Yayandikwaga na Luka 22:1-71
-
Abadahwa bamapanga okuntu bayirha Yesu (1-6)
-
Amarheganyo me Pasaka y’obuzinda (7-13)
-
Okurhonderesa Ebilyo by’Egola bya Waliha (14-20)
-
“Owandenganya ali haguma nani ku manola meza” (21-23)
-
Obuhaka bukalihire oku bilolere obukulu (24-27)
-
Yesu amajira endagano y’obwami (28-30)
-
Yesu amaleba oku Petro amuhakana (31-34)
-
Obulagirire b’okuchirheganya; ingorho ebiri (35-38)
-
Yesu ali asalira oku Musozi gwe Mizeyituni (39-46)
-
Bamafarha Yesu (47-53)
-
Petro amahakana Yesu (54-62)
-
Bamashinyagulira Yesu (63-65)
-
Okusambiswa ne Sanendrini (66-71)
22 Olusiku Lukulu lwe Migati Erhali mu Levire, olu banahamagala Pasaka lwaliri hofi kuhika.
2 Abakulu b’abadahwa n’abandisi baliri balonza enjira nyinja bakamuyirhamo bulala baliri bayubaha abantu.
3 Shetani aja omu murhima gwa Yuda, onayirikwa Iskariyote, waliri muguma mu balala 12,
4 Agenda, aja kuganira n’abakulu b’abadahwa, n’abakulu b’abalanzi b’ehekalu oku bilolere okuntu alenganya Yesu emunda bali.
5 Basima bwenene banayunvikana oku bamulipa efuranga.
6 Ayemera anarhondera kulonza akasanzi kenja akamulenganya emunda bali, amango aba ey’arhali na bantu banene.
7 Olusiku lwe Migati Erhali mu Levire* lwahika, olusiku balikwanene kuhaana enterekero ye Pasaka;
8 Yesu ava arhuma Petro na Yowane, ababwira ntya: “Mugende murhurheganyize e Pasaka rhuyilye.”
9 Bamubaza: “Ngahe olonzeze rhujage kuyirheganyiza?”
10 Abashubiza ntya: “Muyunve! Hanola mugera omu vile, mwabuganana n’omulume ohekere akabindi k’amenji, mumukulikire kugera omu nju ajamo.
11 Mubwire nyine eyola nju ntya, ‘Mwalimu arhurhumire rhukubaze: “Ngahe echumba ch’abageni chili nakalira mwe Pasaka haguma n’abanafunzi bani?”’
12 Oyola muntu abayereka echumba chizibuzibu ch’oku etaje chili mw’ebikoleso byoshi, murhurheganyize e Pasaka omola.”
13 Bava bagenda babugana ebintu byoshi nk’oku anababwiraga, barheganya e Pasaka.
14 Akasanzi kahikire ayikala oku meza haguma n’entumwa zage.
15 Ababwira: “Naliherhe nyorha nene y’okulya eyila Pasaka haguma nenyu embere ndibuke.
16 Bulala imbabwirire, intakachiyilya kugera amango yayenera omu Bwami bwa Mungu.”
17 Arhola echikombe, asalira omu kubwira Mungu koko, aderha: “Murhole echila chikombe muchigeze kubuli muguma wenyu,
18 bulala imbabwirire, kurhangirira zene, intakachinywa oku divayi y’emizabibu kugera amango Obwami bwa Mungu bwayinja.”
19 Kandi arhola omugati, asalira omu kubwira Mungu koko, aguchagulanga, abahago aderha: “Ogula gushushanyize omubiri gwani gwahanwa eju yenyu, mugenderere kujira ntya omu kunyibuka.”
20 Ajira ntyo kon’okola n’oku chikombe eyi bamamala kulya ebilyo by’egolo, aderha: “Echila chikombe chishushanyize endagano mpyahya yayenezwa kugerera eshagama yani yasheshwa eju yenyu.
