Yayandikwaga na Luka 11:1-54
11 Yesu aliri asalira ey’ali fasi nguma ntya. Amalire, muguma omu banafunzi bage amubwira: “Waliha, orhuyigirize kusalira kuguma n’oku Yowane ayigirizaga abanafunzi bage.”
2 Ababwira: “Amango muli mwasalira muderhe ntya: ‘Darha, ezino lyawe licheswe. Obwami bwawe buyinje.
3 Buli mango orhuhe ebilyo rhwakaba rhukenere oku lusiku.
4 Orhubabalire ebyaha byerhu bulala nerhu rhunababalira buli yeshi warhugoseze, orhanayemeraga rhwarhogera omu chigeregezo.’”
5 Naho ababwira: “Mube nka mwawaza oku muguma mu mwewe akaja emwa mwira wage emidi y’ebudufu anamubwira ntya: ‘Mwira wani, onyindike migati esharhu,
6 bulala hali mwira wani wamagera emwani arhenga omu lugenzi na ntacho ngwerhe ch’okumuha.’
7 Aliko oyola mwira wage anamushubiza ntya ey’anali omu nju: ‘Orhambuzaga omurhula. Mira nachingaga omulyango n’abana bani badorho balyamire haguma nani oku buliri. Intakachizuka mpu nyinje inguhe echintu.’
8 Imbabwirire oku chiro akaba arhazuka mpu amuhe echintu bulala ali mwira wage, azuka anamuha buli chintu akenere bulala agenderere kuhema n’obushiru.
9 Bobola imbabwirire, mugenderere kuhema babaha, mugenderere kulonza mwapata, munagenderere kukongorha babachingulira.
10 Bulala buli yeshi onahema, banamuha, buli yeshi onalonza anapata na buli yeshi wakongorha bamuchingulira.
11 Omu bukweri, muzere ohe mu mwabo omwana wage akahema efi akamuha enjoka ahali h’okumuha efi?
12 Changwa nk’omwana wage amuhemere egi akamuha engobe?*
13 Che chirhumire, akaba mwabo, chiro akaba oku muli bantu babi muyinji kuha abana benyu ebintu binja, Yisho w’omu mbingu yi wakaja afunda kuhaana eroho lichesibwa ku balala bamuhemerelyo si?
14 Buzinda afukuza omuzimu wabaga ajirire omuntu kaduma. Amalire kumufukuza, oyola muntu waliri kaduma arhondera kuderha n’abantu kamama basomerwa.
15 Aliko baguma mw’abola bantu baderha: “Ali afukuza abazimu kugerera emisi ya Belzebuli* murhegesi w’abazimu.”
16 Abandi barhondera kumuhema echimenyeso chirhengere embingu omu kumurhega.
17 Yesu abere amenya amawazo mabo, ababwira ntya: “Buli bwami buli m’okurhayunvikana* bunazinda eyi bwahenere na buli nju eli m’okurhayunvikana enahena.
18 Intyo kon’okola, nka Shetani ali achilwisa yenyine, gurhe obwami bwage bwakaja bwayorha buyumangire? Bulala muli mwaderha oku ndi nafukuza abazimu oku misi ya Belzebuli.*
19 Akaba ndi nafukuza abazimu oku misi ya Belzebuli,* abanafunzi benyu bowe banabafukuza oku misi ya nde? Che chirhumire bonyine nji baba bazuzi benyu.
20 Aliko akaba ndi nafukuza abazimu kugerera omudoke gwa Mungu, k’okuderha ok’Obwami bwa Mungu bwabahikireko mira.
21 Amango omulume ogwerhe emisi n’entwaro zikomere ali alanga enju yage, ebintu byage binaba eyi bili omu bulanzi.
22 Aliko amango owindi muntu ogwerhe emisi kumulusha amamurhera n’okumuhima, oyola muntu anamunyega entwaro zage zoshi alilangalire, anagabira n’abantu ebintu byoshi amunyegere.
23 Buli muntu orhali oku lunda lwani ali mupinzani wani, n’omuntu orhali angwasa kugusha ali ashandaza.
24 “Amango omuzimu amarhenga omu muntu, anaja kulonza ahantu ahumukira omu fasi zirhaba mu menji, aliko anahabula. Ey’oyola muzimu abona ntyo anaderha, ‘Nashuba galuka omu nju yani narhengagamo.’
25 Ey’ageramo anabugana bayicheseze bwinja banayipambire.
26 Oyola muzimu anava agenda analerha bandi bazimu mushanvu bakalihire kumulusha banaja mw’eyola nju n’okuberamo. Buzinda ehali y’oyola muntu yanaja yabiha bwenene kulusha okuntu yaliri burhanzi.”
27 Okw’anali aderha eyola myazi, mukazi muguma waliri ahagarhi k’abola bantu ayama ntya n’omulenge gunene: “Ogwerhe obusime ali mukazi wakuburhaga n’amabere wayonkaga!”
28 Aliko Yesu aderha: “Nanga, s’ahubwe abagwerhe obusime bali balala banayunva echinwa cha Mungu n’okuchikenga!”
29 Okw’abantu banali bagenderera kuluga Yesu arhondera kuderha: “Echila chili chizazi chibi; chili chalonza echimenyeso aliko nta chimenyeso bahabwa olekere echimenyeso cha Yona.
