Yayandikwaga na Luka 8:1-56
-
Abakazi baliri baherekeza Yesu (1-3)
-
Omufano g’omuhinzi wajaga kubyala (4-8)
-
Echarhumaga Yesu akolesa emifano (9, 10)
-
Okufasiriya omufano g’omuhinzi wajaga kubyala (11-15)
-
Etara lirhafunikwa (16-18)
-
Bene-babo Yesu na nyina (19-21)
-
Yesu amarhuleza omulaba (22-25)
-
Yesu amarhuma abazimu omu ngulube (26-39)
-
Mwali wa Yairo; mukazi muguma amahuma oku mwambaro gwa Yesu (40-56)
8 Kasanzi kageke enyuma waho, Yesu arhondera kubalama kurhenga omu vile anaja omu yindi na vilaje oku yindi ey’ali ahubiri emyazi minja y’Obwami bwa Mungu. Aliri na balala 12,
2 na bakazi baguma Yesu abaga afumize amalwala n’okubafukuza mw’abazimu. Haliri: Mariya waliyirikirwe Magadalene bafukuzaga mu bazimu mushanvu,
3 Jani muka Kuza waliyumangiire enju ya Herode, Suzana, n’abandi bakazi banene baliri babakolera ebi bakenere omu kukolesa ebirugu byabo.
4 Abantu kamama babere bachigusha haguma n’abandi bantu barhengaga eyi n’eyi omu mavile, arhondera kuganira nabo kugerera ogula mufano:
5 “Muhinzi muguma ajaga kubyala emburho. Okw’anali abyala,* mburho ziguma zarhogera oku njira, zalabarhwa, n’enyunyi z’omu chanya zayinja zazilya.
6 Ezindi zarhogera oku bale. Zabere zamera, zayuma bulala zirhapataga amenji.
7 Ezindi zagwa omu mishaki, n’eyola mishaki yakula haguma nazo yazifundeza.
8 Aliko ezindi zarhogera omu budaka bwinja. Zabere zamera zayana matunda manene zachiyongera kali 100.” Amalire kuderha ebyola bintu, aderha ntya n’omulenge: “Ogwerhe amarhwiri m’okuyunva ayunve.”
9 Aliko abanafunzi bage bamubaza bichi ogola mufano guderhere.
10 Abashubiza: “Mwabo mwahabirwe obuhashe b’okuyunva esiri zichesibwa z’Obwami bwa Mungu, aliko abandi banabibona nka mifano konyine. Che chirhumire chiro balola, banalola aliko eyi ntacho babona, na chiro bayunviriza, banayunviriza aliko eyi barhayunva ebyaderherwe k’okuderha gurhe.
11 Muyunve ogula mufano k’okuderha gurhe: Emburho guli mwazi g’Obwami.
12 Ezarhogeraga oku njira bali bantu banayunva omwazi g’Obwami aliko Ibilisi anayinja anagushigula omu mirhima yabo yi barhagwarha obwemere bakachunguka.
13 Ezarhogeraga oku bale bali bantu banayunva omwazi g’Obwami, banaguyemera n’obusime aliko eyi nta mizi baherhe. Banagwarha obwemere kasanzi kageke, aliko amango m’ebigeregezo banachika entege.
14 Ezarhogeraga omu mishaki, bali bantu banayunva omwazi g’Obwami aliko bulala bali bahekwa eyi n’eyi n’emilago, obuchire, n’ebintu by’okuchisimisa bya kanola kalamo byanabafundeza bwenene eyi barhajira amajambere.
15 N’ezarhogeraga omu budaka bwinja bali bantu banayunva omwazi g’Obwami n’omurhima gwinja, banagubika omu murhima, n’okuyana amatunda omu kulembera.
16 Nta muntu wakayusa kukonga etara akashuba kulifunika n’echintu changwa akalihira omu ntalule, s’ahubwe analihira oku chinara ch’etara y’abantu boshi baja omu nju babona omwangaza.
17 Bulala nta chintu chabishirwe chirhakabishulwa na nta chintu chafunikirwe bwinja-bwinja chirhakafunulwa.
18 Che chirhumire mulole bwinja okuntu munayunviriza, bulala buli yeshi ogwerhe obumenyi bamuyongerera obwindi, aliko orhagwerhe bumenyi, na hityuli akaba awazize okw’agwerhe bamunyegahyo.
19 Bene-babo na nyina bayinja kumulola aliko barhagalaga kuhika ahali bulala abantu baliri kamama.
20 Bobola bamubwira: “Nyoko na bene-benyu bayimangire ahambuga bali balonza bakubone.”
21 Abashubiza ntya: “Nyama na bene-berhu bali balala banayunviriza echinwa cha Mungu n’okuchikolesa.”
22 Lusiku luguma, Yesu n’abanafunzi bage baja omu bwarho, ababwira ntya: “Rhuyambuke rhuje oku lwindi lunda lw’enyanja.” Bava bagenda.
23 Aliko oku banali bagenda, Yesu ajero. Omulaba gukalihire gwarhengerera, amenji marhondera kuyunjula omu bwarho, omu kuntu baba eyi bali omu buhanya.
24 Bava bamuchula bamubwira ntya: “Mwalimu, Mwalimu, kufa kuno!” Azuka akalihira echiyaga n’ebivundu by’omulaba; byarhulera haba endera.
25 Kisha ababaza: “Ngahe obwemere bwenyu buli?” Aliko baliyubahire bwenene n’okusomerwa, barhondera kubwirana: “Oyula muntu ali nde kanuni? Bulala ali arhegeka chiro n’omuyaga n’amenji byanamukenga.”
