Yayandikwaga na Luka 20:1-47
20 Lusiku luguma eyi Yesu ali ayigiriza abantu omu hekalu n’okutangaza emyazi minja, abakulu b’abadahwa, abandisi, n’abashamuka bayinja
2 bamubaza: “Orhubwire, ku ruhusa luhe oli wakola ebila byoshi? Changwa inde okuhere oruhusa?”
3 Abashubiza: “Nani imperhe echibazo nababaza, nenyu munshubize:
4 Obubatizo bwa Yowane bwarhengaga embingu, changwa emw’abantu?”
5 Barhondera kuwaza n’okubwirana: “Rhukaderha oku bwarhengaga embingu, arhubaza, ‘Bichi byajaga byarhuma murhamuyemera?’
6 Aliko rhukaderha mpu, ‘Bwarhengaga emw’abantu,’ abantu boshi barhushurha amabale, bulala boshi bachizerere oku Yowane aliri mulebi.”
7 Bava bashubiza oku barhenji ngahe bwarhengaga.
8 Yesu ababwira: “Akaba ntyo nani intababwira indi najira ebila byoshi ku ruhusa luhe.”
9 Ava aha abantu ogula mufano: “Mulume muguma alihingire eshwa ly’emizabibu alilekera abahinzi,* abalamira omu chihugo cha hale alegamayo.
10 Aliko echihe ch’okushalula chagerereho, arhuma omukozi wage emw’abola bahinzi, omu kuntu bamuhe oku matunda ma mw’elyola shwa ly’emizabibu. Aliko abola bahinzi bamushurha banamugalula maboko momu.
11 Ashuba kurhuma owindi mukozi. Naye bamushurha bamusuzagura n’okumugalula maboko momu.
12 Kandi arhuma owa kasharhu; aliko yewe bamukoromesa n’okumufukuza.
13 Nyina eshwa ly’emizabibu abwene ntyo aderha, ‘Gurhe njage najira baza? Narhuma mugala wani, eyi nzigira bwenene. Nkabaga yewe bamukenga.’
14 Abahinzi babere balangira omugala, barhondera kuwaza n’okubwirana, ‘Okwanene kushokola y’olira wayinjire. Muyinje rhumuyirhe rhushokole elila shwa.’
15 Bava bamukabula eburhambi bw’eshwa bamuyirha. Gurhe nyina eshwa nj’abajira?
16 Nj’ayinja anayirha abola bahinzi n’elyola shwa ly’emizabibu analiha abandi.”
Abantu bayunvirhe ntyo, baderha: “Ebyola birhahira bikahika!”
17 Aliko abalola bwinja-bwinja aderha: “Amandiko maderhere, ‘Ebale abanayumbaka bakabulaga lye lyayinjire kuba bale lizibuzibu ly’oku pembe.’ K’okuderha gurhe?
18 Buli yeshi nji wachikuba kw’elyola bale nj’ashenyaguka. Na buli yeshi nji lyarhogerako, nji lyamuhombola.”
19 Abandisi n’abakulu b’abadahwa balonza oku bamufarhe ahola han’aho bulala balirhegerere oku ahaanaga ogola mufano eyi bowe b’ali awazako, aliko bayubaha abantu.
20 Bamalire kumulolereza, bamurhumira abantu babaga bapatene nabo oku babalipa bachijire nka bali banyakunali yi bamufarhira omu binwa aderha omu kuntu bamuhire omu fune z’oburhegesi n’emwa guvernere.
21 Abola bantu babaza Yesu ntya: “Mwalimu, rhuyinji kw’eby’onaderha biba by’okuli onayigiriza bwinja, orhanajira kabolo, aliko eby’onayigiriza oku bilolere Mungu biba by’obukweri.
22 Orhubwirage lero, amarhegeko mayemerere ku rhukwanene kulipa Kayizari ekoli changwa nanga?”
23 Aliko arhegera obulyalya bwabo ababwira ntya:
24 “Munyereke echicheri ch’edinari. Eyila foto n’ogula mwandiko guliko bili bya nde? Bamushubiza: “Bya Kayizari.”
25 Ababwira: “Akaba ntyo, ebintu bya Kayizari mubihe Kayizari aliko ebya Mungu mubihe Mungu.”
26 Barhagalaga kumufarhira omu binwa embere z’abantu, aliko basomerwa n’echishubizo abahaga, basira.
27 Baguma omu Basadukayo, banaderha k’obufuke burhabaho bayinja bamubaza:
28 “Mwalimu, Musa alirhuyandikiire ntya, ‘Nka mwene-wabo muntu afire, akaleka omukazi buzira mwana, mudorho wage akwanene kurhola oyola mukazi y’arhondereseza mwene-wabo oluburho.’
29 Sasa, haliri balume mushanvu ba nda nguma. Ow’oburhanzi arhola omukazi aliko afa buzira kuleka omwana.
30 Owakabiri naye byaba ntyo kon’oko.
31 Owakasharhu naye arhola oyola mukazi. Aliko byaba okola kon’oko ku boshi oku banali mushanvu. Bafa buzira kuleka abana.
32 Buzinda oyola mukazi naye afa.
33 Bobuno si lero, amango m’obufuke, nj’aba muka nde? Bulala boshi oku banali mushanvu balimurholere aba mukabo.”
34 Yesu abashubiza: “Abana ba mu linola gulu banashaba n’okushabwa,
35 aliko balala babonekene oku bakwanene kulama omu gulu lyayinja nji bafuka eyi barhashaba barhanashabwa.
36 Omu bukweri barhakachifa, bulala bali nka bamalayika, banali bana ba Mungu kugerera obufuke.*
37 Aliko oku bilolere obufuke bw’abafire, chiro na Musa alibiyerekene omu ngani elolere echishaka ch’emishaki amango ahamagalaga Yehova ‘Mungu wa Abrahamu, Mungu wa Isaka kandi Mungu wa Yakobo.’
38 Arhaba Mungu w’abafire si w’abazene, bulala ku yewe boshi balamire.”
39 Omu kumushubiza bandisi baguma baderha ntya: “Mwalimu, waderhere bwinja.”
40 Bulala barhalichiherhe obushiru b’okumubaza chiro n’echibazo n’echiguma.
41 Naye aja ababaza ntya: “Bulagurhe si abantu banadera mpu Kristu ali mugala wa Daudi?
42 N’obola Daudi yewe yenyine aliderhere ntya omu chitabu ch’Enyimpo, ‘Yehova abwirire Waliha: “Yikala ewa kuboko kwani kw’ekulyo
43 kugera amango najira abashombanyi bawe chichumbi ch’okuheba kw’amagulu mawe.”’
44 Daudi yewe yenyine alimuyirikire Waliha; bobuno si gurhe akaja aba mugala?”
45 Oku abantu boshi bali bamuyunviriza, abwira abanafunzi bage ntya:
46 “Muchilange n’abandisi basima kuchilambagiza eyi bayambere amakanzu, basima abantu babalamusize omu masoko, basima efasi z’embere-mbere omu masinagogi, n’efasi z’olukengo bwenene omu fete,
47 banarhola hyoshi abashumbakazi bakaba baliherhe, banasalira n’amasala malehere yi bachiyerekana. Nji bachirwa echihano chikalihire.
