Yayandikwaga na Luka 21:1-38
21 Yesu abere ayinamula amasu, abona abachire bali barhozeza entulo zabo omu sanduku y’okuheba mw’entulo.
2 Abona na mushumbakazi muguma w’omukene arhozeza mu bicheri bibiri by’akachiro kageke.
3 Aderha: “Kweri imbabwirire, oyula mushumbakazi w’omukene yi wahirire mu zinene kulusha abandi boshi.
4 Bulala abandi boshi bahirire mw’entulo oku zibasigazaga, aliko yewe, chiro akaba okw’ali mukene ahirire mu hyoshi aliherhe hy’okumurhabala kulama.”
5 Enyuma waho eyi bantu baguma yibaderha oku bilolere okuntu ehekalu lipambirwe n’amabale makwirire, n’ebintu byahanwaga emwa Mungu,
6 aderha: “Ebila muli mwabona, hagera amango eyi nta bale lyayorha lifarhire oku lindi buzira kuhonongolwa.
7 Bava bamubaza: “Mangochi ebila bintu nji byaba na bichi nji byaba chimenyeso chiyerekene kw’ebila bintu bili hofi kurhengerera?”
8 Abashubiza: “Muchilange inta muntu nj’obarhebekage, bulala banene nji bayinja omu zino lyani eyi bali baderha mpu ‘Nyono nye Kristu, kandi banaderha, ‘Echihe chikwanene chili hofi.’ Nji murhabakulikiraga.
9 Echindi, hanola nji muyunva yibaderha oku bilolere evita n’entambala, nji murhayubahaga bwenene. Bulala ebyola bintu bikwanene birhange bibe, aliko ey’obuzinda burhava bwahika ahola han’aho.”
10 Ababwira: “Eshanja nji lyayumanga lyanalwisa elindi shanja, n’obwami bwanalwisa obwindi bwami.
11 Nji haba emisisi y’egulu ekomere, na hantu oku handi nji haba echibula ch’ebilyo n’amalwala m’okuyahukira, n’abantu nji babona ebintu biyubahisize n’ebimenyeso bikomere birhengerere embingu.
12 “Aliko embere ebyola byoshi bihike, abantu nji babafarha, banabalibuza, nji babaheka omu masinagogi n’okubakabula omu maprizo. Nji babaheka embere z’abami n’emwa baguvernere eju y’ezino lyani.
13 Nantyo nji mwapata orozo l’okuhana obuhamirizi.
14 Che chirhumire mumenye oku birhahemere mpu mube mwarheganya embere w’ebisanzi ebi nji mwasamba.
15 Bulala nji nabaha ebinwa n’obwengehe abanzi benyu chiro bachiheba haguma barhakagala kulwisa changwa okupinga.
16 Echindi, chiro n’abazere benyu, bene-benyu, abantu b’emilala yenyu, na bera benyu nji babalenganya, na chiro baguma mu mwabo nji bayirhwa,
17 n’abantu boshi nji babashomba eju y’ezino lyani.
18 Aliko nta luviri n’oluguma l’oku rhwe lyenyu nji lwahera chiro.
19 Kugerera okulembera nji mwachungula akalamo kenyu.
20 “Aliko amango nji mwabona abasoda bamagorha e Yerusalemu, mwanamenya oku eli hofi kulimbulwa.
21 Abali omu Yudeya nji barhondere kubungira oku misozi, abali omu Yerusalemu nji barhengemo, n’abanji baba bali omu shwa nji barhagalukaga e Yerusalemu.
22 Bulala mw’ezola siku ehaki ekwanene ekolwe, y’ebintu byoshi byayandikirwe biyenera.
23 Buli buhanya oku bakazi nji baba bali bukule n’abanji baba bali bayonsa mw’ezola siku! Bulala nji haba amateso makalihire omu chihugo n’oburhe kw’abola bantu.
24 Baguma nji bayirhwa n’engorho n’abandi banahekwa lubungo omu mashanja moshi; ne Yerusalemu nji yalabarhangwa kuhika amango ebihe by’amashanja byahirirweho byayenera.
25 “Kandi, nji haba ebimenyeso omu zuba, omu mwezi n’omu nyenyezi. Oku gulu nako abantu nji bagwarha obuba n’omulago gunene banabula gurhe bajirage eju y’okuntu enyanja eli yahuma n’omulaba gunene.
26 Omu kulindira ebi nji byahikira egulu, abantu nji bagangabala n’obuba bulala ebintu by’omu mbingu nji byashaganywa.
27 Naho nji babona Mwen’omuntu ayinjire omu chichu, ey’agwerhe emisi n’obukuuze bunene.
28 Aliko amango ebyola nji byarhengerera, nji muyimange n’okuyinamula amarhwe menyu bulala obuchunguke bwenyu buli hofi.”
29 Abaha ogula mufano: “Mulole omurhi gw’etini n’eyindi mirhi yoshi.
30 Amango yamashoga, munachibonera n’okumenya okw’echanda chili hofi.
31 Intyo kon’okola, hanola nji mubona ebila bintu byoshi byarhengerera, mwanamenya k’Obwami bwa Mungu buli hofi.
32 Kweri imbabwirire okw’echila chizazi chirhakahwa n’ebila bintu byoshi birhaza kurhengerera.
33 Embingu n’egulu nji byahirima aliko ebinwa byani birhakafa byahirimire haba n’akatyu.
34 “Aliko muchilange y’emirhima yenyu erhalemererwa n’okulya kuchubusya olugero, okunywa kukabya, n’emilago y’akalamo n’olola lusiku nji lukabarhogerako ahola han’aho
35 nka murhego. Bulala nji lwahikira balala boshi balamire oku gulu lyoshi.
36 Muyorhe muzene n’okulakirira Mungu amango moshi yi nji mugala kufuma ebyola byoshi bikwanene kurhengerera, n’okugala kuyumanga embere za Mwen’omuntu.”
37 Yesu aliri ayigiriza omu hekalu ezuba aliko ebudufu anaja oku musozi guyirikirwe Musozi gwe Mizeyituni.
38 N’abantu baliri balamukira omu hekalu emunda ali yi bamuyunviriza.
