Yayandikwaga na Luka 13:1-35
-
Nka murhahungamire mwaharabiswa (1-5)
-
Omufano g’omurhi gw’etini gurhayana (6-9)
-
Okufumya omukazi baligonyezemo kabiri olusiku lwe Sabato (10-17)
-
Omufano gw’akaburho k’eharadali n’ogw’elevire (18-21)
-
Bihemere okuchihangana y’omuntu agera omu mulyango gufunderere (22-30)
-
Herode, “oyola nyambwe” (31-33)
-
Yesu amalakira Yerusalemu (34, 35)
13 Mw’akola kasanzi, bantu baguma omu baliri ahola barhondera kubalira Yesu oku bilolere abantu be Galilaya Pilato ayirhaga, achanga eshagama yabo haguma n’enterekero zabo.
2 Omu kushubiza Yesu ababwira: “Muwazize okw’abola Banyagalilaya ebyola byahikiraga babaliri banyabyaha bwenene kulusha abandi Banyagalilaya boshi?
3 Nanga, aliko imbabwirire, akaba murhahungamire, nenyu mweshi mwaharibiswa kuguma nabo.
4 Changwa balala bantu 18 omunara gwe Silowamu gwaheneraga bafa; muwazize oku bobaliri banyabyaha kulusha abandi boshi balamire omu Yerusalemu?
5 Nanga, aliko imbabwirire, akaba murhahungamire, nenyu mweshi mwaharibiswa kuguma nabo.”
6 Naho abaha ogula mufano: “Muntu muguma abyala omurhi gw’etini omu shwa lyage ly’emizabibu. Ayinjire kulola kw’amatunda arhapataga ku n’eliguma.
7 Abwira omukozi wa mw’elyola shwa lyage ly’emizabibu ntya, ‘Ekala myaka esharhu eyila eyi nanyinja kulonza amatunda k’ogula murhi gw’etini, aliko ntasagi kupata ku n’eliguma. Ogukube! Bulagurhe gugenderere kubihya obudaka oku busha?’
8 Omu kushubiza oyola mukozi aderha, ‘Waliha, orhange oshube oguleke gwindi mwaka muguma, naguyuhirira n’okuguheba k’omwavu.*
9 Gukaja gwayana amatunda omu mango mayinjire, kwaba kwinja; aliko akaba gurhayanire, wanaja wagukuba.’”
10 Sasa Yesu aliri ayigiriza omu sinagogi olusiku lwe Sabato.
11 Omola mwaliri omukazi omuzimu abaga ajirire muzamba mu myaka 18; ali amugonyezemo kabiri arhakanachigalire kuyinamuka.
12 Yesu amubwene, amubwira: “Mukazi, wamashwekulwa kurhenga omu buzamba bwawe.”
13 Yesu aheba oyola mukazi kw’efune, ahola han’aho ayinamuka arhondera kukuza Mungu.
14 Aliko omwimangizi we sinagogi agaya bwenene bulala Yesu afumizye olusiku lwe Sabato, abwira abantu ntya: “Haba siku ndarhu z’okujira akasi; bobunola mugende mwayinja babafumye mw’ezola siku s’arhali olusiku lwe Sabato.”
15 Waliha amushubiza: “Ego mwe ndyalya mwe, buli muguma wenyu arhashwekula empanzi yage changwa epunda yage akayikula omu nju yayo olusiku lwe Sabato akayiheka kushoka?
16 Oyula mukazi w’omu buko bwa Abrahamu, Shetani abaga ashwekere mu myaka 18, birhalihemere akashwekulwa m’ogula mugozi olusiku lwe Sabato?”
17 Aderhere ebyola, abapinzani bage boshi bayunva eshoni, aliko abantu boshi basima bwenene eju y’ebintu binja aliri akola.
18 Agenderera kuderha: “Obwami bwa Mungu buli nka bichi? Na bichi nakabushushanya nabo?
19 Buli nka mburho y’eharadali omuntu arholaga ayibyala omu shwa lyage, yamera n’okuba murhi, n’enyunyi z’omu chanya zayalikira enyogo zazo omu mirhabi yago.”
20 Ashuba derha: “Bichi nakashushanya n’Obwami bwa Mungu?
21 Buli nka levire* omukazi anarhola anayichanga mu bipimo bisharhu bizibuzibu by’esyano kugera ah’epate yoshi yarhundira.”
22 Yesu agenda ey’ali ahubiri vile oku vile na vilaje oku vilaje, agenderera n’olugenzi lwage l’okuja e Yerusalemu.
23 Naho muntu muguma amubaza: “Waliha, aba nji bachunguka bali bageke si?” Ashubiza:
24 “Muchihangane bwenene mugerere omu mulyango gufunderere bulala imbabwirire, banene nji bachihangana kugeramo aliko barhakagala.
25 Amango nyina enju nj’ayimanga n’okuchinga omulyango, nji mwayimanga embuga eyi muli mwakongorha n’okuderha, ‘Waliha orhuchingulire.’ Aliko nj’abashubiza: ‘Intamenyere ngahe mwarhenga.’
26 Naho nji mwaderha, ‘Rhwaliri rhwalya n’okunywa embere zawe, wanaliri wayigiriza abantu omu mabarabara merhu mazibuzibu.’
27 Aliko nj’abashubiza, ‘Intamenyere ngahe mwarhenga. Murhenge embere zani, mwabo banyankola maligo mweshi!’
28 Eyola munda yi nji mwalirira n’okuhekenyera y’amenyo amango nji mwabona Abrahamu, Isaka, Yakobo n’abalebi bali omu Bwami bwa Mungu, aliko eyi mwabo mwakabwirwe embuga.
29 Echindi abantu nji bayinja barhengerera engambo z’emashoshokero m’ezuba n’emazikiro, enoro* n’eside,* banayikala oku meza omu Bwami bwa Mungu.
30 Mulole! Hali ab’obuzinda nji baba b’oburhanzi, hali n’ab’oburhanzi nji baba b’obuzinda.”
31 Mw’akola kasanzi Bafarisayo baguma bayinja bamubwira: “Ogende, orhenge hanola bulala Herode ali alonza kukuyirha.”
32 Abashubiza ntya: “Mugende mubwire oyola nyambwe ntya: ‘Yunva! Nafukuza abazimu zene n’omusezi aliko lishinjo naba eyi namalire.’
33 Chiro akaba ntyo, byahema ingendereze olugenzi zene, omusezi na lishinjo, bulala birhayemererwe omulebi ayirhirwe aharhali omu Yerusalemu.
34 Yerusalemu, Yerusalemu, munizi w’abalebi onayirha abarhumirwe emwage omu kubashurha amabale. Kanga nalonzeze ingushe abana bawe nka kulala engoko enagusha oburhulage bwayo omu byubi! Aliko murhayemeraga.
35 Tala! Mungu abalekeere enju yenyu. Imbabwirire, kurhangirira zene murhakachimbona kugera amango mwaderha: ‘Ogishirwe ali olala oyinjire omu zino lya Yehova!’”
