Yayandikwaga na Luka 12:1-59

  • Elevire y’Abafarisayo (1-3)

  • Oyubahe Mungu, s’arhali abantu (4-7)

  • Okuyemera okuba omu buguma na Kristu (8-12)

  • Omufano g’omuchire w’echihwinja (13-21)

  • Muleke okuchilaza (22-34)

    • Echishumba chigeke (32)

  • Akamaro k’okuyorha rhuzene (35-40)

  • Omuja mwimana n’omuja orhali mwimana (41-48)

  • Arhali murhula, s’okurhayunvikana (49-53)

  • Obulagirire b’okusuzuma ebihe rhulimo (54-56)

  • Okumala obuhaka (57-59)

12  Mw’agola mango haliri ebihumbi by’abantu balichigushire haguma mpaka barhondera kulabarhana. Yesu abwira abanafunzi bage ntya: “Muchilange n’elevire* y’Abafarisayo, k’okuderha obulyalya. 2  Aliko nta chintu chabishirwe bwinja-bwinja chirhakabishulwa na nta siri n’enguma erhakamenyikana. 3  Che chirhumire, buli byoshi muli mwaderha omu mwizimya nji byayunvikana omu mwangaza, n’ebi muli mwaboherezana eyi muli omu byumba byenyu nji byayamagazizwa oku nju elugulu. 4  Kandi mbabwirire bera bani, murhayubahaga balala bakayirha omubiri aliko eyi nta chindi bakagala kukola chirhalukire echola. 5  Nababwira eyi mukwanene kuyubaha: Muyubahe Olala enyuma y’okumala kuyirha, aherhe obuhashe b’okukabula omu Chihenama.* Kweri mbabwirire, Oyola yi muyubahage. 6  Nyunyi erhano z’ebishwa* zinagulwa bicheri bibiri by’akachiro kageke bwenene. Arhali ntyo? Aliko ntayo n’enguma muzo Mungu anayibagira. 7  Bobuno oku bibalolere, chiro n’enviri z’oku rhwe lyenyu zoshi ziba ziganjirwe. Murhayubahaga, mugwerhe kachiro kanene bwenene kulusha bishwa* binene. 8  “Imbabwirire, buli yeshi wayemera okw’ali mwanafunzi wani embere z’abantu, Mwen’omuntu naye nj’amuyemera kw’ali mwanafunzi wage embere za bamalayika ba Mungu. 9  Aliko buli yeshi wandahira embere z’abantu, naye nj’alahirwa embera za bamalayika ba Mungu. 10  Na buli yeshi waderha Mwen’omuntu kubi nj’ababalirwa, aliko buli yeshi wadukanga eroho lichesibwa arhakafa ababalirwe. 11  Amango nji babaheka embere z’abantu, abarhegesi n’abarhambo, nji murhalagaga eju y’okuchibaza gurhe mwachifasiriya changwa bichi mwaderha. 12  Bulala mw’akola kasanzi kan’akola eroho lichesibwa nji lyabayigiriza ebi mukwanene kuderha.” 13  Muntu muguma mw’abola bantu boshi ava amubwira: “Mwalimu, bwira mwene-werhu ayemere rhugabane naye akashambala.” 14  Yesu amubwira: “Muza we, inde wanjiraga muzuzi changwa muntu w’okubagabira ebyenyu?” 15  Ava ababwira: “Mufungule amasu munachilange na buli buko b’obuhugu, bulala chiro omuntu aba agwerhe bintu binene, ebyola byoshi agwerhe arhali bye byakamuha akalamo. 16  Eju y’echola abaha ogula mufano, aderha: “Eshwa lya muchire muguma lyaliyerere bwenene. 17  Ava arhondera kuwaza ntya omu murhima: ‘Gurhe naja najira bunola ntachiherhe ahanakashalulira emyaka yani?’ 18  Aderha mpu, ‘Najira ntya: Nashanda edepo zani nanayumbaka ezizibuzibu, nanalunda mw’emburho zani n’ebikulo byani byoshi, 19  nanaja nabwira omurhima gwani: ‘Oherhe bintu binene binja obikiire emyaka yayinjire; chihumukira, olye, onywe onachisimise.’ 