Yayandikwaga na Luka 18:1-43

  • Omufano g’omushumbakazi waliri agenderera kuhema bamuchire olubanja omu kunali (1-8)

  • Omufarisayo n’omuntu onalipisa ekoli (9-14)

  • Yesu n’abana badorho (15-17)

  • Echibazo ch’omurhegesi waliri muchire (18-30)

  • Yesu amashuba kuderha oku bilolere olufu lwage (31-34)

  • Empumi yagendanga yahemuza yamabona (35-43)

18  Naho Yesu abaha omufano guyerekene oku bakwanene kugenderera kusalira buzira kuleka, 2  ababwira: “Hali evile yaliri mu muzuzi muguma orhagendaga ayubaha Mungu na nta muntu akengaga. 3  Mw’eyola vile mwaliri n’omushumbakazi wagendaga azigana kuja em’oyola muzuzi anamubwira, ‘Ojire okuntu impate ehaki m’olula lushinja ngwerhe n’oyula muntu.’ 4  Hali amango agendaga alahira, aliko buzinda achibwira ntya, ‘Chiro akaba oku ntayubaha Mungu na nta muntu inkenga, 5  aliko bulala oyula mushumbakazi agenderere kumbuza omurhula, najira okuntu akolerwe oku haki omu kuntu arhachigendaga ayinja kumpema ebila y’ampema, andekere omurhula.’” 6  Waliha ababwira: “Mwayunvirhe eby’oyola muzuzi aderhaga chiro akaba oku arhaliri munyakunali! 7  Mungu yewe akaja afunda kujira okuntu ab’achishogere banamulakirira ezuba n’ebudufu bakolerwe oku haki eyi anali abalembera? 8  Imbabwirire, ajira okwage koshi bakolerwe oku haki juba-juba. Aliko, amango Mwen’omuntu ayinja, nj’abugana obula bwemere oku gulu si?” 9  Na balala bagendaga bachibona oku bali banyakunali n’okubona abandi oku ntacho bamalire abaha ogula mufano: 10  “Bantu babiri balijire kusalira omu hekalu, muguma aliri Mufarisayo n’owindi aliri muntu onalipisa ekoli. 11  Oyola Mufarisayo ayimanga arhondera kusalirira ntya omu murhima, ‘Mungu wee, inkubwirire koko bulala nyono ntali kuguma n’abandi bantu, intali nk’abananyegana, abarhali banyakunali, abagonyi, intanali kuguma chiro n’oyula muntu onalipisa ekoli. 12  Inanchishalisa* kabiri omu boso, inampana n’echakumi cha buli chintu inampata.’ 13  Aliko omuntu onalipisa ekoli yewe, ayimanga hale bugeke, arhalilonzeze chiro okuyerekeza amesho embingu. Aliri achishurha oku chifuba anaderha, ‘Mungu wee, ombere obonjo bulala nyono indi munyabaha.’ 14  Imbabwirire, oyola muntu agalukaga emwage ey’ali munyakunali embere za Mungu kulusha oyola Mufarisayo. Bulala buli yeshi wachizamula ayandagazwa, aliko buli yeshi wachiyandagaza azamulwa.” 15  Abantu baliri balerhera Yesu abana babo badorho okw’abahumeko, aliko abanafunzi babwene ntyo, barhondera kubakalihira. 16  Yesu ava ahamagala abola bana aderha: “Muleke abana badorho bayinje emunda indi, murhanalonzaga kubabuza, bulala Obwami bwa Mungu buli bwa balala bali kuguma nabo. 17  Kweri imbabwirire, buli muntu orhayemera Obwami bwa Mungu kuguma n’omwana mudorho arhakafa abujiremo.” 18  Muguma omu barhambo b’Abayahudi amubaza: “Mwalimu mwinja, bichi nkwanene kujira y’inshokola akalamo k’esiku n’amango?” 19  Yesu amubwira: “Bulagurhe ompamagere mwinja? Nta mwinja obaho olekere muguma yenyine, Mungu. 20  S’oyinji amarhegeko: ‘Orhajiraga obugonyi, orhayirhaga, orhayibaga, orhahamirizaga obubeshi, okenge yisho na nyoko.’” 21  Oyola muntu ashubiza: “Kurhenga inchili mwana eyi inankenga ebyola bintu byoshi.” 22  Yesu ayunvirhe ntyo, amubwira, “Hachili chintu chiguma obulire: Genda oguze ebintu byawe byoshi ogabire abakene efuranga, wagwarha obuchire omu mbingu; naho oyinje obe mwanafunzi wani.” 23  Oyola muntu ayunvirhe ntyo agaya bwenene, bulala aliri muchire bwenene. 24  Yesu amulola aderha: “Kweri, nji byakomerera bwenene abagwerhe efuranga okuja omu Bwami bwa Mungu! 25  Kweri, biyorohere engamiya egere omu chirhule ch’esindani y’okuhanga kulusha omuchire okuja omu Bwami bwa Mungu.” 26  Abayunvaga ebyola baderha ntya: “Inde wakaja achunguka si berhu?” 27  Aderha: “Ebirhakashobokana oku bantu, byakashobokana emwa Mungu.” 28  Aliko Petro aderha: “Tala! Rhwalekere ebintu byerhu byoshi rhwaligwerhe rhwakukulikira.” 29  Yesu aderha: “Kweri imbabwirire, nta muntu walekere enju, omukazi, bene-babo, abazere, changwa abana eju y’Obwami bwa Mungu 30  orhabipata kanene mu chinola chihe, n’omu gulu lyayinjire akalamo k’esiku n’amango.” 31  Naho arhola balala 12 abaheka eburhambi ababwira: “Mulole! Obola rhwazamukira e Yerusalemu, na byoshi byayandikwaga kugerera abalebi oku bilolere Mwen’omuntu byayenera. 32  Omufano, bamuhira omu fune z’abantu b’amashanja, banamushinyagulira, banamukolera oku kasuzaguro n’okumuchirako. 33  Na buzinda bamushurha, banamuyirha, aliko olusiku lwakasharhu afuka.” 34  Aliko barhalimenyere ebyola binwa k’okuderha gurhe, bulala byalibishirwe kubo. Barhaliri bayunva ebyaliri byaderhwa. 35  Yesu abere ali hofi ne Yeriko, haliri omulume w’empumi waliyikere oku njira ey’ali ahemuza. 36  Ayunvirhe abantu kamama bali bagera, arhondera kubaza bichi ebyola byabere. 37  Bamushubiza: “Yesu we Nazareti y’eli wagera!” 38  Ava aderha ntya n’omulenge gunene: “Yesu, Mugala wa Daudi, onyunvire obonjo!” 39  Abaliri embere barhondera kumukalihira n’okumubwira asire, aliko aja ayama bwenene, aderha: “Mugala wa Daudi, onyunvire obonjo!” 40  Yesu ava ayumanga aderha bamulerhere oyola muntu. Agerere hofi, Yesu amubaza: 41  “Bichi olonzeze inkujirirage?” Aderha: “Waliha, ndonzeze mbone.” 42  Yesu ava amubwira: “Amasu mawe mabone; obwemere bwawe bwakufumizye.” 43  Ahola han’aho arhondera kubona, akulikira Yesu, ey’ali akuza Mungu. Abantu boshi babwene ntyo, basingiza Mungu.

Mahugulo m'efo

^ Ao “inanjira amafungo, inanchibuza kulya n’okunywa.”

Copyrights for this publication