Yayandikwaga na Luka 10:1-42
10 Enyuma w’ebyola bintu byoshi, Waliha achishoga bandi 70 abarhuma babiri-babiri babe bamurhanga mu buli vile na buli hoshi yewe yenyine alikwanene kuja.
2 Naho ababwira: “Kweri, akasi k’okushalula kalugire, aliko abakozi bagehere. Che chirhumire muheme Omukulu w’akasi k’okushalula arhume abakozi omu kasi kage k’okushalula.
3 Mugendage! Aliko mumenye oku namabarhuma nka ntama omu mbwa z’elubala.
4 Murhahekaga akashaho k’efuranga, murhachiyikiraga ebilyo, ebirato na nta muntu mulamusage* omu njira.
5 Buli nju mwakajamo, murhange muderhe: ‘Omurhula gube mw’enola nju.’
6 Akaba hali omwira w’omurhula olimo, omurhula gwenyu gumubereko; aliko akaba ntaye, omurhula gwenyu gubagalukire.
7 Bobola mubere mw’eyola nju eyi muli mwalya n’okunywa ebintu byoshi babaha, bulala omukozi akwanene omushahara gwage. Murhanayinjaga mwahama mukarhenga omu nju mukaja omu yindi.
8 “Echindi, buli vile mwajamo bakabakaribisa, mulye byoshi babahere
9 mufumye abalwala balimo munababwire: ‘Obwami bwa Mungu bwayinjire hofi nenyu.’
10 Aliko buli vile mwajamo bakafunda kubakaribisa, mugere omu mabarabara mabo mazibuzibu eyi muli mwaderha:
11 ‘Rhwamabakungurhira chiro n’oluchuchu* l’omu vile yenyu lwali lwafarhire oku magulu merhu. Aliko mumenye ok’Obwami bwa Mungu buli hofi.’
12 Imbabwire, oku Lusiku l’Okucha Olubanja e Sodoma nji yachirwa echihano chiyorohere kulusha eyola vile.
13 “Buli buhanya bwawe, Korazini! Buhanya bwawe Betsaida! Bulala nk’ebisomerene byakolerwe emwenyu byakolwaga omu Tiro n’omu Sidoni, abantu balilamiremo barhakalegamire chiro kuhungama, banayambala ebigunira n’okuyikala omu luvu.
14 Che chirhumire oku Lusiku l’Okucha Olubanja, e Tiro ne Sidoni nji bachirwa echihano chiyorohere kulusha echenyu.
15 Nawe Kapernaumu, owazize ku byashobokana ozamulwe kugera embingu si? Nanga, wayandagazwa kugera omu Shinda!
16 “Omuntu yeshi-yeshi wabayunvirize ey’anyunvirize. N’owabasuzagwire ey’ansuzagwire nani. Echindi, omuntu yeshi wansuzagwire ey’asuzagwire n’olala wantumaga.”
17 Naho balala 70 bagaluka n’obusime baderha: “Waliha, chiro n’abazimu bali bachichimya amango rhwamakolesa ezino lyawe.”
18 Eju y’echola ababwira: “Nabere nabona, Shetani arhoga omu mbingu nka mubaraganyo.
19 Mulole! Namabaha obuhashe b’okulabarha enjoka n’engobe* n’obuhashe b’okuhima emisi yoshi y’omwanzi, na ntacho nji chabajira kubi.
20 Chiro akaba ntyo, murhagwarhaga obusime mpu bulala abazimu bali babakenga, si mugwarhe obusime bulala amazino menyu mayandikirwe omu mbingu.”
21 Mw’akola kasanzi kan’akola, ayunjulirana obusime kugerera eroho lichesibwa aderha: “Darha, Waliha w’embingu n’egulu, namakusingiza omu bantu bulala wabishire bwinja ebila bintu oku bengehe n’abasomi, wabibishulira abana badorho. Nechi, Darha we, bulala wabwene oku ntyo k’ojirage.
