Yayandikwaga na Luka 17:1-37
17 Naho Yesu abwira abanafunzi bage ntya: “Ntako byakaba y’ebintu by’okurhuma abandi bagoma bifunda kuyinja. Aliko buli buhanya k’olala byagererako!
2 Kwakabere kwinja barhole engashiri nzibuzibu bamushwekereyo omu gosi naho banamukabule omu nyanja, ahali h’okuderha kw’arhume muguma mw’abala badorho agoma.
3 Muchilange. Nka mwene-wenyu amakola echaha, omukalihire na nk’amahungama, omubabalire.
4 Na chiro akukolera echaha kali mushanvu oku lusiku, aliko anagaluka emunda oli kali mushanvu anaderha, ‘Namahungama,’ okwanene kumubabalira.”
5 Entumwa zava zabwira Waliha ntya: “Orhuhe obwemere bunene.”
6 Naho Waliha aderha: “Nka mwaliherhe obwemere bungana akaburho k’eharadali, mwakabwirire ogula murhi gw’akafulensi, ‘Shiguka oje kumera omu nyanja!’ Gwakanabakengere.
7 “Inde mu mwewe wakaba agwerhe omukozi onamuhingira changwa onamuchungira ebirhungano, wakamubwira ntya amango amafuluka omu shwa, ‘Yinja juba-juba olye’?
8 Ntaye, s’ahubwe amubwira ntya ‘Integanyiza ebilyo by’egolo, onayambale omwambaro gwawe gw’akasi onkolere ebinkenere kugera ahanamala kulya n’okunywa, nawe wanaja walya n’okunywa.
9 Arhakagwarha eshukrani k’oyola mukozi bulala ajirire ebintu alikwanene kujira. Arhali ntyo si?
10 Intyo kon’okola, amango mwamakola ebintu mwalihemerwe mukole, muderhe: ‘Rhuli baja barhaherhe echi bamalire. Ebi rhwakolere birhwanalikwanene kukola.’”
11 Amango Yesu aliri aja e Yerusalemu, agera ahagarhi ke Samariya ne Galilaya.
12 Abere aja mu vilaje nguma ntya, abuganana na balume ekumi balwere ebibenzi, aliko bayorha bayumangire hale naye.
13 Baderha ntya n’omulenge gunene: “Mwalimu, Yesu, orhuyunvire obonjo!”
14 Yesu abere ababona ababwira: “Mugende muje kuchiyerekana emw’abadahwa.” Oku banali bajayo, bafuma.
15 Muguma mubo abere abona okw’amafuma agaluka enyuma eyi ali akuza Mungu n’omulenge gunene.
16 Afukama oku magulu ma Yesu ayunama kugeza amalanga ahashi, amubwira koko. N’oyola mulume aliri Musamariya.
17 Omu kushubiza Yesu aderha: “Boshi oku bali ekumi balifumizwe. Arhali ntyo? Ngahe balala bandi mwenda bali?
18 Nta windi muntu wagalukire kukuza Mungu olekere oyula muntu w’elindi-lindi shanja?”
19 Ava amubwira ntya: “Yumanga ogende; obwemere bwawe bwakufumize.”
20 Abafarisayo babere bamubaza mangochi Obwami bwa Mungu bwayinja, abashubiza ntya: “Obwami bwa Mungu burhakayinja omu bulyo bubonekene bwinja;
21 n’abantu barhakaderha mpu ‘Buli hanola!’ changwa mpu ‘Buli halira!’ Bulala Obwami bwa Mungu buli ahagarhi kenyu.”
22 Kisha abwira abanafunzi bage: “Nji hagera amango eyi muli mwachifija mubone lusiku luguma omu siku za Mwen’omuntu, aliko murhakalubona.
23 N’abantu nji bababwira mpu, ‘Ali halira!’ Changwa mpu, ‘Ali hanola!’ Aliko nji murhajagayo nji murhanabakulikiraga.
24 Bulala nka kulala omubaraganyo gunagera gwanaboneka omu chanya kurhonderera ku lunda luguma kugera oku lwindi lunda, intyo ku Mwen’omuntu nj’aba omu lusiku lwage.
25 Aliko bihemere arhange alibuke bwenene n’okulahirwa n’echila chizazi.
26 Echindi, nka kulala ebintu byaliri omu siku za Nowa, intyo ku nji byanaba omu siku za Mwen’omuntu:
27 Abantu baliri balya, bananywa, abalume baliri bashaba, n’abakazi banashabwa kugera amango Nowa ajaga omu safina ne Chihonzi chayinja chabalimbula boshi.
28 Kandi nka kulala byanaliri omu siku za Loti: Abantu baliri balya, baliri banywa, baliri bagula, baliri baguza, baliri babyala,* banaliri bayumbaka.
29 Aliko olusiku Loti arhenga e Sodoma, envula y’omuliro n’obuzunga* yarhoga kurhenga embingu yabasingonyola boshi.
30 Intyo kon’okola ku nji byaba olusiku Mwen’omuntu nj’abonekana.
31 “Olola lusiku, omuntu nji waba ali elugulu w’enju yage aliko ey’ebintu byage bili omu nju,* nj’arhayandagalaga mpu aja kubirhola. Intyo kon’okola, omuntu nji waba ali omu shwa nj’arhagalukiraga ebili enyuma.
32 Muyibuke muka Loti.
33 Buli muntu oli walonza kulanga akalamo kage akaheza, aliko buli muntu wakaheza nj’akachungula.
34 Imbabwirire, m’obola budufu bantu babiri nji baba bali ku buliri buguma, muguma anahekwa aliko owindi analekwa.
35 Bakazi babiri nji baba bali basyera ku lusyo luguma, muguma nji ahekwa aliko owindi nji alekwa.”
36 —
37 Bava bamubaza: “Ngahe si Waliha?” Abashubiza: “Buli hoshi omufu nji gwaba guli, ha barubaka nabo nji bachigusha.”