26 Basika omu teritware y’Abagerasene elolene ne Galilaya.
27 Yesu ahikire eshi, abuganana n’omulume wa mw’eyola vile waliri mw’abazimu. Abaga amamala siku zinene ey’arhayambala, arhalama omu nju, s’eyo mumashinda mwanalama.
28 Anabere abona Yesu ntya abanda endulu n’okuchikweba embere zage, aderha ntya n’omulenge gunene: “Bichi oli wandonzako si Yesu Mugala wa Mungu Oli Enyanya Bwenene? Inkuhemere orhandibuzaga.”
29 (Bulala Yesu abaga arhegekere oyola muzimu kw’arhenge m’oyola muntu. Oyola muzimu abaga ey’anafarha oyola muntu turu zinene. Banaliri bazigana kumushweka m’obulegule n’amapingu, banayinja bamulanga, aliko byoshi aliri abicha, n’oyola muzimu aliri amuheka omu fasi zirhali ku bantu.)
30 Yesu amubaza: “Ezino lyawe we nde?” Amushubiza: “Nye Lejiyo,” bulala indi mu bazimu banene.
31 Abola bazimu bagenderera kurhebereza Yesu arhabarhumaga omu abiso.
32 Bulala hofi n’ahola haliri ngulube zinene zaliri zalisa oku musozi, bamulakirira abayemerere baje mw’ezola ngulube, ava abayemerera.
33 Abola bazimu barhenga m’oyola mulume baja mw’ezola ngulube; ezola ngulube zagenda zalibirha zarhoga oku rukumba zagwa omu nyanja, zava zazika.
34 Aliko abangeri b’ezola ngulube babwene ebyabere, balibirha baja kubibala omu vile n’omu vilaje.
35 Abantu baja kulola bichi ebyola byabere. Bayinja emunda Yesu ali, babugana oyola muntu warhengaga mw’abazimu, ayambere, obwenge bwage bwarhulerere, ayikere omu magulu ma Yesu, bayubaha.
36 Ababonaga gurhe ebyola byaba barhondera kubalira abola bantu gurhe oyola mulume waliri mw’abazimu afumaga.
37 Bantu banene baliturene ne teritware y’Abagerasene babwira Yesu agende arhenge eyola mwabo bulala baliyubahire bwenene. Ava aja omu bwarho y’agenda.
38 Oyola mulume waliri mw’abazimu agenderera kurhebereza Yesu bagende naye, aliko Yesu arhamuyemereraga, amubwira ntya:
39 “Ogaluke eka, ogenderere kubala ebi Mungu akujirire.” Ava agenda ey’ali atangaza omu vile yoshi ebi Yesu amujirire.
40 Yesu abere agaluka abantu kamama bamukaribisa bwinja bulala boshi baliri bamulinga.
41 Bobola mulume muguma waliyirikirwe Yayiro ayinja. Aliri mwimangizi w’esinagogi. Achikabula oku magulu ma Yesu arhondera kumurhebereza ayinje emwage,
42 bulala omwana wage muguma w’obunyere analiherhe, wa myaka 12 ntya aliri hofi kufa.
Yesu abere arhondera kugenda ntya, abantu kamama bamufundeza.
43 Ahola haliri omukazi wabaga amamala myaka 12 ey’alwere obulwala b’okuva eshagama, na nta muntu waligalire kumufumya.
44 Arhengerera enyuma ahuma oku mukunjo g’omwambaro gwa Yesu gw’enyanya, n’aho han’ahola aleka kuva eshagama.
45 Yesu ava aderha: “Inde wampumireko?” Oku buli muguma y’ahakana, Petro aderha: “Mwalimu abantu kamama bakuzungulukire banakufundezeze.”
46 Yesu aderha: “Hali omuntu wampumireko, bulala nyinji okw’emisi yantengeremo.”
47 Abwene oku bamenyere eby’ajirire, oyola mukazi ayinja adirhimana, achikabula embere za Yesu n’okuderha embere z’abantu boshi echarhumaga amuhumako n’okuntu afumire aho han’ahola.
48 Aliko Yesu amubwira: “Mwali wani, obwemere bwawe bwakufumizye. Genda n’omurhula”
49 Oku Yesu anachili aderha, murhumwa muguma w’omwimangizi w’esinagogi ayinja aderha: “Mwali wawe afire; orhachigendereraga kubuza Mwalimu omurhula.”
50 Yesu ayunvirhe ntyo, amubwira: “Orhayubahaga, ofe chakugwarha obwemere, mwali wawe alama.”*
51 Ahikire aha mwa Yayiro, arhayemeraga owindi muntu amukulikira omu nju olekere Petro, Yowane, na Yakobo n’abazere b’oyola mwananyere.
52 Aliko abantu baliri balaka n’okuchishurha-shurha eju y’akahinda k’oyola mwana. Yesu ava ababwira: “Muleke okulira, bulala arhafire s’ajire ero.”
53 Barhondera kumushekera omu kumuha akanyabwinyo bulala baliyinji k’oyola mwana afire.
54 Aliko Yesu amufarha efune amuhamagala: “Mwana-wani, zuka!”
55 Omuka gwage gwamugalukamo, aho han’ahola ayimanga na Yesu aderha oku bamuhe ebilyo.
56 Abazere bage basima bwenene, aliko Yesu abakomereza oku nta muntu babwirage ebyabere.
