hekalu ey’ali akola akasi kachesibwa ezuba n’ebudufu omu kuchishalisa* n’okusalira amasala m’okulakirira Mungu.
38 Mw’akola kasanzi ayegera Yosefu na Mariya, arhondera kubwira Mungu koko n’okubwira boshi baliri balindira okuchungulwa kwa Yerusalemu oku bilolere oyola mwana.
39 Bamalire kujira byoshi Amarhegeko ma Yehova malihemere, bagaluka e Galilaya omu vile yabo ye Nazareti.
40 Oyola mwana agenderera kukula n’okugwarha emisi, agwarha obwengehe, anagenderera kuyemerwa na Mungu.
41 Abazere bage bagendaga bazigana kuja e Yerusalemu buli mwaka oku lusiku lukulu lwe Pasaka.
42 Yesu ayeneze myaka 12, bagenda naye oku siku zikulu nk’oku banagendaga bajira.
43 Esiku zikulu zabere zahwa barhondera kugaluka eka, aliko Yesu ayorha e Yerusalemu buzira abazere bage okumenya.
44 Baliwazize okw’ali omu chigusho ch’abantu bali babalama nabo. Bamalire olusiku bali balambagira barhondera kumulonzeza oku bantu b’emilala, n’oku bandi balimenyene nabo.
45 Bulala barhamubonaga, bava bagaluka e Yerusalemu eyi banali bamulonza bwenene.
46 Enyuma wa siku esharhu bamubugana omu hekalu, ey’ayikere ahagarhi k’abalimu, ey’ali abayunviriza n’okubabaza ebibazo.
47 Aliko boshi baliri bamuyunviriza baliri basomerwa n’obuhashe bwage b’okuyunva ebintu n’okuntu aliri ashubiza.
48 Abazere bage bamubwene basomerwa bwenene. Nyina amubwira ntya: “Mwana we, gurhe wakarhujirira ebili ntya? Nyono na yisho rhwaliyubahire bwenene eju yawe na ntaho rhurhagerere rhwakulonza.”
49 Aliko abashubiza ntya: “Bulagurhe mwaliri mwandonza? Murhalimenyere oku nkwanene kuba omu nju ya Darha si?”
50 Chiro akaba ntyo, barhamenyaga bichi aliri alonza kubabwira.
51 Bava bagaluka naye e Nazareti, anagenderera kukenga abazere bage. Kandi nyina abika ebyola binwa byoshi omu murhima gwage.
52 Na Yesu agenderera kukula n’okugwarha bwengehe bunene, anagenderera kuyemerwa na Mungu n’abantu.
