Yayandikwaga na Luka 24:1-53
24 Aliko olusiku lurhanzi lw’eboso, baja ewa shinda emiseke-miseke eyi bagwerhe ebintu bihumwire bwinja* babaga barheganyize.
2 Babugana ebale lyalichingire eshinda lyahirikirwe.
3 Babere bajamo, barhabonaga m’omubiri gwa Waliha Yesu.
4 Oku babulire gurhe bajirage eju y’echola, tala! Balume babiri bayambere emyambaro eli yabaraganya bayumanga hofi nabo.
5 Abola bakazi bayubaha bwenene bayorha balolere ahashi. Eju y’echola abola balume bababwira: “Gurhe muli mwalonzeza omuntu ozene omu bafire?
6 Arhali hanola s’afukire. Muyibuke eby’ababwiraga ey’achiri e Galilaya,
7 aderha oku Mwen’omuntu akwanene kulenganywa omu fune z’abanyabyaha, anamanikwa oku murhi n’olusiku lwa kasharhu anafuka.”
8 Bava bayibuka eby’aderhaga,
9 barhenga ahola oku shinda baja kubibalira balala 11 n’abandi boshi.
10 Haliri Mariya we Magadala, Jani na Mariya nyina wa Yakobo. Abandi bakazi baliri nabo babalira entumwa ebyola bintu byoshi.
11 Aliko entumwa zabona nk’ebyola bili bintu birhakayunvikana chiro, barhanayemeraga bachizera eby’abola bakazi baderhere.
12 Chiro akaba ntyo Petro alibirhira ewa shinda, ahenguzamo, abona mw’ebiraka by’ebinusi byonyine. Agaluka eyi ali achibaza bichi byabere.
13 Olola lusiku lon’olola, banafunzi babiri baliri babalamira omu vilaje enayirikwa Emau, ku bilometre hofi 11 ne Yerusalemu.
14 Baliri bagenda baganira oku bilolere ebyola bintu byoshi byabaga byabere.
15 Oku banali bagenda babiganirako n’okubiwazako, Yesu yewe yenyine abayegera arhondera kulambagira nabo.
16 Aliko amasu mabo maliri nk’amafungirwe omu kuntu barhamurhegeraga.
17 Ababaza: “Bintu bihe ebyola muli mwagenda mwaganirako?” Bayumanga eyi babonekene oku bagayire.
18 Muguma mubo oyirikirwe Keleopasi, ashubiza aderha: “Oli mwinjira olamire yenyine omu Yerusalemu omu kuntu orhenji ebyaberemo mu zinola siku?”
19 Ababaza: “Bintu bihe ebyola? Baderha: “Ebilolere Yesu we Nazareti, walichiyerekene oku ali mulebi ogwerhe emisi omu binwa n’omu bijiro embere za Mungu n’embere z’abantu;
20 n’okuntu abakulu berhu n’abarhambo nji bamuhanaga achibirwe echihano ch’olufu n’okumumanika oku murhi.
21 Rhwalinihire k’oyula muntu ye wachungula Izraeli. Olekere nantyo, lukala luli lusiku lwa kasharhu lunola kurhenga ebyola bintu bibere.
22 Hali na bakazi baguma rhuba nabo barhusomeze, bulala balilamukire oku shinda,
23 babere babula omubiri gwage, bamayinja kuderha oku balibonekerwe, bamalayika bamababwira oku ali mugumaguma.
24 Baguma omu baliri nerhu bamalibirhira oku shinda, bamabugana ebintu bili nk’oku abola bakazi banaderhaga aliko barhamubwene.
25 Ava ababwira: “Ego bantu barhagwerhe bwenge bagwerhe n’emirhima erhayemera juba-juba ebintu byoshi byaderhwaga n’abalebi!
26 Birhalihemere Kristu arhange agere mw’ebyola byoshi embere aje omu bukuze bwage?”
27 Arhonderera ku Musa n’Abalebi boshi, abafasiriya ebintu biderherwe oku bimulolere bili omu Mandiko moshi.
28 Buzinda bagera hofi ne vilaje baliri bajamo, aliko yewe ashusha nk’ow’agenderera n’olugenzi.
29 Bamuhema abere nabo bamubwira: “Obere nerhu bulala bwayirire.” Eju y’echola aja omu nju y’abera nabo.
30 Abere ali alya haguma nabo, arhola omugati aguchagulanga aguhabo.
31 Amasu mabo maja mafunguka bwinja bamurhegera aliko ava ahirima.
32 Bayinja babwirana: “Emirhima yerhu erhaliri yagulumira amango aliri aganira nerhu omu njira n’amango aliri arhufasiriya bwinja-bwinja amandiko?
33 Bava bayumanga mw’akola kasanzi kan’akola bagaluka e Yerusalemu, babugana balala 11 n’abandi banafunzi balichigushire haguma nabo.
34 Abola babuganaga bababwira: “Kweri Waliha afukire analirhengerere Simoni.”
35 Nabo bababalira ebyarhengereraga omu njira n’okuntu bamurhegeraga amango achagulangaga omugati.
36 Oku banachili baderha yewe yenyine ayumanga ahagarhi kabo ababwira: “Mugwarhe omurhula.”
37 Aliko bulala balishalamire n’okuyubaha bwenene, bawaza ku babwene echilemwa ch’eroho.
38 Ababwira: “Bichi birhumire mwayubaha, bulagurhe mugwerhe engangane omu mirhima yenyu?
39 Mulole efune n’amagulu mani mwabona oku anali nyono; mumpumeko mulole, bulala echilemwa ch’eroho chirhajira mubiri n’amagufa nka kunola mubwene indi.
40 Aliri aderha ntyo ey’anali abayereka amaboko n’amagulu mage.
41 Aliko babere barhaza kuchizeraye eju y’obusime bunene n’okusomerwa, ababaza: “Hali echintu ch’okulya muherhe hanola si?
42 Bamuha echichira ch’efi eyosezwe,
43 achirhola achilira embere zabo.
44 Ababwira: Amango nalichili haguma nenyu nalibabwirire oku ebintu byoshi byayandikirwe omu Marhegeko ma Musa, omu Balebi n’omu chitabu ch’Enyimpo, bikwanene kuyenera.”
45 Afungula bwinja obwenge bwabo omu kuntu barhegere eby’Amandiko maderhere k’okuderha gurhe.
46 Ababwira: “Amandiko maderhere oku Kristu akwanene alibuke n’okufuka olusiku lwa kasharhu.
47 Okuhungama n’okubabalirwa ebyaha omu zino lyage, bikwanene bihubiribwe omu mashanja moshi kurhangirira e Yerusalemu.
48 Mwaba bahamirizi b’ebila bintu.
49 Mulole! Nabarhumira echi Darha alaganyaga. Mwabo muyorhe omu vile kugera amango mwayunjuzwa emisi erhengerere enyanya.
50 Ava abakula omu vile abaheka e Betaniya, azamula efune zage abagisha.
51 Oku anali abagisha, ava akulwa haguma nabo ahekwa embingu.
52 Bamuyunamira, bagaluka e Yerusalemu n’obusime bunene.
53 Buli mango baliri baba omu hekalu eyi bali basingiza Mungu.
Mahugulo m'efo
^ Ao “amanukato.”
