Yayandikwaga na Luka 7:1-50
7 Amalire kubwira abantu ebyola byoshi, aja omu Kapernaumu.
2 Mukulu muguma w’abasoda aligwerhe omukozi wage asima bwenene. Oyola mukozi alwala bwenene abwira afa.
3 Oyola mukulu w’abasoda abere ayunva oku bilolere Yesu, arhuma bashamuka baguma b’Abayahudi emunda Yesu ali bamubwire ayinje afumye omukozi wage.
4 Baja emunda Yesu ali, barhondera kumubembereza bwenene n’okumubwira: “Oyula muntu akwanene omujirire ebyahemere,
5 bulala asima eshanja lyerhu yi wanarhuyumbakiraga esinagogi.”
6 Yesu ava agenda nabo. Babere bali hofi n’ahamwage, oyola mukulu wabasoda arhuma bera bage babwire Yesu ntya: “Waliha, orhashibaga wachilaza bulala indi muntu orhakwanene; orhakaja omu nju yani.
7 Echola che chanarhumaga nabona oku nta kwanene kuyinja emunda oli, aliko oderhe chinwa chiguma chonyine, omukozi wani afuma.
8 Bulala nani inankenga abanantegeka, inampa n’abasoda bani amarhegeko, nka namabwira muguma mpu ‘Genda’, anagenda; nka namabwira owindi mpu ‘Yinja,’ anayinja; na nka namabwira omukozi wani mpu ‘Jira ntya,’ anajirako.”
9 Yesu ayunvirhe ntyo, asomererwa oyola muntu. Ahindamuka, alola abantu kamama baliri bamukulikira, aderha: “Imbabwirire, intasaga kubona obwemere bunene ntya chiro n’omu Izraeli.”
10 Abarhumwaga babere bagaluka em’oyola mukulu w’abasoda, babugana oyola mukozi afumire.
11 Kasanzi kageke enyuma w’ahola, Yesu abalamira omu vile enayirikwa Naini, abanafunzi bage n’abantu kamama bagenda naye.
12 Ahikire hofi n’omulyango guzibuzibu gw’evile, nyamawee! Haliri abantu baliri bakula omuntu ofire mw’eyola vile waliri mwana muguma yenyine nyina analigwerhe. N’olekere nantyo, oyola mukazi aliri mushumbakazi. Abantu kamama ba mw’eyola vile baliri haguma naye.
13 Waliha abere amubona, amuyunvira obonjo amubwira: “Leka okulaka.”
14 Ayegera bugeke, ahuma oku chipoyi, abalichihekere bayumanga. Aderha: “Mwana w’obusole, inkubwirire, zuka!”
15 Oyola muntu wabaga afire, ayikala arhondera kuderha, Yesu amuha nyina.
16 Boshi bayunva obuba barhondera kukuza Mungu n’okuderha: “Omulebi mukulu arhengerere ahakagarhi kerhu,” kandi baderha: “Mungu ayibukire abantu bage.”
17 Emyazi oku bilolere Yesu yayenera omu Yudeya yoshi n’omu materitware maliyizungulukire.
18 Abanafunzi ba Yowane bamubalira ebyola bintu byoshi.
19 Yowane ava ahamagala babiri omu banafunzi bage abarhuma baje kubaza Waliha ntya: “Woyo we walikwanene kuyinja, changwa si rhulindire oku hali owindi wachiyinja?”
20 Bahikire emunda Yesu ali, bamubwira: “Yowane Mubatiza arhurhumire rhukubaze ntya: “Woyo we walikwanene kuyinja, changwa si rhulindire oku hali owindi wachiyinja?”
21 Mw’akola kasanzi, afumya bantu banene baligwerhe obuzamba, amalwala makomere, afukuza abazimu, ahumula n’empumi zabona.
22 Omu kubashubiza Yesu ababwira: “Mugende mubalire Yowane ebi mwabwene n’ebi mwayunvirhe: Empumi zikala zili zabona, ebilema bili byalambagira, abalwere ebibenzi bali bafuma, ebihuli bili byayunva, abafire bali bafuka, n’emyazi minja eli yahubiribwa oku bakene.
23 Obusime buli b’olala orhambwene mw’empanvu yarhuma asirhala.”
24 Abantu Yowane arhumaga babere bagenda, Yesu arhondera kubwira abantu kamama oku bilolere Yowane ntya: “Bichi mwajaga kulola omu rungu? Olusheke luli lwashaganywa n’omuyaga si?
25 Bichi mwajaga kulola kanuni? Omuntu oyambere emyambaro ekwirire si? Bulala abayambere emyambaro ekwirire banalama n’akalamo k’omuhimbo, baba omu nju z’oku bwami.
