Yayandikwaga na Luka 6:1-49
-
Yesu, “Mukulu we Sabato” (1-5)
-
Okufumya omuntu waligwerhe efune ehunzize (6-11)
-
Entumwa 12 (12-16)
-
Yesu ali ayigiriza n’okufumya (17-19)
-
Abagwerhe obusime n’abagwerhe obuhanya (20-26)
-
Okuzigira abashombanyi (27-36)
-
Muleke okuchira abandi olubanja (37-42)
-
Buli murhi gunamenyikana kugerera amatunda mago (43-45)
-
Enju eyumbakirwe bwinja; enju erhaherhe omusinji gukomere (46-49)
6 Lusiku luguma lwe Sabato eyi Yesu y’agera omu mashwa m’engano, abanafunzi bage barhondera kuhagula engano banazivunga n’efune banazihekenya.
2 Eju y’echola Bafarisayo baguma baderha: “Bulagurhe yimwajira ebirhakwanene kujirwa olusiku lwe Sabato?”
3 Aliko omu kubashubiza Yesu ababwira: “Murhasomaga ebi Daudi ajiraga amango yewe n’abalume aliri nabo bayunvaga enzara?
4 Okuntu ajaga omu nju ya Mungu, bamuha emigati y’okuyerekanwa embere za Mungu ayilya ayiha n’oku balume aliri nabo, n’obola erhalikwanene kulibwa n’omuntu yeshi-yeshi olekere abadahwa bonyine?”
5 Ashuba kubabwira ntya: “Mwen’omuntu ye Mukulu we Sabato.”
6 Olwindi lusiku lwe Sabato, aja omu sinagogi arhondera kuyigiriza. Omola mwaliri omulume ohunzize okuboko.
7 Abandisi n’Abafarisayo baliri balolereza Yesu bwinja-bwinja, omu kuntu balole akaba afumya omuntu olusiku lwe Sabato, yi babona echi bakamusidakako.
8 Aliko Yesu amenyere amawazo mabo, abwira oyola mulume walihunzize okuboko: “Yinja oyumange ahagarhi.” Ava ayinja ayumanga ahola.
9 Naho Yesu ababwira: “Leka mbabaze; Amarhegeko mayemerere okujira echinja changwa echibi, okuchungula omuntu changwa okumuyirha olusiku lwe Sabato?”
10 Amalire kubalola boshi eyi n’eyi, abwira oyola mulume ntya: “Lambula okuboko kwawe.” Alambula okuboko, kwava kwafuma.
11 Aliko barukura bwenene barhondera kubazana gurhe bajirage Yesu.
12 Lusiku luguma azamukira oku musozi kusalira, amala obudufu boshi ey’ali asalira emwa Mungu.
13 Bwabere bwacha ahamagala abanafunzi bage achishoga 12 mubo, abayirika intumwa.
14 Haliri: Simoni, ey’ayinjaga kuyirika Petro, Andreya mwene-wabo, Yakobo, Yowane, Filipo, Bartolomayo,
15 Matayo, Tomasi, Yakobo mugala wa Alfayo, Simoni waliyirikirwe “Muntu w’obushiru,”
16 Yuda mugala wa Yakobo na Yuda Iskariyote wayinjaga kuba mulenganyi.
17 Bava bayandagala haguma bayimanga oku fasi elambukire. Haliri banafunzi bage banene n’abandi bantu kamama barhengereraga omu Yudeya yoshi, e Yerusalemu, n’omu teritware ye Tiro ne Sidoni yaliri hofi n’enyanja. Bayinjaga yi bayunviriza Yesu, anafumye abalwala babo.
18 Afumya chiro na balala baliri balibuzwa n’abazimu.
19 N’abantu boshi baliri balonza bamuhumeko bulala emisi yaliri yamurhengamo yanabafumya boshi.
20 Ayinamula amasu, alola abanafunzi bage arhondera kubabwira:
“Abagwerhe obusime ali mwabo muli bakene, bulala Obwami bwa Mungu buli bwenyu.
21 “Abagwerhe obusime ali mwabo muli nzara, bulala nji mwayuguswa.
“Abagwerhe obusime ali mwabo muli mwalira zene, bulala nji mwasheka.
22 “Abagwerhe obusime ali mwabo amango abantu bamabashomba, banabafukuza, banabadukanga* n’okuderha oku muli bantu babi eju ya Mwen’omuntu.
23 Amango byamaba ntyo, muchishinge munagwarhe busime bunene bwenene bulala oluhembo lwenyu luli lunene omu mbingu. Bulala intyo kon’okola ku bashokuliza babo baliri bakolera abalebi.
24 “Aliko buli buhanya bwenyu mwabo bachire bulala munaba eyi mwapatire echirhulirizo chenyu chiyenere.
25 “Buli buhanya bwenyu mwe muyugurhire bulala nji mwayunva enzara.
