Yayandikwaga na Luka 15:1-32
15 Sasa abanalipisa ekoli boshi n’abanyabyaha balizungulukire Yesu yi bamuyunviriza.
2 Abafarisayo n’abandisi bagenderera kulunduma omu kuderha: “Oyula muntu ali akaribisa abanyabyaha n’okulya nabo.”
3 Ava abaha ogula mufano aderha:
4 “Inde mu mwewe wakaba aherhe ntama* 100, nguma ekahera, orhaleka zilala 99 omu rungu, akaja kulonza elala yaherere mpaka ayibone?
5 Amango amayibona anayinja ayihekere oku birhugo n’obusime.
6 Hanola ahika ahamwage anahamagala bera bage, abaturanyi anababwira, ‘Muyinje rhusime haguma bulala nabwene entama yani yabaga yaherere.’
7 Imbabwirire oku ntyo kon’okola, haba busime bunene bwenene omu mbingu eju ya munyabyaha muguma wahungamire kulusha obwa banyakunali 99 barhakenere kuhungama.
8 “Changwa mukazi ohe wakaba aherhe bicheri ekumi by’edrakma, akaheza chicheri chiguma, orhakonga etara akahyagira enju yage, anachihuruga bwinja-bwinja mpaka achibone?
9 Amango amachipata anahamagala abaturanyi bage n’aberakazi anababwira: ‘Rhusime haguma bulala nabwene echicheri chani ch’edrakma chabaga chaherere.’
10 Imbabwirire oku ntyo ku bamalayika nabo banagwarha obusime amango munyabyaha muguma amahungama.”
11 Yesu ashuba kuderha: “Mulume muguma aliherhe bagala babiri.
12 Omudorho abwira eshe, ‘Darha, ompe echani chigabi ch’ebirugu inkwanene kuhaabwa.’ Eshe ava abagabira ebirugu byage.
13 Enyuma wa siku zigeke arhola ebili byage byoshi, abalamira omu chihugo cha hale. Ahikire eyola munda, ashandaguza ebirugu byage omu kalamo k’obubaraga.
14 Abere amamala kukolesa buli chintu aliherhe, harhengerera enzara ekalihire mw’echola chihugo, achibugana ali omu bulagirire.
15 Ahikira chiro ahaja kuhema akasi emwa muntu muguma wa mw’echola chihugo. Oyola muntu amurhuma omu mashwa mage agende alagira engulube.
16 Aliri achifija chiro gurhe akalya oku bishugu engulube zaliri zalya, aliko ntaye wamuhere chiro n’echintu n’echiguma.
17 “Abere ahuguka, aderha: ‘Darha aherhe bakozi banene, na boshi bali balya banayugurha oku nyono nafira enola munda n’enzara!
18 Nabalama ingaluke emwa darha imubwire ntya: “Darha, nagoseze Mungu nawe nakugoseza.
19 Intachikwanene kuhamagalwa mugala wawe, aliko ontole nka muguma omu bakozi bawe.”’
20 Ava agenda agaluka emw’eshe. Oku anachili hale, eshe amulangira, amuyunvira obonjo, agenda alibirhira emunda ali, amuhobera n’okumuha ebize.
21 Omugala amubwira: “Darha, nagoseze Mungu nawe nakugoseza, intachikwanene chiro kuhamagalwa mugala wawe.
22 Aliko eshe abwira abakozi bage: ‘Mujire juba, mulerhe omwambaro gukwirire, ogukwirire bwenene, mumuyambisego, mumuyambise olupeta oku modoke n’ebirato omu magulu.
23 Mulerhe n’enyana eshishire, muyibage rhulye rhujire efete,
24 bulala oyula mugala wani abaga afire aliko ashubire kulama. Abaga aherere aliko abonekene.’ Bava barhondera kuchisimisa.
25 “Sasa omugala mukulu aliri omu shwa; abere y’afuluka, agerere hofi n’ahamwabo ayunva omuziki n’abantu yibazina.
26 Ava ahamagala mukozi muguma amubaza bichi byabere.
27 Amushubiza: ‘Mwene-wenyu agalukire, bobunola yisho abagire enyana eshishire bulala amupatire ey’achili mugumaguma.’
28 Ava ayunva oburhe alahira oku arhachija omu lugo. Eshe ahuluka arhondera kumurhebereza.
29 Aderha ntya omu kushubiza eshe: ‘Tala, hamagera myaka minene ey’indi nakukolera nka muja, intanasaga funda kukenga ebi waderhere haba n’eliguma. Aliko nta lusiku osaga kumpa chiro akahene inkachisimisa na bera bani.
30 Aliko obola oyula mugala wawe washandagwize ebirugu byawe omu mbaraga agalukire, wamamubagira enyana eshishire.’
31 Eshe amubwira: ‘Mwana-wani esiku zoshi oba haguma nani; n’ebikulo byani byoshi binali byemwawe.
32 Bobola byalihemere rhujire efete rhunachisimise bulala mudorho wawe abaga afire aliko ashubire kulama, abaga aherere aliko abonekene.’”
Mahugulo m'efo
^ Ao “bibuzi.”