26 Omu bukweri bichi mwajaga kulola? Mulebi si? Kweri, imbabwirire, alushire chiro n’omulebi.
27 Yewe yi biyandikirwe ntya eju yage: ‘Tala! Narhuma omurhumwa wani embere zawe, yewe yiwaba akurheganyiza enjira.’
28 Imbabwirire, omu bantu boshi baburhirwe n’abakazi, ntaye wabereho oli mukulu kulusha Yowane. Aliko ow’eshishi bwenene omu Bwami bwa Mungu, ali mukulu kumulusha.”
29 (Abantu boshi n’abanalipisa ekoli babere bayunva ntyo, baderha oku Mungu ali munyakunali bulala babaga eyi babatizwe omu bubatizo bwa Yowane.
30 Aliko Abafarisayo n’abandi bantu baliyinji Amarhegeko bwenene basuzagura empanulo* Mungu abahaga bulala barhayemeraga Yowane ababatiza.)
31 “Inde nakashushanya n’abantu ba mw’echila chizazi, inde bali kuguma naye?
32 Bali nka bana badorho bayikere omu soko bali bahamagala ababo banasharha nabo banaderha: ‘Rhwabazihire omulizi aliko murhazinire; rhwabandire endulu aliko murhalakire.’
33 Intyo kon’oko, Yowane Mubatiza ayinjaga ey’arhalya mugati arhananywa divayi, aliko mwaderha: ‘Ali m’omuzimu.’
34 Mwen’omuntu yewe ayinja eyi ali alya n’okunywa, aliko muli mwaderha: ‘Mulole! Oyula muntu ali mudambi, muja w’edivayi, mwira w’abanalipisa ekoli n’abanyabyaha!’
35 Aliko obwengehe bunaboneka kugerera ebijiro bili byajirwa.”
36 Mufarisayo muguma ahema Yesu aje emwage basangire. Yesu ava aja em’oyola Mufarisayo basangira.
37 Mukazi muguma walimenyikene mw’eyola vile kw’aba munyabyaha ayunva oku Yesu y’alya omu m’oyola Mufarisayo, ayinja n’esupa likolerwe ne alabasta lili mw’amarashi.
38 Aja enyuma za Yesu oku magulu, orhondera kulira analobya amagulu ma Yesu n’emiziga, anamashangula n’enviri zage. Ayinja aha amagulu ma Yesu ebize n’okumashiga amarashi.
39 Oyola Mufarisayo wakaribisaga Yesu omu mwage abwene ntyo, arhondera kuwaza ntya: “Nk’oyula muntu analiri mulebi w’obukweri, akarhegerere mukazi nyabachi oyula oli wamuhumako, akanamenyere okw’ali munyabyaha.”
40 Yesu amubwira: “Simoni, ingwerhe echintu nakubwira.” Simoni aderha: “Mwalimu, mbwiracho!”
41 Balume babiri baliri omu deni lya muntu muguma; ow’oburhanzi aliri omu deni lya dinari 500 n’owindi aliri omu deni lya dinari 50.
42 Babere babula gurhe bakamulipa, abona okw’abababalire. Bobola si, inde wakamusimire bwenene mw’abola bombi?
43 Omu kushubiza Simoni aderha: “Imbwazize okw’eyibababaliraga deni linene.” Yesu amubwira: “Waderhere bwinja.”
44 Naho ahindamuka alola oyola mukazi, abwira Simoni: “Obwene oyula mukazi? Najire omu mwawe orhampere amenji m’okushuka amagulu. Aliko oyula mukazi yewe alobyeze amagulu mani n’emiziga yage n’okumapanguza n’enviri zage.
45 Nta bize walimpere, aliko kurhenga esa najaga munola, oyula mukazi arhaza kuleka kuha amagulu mani ebize.
46 Orhalisheshere amavurha oku rhwe lyani, aliko oyula mukazi asheshere amarashi oku magulu mani.
47 Che chirhumire inkubwirire, chiro akaba ebyaha by’oyula mukazi bili binene, byoshi byababalirwe bulala ayerekene buzigire bunene. Aliko owababalirwe bigeke anayerekana buzigire bugeke.”
48 Ava abwira oyola mukazi ntya: “Ebyaha byawe byababalirwe.”
49 Abaliri balya haguma naye barhondera kubazana: “Oyula muntu ali nde oli wababalira chiro n’ebyaha?”
50 Aliko Yesu abwira oyola mukazi: “Obwemere bwawe bwakuchungwire; genda n’omurhula.”
Mahugulo m'efo
^ Ao “Obwerekezi.”
