Yayandikwaga na Luka 23:1-56
23 Bobola abantu boshi bayumanga baheka Yesu emwa Pilato.
2 Barhondera kumusidaka banaderha: “Rhwalibuganire oyula muntu ali alerha akavulindi omu shanja lyerhu, anabwira abantu oku barhakwanene kulipa ekoli lya Kayizari, anaderha oku ye mwami Kristu.”
3 Pilato ava amubaza: “Woyo we Mwami wa Bayahudi si?” Omu kumushubiza Yesu aderha: “Wenyine waderhereko.”
4 Pilato ava abwira abakulu b’abadahwa n’abantu kamama ntya: “Nta gosa mbwene oyula muntu agwerhe.”
5 Aliko bahanzika eyi bali baderha: “Ali arhebeka abantu omu kuyigiriza omu Yudeya yoshi, kurhonderera omu Galilaya kugera chiro n’enola munda.”
6 Pilato ayunvirhe ntyo, abaza akaba Yesu ali Munyagalilaya.
7 Pilato abere amenya oku Yesu ali w’omu teritware yaliri yarhegekwa na Herode, amurhuma emwa Herode waliri e Yerusalemu mw’ezola siku.
8 Herode abwene Yesu asima bwenene. Abaga amamala siku zinene ey’ali achibaza gurhe akamubona bulala abaga ayunvirhe binene oku bimulolere, analigwerhe enyorha y’okubona biguma omu bisomerene byage.
9 Ava arhondera kumabaza ebibazo binene aliko ntacho n’echiguma Yesu amushubize.
10 Aliko abakulu b’abadahwa n’abandisi bagenderera kuyumanga ahola n’okumusidaka n’obukali.
11 Herode n’abasoda bage bamukolera oku kasuzaguro, bamuyambisya omwambaro gukwirire bwenene omu kumushinyagulira, baja bamugalula emwa Pilato.
12 Herode na Pilato bava baba bera, nobo embere w’ahola baliri banzi.
13 Pilato ahamagala abakulu b’abadahwa, abarhambo n’abantu
14 ababwira: “Mwalinderhere oyula muntu mwamaderha oku ali ashumika abantu babe bapinzani. Bobola mulole! Nalimubazize ebibazo embere zenyu, aliko ntacho n’echiguma nabwene chiyemezeze ebi mwamusidakire.
15 Kweri, na Herode nta gosa abwene bulala ashubire kurhugaluliraye. Oyula muntu ntacho ajirire chakarhuma ayirhwa.
16 Namuha obuhane, naho nanamushwekula.”
17 ——
18 Aliko abantu boshi baderha ntya n’omulege gunene: “Oyirhe oyula muntu orhushwekulire Baraba!”
19 (Bahebaga Baraba omu prizo bulala alichihebere omu ntambala yabaga omu vile n’eju y’obunizi.)
20 Pilato ashuba kuganira nabo bulala alilonzeze ashwekule Yesu.
21 Bava barhonderha kuyama ntya: “Amanikwe oku murhi! Amanikwe oku murhi!”
22 Ababwira ntya obwakasharhu: “Bulagurhe? Chintu chihe chibi ajirire? Nyono nta chintu n’echiguma nabwene chakarhuma ayirhwa; bobola namuha obuhane ahandi nanamushwekula.”
23 Aliko bagenderera kuhanzika eyi bali baderha n’omulenge gunene oku ayirhwe, n’emilenge yabo yahima ogwage.
24 Pilato ava abona oku abajirire ebi bali bahema.
25 Ashwekula omuntu bamuhemaga ashwekule, eyi bahebaga omu prizo eju y’okuchiheba omu ntambala n’obunizi, aliko abaha Yesu omu kuntu bamujire nk’okubalonzeze.
26 Babere bamuhekere, bafarha mulume mugumu mpu ye Simoni we Kirene waliri arhenga omu shwa bamuhesa omurhi gw’amateso, agenda aguhekere ey’ali enyuma za Yesu.
27 Bantu banene balibakulikire kuheba mu n’abakazi baliri bamulakira n’oku chishurha-shurha oku chifuba eju y’akahinda.
28 Yesu ahindamuka alola abola bakazi ababwira: “Banyere be Yerusalemu, muleke okundakira. Muchilakire munalakire abana benyu;
29 bulala nji hagera amango abantu baderha ntya: ‘Abagwerhe obusime bali bakazi b’engumba, enda zirhaburhaga bana, n’amabere marhayonsaga!’
