1. ?Plante man oli ting se i oraet nomo blong mekem wanem?

YUMI laef long wan wol we i fulap long ol rabis fasin. Plante man oli ting se i oraet nomo blong man i slip wetem man mo woman i slip wetem woman. Oli ting se i oraet nomo blong man no woman we i mared i slip wetem narafala. Ol muvi, ol buk, ol singsing, mo ol pablisiti, oli fulap long ol rabis fasin blong seks. (Ol Sam 12:8) Be Jehova i save givhan long yumi blong yumi gat wan laef we i klin. Taswe yumi save stap klin long wol ya we i fulap long ol rabis fasin.—Ridim 1 Tesalonaeka 4:3-5.

2, 3. (1) ?From wanem yumi mas sakemaot ol tingting we oli no klin? (2) ?Bambae yumi tokbaot wanem long stadi ya?

² Be blong gat wan laef we i klin, yumi mas sakemaot ol rabis tingting. Ol rabis tingting oli olsem wan bet long wan huk, taem fis i luk bet ya, hem i go from. Taswe, sipos yumi stat blong tingbaot ol rabis fasin, yumi mas kwik blong sakemaot. Sipos no, tingting ya i save kam strong long yumi gogo, taem i gat wan janis, bambae hem i pulum yumi blong mekem rabis fasin blong seks. Baebol i talem se taem wan man “i wantem tumas ol samting nogud, fasin ya bambae i kam bigwan moa long hem, nao bambae man ya i stap mekem ol samting nogud from.”—Ridim Jemes 1:14, 15.

 ³ Rabis tingting i save gru long hat blong yumi. Taswe, yumi mas lukaotgud long ol samting we tingting blong yumi i wantem. Sipos yumi sakemaot tingting ya blong wantem wan rabis fasin, bambae yumi no save mekem rabis fasin blong seks, mo bambae yumi no kasem trabol tu we i kamaot from. (Galesia 5:16) Long stadi ya, bambae yumi tokbaot 3 samting we i save givhan long yumi blong blokem ol tingting we oli no klin. Bambae yumi tokbaot fasin blong yumi blong fren wetem Jehova, advaes we i kamaot long Baebol, mo help we ol elda oli givim.

4. ?From wanem yumi mas stap klosap long Jehova?

⁴ Baebol i talem long olgeta we oli wantem “stap klosap long God” se: “Yufala i mas wasem han blong yufala” mo “yufala i mas mekem tingting blong yufala i klin.” (Jemes 4:8) Taem yumi tinghae long fasin blong yumi blong fren gud wetem Jehova, bambae yumi traehad evri dei blong meksua se samting we yumi mekem mo yumi tingbaot, oli mekem hem i glad. Sipos yumi mekem tingting blong yumi i klin gud, hat blong yumi tu bambae i klin. (Ol Sam 24:3, 4; 51:6; Filipae 4:8) Jehova i save se yumi sinman. Hem i save se yumi save stat blong tingbaot ol rabis fasin. Be from we yumi no wantem mekem Jehova i harem nogud, yumi traehad blong sakemaot ol rabis tingting. (Jenesis 6:5, 6) Yes, yumi traehad blong mekem se tingting blong yumi i klin gud oltaem.

5, 6. ?Olsem wanem prea i save givhan long yumi blong sakemaot ol rabis tingting?

⁵ Wan rod blong sakemaot ol rabis tingting hemia blong prea oltaem long Jehova blong i givhan long yumi. Jehova i givim tabu spirit blong mekem yumi gat strong tingting blong sakemaot ol rabis tingting mo blong stap klin. Taswe, i gud we long ol prea blong yumi, yumi talem long Jehova se yumi wantem we ol tingting blong yumi oli mekem hem i glad. (Ol Sam 19:14) I gud yumi askem long hem wetem wan tingting we i stap daon, blong hem i jekem hat blong yumi blong luk sipos yumi gat sam rabis tingting we i save pulum yumi blong mekem sin. (Ol Sam 139:23, 24) Yu mas gohed blong askem long Jehova blong i givhan long yu blong yu sakemaot ol rabis tingting, mo blong yu mekem samting we i stret taem ol samting oli traem yu.—Matiu 6:13.

⁶ Taem yumi no stadi Baebol yet, maet yumi laekem mekem ol samting we Jehova i no laekem, mo maet yumi stap traehad yet blong sakemaot ol nogud tingting. Be Jehova i save givhan long yumi blong yumi jenisim tingting blong yumi, mo yumi mekem samting we hem i glad long hem. King Deved i luksave samting ya, taswe afta we hem i slip wetem Batseba, hem i tanem tingting blong hem mo i plis long Jehova blong i ‘mekem tingting blong hem i klin’ mo blong i ‘mekem hat blong hem i kam niuwan bakegen blong i stap strong long Jehova oltaem.’ (Ol Sam 51:10, 12) Taswe, sipos yumi gat ol rabis tingting yet, mo yumi stap traehad blong sakemaot, Jehova i save givhan long yumi blong yumi gat tingting ya blong wantem obei long hem mo mekem samting we i stret. Hem i save givhan long yumi blong rabis fasin i no winim yumi.—Ol Sam 119:133.