21 Aliko, mulole! Omuntu wandenganya ali haguma nani ku manola meza.
22 Bulala kweri, Mwen’omuntu achigendera nk’oku byabaga byayandikirwe; aliko buli buhanya k’olala wamulenganya!”
23 Bava barhondera kubazana inde mu bowe wakaba eyi yekala kujira ebili ntyo.
24 Chiro akaba ntyo barhondera kujira buhaka bunene yi bamenya inde okwanene kuba mukulu ahagarhi kabo.
25 Aliko ababwira: “Abami b’amashanja banamarhegeka oku chingufu, na balala baherhe obukulu kubo banayirikwa bantu banajira amenja.
26 Aliko mwabo murhakwanene kuba kuguma nabo. S’ahubwe oli mukulu bwenene ahagarhi kenyu akwanene kuba nka ye mudorho bwenene, n’oli wayerekeza akwanene kuba nka mukozi wenyu.
27 Bulala, inde mukulu bwenene ey’oli walya oku meza, ey’oli wamukolera eby’akenere? Arhali oli walya si? Aliko nyono indi nka muntu oli wabakolera.
28 “Chiro akaba ntyo, mwabo mwe mwayorhere muchishwekere haguma nani omu malibuko mani;
29 bobuno namajira endagano haguma nenyu nka kulala Darha ajiraga endagano haguma nani eju y’obwami,
30 omu kuntu mulye n’okunywa oku meza mani omu Bwami bwani, eyi muyikere oku bichumbi by’obwami yi muchira moko 12 me Izraeli olubanja.
31 “Simoni, Simoni, tala! Shetani ali alonza abapate mweshi omu kuntu abayere nka ngano.
32 Aliko nalakirire Mungu bwenene eju yawe y’obwemere bwawe burhahola; nawe hanola ogaluka, okomeze bene-benyu.”
33 Petro ava amubwira: “Waliha, indi tayari kuja haguma nawe omu prizo n’okufa haguma nawe.”
34 Aliko aderha: “Petro, inkubwirire, zene oluhazi lurhabika orhanaza kumpakana kasharhu.”
35 Kandi ababwira: “Amango imbarhuma buzira shaho y’efuranga, na buzira shaho y’ebilyo na buzira birato, hali echintu choshi-choshi mwalibulire? Baderha mpu “Ntacho!”
36 Ashuba kubabwira: “Aliko lero ogwerhe eshaho y’efuranga ayirhole, ogwerhe eshaho y’ebilyo naye ajire ntyo kon’okola, n’orhagwerhe ngorho aguze omwambaro gwage agule engorho.
37 Bulala imbabwirire oku ebyayandikirwe eju yani bikwanene kuyenera, ebiderhere, ‘Aliganjirwe omu bantu barhakenga amarhegeko.’ Bulala ebyola bili byanyenererako.
38 Bava baderha: “Waliha, Tala! Hanola hali ngorho ebiri.” Abashubiza mpu, “Ezola zitosheze.”
39 Arhengere ahola, ava agenda oku Musozi gwe Mizeyituni nk’oku anarhulaga ajira, n’abanafunzi bage bamukulikira.
40 Abere ahikako ababwira: “Mugenderere kusalira yi murharhogera omu chigeregezo.”
41 Arhenga ahabaliri achichunda kugera ah’omuntu akageza ebale omu kulikabula. Afukama arhondera kusalira,
42 aderha: “Darha, akaba olonzeze onkulire echila chikombe, aliko obulonza bwawe b’obujirikage, s’arhali obwani.”
43 Malayika ava arhenga embingu, amubonekera arhondera kumukomeza.
44 Aliko aliyunvirhe mulago gunene bwenene n’echola charhuma agenderera kusalira bwenene; echuka chage chaba nka ntonyi z’eshagama zili zarhogera ahashi.