“Buli bahanya bwenyu mwe muli mwasheka zene, bulala nji mwachiganya n’okulira.
26 “Buli buhanya bwenyu amango abantu boshi bamabaderha bwinja, bulala intyo ku bashokuliza babo baliri bakolera abalebi b’obubeshi.
27 “Aliko mbabwirire mwabo muli mwanyunviriza: Mugenderere kuzigira abanzi benyu n’okukolera abashombanyi benyu ebinja,
28 mugishe abali babavuma, munasalirire abali babadukanga.*
29 Nk’omuntu amakushurha echigalo oku rhama, omuhindamulire n’elindi; nk’omuntu amakunyega egoti lyawe orhamulahiriraga chiro n’akanzo.
30 Buli yeshi wakuhema omuhe, na buli yeshi wakunyega ebintu byawe, orhamuhemaga akugalulirebyo.
31 “Kandi, ebi mwakasima abantu babakolere nenyu bimunabakolerage.
32 “Nka muzigire abanabazigira, lukengo luhe mwakaba mukwanene? Bulala chiro n’abanyabyaha banazigira abanabazigira.
33 Na nka mwamakolera amenja abanabakolera amenja, lukengo luhe mwakaba mukwanene? Chiro n’abanyabyaha banajira intyo kon’okola.
34 Kandi, nka mwamayindika balala mumenyere oku bakabagalulira, lukengo luhe mwakaba mukwanene? Bulala chiro n’abanyabyaha banayindika ababo banyabyaha eyi banamenyere oku babajuha ebi patene n’ebi babayindikaga.
35 Ahubwe mugenderere kuzigira abanzi benyu, mukole amenja munayindike buzira kulangalira oku babagalulira enyungu, bulala oluhembo lwenyu lwaba lunene, mwanaba bagala b’Oli Enyanya Bwenene, bulala anayereka obwinja abantu barhajira shukrani n’ababi.
36 Mugenderere kuyerekana olukogo bulala Yisho naye anayerekana olukogo.
37 “Echindi, muleke okuchirana olubanja yi nenyu nji barhabachira olubanja, muleke n’okuhesa abandi amagosa yi nenyu nji barhabahesa amagosa.
38 Mugenderere kubabalirana nenyu nji mwababalirwa. Mugwarhe engeso y’okuhaana nenyu babaha, nji mwarhega omwambaro gwenyu banasheshera m’omulengo gwinja, gusindagizwe banagushaganya gwanayunjula bwenene kugera aha byarhondera kusheshekala. Bulala omulengo munalengera mw’abandi gu nenyu nji babalengeramo.”
39 Kandi abaha ogula mufano: “Empumi erhakayerekeza eyabo mpumi. Nka bibere ntyo bombi banarhogera omu chishimu. Arhali ntyo?
40 Omwanafunzi arhakalusha mwalimu wage, aliko buli yeshi wayigirizwe bwinja aba kuguma na mwalimu wage.
41 Bulagurhe wakabona ehirhi hili omu lisho lya mwene-wenyu aliko ey’orhabona echisinde chili omu lisho lyawe?
42 Gurhe wakabwira mwene-wenyu mpu, ‘Mwene-werhu, leka inkukule ehirhi hikuli omu lisho, n’obola ogwerhe echisinde omu lyawe? Ego we ndyalya we, orhange okule echisinde chili omu lisho lyawe y’obona bwinja gurhe wakula ehirhi hili omu lisho lya mwene-wenyu.
43 “Nta murhi gwinja gunayana amatunda mabi, na nta murhi gubi gunayana amatunda menja.
44 Bulala buli murhi gunamenyikana kugerera amatunda mago. Omufano, abantu barhakaja kushalula etini oku murhi gw’enkereri changwa mpu bashalule emizabibu oku mishakishaki.
45 Omuntu mwinja anakula ebintu binja omu depo nyinja y’omurhima gwage, aliko omuntu mubi anakula ebintu bibi omu depo mbi y’omurhima gwage. Bulala obunu bunaderha ebiyunjwire omu murhima.
46 “Bulagurhe muli mwampamagala ‘Waliha! Waliha!’ aliko eyi murhakola ebindi nababwira?
47 Buli muntu wayinja emunda ndi, anayunviriza ebinwa byani n’okubikola, nababwira ali nka nde:
48 Ali nka muntu walonzaga kuyumbaka enju, achimbula bwenene kugera eshishi ayumbaka omusinji oku bale. Obuhindule bwarhengerera, olwinji lwatomboka lwachishurha kw’eyola nju aliko erhashaganyikaga bulala yaliyumbakirwe bwinja.
49 Oku bwindi, omuntu onayunviriza aliko ey’arhakola eby’ayunvirhe, ali nka muntu wayumbakaga enju oku budaka buzira kujira omusinji. Olwinji lwayinja lwachishurha kw’eyola nju, ahola han’aho yagwa n’okushanduka yoshi.”
