Yayandikwaga na Luka 19:1-48
19 Aja e Yeriko arhondera kugera omu vile.
2 Mw’eyola vile mwaliri omulume mpu ye Zakayo waliri mukulu w’abanalipisa ekoli, analiri muchire.
3 Sasa, aliri alonza alole ku Yesu, aliko arhakagalire kumubona bulala aliri mufi n’abantu baliri kamama.
4 Ava agenda alibirhira embere, ashona oku murhi g’omulehe, y’ayinja kumubona bulala aliri hofi kugera ahola.
5 Yesu abere agera ahola alola oku murhi, amubwira: “Zakayo, shonoka juba-juba, bulala naba mugeni wawe zene.”
6 Ava ashonoka juba-juba amukaribisa emwage n’obusime.
7 Abantu boshi babwene ntyo barhondera kulunduma n’okuderha: “Mulolage berhu, ajire kulambagirira omunyabyaha.”
8 Aliko Zakayo ayimanga abwira Waliha: “Naha abakene enusu y’ebirugu byani byoshi Waliha; n’akaba hali omuntu nalire echintu, namugaluliracho kukuba kane.”
9 Yesu ava aderha: “Zene obuchunguke bwayinjire mw’enola nju, bulala naye ali mugala wa Abrahamu.
10 Bulala Mwen’omuntu ayinjaga kulonza n’okuchungula ababaga baherere.”
11 Oku banali bamuyunviriza, Yesu abaha ogwindi mufano bulala aliri hofi ne Yerusalemu, banaliri bawaza mpu Obwami bwa Mungu bwakabonekene ahola han’aho.
12 Aderha: “Mulume muguma waburhwaga omu mulala gw’abarhwali alibalamire omu chihugo cha hale yi bamujira mwami na buzinda ashube agaluke.
13 Ahamagala abakozi bage, abaha mina ekumi, ababwira mpu ‘Muchuruze mw’ezila furanga kugera amango nji nagaluka.’
14 Aliko abantu alikwanene kurhegeka bamushomba, barhuma abantu emunda ajaga, omu kuntu baje kuderha: ‘Rhurhalonza oyula muntu akaba mwami werhu.’
15 Abere agaluka ey’akala ali mwami, ahamagala abakozi ahaga efuranga omu kuntu bamuyereke bichi bayungukire omu buchuruzi bwabo.
16 Ow’oburhanzi ashegera embere aderha: ‘Waliha, emina yawe yayungukire zindi mina ekumi.’
17 Amubwira: ‘Wakolere bwinja, mukozi mwinja! Bulala wachiyerekene k’oli mwimana mu bintu bigeke, namakuha obukulu ku vile ekumi.’
18 Owakabiri ayinja aderha: ‘Waliha, emina yawe yayungukire zindi mina erhano.’
19 Abwira oyola wakabiri naye: ‘Nawe warhambula vile erhano.’
20 Aliko owindi ayinja aderha: ‘Waliha emina yawe y’enola, naliyibishire omu chiraka.
21 Oyinji, nalikuyubahire bulala oba muntu mudarhi. Onalonzeza ah’orhabikiraga, onashalula n’eby’orhabyalaga.’*
22 Amubwira: ‘Nakuchira olubanja kugerera ebinwa byawe; mukozi mubi. Mpu waliyinji oku mba muntu mudarhi onalonzeza aharhabikaga onashalula n’eby’arhabyalaga?*
23 Bichi byajaga byarhuma orhabika efuranga zani oku banke? Omu kuntu hanola ngaluka inzirhole eyi zajire mw’enyungu.’
24 “Eju y’echola abwira abaliyumangire ahaburhambi bwage ntya: ‘Mumunyege eyola mina muyihe oherhe mina ekumi.’
25 Aliko bamubwira mpu, ‘Waliha, oku yewe aherhe mina ekumi!’
26 Abashubiza: ‘Buli yeshi oherhe echintu, bamuyongerera ebindi, aliko orhagwerhe chintu, na hityuli akaba aligwerhe, bamunyegahyo.
27 Echindi, mulerhe hanola balala bantu barhalilonzeze inkaba mwami wabo, mubayirhire embere zani.’”
28 Amalire kuderha ebyola byoshi, agenda azamukira e Yerusalemu.
29 Ahikire hofi ne Betfaje ne Betaniya oku musozi guyirikwa Musozi gwe Mizeyituni, arhuma babiri omu banafunzi bage,
30 ababwira ntya: “Mugende mw’elira vilaje muli mwalangira, hano muhikamo mwabona omwana gw’epunda bashwekere, inta muntu osaga kuguyikalako. Mugushwekule mugunderhere.
31 Aliko hakajira owababaza mpu, ‘Bulagurhe muli mwashwekula eyila punda?’ Mumubwire ntya, ‘Waliha ayikenere.’”
32 Balala arhumaga bagenda, babugana ebintu nk’oku Yesu anababwiraga.
33 Aliko oku banali bashwekula ogola mwana gw’epunda, banyinayo bababwira: “Bulagurhe muli mwashwekula ogola mwana gw’epunda?”
34 Bashubiza: “Waliha ayikenere.”
35 Bava bayihekera Yesu, balerha n’emyambaro yabo bayihira k’ogola mwana gw’epunda, Yesu ayiyikalako.
36 Abere ali agenda, abantu bayinja basasa emyambaro yabo omu barabara.
37 Oku anagera hofi n’ebarabara limanukire kurhenga oku Musozi gwe Mizeyituni, abanafunzi kamama boshi bagwarha obusime n’okusingiza Mungu n’omulenge gunene eju y’ebisomerene byoshi babaga babwene.
38 Baliri baderha: “Ogishirwe ali Mwami oyinjire omu zino lya Yehova! Murhula omu mbingu, n’obukuze ok’oli enyanya bwenene!”
39 Aliko Bafarisayo baguma baliri mw’abola bantu kamama bamubwira: “Mwalimu, kalihira abanafunzi bawe.”
40 Omu kubashubiza ababwira: “Imbabwirire, chiro bakayorhere basirire, amala mabale makaderhere n’omulenge gunene.”
41 Agerere hofi ne Yerusalemu, abona evile arhondera kuyilakira,
42 ey’ali aderha: “Nka chiro ahubwe nawe zene warhegeraga ebintu by’okulerha omurhula; aliko bakubishirebyo y’orhabibona.
43 Bulala nji hagera esiku abanzi bawe banayumbaka olugurhu lukuzungulukire lw’emirhi eshongwerwe, nji bakugorha n’okukufundeza enyunda zoshi.
44 Nji bakuhombola woyo n’abana bawe, na nta bale nji baleka oku lindi omu mabale makuliko, bulala orharhegeraga akasanzi waliri wasuzumwa.”
45 Buzinda Yesu aja omu hekalu, arhondera kufukuza abaliri baguza,
46 ey’ali ababwira: “Amandiko maderhere, ‘Enju yani yaba nju y’esala,’ aliko mwabo mwayijirire lukunda lw’ebishambo.”
47 Agenderera kuyigiriza omu hekalu buli lusiku. Aliko abakulu b’abadahwa, abandisi n’abakulu b’abantu baliri balonza bamuyirhe;
48 si barhabonaga okuntu bakajira ntyo, bulala abantu boshi baliri bagenderera kumukulikira yi bamuyunviriza.