45 Amalire kusalira, aja emunda abanafunzi bage bali, abugana bajire ero bulala babaga banokere eju y’akahinda.
46 Ababwira: “Bichi byarhumire mwalyama? Muzuke, mugenderere kusalira yi murharhogera omu chigeregezo.”
47 Oku anachili aderha, tala! Abantu kamama bayinja eyi baherekezwe n’omuntu oyirikwa Yuda, muguma mu balala 12, ayegera Yesu y’amuha ebize.
48 Aliko Yesu amubwira: “Yuda, wamalenganya Mwen’omuntu kugerera ebize?”
49 Abalimuzungulukire babere babona ebikala kurhengerera, baderha: “Waliha, rhubarheme n’engorho?”
50 Muguma mubo ava ashurha omukozi w’omudahwa mukulu, amucha okurhwiri kw’ekulyo.
51 Aliko Yesu aderha: “Lekera aho!” Ahuma oku gurhwiri k’oyola muntu n’okumufumya.
52 Yesu abwira abakulu b’abadahwa, abakulu b’abalanzi b’ehekalu n’abashamuka bayinjaga kumufarha ntya: “Mwayinjire n’engorho n’obuhiri wamenya nka chishambo chimwaja kufarha?
53 Naliri naba nenyu buli mango omu hekalu eyi ndi nayigiriza murhananfarhaga. Aliko y’esa yenyu enola, yena sa abali omu mwizimya bakolesa oburhwali bwabo.”
54 Bava bamufarha, bamuheka kugera omu nju y’omudahwa mukulu, aliko Petro aliri abakulikira ey’anali hale.
55 Babere bachana omuliro ahagarhi k’embuga, bayikala haguma, Petro naye ayikala haguma nabo.
56 Aliko mujakazi muguma abona Petro ayikere ey’omwangaza g’omuliro yigwamukolezako. Amulolereza bwenene, aderha: “Oyula mulume naye aliri haguma naye.”
57 Aliko ahakana n’okuderha: “Ego mukazi, oyola muntu ntamuyinji.”
58 Hagerere kasanzi kageke owindi muntu amubona aderha: “Nawe oli muguma wa mubo.” Aliko Petro aderha: “Ego mulume, intali muguma wabo.”
59 N’enyuma wa hofi sa nguma ntya, owindi muntu arhondera kuhanzika bwenene, aderha “Kweri mbabwirire, oyula muntu naye aliri haguma naye, bulala kwanza ali Munyagalilaya!
60 Aliko Petro aderha: “Ego mulume, intenji eby’oli waderha chiro.” N’ahola hana’aho oku anachili aderha, oluhazi lwabika.
61 Waliha ahindamuka n’okulola Petro, bashurhana kw’amasu. Petro ayibuka ebinwa Waliha abaga amubwirire: “Embere oluhazi lubike wampakana kasharhu.”
62 Ava ahuluka agenda alaka n’omugayo gunene.
63 Abalume baliri balanga Yesu barhondera kumushinyagulira n’okumukubirha;
64 Bamalire kumufunga amasu barhondera kumubaza ntya: “Lebaga! Inde okushurhire?”
65 Baderha na bindi bintu binene by’okumudukanga.
66 Bwabere bwacha, abakulu b’abadahwa, abashamuka n’abandisi, babuganana, bamuheka omu chumba chabo che Sanendrini n’okuderha ntya:
67 “Akaba we Kristu, orhubwire.” Aliko abashubiza: “Chiro nababwira, murhayemera haba n’akatyu.
68 Na chiro nababaza, murhanshubiza.
69 Chiro akaba ntyo, kurhangirira bunola, Mwen’omuntu ayikala ewa kuboko kw’ekulyo kwa Mungu oherhe obuhashe.”
70 Eju y’echola bamubaza: “K’okuderha k’oli Mugala wa Mungu?” Abashubiza: “Mwewe mwenyine mwaderhere oku ndi yewe.”
71 Baderha: “Hali obwindi buhamirizi rhuchikenere si? Rhwewe rhwenyine rhwachiyunvirhire ebyaderhere.”
Mahugulo m'efo
^ Ao “engezo.”