30 Agola mango abantu nji barhondera kubwira emisozi, ‘Orhuhonongokereko!’ Banabwira n’orhusozi, ‘Orhushukulire!’
31 Obola byabere ntyo n’omurhi guchili gubishi, gurhe byakaja byaba amango gwamayuma?”
32 Balerha bandi balume babiri baliri banyankola-maligo, yi babayirhira haguma naye.
33 Bahikire oku fasi enayirikwa Chihangasi, bamumanika oku murhi haguma n’abola banyankola-maligo, muguma ekulyo owindi ekulembe.
34 Aliko Yesu aliri aderha: “Darha, obabalirebo bulala barhenji ebi bali bajira.” Echindi bayeshera emyambaro yage esimbi yi bamenya okuntu bayigaba.
35 Abantu baliyumangire ahola eyi bali balola. Aliko abarhambo baliri baderha: “Aliri achungula abandi muleke achichungule akaba anali Kristu wa Mungu, Olala Wachishogerwe.”
36 Chiro n’abasoda baliri bamushekera banayinja banamuha edivayi ekalirire
37 banaderha: “Akaba onali Mwami w’Abayahudi, ochichungule.”
38 Haliri n’eyila myandiko elugulu w’erhwe lyage: “Oyula ye Mwami w’Abayahudi.”
39 Muguma mw’abola banyankola-maligo balimanikirwe ahola arhondera kumushinyagulira aderha: “Si we Kristu; chichungulaga nerhu orhuchungule!”
40 Aliko owabo amukalihira amubwira: “Orhayubahire Mungu chiro haba n’akatyu, nobo nawe wapatire echola chihano chen’echola?”
41 Rhwabo obula buhane rhwahabirwe bu rhwanalikwanene eju y’ebintu bibi rhwajirire, aliko oyula muntu yewe nta chibi akolere.”
42 Naho aderha: “Yesu nj’onyibuke amango waja omu Bwami bwawe.”
43 Yesu amushubiza: “Kweri inkubwirire zene, nji waba haguma nani omu paradizo.”
44 Yabere hofi midi echihugo choshi chaba m’omwizimya kugera hofi sa mwenda
45 bulala omwangaza gw’ezuba gurhachiliho. Naho erido ly’ahachesibwa lyasharhukamo ahagarhi.
46 Yesu ayama ntya n’omulenge gunene: “Darha, namaheba akalamo kani omu fune zawe.” Amalire derha ntyo afa.
47 Abakulu b’abasoda babwene ebyarhengereraga, bakuza Mungu baderha: “Kweri oyula muntu aliri munyakunali.”
48 N’abantu kamama balichigushire ahola eju y’echola chihe babwene ebyabere, bagaluka emwababo eyi bali bachishurha-shurha oku chifuba eju y’akahinda.
49 N’abantu boshi balimenyene na Yesu baliyumangire hale bugeke n’ahola. Abakazi bamuherekezaga kurhenga e Galilaya baliri ahola, nabo babona ebyabaga.
50 Ahola haliri omulume mpu ye Yosefu w’omu baraza ly’abashamuka b’ehano, waliri muntu mwinja na munyakunali.
51 (Oyola mulume arhalishigikire omuhigo gwabo g’okuyirha Yesu, n’ebijiro byabo.) Aliri we Armateya vile ye Yudeya analiri alindira Obwami bwa Mungu.
52 Oyola mulume aja emwa Pilato amuhema omubiri gwa Yesu.
53 Agumanula oku murhi, aguzingira omu chiraka chikwirire bwenene ch’ebinusi. Agulyamikiza omu shinda yabaga yachibirwe omu bale, erhaliza kuhambwa m’owindi muntu.
54 Lwaliri lusiku lwa Marheganyo, ne Sabato yaliri hofi kurhondera.
55 Aliko abakazi baherekezaga Yesu kurhenga e Galilaya bakulikira oyola mulume, baja kulola oku shinda babona gurhe baheba m’omubiri gwage.
56 Bagaluka baja kurheganya ebintu bihumwire bwinja* n’amarashi. Aliko kweri balihumukire olusiku lwe Sabato nk’oku amarhegeko maliderhere.
Mahugulo m'efo
^ Ao “amanukato.”
