Yayandikwaga na Luka 3:1-38
3 Omu mwaka gwe 15 g’oburhegesi bwa Kayizari Tiberiyo, amango Ponsiyo Pilato aliri guvernere we Yudeya, eyi Herode ali arhambula e Galilaya, eyi Filipo mwene-wabo ali arhambula echihugo che Itureya ne Trakoniti na Lisaniya aliri arhambula Abilene;
2 omu siku z’omudahwa mukulu Anasi n’eza Kayafa, Yowane mugala wa Zakariya ayunva oburhumwa bwa Mungu ey’ali omu rungu.
3 Yowane aja omu materitware moshi me Yordani ey’ali ahubiri abantu oku bakwanene kubatizwa omu kuyerekana oku bahungamire ebyaha,
4 nk’oku binayandikirwe omu chitabu ch’ebinwa by’omulebi Isaya: “Hali omulenge g’omuntu oli wahamagaza omu rungu: ‘Murheganye enjira ya Yehova! Mulambule amabarabara mage.
5 Buli lubanda lukwanene kuyunjuzwa, buli musozi na buli kasozi bikwanene kulambulwa, enjira zigondamire-gondamire zikwanene zinyoroswe, enjira zili mw’ebishimu-bishimu zikwanene kukwizwa,
6 n’abantu boshi nji babona obuchunguke kugerera Mungu.’”
7 Arhondera kubwira ntya abantu kamama bayinjaga emunda ali mpw’ababatize: “Ego bana b’empiri we, inde wabahere omukonge* oku mulibirhe oburhe bw’amango mayinjire?
8 Lero mukole ebijiro biyerekene oku mwahungamire. Murhachibwiraga mpu ‘rhuli bana ba Abrahamu,’ bulala imbabwirire, Mungu akakulira Abrahamu abana mw’amala mabale.
9 Kweri, embasha ekala eli oku sina* y’omurhi. Buli murhi gurhayana amatunda menja gwachibwa n’okukabulwa omu muliro.”
10 N’abola bantu kamama baliri bamubaza ntya: “Bichi rhujage rhwajira?”
11 Omu kubashubiza ababwira: “Omuntu ogwerhe myambaro ebiri ayigabane n’orhaherhe mwambaro n’omuguma, n’oherhe ebilyo ajire ntyo kon’okola.”
12 Chiro n’abanalipisa ekoli bayinja mpw’ababatize, bamubaza: “Mwalimu, bichi rhukwanene kujira?”
13 Ababwira ntya: “Murhahemaga echintu choshi-choshi chirhalukire akachiro k’ekoli.”
14 Abasoda nabo baliri bamubaza ntya: “Bichi rhukwanene kujira?” Nabo abashubiza: “Nta muntu munyegage na nta muntu mubesherage, s’ahubwe mutosheke n’omushara gwenyu.”
15 Bulala abantu baliri balingiriza Kristu, barhondera kuchibaza ntya omu mirhima yabo oku bilolere Yowane: “Oyula arhakaba eyi ye Kristu?”
16 Yowane abashubiza, ababwira ntya boshi: “Nyono yinababatiza kugerera amenji, aliko okomere kundusha ayinja, intanakwanene chiro kushwekula orhwamba rhw’ebirato byage. Yewe ababatiza kugerera eroho lichesibwa n’omuliro.
17 Agwerhe echikoleso ch’okuyeresa omu fune, achesa bwinja-bwinja echibuga chage ch’okuhulirako, analunda engano omu depo yage, aliko ebisasara anabidwika omu muliro gurhakafa gwazimizwe.”
18 Kandi ababwira bindi binwa binene bihebere omurhima, anagenderera kutangaziza abantu emyazi minja.
19 Aliko Yowane abaga akalihire Herode waliri arhambula e Galilaya eju ya Herodiya muka mwene-wabo n’eju y’ebindi bintu bibi binene Herode aliri ajira.
20 Kw’ebyola bijiro byoshi bibi, Herode ashuba kuyongera ha n’okuheba Yowane omu prizo.
21 Abantu boshi babere babatizwa, Yesu naye abatizwa. Abere ali asalira, embingu yafunguka
22 n’eroho lichesibwa lyayandagala omu mubiri gubonekene nka gwe pijo* lyamuyinjako, n’omulenge gwarhenga embingu gwaderha: “Oli Mugala wani, muzigirwa wani; nakuyemerere.”
23 Amango Yesu arhonderaga akasi kage, aliherhe hofi myaka 30. Nk’oku abantu bali mumenyere, alirimugala wa Yosefu,mugala wa Heli,
24 mugala wa Matati,mugala wa Lawi,mugala wa Melki,mugala wa Yanayi,mugala wa Yosefu,
25 mugala wa Matatiya,mugala wa Amosi,mugala wa Nahumu,mugala wa Esli,mugala wa Nagayi,
26 mugala wa Maati,mugala wa Matatiya,mugala wa Semeyi,mugala wa Yoseki,mugala wa Yoda,
27 mugala wa Yowanani,mugala wa Resa,mugala wa Zerubabeli,mugala wa Sheyaltiyeli,mugala wa Neri,
28 mugala wa Melki,mugala wa Adi,mugala wa Kosamu,mugala wa Elmadamu,mugala wa Eri,
29 mugala wa Yesu,mugala wa Eliyezeri,mugala wa Yorimu,mugala wa Matati,mugala wa Lawi,
30 mugala wa Simeoni,mugala wa Yuda,mugala wa Yosefu,mugala wa Yonamu,mugala wa Eliyakimu,
31 mugala wa Meleya,mugala wa Mena,mugala wa Matata,mugala wa Natani,mugala wa Daudi,
32 mugala wa Yese,mugala wa Obedi,mugala wa Bowazi,mugala wa Salmoni,mugala wa Nashoni,
33 mugala wa Aminadabu,mugala wa Arni,mugala wa Hezroni,mugala wa Perezi,mugala wa Yuda,
34 mugala wa Yakobo,mugala wa Isaka,mugala wa Abrahamu,mugala wa Tera,mugala wa Nahori,
35 mugala wa Serugi,mugala wa Reu,mugala wa Pelegi,mugala wa Eberi,mugala wa Shela,
36 mugala wa Kayinani,mugala wa Arpakshadi,mugala wa Shemu,mugala wa Nowa,mugala wa Lameki,
37 mugala wa Metusela,mugala wa Enoke,mugala wa Yaredi,mugala wa Mahalaleli,mugala wa Kayinani,
38 mugala wa Enoshi,mugala wa Seti,mugala wa Adamu,mugala wa Mungu.
