Yayandikwaga na Luka 1:1-80
-
Luka amayandikira Teofile (1-4)
-
Malayika Gabriyeli amaleba oku bilolere okuburhwa kwa Yowane Mubatiza (5-25)
-
Malayika Gabriyeli amaleba oku bilolere okuburhwa kwa Yesu (26-38)
-
Mariya amalambagirira Elizabeti (39-45)
-
Mariya amakuza Yehova (46-56)
-
Yowane amaburhwa, amahabwa n’ezino (57-66)
-
Obulebi bwa Zakariya (67-80)
1 Bulala bantu banene babwene oku bayandike emyazi oku bilolere ebintu by’okuli rhuba rhuyemerere bwinja-bwinja,
2 rhwamenyaga kugerera abantu bachiboneraga ebintu byoshi kurhangira oku murhondero banarhondera kutangaza eyola myazi.
3 Mukengwa bwenene Teofile, bulala nalonzeze bwinja-bwinja ebintu byoshi kurhangira oku murhondero, nani nabwene oku nkuyandikirebyo omu bulyo bukulikirene bwinja;
4 y’omenya bwinja obukweri bw’ebintu bakuyigirizaga omu kukubalira konyine.
5 Omu siku za Herode mwami we Yudeya, haliri mudahwa muguma waliyirikirwe Zakariya w’omu chigusho cha Abiya. Mukage aliri w’omu buko bwa Haruni, analiyirikirwe Luzabeti.
6 Bombi Mungu aliri ababona oku bali banyakunali, bulala baliri bachigendesa buzira magosa omu kukulikiza amarhegeko moshi n’ebintu byoshi bihemerwe n’Amarhegeko ma Yehova.
7 Aliko nta mwana baliherhe bulala Luzabeti aliri ngumba, na bombi balikala bashajire.
8 Lusiku luguma, Zakariya aliri akola akasi kage k’obudahwa bulala yaliri turu y’echigusho chage y’okukola embere za Mungu.
9 Omu kukulikiza amarhegeko m’abadahwa maliheberweho, eturu yage yahika y’okuja omu hekalu y’adwika obuvumba* embere za Yehova.
10 Abantu boshi baliyorhere embuga eyi bali basalira omu kasanzi k’okudwika obuvumba.*
11 Malayika wa Yehova amurhengerera, ayimanga ahaburhambi bw’amazabahu m’okudwikira k’obuvumba* oku lunda lw’ekulyo.
12 Aliko Zakariya abwene malayika, ayubaha bwenene n’okuyunva bimuchubukire.
13 Chiro akaba ntyo, malayika amubwira: “Orhayubahaga Zakariya, bulala Mungu ayunvirhe n’okuyemera esala lyawe ly’okumulakirira, na mukawe Luzabeti akuburhira omwana, wanamuyirika Yowane.
14 Wagwarha obusime n’omwishingo gunene, na bantu banene nji basima okuburhwa kwage,
15 bulala nj’aba mukulu omu masu ma Yehova. Aliko arhakwanene kunywa edivayi changwa amavu moshi-moshi, nj’ayunjula eroho lichesibwa chiro n’embere aburhwe.
16 Nj’arhabala Baizraeli banene bagalukire Yehova Mungu wabo.
17 Kandi alambagira embere za Mungu n’eroho n’emisi ya Eliya, omu kuntu ajire emirhima y’abalume ebe nka y’abana, n’okurhabala balala barhakenga bakole ebintu n’obwengehe kuguma n’abanyakunali; y’arheganyiza Yehova olubaga lurheganyizwe bwinja.”
18 Zakariya abwira malayika ntya: “Gurhe nakachizera ogula mwazi? Bulala inkala ndi mushaja, na mukani akala mugekulu.”
19 Malayika amushubiza: “Nyono nye Gabriyeli, onayimanga embere za Mungu, hofi-hofi naye; antumire inkumenyese ogula mwazi.
20 Aliko waba kaduma orhanagala kuderha kugera amango ebila bintu nji byayenera, bulala orhayemerere ebi nakubwirire bikwanene kuyenera omu kasanzi kabyo kapangirwe.”
