Yayandikwaga na Luka 16:1-31
16 Naho ashuba kubwira abanafunzi bage ntya: “Haliri omuchire waligwerhe omwimangizi w’ebintu byage, bayinja kumusidaka emwa nahamwabo oku ali akolesa ebikulo byage kubi.
2 Amuhamagala amubwira, ‘Bye bichi ebila nayunvirhe oku bikulolere? Nyereka ebintu nakushingizaga bulala orhachikwanene kuba mwimangizi w’enju yani.’
3 Oyola mwimangizi arhondera kuchibwira ntya, ‘Nahamwerhu akala kunfukuza oku kasi k’obwimangizi, gurhe naja najira si berhu? Nta misi ngwerhe y’okuhinga, nakayunva n’eshoni z’okuhemuza.
4 Ahaa! Namamenya gurhe najira omu kuntu hanola bankula oku kasi k’obwimangizi abantu nji bankaribise ahamwabo.’
5 Ahamagala buli muguma waliri omu deni lya nahamwabo, abaza ow’oburhanzi, ‘Deni lingana gurhe ogwerhe nahamwerhu?’
6 Amushubiza, ‘Bipimo 100 by’amavurha m’omuzeyituni.’ Amubwira, ‘Rhola akaratasi kayandikirwe kw’ebi mwayunvikanaga oyandike juba-juba bipimo 50.’
7 Abaza owindi ntya, ‘Nawe oli omu deni lingana gurhe?’ Aderha, ‘Bipimo bizibuzibu 100 by’engano.’ Amubwira, ‘Rhola akaratasi kayandikirwe kw’ebi mwayunvikanaga oyandike 80.’
8 Nahamwabo amusingiza okuntu akoleseze obwengehe; chiro akaba oku arhaliri munyakunali, bulala oku bilolere okuntu abantu bakakolera abandi, abantu ba mu linola gulu baba bengehe kulusha abantu bali omu mwangaza.
9 “Kandi imbabwirire: Muchijirire abera kugerera obuchire burhali b’okunali, omu kuntu hanola nji buhwa nji babakaribise omu fasi z’okulama esiku n’amango.
10 Omuntu oli mwimana omu bintu bigeke bwenene, ey’anali mwimana omu bintu binene, n’omuntu orhali munyakunali omu bintu bigeke, ey’arhanali munyakunali omu binene.
11 Nka murhachiyerekene oku muli bemana omu buchire burhali b’okunali, inde wakaja abashingiza obuchire b’okuli?
12 Na nka murhachiyerekene oku muli bemana omu kukolesa obuchire bwa bene, inde wakaja abaha obwenyu-bwenyu buchire?
13 Nta muntu wakaba muja wa bawaliha babiri, bulala nk’ajirire ntyo agaya muguma anasima owindi, changwa anachishwekera ku muguma, anasuzagura owindi. Murhakaba baja ba Mungu mukanaba baja b’obuchire.”
14 Abafarisayo bayunvirhe ebyola byoshi barhondera kushekera Yesu, bulala bagendaga basima efuranga bwenene.
15 Ava ababwira: “Mwabo munachiyerekana oku muli banyakunali embere z’abantu, aliko Mungu ayinji emirhima yenyu. Bulala eby’abantu banabona oku bili by’akachiro, biba bintu bishologoseze embere za Mungu.
16 Amarhegeko n’Abalebi byaliriho kugera ku Yowane. Kurhonderera agola mango, Obwami bwa Mungu y’emyazi minja eli yatangazwa. N’abantu ba buli buko yibachihangana yi babuhikira.
17 Kweri, byakayoroha embingu n’egulu bihere ah’ali h’akatomo k’eherufi y’Amarhegeko okuhera buzira kuyenera.
18 “Buli muntu onashanda obuhya na mukage anashaba owindi; anaba ey’ajirire obugonyi, na buli muntu onashaba omukazi washandire obuhya n’eba anaba ey’ajirire obugonyi.
19 “Haliri mulume muguma w’omuchire wagendaga azigana kuyambala emyambaro ekwirire y’erangi ly’omushonga n’emyambaro minja y’ebinusi. Aliri achisimisa buli lusiku n’okulama akalamo k’okuchisimisa.
20 Aliko bagendaga balerha muntu muguma onahemuza onayirikwa Lazaro banamuyikaza embere z’omulyango g’oyola muchire, aligwerhe n’ebihulu oku mubiri goshi.
21 Agendaga achifija gurhe akalya oku byarhogere kurhenga oku meza g’oyola muchire. Chiro n’embwa zagendaga zayinja kukomba ebihulu byage.
22 Enyuma w’esiku, oyola muntu w’okuhemuza ava afa na bamalayika bamuheka bamuheba eburhambi bwa Abrahamu.
“Oyola muchire naye afa, bamuhamba.
23 Oku anali omu shinda ali ateseka, ayinamula amesho alangira Abrahamu eyi na Lazaro ali eburhambi bwage.
24 Ava ahamagala aderha, ‘Darha Abrahamu, onyunvire obonjo, orhume Lazaro ahebe esongi ly’omudoke gwage omu menji ambobeze olulimi, bulala indi natesekera mu gunola muliro gudugurhire.’
25 Aliko Abrahamu amubwira, ‘Mwana-wani, oyibuke oku waligwerhe bintu binene binja omu kalamo kawe, aliko Lazaro yewe alipatire emilago yonene. Bobola akala ali arhulirizwa hanola, nawe oli walibuka.
26 Olekere nantyo, omuhola guzibuzibu guheberwe ahagarhi kerhu nenyu. Eju y’echola abalonzeze kurhenga enola munda rhuli baje eyola munda barhakagala; n’abantu barhakagala kuyambuka bakarhenga eyola munda bakaja enola mwerhu.’
27 Naho oyola mulume aderha, ‘Darha, akaba ntyo ku bili, inkuhemere orhume Lazaro agende emwerhu,
28 bulala ingwerhe bene-berhu barhano, abahe omulali omu kuntu nabo nji barhajaga mw’enola fasi y’amateso.’
29 Aliko Abrahamu amushubiza, ‘Bagwerhe Musa n’Abalebi; babayunvirize.’
30 Ava ashubiza, ‘Nanga, arhali ntyo darha Abrahamu, aliko nk’omuntu wali wafire ye jire emunda bali, bakahungama.’
31 Abrahamu amushubiza, ‘Akaba barhayunvirhe Musa n’Abalebi, na chiro hajira omuntu wafuka barhakamuyunva.’”