20  Aliko Mungu amubwira, ‘We chihwinja we, obudufu bwa zene wafa. Bobo si lero ebila bintu byoshi walundire byaba bya nde?’ 21  Intyo kubinabera omuntu wachilundikire bikulo binene aliko ey’arhali muchire emwa Mungu.” 22  Ava abwira abanafunzi bage ntya: “Che chirhumire imbabwirire, muleke okuchilaza oku bilolere akalamo kenyu omu kuchibaza bichi mwalya, changwa oku bilolere emibiri yenyu omu kuchibaza bichi mwayambala. 23  Bulala akalamo kali k’akamaro kulusha ebilyo, n’omubiri guli gw’akamaro kulusha emyambaro. 24  Mulole ebihungwe; birhahinga mburho birhanashalula; birhajira depo binashaluliramo, aliko Mungu anabilisa. Murhali b’akachiro bwenene kulusha enyunyi si? 25  Inde mu mwewe wakayongera chiro hityu oku bule bw’akalamo kage omu kuchilaza bwenene? 26  Bulala murhakagala kujira chiro ehintu hityuli hili nk’ehyo, bulagurhe mwakaja mwachilaza eju y’ebindi bintu? 27  Mulolereze gurhe amauwa manakula: Nta kasi k’okuyuha echuka manakola, marhanaluka myambaro; aliko imbabwirire oku chiro na Sulemani omu bukuze bwage boshi arhachigeraga ayambala kuguma na uwa liguma mumo. 28  Akaba ntyo ku Mungu anayambisa ebirhi by’omushwa byabaho zene n’omusezi byanakabulwa omu chibeyi, k’arhabayambisa bwenene chiro na kulusha; mwabo bantu baherhe bwemere bugeke! 29  Bobola muleke okuchibaza bichi mwalya na bichi mwanywa, munaleke kuchilaza bwenene; 30  bulala ebyola bintu byoshi by’abantu b’amashanja m’egulu banakulikiranya bwenene, aliko Yisho amenyere oku mukenere ebyola bintu. 31  Ahubwe mugende mwarhanga kulonza Obwami bwage, ahandi mwayongerwa ebyola bintu. 32  “Murhayubahaga, mwabo chishumba chigeke, bulala Yisho ayemerere kubaha Obwami. 33  Muguze ebintu byenyu muhe abakene efuranga. Mukole eshaho zirhakashaja z’okubika mw’efuranga, muchibikire omu mbingu ebikulo birhakahwa, ah’omwizi arhakahika n’omushwa gurhakahikayo gukaharabisa. 34  Bulala ah’ebikulo byenyu bili ha n’emirhima yenyu nayo yaba. 35  “Muyambale emyambaro, mube tayari, n’amatara menyu mayorhe makolezezwe, 36  munakwanene kuba nka bantu bali balindira oku nahamwabo arhenga oku buhya, omu kuntu hano akongorha oku mulyango, bamuchingulire ahola han’aho. 37  Abagwerhe obusime bali bakozi nahamwabo nj’ayinja anabugana bazene! Kweri imbabwirire, nj’ababwira bayikale oku meza, anayambala omwambaro gwage gw’akasi anarhondera kubakolera ebibakenere. 38  Nj’akayinja midi y’ebudufu* changwa akayinja oluhazi lubika* akabugana bachizene, nji bagwarha obusime! 39  Aliko echi mumenyage, nka nyina enju amenyere mangochi omwizi ayinja, arhakayemera barhula enju yage. 40  Nenyu muyorhe muli tayari bulala Mwen’omuntu nj’ayinja oku sa murhaliwazize.” 41  Petro amubaza: “Waliha, rhwabo rh’oli wabwira ogula mufano changwa oli wagubwira n’abala bandi bantu boshi?” 