Yayandikwaga na Luka 4:1-44
4 Yesu abere ayunjwire eroho lichesibwa, arhenga oku Yordani, eroho lyamuheka eyi n’eyi omu rungu
2 mu siku 40. Oku anali omola rungu Ibilisi amugeregeza. Mw’ezola siku zoshi nta kalyo n’akatyu alire. Ezola siku zabere zahwa, ayunva enzara.
3 Eju y’echola Ibilisi ayinja amubwira: “Akaba onali mugala wa Mungu, bwira elila bale lihinduke mugati.”
4 Aliko Yesu amushubiza: “Amandiko maderhere, ‘Omuntu arhakwanene kulama oku mugati gonyine.’”
5 Enyuma w’aho, amuheka oku musozi gulehere amuyereka amami moshi m’oku gulu chaligumira.
6 Naho Ibilisi amubwira: “Naguha amala mami moshi n’obukuze bwamo, bulala nabihabirwe inambiha n’eyindonzeze.
7 Che chirhumire, okajira echijiro ch’obuharamye embere zani, byoshi byaba byawe.”
8 Yesu amushubiza: “Amandiko maderhere, ‘Yehova Mungu wawe y’okwanene kuharamya na yenyine y’okwanene kukolera akasi kachesibwa.’”
9 Kandi amuheka e Yerusalemu, amuyimanza oku kasongero* k’ehekalu amubwira: “Akaba onali mugala wa Mungu, rhenga hano ochikabule ahashi,
10 bulala amandiko maderhere: ‘Aha bamalayika bage erhegeko oku bikulolere, yi bakulanga,’
11 echindi, ‘Bakuheka omu fune zabo y’orhabanda okugulu kwawe oku bale.’”
12 Omu kushubiza, Yesu amubwira: “Amandiko maderhere, ‘Orhakwanene kugeregeza Yehova Mungu wawe.’”
13 Bobuno, Ibilisi amalire ebyola bigeregezo byoshi, arhanga kumuleka, alindira akandi kasanzi kakwanene.
14 Yesu agaluka e Galilaya ey’ayunjwire emisi y’eroho. Abantu barhondera kumuderha bwinja omu teritware zoshi z’eyola munda.
15 Arhondera kuhubiri omu masinagogi mabo, n’abantu boshi baliri bamuha olukengo.
16 Enyuma w’aho, aja e Nazareti emunda akuliraga, na nk’okw’analikomere kujira olusiku lwe Sabato, aja omu sinagogi ayimanga y’asoma amandiko.
17 Bamuha echitabu ch’omuzingo ch’omulebi Isaya, achizingula, abona ahabayandikire ntya:
18 “Eroho lya Yehova lindiko, bulala anshigire amavurha yi ntangaza emyazi minja oku bakene. Antumaga yi ntangaza obuhuru oku bafungwa, okujira empumi zibone, okuluhula abali balibuzwa,
19 n’okuhubiri omwaka gwa Yehova g’okuyerekana olukogo.”
20 Amalire, azinga echola chitabu ch’omuzingo achigalulira omukozi w’omu sinagogi, ayikala; abantu boshi baliri omu sinagogi bamuseza kw’amasu.
21 Ababwira: “Zene, olula lwandiko mwamamala kuyunva lwayenere.”
22 Boshi barhondera kuhana obuhamirizi bwinja oku bimulolere n’okusomerwa n’ebinwa bisimisize aliri aderha, bayinja babwirana: “Oyula arhali mugala wa Yosefu si?”
23 Eju y’echola ababwira: “Kweri, mwankolesa kw’ebila binwa biderhere, ‘Munganga, chifumya wenyine. Rhwayunvirhe ebintu wakolere e Kapernaumu, ojage wabikola na hanola omu vile y’emwenyu.’”
24 Ayongera ntya: “Kweri imbabwirire, inta mulebi onakengwa omu teritware y’emwabo.
25 Omufano, imbabwirire okuli: Omu mango ma Eliya haliri bashumbakazi banene omu Izraeli. Amango envula emala myaka esharhu na myezi ndarhu erharhoga, enzara nene yaba omu chihugo choshi.
26 Chiro akaba ntyo, barharhumaga Eliya emw’abola bakazi olekere emwa mushumbakazi muguma we Serafati omu chihugo che Sidoni.
27 Kandi haliri bantu banene balilwere ebibenzi omu Izraeli omu siku z’omulebi Elisha; aliko ntaye n’omuguma wafumizwe olekere Naamani w’Omusiriya.”
28 Boshi baliri omu sinagogi bayunvaga ebyola binwa bakaliha bwenene,
29 bayumuka, bamukula omu vile, bamuheka oku songi ly’omusozi evile yabo yaliyumbakirweko, omu kuntu bamukabule arhange erhwe ahashi.
30 Aliko abagera ahagarhi achigendera.
31 Ava ayandagalira e Kapernaumu, vile nguma ye Galilaya. Aliri ayigiriza abantu olusiku lwe Sabato,
32 basomerwa n’okuntu aliri ayigiriza, bulala aliri aderha n’oburhwali.
33 Omu sinagogi mwaliri omuntu walifarhirwe n’omuzimu, ava ayama ntya n’omulenge gunene:
34 “Yooo! Ego Yesu we Nazareti, bichi oli warhulonzako? Wayinjire kurhuharabisa* si? Imenyere bwinja-bwinja oli inde, oli Muchesibwa wa Mungu!”
35 Aliko Yesu amukalihira, amubwira ntya: “Sira, onamurhengemo.” Oyola muzimu amalire kubanda oyola muntu ahashi ahagarhi kabo, amurhengamo buzira kumujira kubi.
36 Boshi basomerwa, barhondera kubwirana ntya: “Binwa nyabachi ebila? Bulala ali akalihira abazimu n’oburhwali n’emisi, banagenda!”
37 Emyazi oku bimulolere yagenderera kuyenera omu materitware moshi m’eyola munda.
38 Yesu arhengere omu sinagogi, aja emwa Simoni. Nazala wa Simoni aliherhe ehoma likalihire, bahema Yesu amurhabale.
39 Yesu ava agenda ayinama ahali, akalihira elyola homa, ehoma lyachika. Ahola han’aho ayimanga arhondera kubarheganyiza eby’okulya.
40 Ezuba lyazikire, boshi baliherhe abantu balwere endwala za buli buko babalerhera Yesu. Abafumya omu kuhira buli muguma wabo kw’efune.
41 N’abazimu barhondera kurhenga omu bantu banene n’okuyama ntya: “Oli Mugala wa Mungu.” Aliko abakalihira arhanachibayemereraga baderha, bulala balimenyere oku ye Kristu.
42 Lyabere sezi aja ah’akaba yenyine, abantu kamama barhondera kumuhuruga, bava bahika emunda aliri, balonza kumubuza arhajaga hale nabo.
43 Aliko ababwira: “Inkwanene mpubiri emyazi minja y’Obwami bwa Mungu omu zindi vile nazo, bulala k’akasi bantumaga nkole.”
44 Ava agenda kuhubiri omu masinagogi me Yudeya.