30 Bulala nka kulala Yona abaga chimenyeso oku bantu be Ninawi, Mwen’omuntu naye aba chimenyeso kw’echila chizazi.
31 Oku lusiku l’okucha olubanja, mwamikazi we Sheba* nj’ayumanga haguma n’abantu b’echila chizazi anayerekana oku bakwanene kuhanwa bulala alirhengere oku buzinda bw’egulu y’ayinja kuyunviriza obwengehe bwa Sulemani. Aliko mulole! Hanola hali olushire Sulemani.
32 Oku lusiku l’okucha olubanja abantu be Ninawi nji bafuka banayumanga haguma n’echila chizazi, banayerekana oku chikwanene kuhanwa bulala balihungamire amango bayunva ebi Yona aliri ahubiri. Aliko mulole! Hanola hali olushire Yona.
33 Ey’omuntu ayusa kukonga etara arhalihira ahantu habishirwe changwa akalihira omu karhanda, s’ahubwe analihira oku chinara ch’etara, y’abantu boshi baja omu nju babona omwangaza.
34 Etara ly’omubiri liba lisho. Nk’elisho lyawe lichisezeze ku chintu chiguma,* omubiri gwawe goshi gwaba omu mwangaza, aliko nk’elisho lyawe lili ly’obongwa, omubiri gwawe goshi gwaba omu mwizimya.
35 Che chirhumire obe merangwe y’omwangaza gukulimo gurhahinduka mwizimya.
36 Bobola nk’omubiri gwawe goshi guli m’omwangaza na nta chirumbu chili m’omwizimya, omubiri goshi gwaba m’omwangaza nka kulala binaba amango etara lili lyakukolezeza.”
37 Yesu amalire kuderha ntyo, Mufarisayo muguma amuhamagala aje kulya ebilyo emwage. Yesu ava aja omu mwage basangira.
38 Aliko oyola Mufarisayo asomerwa okubona Yesu arhakalabire embere y’okulya.*
39 Aliko Waliha amubwira: “Mwabo Bafarisayo muli nka gopo n’esahani bishukirwe embuga, aliko omu mirhima yenyu muyunjwire obuhugu n’obubi.
40 Ego mwe bihwinja! Owakolaga embuga arhali yiwakolaga n’omu ndani si?
41 Amango mwamaha abakene, mubahe ebirhengere omu mirhima yenyu. Mukajira ntyo mwaba eyi mwamachesa embuga n’omu ndani.
42 Aliko buli buhanya bwenyu Bafarisayo, bulala munahaana echakumi ch’ebirhi bigekegeke nk’emante, omunana n’ebindi birhi byoshi by’eshogo, aliko mwanasuzagura okunali n’obuzigire bwa Mungu! Mwalikwanene kujira ebila bintu byoshi aliko eyi murhasuzagura ebila bindi byoshi.
43 Buli buhanya bwenyu Bafarisayo bulala munasima efasi z’embere-mbere omu masinagogi n’okusima abantu babalamusize omu masoko!
44 Buli buhanya bwenyu bulala muli nka shinda zirhabonekana bwinja, n’abantu banazilambagirako buzira kumenya!”
45 Omu kumushubiza, muntu muguma walimenyere Amarhegeko bwenene amubwira: “Mwalimu, omu kuderha ntyo oli warhudukanga nerhu.”
46 Yesu aderha: “Buli buhanya bwenyu nenyu bantu bamenyere Amarhegeko bwenene, bulala munahesa abantu emizigo elemerere bwenene, aliko eyi mwewe mwenyine murhalonzeze chiro kuyikoza k’omudoke!
47 “Buli buhanya bwenyu bulala munayumbaka eshinda z’abalebi, n’obo bashokuliza benyu babayirhagabo!
48 Kweri, muli bahamirizi b’ebijiro bya bashokuliza benyu, munali mwabiyemera bulala baliyirhire abalebi, nenyu muli mwayumbaka eshinda z’abola balebi.
49 Che chirhumire Mungu alikoleseze obwengehe bwage amango aderha ntya: ‘Narhumirabo abalebi n’entumwa, aliko bayirha baguma mubo n’okulibuza abandi,
50 omu kuntu eshagama y’abalebi boshi bayirhirwe kurhangirira oku murhondero gw’egulu ebe oku rhwe ly’echila chizazi.
51 Kurhangirira oku shagama ya Abeli kugera oku shagama ya Zakariya bayirhiraga ahagarhi k’amazabahu n’ehekalu.’ Kweri, imbabwirire, eli oku rhwe ly’echila chizazi.
52 “Buli buhanya bwenyu mwe muyinji Amarhegeko bwenene, bulala mwakabwire efungulo z’omulyango g’obumenyi oku bilolere Mungu. Oku mwabo mwenyine murhajamo n’abalonzeze kujamo muli mwababuza!”
53 Amango arhenga ahola, abandisi n’Abafarisayo barhondera kumuyegera bamufundeza bwenene n’okumubaza bibazo binene,
54 omu kulonza okuntu bakamufarhira omu binwa aderha.