7. ?Baebol i save givhan long yumi olsem wanem blong sakemaot ol rabis tingting?

⁷ Jehova i save yusum Baebol blong ansa long ol prea we yumi mekem blong askem long hem blong i givhan long yumi. Waes blong God we i stap long Baebol, hem i “klin gud.” (Jemes 3:17) Taem yumi ridim Baebol oltaem, yumi stap fulumap tingting blong yumi long ol samting we i klin. (Ol Sam 19:7, 11; 119:9, 11) Mo tu, i gat ol stori mo ol woning long Baebol we oli save givhan long yumi  blong sakemaot ol rabis tingting mo ol samting we yumi wantem we oli no stret.

8, 9. (1) ?From wanem wan yang man i slip wetem wan woman blong rod? (2) ?Wanem sam samting we yumi mas lukaotgud long hem, blong lesin long woning blong Ol Proveb japta 7?

⁸ Ol Proveb 5:8 i talem se: “!Yu mas stap longwe long woman olsem! !Mo yu no mas go klosap long haos blong hem tu!” Yumi mas lesin long woning ya. Ol Proveb japta 7, i tokbaot wan yangfala man we i stap wokbaot long naet, klosap long haos blong wan woman blong rod. Woman ya i stap stanap long kona blong rod mo “klos blong hem i soemaot we hem i woman blong rod stret.” Ale, woman ya i putum han blong hem i goraon long yang man ya, i kisim hem, mo i talem sam swit tok blong wekemap filing blong yang man ya, nao man ya i go slip wetem hem. Yang man ya i no sakemaot ol rabis tingting ya kwiktaem, taswe hem i mekem sin mo i kasem trabol from, nating se fastaem hem i no bin tingbaot blong mekem rabis fasin ya. I klia se yang man ya i no gat plante save mo hem i no save skelem gud samting. !Sipos hem i bin stap longwe long woman ya, bambae hem i no save kasem trabol!—Ol Proveb 7:6-27.

⁹ Maet samtaem, yumi tu yumi olsem yang man ya, yumi no save skelem gud samting. Maet yumi mekem wan samting we yumi no luksave se i save pulum yumi blong wantem mekem rabis fasin. Eksampol, long naet, sam program blong televisin oli soemaot ol rabis fasin blong seks. Taswe, i no waes nating blong stap presprestem kontrola blong lukluk ol defdefren stori long televisin. Mo tu, sipos yu stap long Intenet, i no waes blong lukluk enikaen samting nomo, no blong toktok wetem ol man we oli haedem olgeta se oli hu, no blong go long wan Websaet we i klia se i gat  ol rabis fasin mo ol rabis pija blong seks i stap long hem. Sipos yumi no lukaot gud, ol samting we yumi luk oli save pulum yumi blong wantem ol rabis fasin, nao biaen yumi save mekem samting we Jehova i no glad long hem.

10. ?From wanem i no stret blong pleplei wetem filing blong narafala? (Yu luk pija long stat blong stadi.)

¹⁰ Baebol i givim advaes tu long fasin we man i mas mekem long woman, mo woman i mas mekem long man. (Ridim 1 Timoti 5:2.) Ol Kristin oli no pleplei wetem filing blong narafala. Samfala oli ting se i no rong sipos wan man i muvum bodi blong hem, no i mekem saen wetem fes no han blong hem, no i sarem ae blong hem blong soemaot long wan woman se hem i laekem hem, sem mak sipos wan woman tu i mekem olsem long wan man. Oli ting se hemia i oraet nomo from we tufala i no tajem bodi blong tufala. Be taem man mo woman tufala i stap pleplei wetem filing blong tufala olsem, tufala i save stat blong gat ol rabis tingting. Mo samting ya i save pulum tufala blong slip tugeta. Wan samting olsem i hapen bifo, mo i save hapen bakegen.

11. ?Yumi lanem wanem long stori blong Josef?

¹¹ Josef i soemaot wan gudfala eksampol long yumi. Woman blong Potifa i traem pulum Josef blong i slip wetem hem, be Josef i no wantem nating. Nating se i olsem, woman ya i gohed blong pulum hem. Evri dei, woman ya i traem pulum Josef blong i “kam slip wetem hem.” (Jenesis 39:7, 8, 10) Wan man blong stadi long Baebol i talem se woman blong Potifa i gat tingting se sipos hem mo Josef tufala nomo i stap, bambae Josef i wantem blong slip wetem hem. Be Josef i gat strong tingting blong no mekem eni samting no talem eni samting we i save pulum filing blong woman ya. Mo Josef i no pleplei wetem filing blong woman ya. Taswe, hem i no letem ol rabis tingting oli gru long hat blong hem. Mo taem woman ya i holem kot blong Josef blong fosem hem blong i slip wetem hem, kwiktaem nomo Josef i “ronwe long kot blong hem, i resis, i go afsaed long haos.”—Jenesis 39:12.