42  Waliha aderha: “Omu bukweri inde ye muja mwimana onakengukire* nahamwabo ashingize abakozi b’omu mwage, agenderere kubaha echigabi chabo ch’ebilyo oku kasanzi kakwanene? 43  Obusime buli b’oyola muja akaba amango nahamwabo ayinja, amubugana ali ajira ntyo! 44  Kweri imbabwirire nj’amushingiza ebikulo byage byoshi. 45  Aliko nk’oyola muja achibwirire omu murhima mpu, ‘Nahamwerhu alegamire,’ akarhondera kushurha abaja n’abajakazi, analya, ananywa n’okulaluka; 46  nahamwabo nj’ayinja omu olusiku arhaliwazize n’omu sa arhamenyere, anamuha obuhane bukalihire bwenene n’okumuhira haguma n’abarhali banyakunali. 47  Oyola muja walimenyere obulonza bwa nahamwabo aliko arhachirheganyaga anafunda kujira ebi balimuhemere, nji bamukubirha nkoni zinene. 48  Aliko olala orhalimenyere eby’alikwanene kujira, akola ebikwanene enkoni, nji bamushurha nkoni zigeke. Kweri eyi bahere binene nji bamuhema na binene, eyi bashingize binene nji banamuhema binene kulusha ebi bahema abandi. 49  “Nayinjaga kuchana omuliro oku gulu, na bunola gwakolerere bichi bindi nakachilonza birhalwise echola? 50  Kweri, hali obubatizo inkwanene kubatizwa, inyunvirhe n’omulago gunene kugera amango bwayenera. 51  Muwazize oku nayinjaga kulerha omurhula oku gulu si? Nanga, imbabwirire oku nayinjaga kulerha okurhayunvikana. 52  Bulala kurhangira bunola, nk’omu nju hali bantu barhano, basharhu nji bapinga babiri na babiri banapinga basharhu. 53  Nji haba okurhayunvikana ahakagarhi k’omulume n’omugala, ahakagarhi k’omurhabana n’eshe, ahakagarhi k’omukazi n’omwali, ahakagarhi k’omunyere na nyina, ahakagarhi k’omukazi n’omwazana, n’ahakagarhi k’omukazi na nazala. 54  Ashuba kubwira abantu kamama ntya: “Eyi mwabona echichu charhengerera emazikiro, mwanaderha mpu ‘Zene haba omuyaga,’ byanayinja kuba ntyo. 55  N’eyi mwabona omuyaga gwarhengerera eside* mwanaderha mpu, ‘Zene haba chuka chinene,’ byanayinja kuba ntyo. 56  Mwe ndyalya mwe, muyinji kusuzuma okuntu egulu n’omu chalege hashushire; bobo si bulagurhe murhenji kusuzuma chinola chihe rhulimo? 57  Bulagurhe murhakachirhegereza mukamenya ebintu bikwanene? 58  Omufano, amango oli waja oku tribinale n’omuntu oherhe naye olushinja, ochihangane muyunvikane eyi muchili omu njira, y’arhakusidaka em’omuzuzi, omuzuzi naye akakuhira omu fune z’omulanzi w’etribinale, n’omulanzi w’etribinale akakukabula omu prizo. 59  Kweri nkubwirire, orhakarhengamo orhanaza kulipa edeni lyoshi kugera oku chicheri chizinda ch’akachiro kageke.”

Mahugulo m'efo

^ Ao “n’engezo.”
^ Echihenama yaliri fasi bagendaga badwikira m’obuchafu embuga w’evile ye Yerusalemu.
^ Ao “z’ebitaranviyo.”
^ Ao “bitaranviyo.”
^ “Chinwa oku Chinwa: ‘omu chitaramo cha kabiri.’ Omu siku za Yesu chaliri chihe cha kurhangira sa esharhu z’ebudufu kugera midi y’ebudufu.”
^ “Chinwa oku Chinwa: ‘omu chitaramo cha kasharhu.’ Omu siku za Yesu chaliri chihe cha kurhangira midi y’ebudufu kugera sa mwenda z’ebudufu.”
^ Ao “oyengehere.”
^ Ao “ekarhongo.”

Copyrights for this publication