Yayandikwaga na Luka 14:1-35
-
Okufumya omulume olwere obulwala b’okuyunjuza amenji omu mubiri olusiku lwe Sabato (1-6)
-
Okuba mwirhohye amango bamakuhamagala obe mugeni (7-11)
-
Ohamagale balala barhakapata echibakugalulira (12-14)
-
Omufano gw’abageni bahanaga empanvu z’okurhabonekana (15-24)
-
Eby’omuntu akwanene kujira y’aba mwanafunzi wa Yesu (25-33)
-
Amango omunyu gwamaheza obununu bwago (34, 35)
14 Lusiku luguma lwe Sabato, Yesu aja kulya ebilyo omu nju y’omukulu w’Abafarisayo, n’abantu baliri bamulola bwenene.
2 Mulume muguma walilwere endwala y’okurhundisa omubiri* aliri embere zage.
3 Bobola Yesu abaza ntya abantu baliyinji Amarhegeko bwenene n’Abafarisayo: “Amarhegeko mayemerere okufumya omuntu olusiku lwe Sabato changwa nanga?”
4 Aliko bayorha basirire. Eju y’echola ahuma k’oyola mulume amufumya amubwira agende.
5 Naho ababaza: “Inde mu mwabo omugala changwa empanzi yage yakarhogera omu chishimu orhakaja kuyikulamo juba-juba olusiku lwe Sabato?”
6 Barhagalaga kumushubiza kw’echola chibazo.
7 Abwene oku abalihamagerwe bali bachishoga efasi z’embere-mbere, ababwira:
8 “Amango muntu mulebe amakuhamagala oku fete y’obuhya, orhayikalaga oku fasi z’embere-mbere. Nkabaga hali owindi muntu ahamagere okengerwe kukulusha.
9 Owabahamagalaga mweshi ayinja anakubwira ‘Lekera oyula muntu efasi yawe.’ Ahola wanaja wagenda n’eshoni oku fasi y’enyuma-nyuma.
10 Aliko amango bamakuhamagala, oyikale oku fasi y’enyuma-nyuma omu kuntu omuntu wakuhamagalaga hanola ayinja anakubwira, ‘Mwira wani, genda oku fasi y’embere.’ Ahola wanapata olukengo embere z’abenyu bageni.
11 Bulala buli yeshi wachizamula ayandagazwa na buli yeshi wachiyandagaza azamulwa.”
12 Enyuma w’ahola abwira owamuhamagalaga ntya: “Amango wamahamagala abantu oku bilyo by’ezuba changwa by’egolo, orhahamagalaga bera bawe, bene-benyu, abantu b’omulala gwawe changwa abaturanyi bawe b’abachire. Nk’ojirire ntyo nabo nji bakakuhamagala nantyo eyi wamapata olwawe luhembo.
13 Aliko amango wamajira efete, ohamagale abakene, abahunzize, ebilema, n’empumi.
14 Ahola wagwarha obusime bulala ntacho bagwerhe bakakujuha, si nji wajuhuhwa amango m’obufuke bw’abanyakunali.”
15 Muguma omu bageni ayunvirhe ntyo aderha: “Ogwerhe obusime ali muntu nji walya ebilyo omu Bwami bwa Mungu.”
16 Yesu amubwira: “Muntu muguma alirheganyize efete nzibuzibu ahamagala bantu banene.
17 Esa y’efete yabere yageraho, arhuma omukozi wage aje kubwira abahamagalwaga ntya, ‘Muyinje bulala ebintu byoshi bikala bili tayari.’
18 Aliko boshi baba nka balipatene, barhondera kulerha empanvu z’okurhabonekana. Ow’oburhanzi aderha, ‘Nagulire eshwa bihemere inje kulirhangula; inkuhemere ombabalire.’
19 Owindi aderha, ‘Nji nagulire nka ekumi bihemere inje kuzilola, inkuhemere ombabalire.’
20 Aliko owindi aderha, ‘Inchizindire kushaba, eju y’echola birhashobokana inyinje.’
21 Oyola mukozi agaluka abwira nahamwabo byoshi baderhere. Nahamwabo akaliha, abwira omukozi wage, ‘Genda juba-juba omu mabarabara mazibuzibu n’omu rhujira rhugekegeke rh’omu vile, olerhe hanola abakene, abahunzize, empumi n’ebilema.’
22 Enyuma w’akasanzi oyola mukozi agaluka aderha, ‘Waliha, ebiwahemaga nabijirire aliko hachili efasi omu chumbi.’
23 Nahamwabo amubwira, ‘Genda omu mabarabara n’omu njira, oseze abantu bayinje y’enju yani eyunjula.
24 Bulala mbabwirire, nta muntu n’omuguma mw’abola balihamagerwe walya oku bilyo byani.’
25 Enyuma waho, abantu kamama baliri babalama haguma na Yesu. Ahindamuka ababwira:
26 “Omuntu yeshi-yeshi wayinja emunda ndi nk’arhashombere eshe, nyina, abana bage, bene-babo, bali-babo chiro n’akalamo kage yewe yenyine arhakaba mwanafunzi wani.
27 Na buli yeshi orhahekere omurhi gwage gw’amateso akankulikira arhakaba mwanafunzi wani.
28 Omufano, inde mu mwabo wakalonza kuyumbaka omunara orharhanga kuyikala akaganja edepanse y’alola akaba agwerhe ebintu bitosheze by’okuguyunjuza?
29 Nk’arhajirire ntyo, hali oku akarhondera omusinji aliko ey’arhagala kugendereza omu kuntu amalirize, n’abantu babona eby’ajirire banarhondera kumushekera,
30 banaderha: ‘Oyula muntu arhondere kuyumbaka aliko arhagala kuyunjuza.’
31 Changwa mwami ohe wakalonza kulwa evita n’owindi mwami orharhanga kuyikala n’abahanuzi bage bakalola akaba basoda bage 10 000 bakagala kulwisa owayinjire kubalwisa n’abasoda 20 000?
32 Omu bukweri nk’abwene oku arhakamuhima amango owabo achili hale, anaba arhuma echigusho ch’abarhumwa baje kuhema omurhula.
33 Intyo kon’okola, mukwanene kumenya oku nk’omuntu arhayemerere alekana n’ebintu byage byoshi, arhakaba mwanafunzi wani.
34 “Omu bukweri, omunyu guba gwinja. Aliko nk’omunyu gwamaheza obununu bwago gurhe bwakashuba kugaluka?
35 Gwanaba eyi ntacho guchimalire oku budaka n’oku mwavu.* Abantu banagukabula. Ogwerhe amarhwiri m’okuyunva ayunve.”