21 Mw’ebyola bisanzi, abantu baliri bagenderera kulindira Zakariya, basomerwa bulala alegamire bwenene omu hekalu.
22 Abere ahuluka, arhagalaga kuganira nabo; barhegera okw’abonekerwe omu hekalu. Aliri abajirira ebimenyeso aliko ayorha kaduma.
23 Esiku zage z’akasi kachesibwa zabere zahwa, agaluka emwage.
24 Siku zigeke enyuma waho, mukage Luzabeti aheka obukule. Amala myezi erhano arhahuluka bulala aliri aderha ntya:
25 “Intya ku Yehova ankoleere mu zinola siku. Anyibukire, ankuliire n’eshoni omu bantu.”
26 Omu mwezi gwa ndarhu g’obukule bwage, Mungu arhuma malayika Gabriyeli e Galilaya, omu vile ye Nazareti
27 ku mubikira muguma waliri washambazwa n’omulume waliyirikirwe Yosefu, w’omu buko bwa Daudi, n’ezino ly’oyola mubikira aliri Mariya.
28 Malayika agerere omu nju, abwira Mariya ntya: “Mahyo, woyo wahabirwe olukengo lunene bwenene, Yehova ali haguma nawe.”
29 Aliko ebyola binwa byahangayisa Mariya bwenene, analonza amenye eyola ndamuso yakaba ye ndamuso nyabachi.
30 Bobola, malayika amubwira: “Mariya we, orhayubahaga, bulala wayemererwe omu masu ma Mungu.
31 Yunva! Waheka obukule, wanaburha omwana w’oburhabana, wanamuha ezino lya Yesu.
32 Nj’aba mukulu n’okuyirikwa Mugala w’Oli Enyanya Bwenene, na Yehova nj’amuha echichumbi ch’obwami ch’eshe Daudi,
33 nj’aba Mwami w’obuko bwa Yakobo esiku n’amango, n’Obwami bwage burhakagwarha buzinda.”
34 Aliko Mariya abwira Malayika ntya: “Gurhe ebyola byakashoboka na nta mulume nalere naye?”
35 Malayika amushubiza: “Eroho lichesibwa lyakuyinjako, n’emisi y’Oli Enyanya Bwenene yakushukulira enchuchu. Che chirhumire oyola waburhwa ayirikwa muchesibwa, Mugala wa Mungu.
36 Tala ku na Luzabeti w’omu buko bwenyu ahekere obukule omu myaka yage y’obugekulu, aburha omwana w’oburhabana, na gunola g’omwezi gwage gwa ndarhu, n’obola bamushambwire ezino mukazi w’engumba;
37 bulala nta chintu chirhakashobokana emwa Mungu.”
38 Naho Mariya aderha: “Tala! Indi mujakazi wa Yehova! Ankolere nk’oku wanaderhere.” Malayika ava amuleka agenda.
39 Mw’ezola siku Mariya abalama jubajuba, aja omu chihugo ch’emisozi-misozi, omu vile ye Yuda,
40 aja omu mwa Zakariya alamusa Luzabeti.
41 Luzabeti abere ayunva endamuso ya Mayira, omwana oli omu nda ashabira na Luzabeti ayunjula eroho lichesibwa
42 aderha ntya n’omulenge gunene: “Wagishirwe omu bakazi boshi, n’omwana oli omu nda yawe agishirwe!
43 Bobola si, gurhe nakapata olula lukengo l’okukaribisa nyina wa Waliha ahamwani?
44 Omenyere si! Amango nayunvaga endamuso yawe, ahola han’aho omwana oli omu nda yani amashabira eju y’obusime.
45 Kandi oherhe obusime ali olala wachizerere ebi bamubwiraga birhengere emwa Yehova, bulala byoshi byayenera bwinja-bwinja.”
46 Mariya naye aderha ntya: “Obugumaguma bwani yibwakuza Yehova,
47 n’omurhima gwani gwagenderera kuyunjula m’obusime, bulala Mungu ali muchunguzi wani,
48 bulala abwene okuntu omujakazi wage ali muntu w’ehali y’eshishi. Aliko lolaga! Kurhangira bunola na kugenderera ebizazi byoshi byantangaza munyabusime,
49 bulala Mungu w’emisi yoshi ankolere ebintu bisomeze, n’ezino lyage lili lichesibwa,
50 na chizazi oku chindi anayereka balala banamuyubaha olukogo lwage.
