Yayandikwaga na Luka 5:1-39
5 Mango maguma eyi Yesu ali ahaburhambi bw’enyanja ye Genezareti, abantu kamama baliri bamufundeza yi bayunviriza echinwa cha Mungu.
2 Abona ahabasikire marho mabiri, aliko abashana barhalirimo bulala baliri bashuka emilaga yabo.
3 Ava aja mu bwarho buguma, obwaliri bwa Simoni, amubwira abe nk’amushunika aje hale n’eshi. Ayikalamo arhondera kuyigiriza abola bantu.
4 Amalire kuyigiriza, abwira Simoni ntya: “Heka obwarho emuhengeri, murhoze emilaga murhondere kurhega efi.”
5 Simoni amushubiza: “Mwalimu, rhwakolere bwenene obudufu boshi aliko ntacho rhwayirhire, aliko bulala woyo wederhereko narhoza emilaga.”
6 Bajirire ntyo, bayirha fi zinene bwenene. Omu kuntu emilaga yabo yarhondera kubereka.
7 Bava bahamagala ababo baliri omu bwindi bwarho bayinje babarhabale. Bayinja, bayunjuza amola marho mabiri omu kuntu maliri mabwira mazika.
8 Simoni Petro abwene ntyo, afukama embere za Yesu, amubwira ntya: “Waliha, oje hale nani, bulala indi munyabyaha.
9 Bulala yewe n’abaliri nabo, balisomerwe bwenene eju y’efi zingana bayirhaga.
10 Yakobo na Yowane bagala ba Zebedayo baliri bakola na Simoni, nabo balisomerwe. Aliko Yesu abwira Simoni ntya: “Leka okuyubaha. Kurhonderera zene wayinja warhega abantu eyi banazene.”
11 Bava bagalula amarho eshi baleka byoshi bakulikira Yesu.
12 Amandi mango ey’ali omu vile nguma, omulume olwere ebibenzi amubona. Ayunama kugeza amalanga ahashi, amurhebereza ntya: “Waliha, akaba olonzeze, wakanfumya.”
13 Yesu ava alambula efune yage amuhumako, amubwira: “Indozeze! Fuma.” Ahola han’aho ebibenzi byamuhwako.
14 Akomereza oyola mulume oku ntaye n’omuguma abwirage, amubwira ntya: “Ogende ochiyerekane em’omudahwa, ohaane enterekero y’okucheswa kwawe nk’oku Musa arhegekaga, yi nabo babona oku wafumire.”
15 Aliko emyazi oku bimulolere yaliri yagenderera kuyenera fasi zinene, n’abantu kamama baliri bachigusha yi bamuyunviriza, anabafumye n’endwala zabo.
16 Aliko agendaga azigana kuja ahali bwihunze y’asalira.
17 Lusiku luguma eyi Yesu ali ayigiriza, Abafarisayo n’abalimu b’Amarhegeko barhengereraga omu mavilaje me Galilaya, e Yudeya ne Yerusalemu, nabo baliyikere ahola; n’emisi ya Yehova yaliri yamukolamo y’afumya amalwala.
18 Hava hayinja abantu bahekere omuntu ohunzize oku chipoyi, baliri balonza okuntu bakamugeza embere za Yesu.
19 Babere babula enjira bulala abantu baliri kamama, bava bashona oku nju, bashakambula amatebura,* bayandagaza oyola muntu oku chipoyi ahagarhi k’abantu baliri embere za Yesu.
20 Abwene obwemere bwabo, Yesu abwira oyola muntu ntya: “Ebyaha byawe byababalirwe.”
21 Abandisi n’Abafarisayo barhondera kubwirana ntya: “Oyula ali nde oli waderha ebinwa by’okudukanga* Mungu? Inde windi wakababalira ebyaha olekere Mungu yenyine?”
22 Aliko Yesu abere amenya amawazo mabo, ababaza ntya: “Bichi muli mwawaza omu mirhima yenyu?
23 Bichi biyorohere, ey’okuderha, ‘Ebyaha byawe byababalirwe,’ changwa okuderha, ‘Yimanga olambagire’?
24 Aliko yi mumenya oku Mwen’omuntu ahaabirwe oburhwali b’okubabalira ebyaha oku gulu...” Yesu abwira oyola muntu walihunzize: “Inkubwirire, yumanga, orhole echipoyi chawe, ogaluke emwawe.”
25 Ava ayimanga embere zabo, arhola echipoyi chage, egenda emwage ey’ali akuuza Mungu.
26 Abantu boshi basomerwa bwenene, barhondera kukuuza Mungu, bayubaha bwenene, baderha ntya: “Zene, rhwabwene ebintu bisomeze!”
27 Enyuma w’aho, Yesu ahuluka, abugana omuntu onalipisa ekoli onayirikwa Lawi ayikere oku biro by’okulipisa ekoli, amubwira: “Yinja obe mwanafunzi wani.”
28 Ayumanga, aleka byoshi, arhondera kumukulikira.
29 Lawi ava asheegera Yesu eshego linene omu mwage, haliri na bantu banene banalipisa ekoli n’abandi bantu baliri basangira nabo.
30 Eju y’echola, Abafarisayo n’abandisi babo barhondera kuderha abanafunzi ba Yesu kubi, omu kubabwira ntya: “Bulagurhe muli mwalya n’okunywa n’abanalipisa ekoli n’abanyabyaha?”
31 Omu kubashubiza Yesu ababwira: “Abantu baherhe amagala menja barhakenere omunganga, s’abalwere babamukenere.
32 Intayinjaga kuhamagala abanyakunali, si nayinjaga kuhamagala abanyabyaha omu kuntu bahungame.”
33 Bamubwira ntya: “Abanafunzi ba Yowane banazigana kuchishalisa* n’okusalira amasala m’okulakirira Mungu, n’abanafunzi b’Abafarisayo banajira ntyo, aliko abanafunzi bawe bowe bali balya n’okunywa.”
34 Yesu ababwira ntya: “Murhakaseza abera b’omuhya-mulume bachishalise* banachili haguma n’omuhya-mulume, arhali ntyo?
35 Aliko esiku nji zahika, omuhya-mulume anakulwa haguma nabo, n’agola mango y’inji bachishalisa.*
36 Kandi abaha ogula mufano: “Nta muntu wakacha echiraka oku mwambaro guhyahya akachihangira oku mwambaro gushajire. Nk’ajirire ntyo, echola chiraka ch’omwambaro guhyahya chafunyaza ogushajire, n’echola chiraka chihyahya chirhafarhana n’omwambaro gushajire.
37 Na nta muntu onaheba edivayi y’omuhyo omu ndaha z’oluhu zishajire. Bulala nk’ajirire ntyo, endaha zabasha edivayi yanasheshekala anabula byoshi.
38 S’edivayi y’omuhyo ekwanene ebikwe omu ndaha zihyahya z’oluhu.
39 Inta muntu wakamala kunywa edivayi y’enchulama wakasima anywe ey’omuhyo, bulala aderha ntya, ‘Ey’enchulama y’elokere.’”