22 Darha ampere ebintu byoshi. Nta muntu oyinji Omugala olekere Darha; na ntaye oyinji Darha olekere Omugala, n’olala Omugala alonzeze kumumenyesa.
23 Amalire kuderha ebyola, ahindamuka alola abanafunzi bage eyi bali ahali bwihunze ababwira ntya: “Abagwerhe obusime ali mwabo muli mwabona ebila bintu.
24 Bulala mbabwirire, balebi banene n’abami baliri bachifija babone ebila bintu muli mwabona, aliko barhabibonaga; baliri bachifija bayunve ebila bintu muli mwayunva, aliko barhabiyunvaga.”
25 Enyuma w’ahola, omuntu oyinji Amarhegeko bwenene ayumanga y’amurhega amubaza: “Mwalimu, bichi inkwanene kujira y’inshokola akalamo k’esiku n’amango?”
26 Amushubiza: “Gurhe biyandikirwe omu Marhegeko? Gurhe woyo onayunva eyi wasomamo?”
27 Omu kushubiza aderha: ‘“Okwanene kuzigira Yehova Mungu wawe n’omurhima gwawe goshi, n’obugumaguma bwawe boshi, n’emisi yawe yoshi, n’obwenge bwawe boshi’ kandi ‘okwanene kuzigira omuturanyi wawe nk’ok’ochizigira.’”
28 Yesu amubwira: “Washubize bwinja; ogenderere kujira ntyo nji wapata akalamo.”
29 Aliko omu kulonza achiyerekane okw’ali munyakunali, oyola mulume abaza Yesu: “Omu bukweri, inde ye muturanyi wani?”
30 Omu kushubiza Yesu aderha: “Mulume muguma aliri ayandagalira e Yeriko arhenga e Yerusalemu, abuganana n’ebishambo byamuhogola byamukubirha byachigendera byamuleka ali hofi kufa.
31 Hava harhengerera omudahwa, agera ahola, aliko amubwene agera eburhambi oku lwindi lunda lw’ebarabara.
32 Intyo kon’okola Omulawi naye ayinja, amubwene, naye agera eburhambi oku lwindi lunda lw’ebarabara.
33 Aliko haliri Musamariya muguma waliri abalama agera mw’elyola barabara, amubwene amuyunvira obonjo.
34 Amuyegera arhuba ebihulu byage, abisheshera kw’amavurha n’edivayi. Amubarhulira oku punda yage, amuheka efasi y’okupangisa abageni amushishikala.
35 Olusiku lwakulikiragaho arhola dinari ebiri aziha omwimangizi w’eyola fasi amubwira ntya: ‘Omushishikale, okakolesa ezirhalukire zinola nji nakujuhazo hanola nji ngaluka.’
36 Mw’abala basharhu, inde obwene walichijirire muturanyi w’oyola muntu ebishambo byarheraga?”
37 Ashubiza: “Oyola wamuyerekaga olukogo.” Yesu amubwira: “Genda nawe ojire intyo kon’okola.”
38 Bagenderera baja mu vilaje nguma ntya. Bahikiremo, mukazi muguma mpu ye Marta akaribisa Yesu omu mwage.
39 Aligwerhe mwene-wabo oyirikirwe Mariya, ayikala omu magulu ma Yesu arhondera kuyunviriza byoshi aliri aderha.
40 Marta yewe alihugisizwe na makasi manene aligwerhe. Bobola ayinja aha Yesu ali aderha: “Waliha, intacho bikubwirire okubona mwene-werhu andekere amakasi nyenyine? Mubwira ayinje angwase.”
41 Waliha amushubiza ntya: “Marta, Marta, oli wachilaza n’okuhugiswa na bintu binene bwenene.
42 Bintu bigeke byebilagirirwe chiro na chiguma. Oku bilolere Mariya yewe, achishogere echigabi chinja na ntaye wamunyegacho.”