51 Alikoleseze okuboko kwage n’emisi, ashandazize abajira omwibone omu mirhima yabo,
52 akulire abantu b’emisi oku bichumbi byabo by’obwami n’okuzamula abantu b’ehali y’eshishi;
53 abali nzara abayugusize bwenene n’ebintu binja, n’abachire abalekere bagende maboko momu.
54 Oku lukogo lwage lw’esiku n’amango, arhabere omukozi wage Izraeli,
55 nka kulala analaganyaga bashokuliza berhu, Abrahamu n’oluburho lwage.”
56 Mariya ayorha na Luzabeti hofi myezi esharhu, naho agaluka emwabo.
57 Esiku za Luzabeti z’okuburha zahikire, aburha omwana w’oburhabana.
58 Abaturanyi na bachi bage bayunvirhe okuntu Yehova amuyerekere olukogo, bachishinga haguma naye.
59 Olusiku lwa munane bayinja kukata* oyola mwana, banalonza kumuha ezino ly’eshe Zakariya.
60 Aliko nyina aderha ntya: “Nanga! S’ahubwe ayirikwa Yowane.”
61 Eju y’echola bamushubiza ntya: “Oku nta muntu w’omu buko bwenyu ojira elyola zino!”
62 Bava babaza eshe kugerera ebimenyeso zino lihe alonzeze bahage oyola mwana.
63 Ahema bamuhe akapaho, ayandikako ntya: “Ezino lyage ye Yowane.” Abantu boshi basomerwa.
64 Aho han’ahola, obunu bwage bwafunguka, olulimi lwage lwayanguha, arhondera kuderha n’okukuza Mungu.
65 Abantu boshi balilamire oku buturanyi bwage bayubaha, n’eyola myazi yarhondera kuderhwa omu chihugo choshi ch’emisozi-misozi che Yudeya.
66 Na boshi baliri bayunva eyola myazi bayibika omu mirhima yabo n’okuderha: “Oyula mwana aba muntu nyabachi?” Bulala okuboko kwa Yehova, kweri kwaliri haguma naye.
67 Naho Zakariya, eshe w’oyola mwana ayunjula eroho lichesibwa arhondera kuleba n’okuderha ntya:
68 “Muleke Yehova Mungu wa Izraeli asingizwe, bulala ayibukire abantu bage, anabalerhere obuchunguke.
69 Anarhuhere omuchunguzi* oherhe emisi, w’omu mulala g’omukozi wage Daudi,
70 nka kulala anaderhaga kugerera obunu bw’abalebi bage bachesibwa ba mira,
71 okw’akarhuyokwere oku banzi berhu, n’omu fune ya balala boshi banarhushomba.
72 Nantyo Mungu arhuyereka olukogo alaganyaga bashokuliza, n’okuyibuka endagano yage nchesibwa,
73 k’okuderha echilapo ahaga shokuliza werhu Abrahamu,
74 oku hanola ayusa kurhuyokola omu fune y’abanzi berhu, arhuha olukengo l’okumukolera akasi kachesibwa buzira buba,
75 oku bwimana n’omu kunali embere zage, omu siku zoshi z’akalamo.
76 Aliko woyo mwana, nji wayirikwa mulebi w’Oli Enyanya Bwenene, bulala nji walambagira embera zage, y’orheganya enjira zage,
77 y’omenyesa abantu bage okw’abachungula omu kubabalirabo ebyaha byabo,
78 eju y’olukogo lw’akasisi lwa Mungu werhu. Kugerera olola lukogo omwangaza gw’esezi gwarhuhikira kurhenga enyanya,
79 yi gukolezeza balala bayikere omu mwizimya n’omu nchuchu y’okulerha olufu, n’okuyerekeza amagulu merhu omu njira y’okulerha omurhula.”
80 Oyola mwana akula, agwarha emisi y’eroho, anagenderera kulama omu rungu kugera olusiku achiyerekanaga bwinja-bwinja oku Baizraeli.