12. ?Yumi save olsem wanem se samting we yumi luk i save spolem hat blong yumi?

¹² Jisas i givim woning ya se samting we yumi luk i save spolem hat blong yumi, nao i pulum yumi blong wantem mekem rabis fasin. Hem i talem se: “Man we i luk wan woman, nao i wantem hem tumas [“long hat blong hem,” NW], i olsem we hem i slip wetem woman ya finis.” (Matiu 5:28) Hemia nao samting we i hapen long King Deved. Taem hem i stap ‘antap long ruf blong haos blong hem, hem i luk wan woman i stap swim.’ Be hem i girap, i gohed blong lukluk woman ya mo blong gat rabis tingting long hem. (2 Samuel 11:2) Ale, samting ya i pulum hem blong wantem tumas woman ya we i blong narafala man mo i slip wetem hem.

13. ?From wanem yumi mas mekem wan “promes” wetem ae blong yumi, mo yumi mekem samting ya olsem wanem?

¹³ Sipos yumi no wantem gat ol rabis tingting, yumi mas mekem olsem Job. Yumi mas “mekem wan strong promes” wetem ae blong yumi. (Job 31:1, 7, 9) Yumi mas gat strong tingting olsem Job, se neva bambae yumi tingting nogud blong mekem rabis fasin wetem wan man no woman we yumi luk. Mo sipos yumi luk wan rabis pija long kompiuta, long ol saen blong pablisiti, long wan magasin blong wol, no long wan narafala ples, bambae yumi tanem fes blong yumi kwiktaem.

14. ?Yumi mas mekem wanem blong stap klin?

¹⁴ Taem yu tingbaot ol samting we yumi jes tokbaot, maet yu luksave se yu mas traehad moa blong sakemaot tingting ya blong wantem mekem ol rabis fasin. !Sipos yu luk se yu mas jenisim sam samting, yu mas mekem naoia! Taem yu obei long advaes blong Baebol, bambae yu stap longwe long ol rabis fasin blong seks, mo yu save stap klin.—Ridim Jemes 1:21-25.

15. Sipos yumi harem se i had blong sakemaot ol rabis tingting, ?from wanem yumi mas askem narafala blong i givhan long yumi?

¹⁵ Sipos yu harem se i had blong sakemaot ol rabis tingting, i gud yu storian wetem wan Kristin we i stap longtaem finis long trutok, mo we i save givim gudfala advaes blong Baebol long yu. I tru se i no isi blong tokbaot ol problem blong yu long ol narafala, be i impoten we yu askem narafala blong i givhan long yu. (Ol Proveb 18:1; Hibrus 3:12, 13) Ol brata mo sista we oli bigman long ol Kristin fasin oli save givhan long yu blong luksave samting we yu mas jenisim. Olsem nao, yu save fren gud wetem Jehova oltaem.

16, 17. (1) ?Ol elda oli save givhan olsem wanem long olgeta we oli harem se i had blong oli sakemaot ol rabis tingting? Yu talem wan stori. (2) ?From wanem i gud blong olgeta we oli stap lukluk rabis pija, oli askem help kwiktaem?

¹⁶ Ol elda oli save givhan long yumi. (Ridim Jemes 5:13-15.) Blong plante yia, wan yangfala long Brasil, i stap traehad blong sakemaot tingting ya blong wantem mekem ol rabis fasin. Hem i talem se: “Mi save se Jehova i no glad long ol tingting blong mi, be mi sem blong talemaot tingting blong mi long narafala.” Ale, wan elda i luksave se yangfala ya i nidim help, nao hem i talem long yangfala ya blong i go luk ol elda blong oli givhan long hem. Yangfala ya i talem se: “Mi sapraes tumas blong luk we ol elda oli kaen gud long mi. Oli kaen tumas mo oli kasem save long mi. Mi no bin ting se bambae oli mekem olsem long mi. Oli lesin gud taem mi tokbaot problem blong mi. Oli yusum Baebol blong soemaot long mi se Jehova i lavem mi, mo oli prea wetem mi. Samting ya i givhan long mi blong mi akseptem ol advaes blong Baebol we oli givim long mi.” Sam yia biaen, afta we yangfala ya i gohed gud long trutok, hem i talem se: “Mi luksave se i impoten blong askem narafala blong i givhan long yumi, i bitim we yumi nomo yumi traem blong winim problem blong yumi.”

¹⁷ Sipos yu gat fasin ya blong lukluk ol rabis pija, yu mas askem narafala blong i givhan long yu kwiktaem. Sipos yu wet longtaem tumas, bambae yu mekem rabis fasin blong seks. Nao bambae yu spolem ol narafala, mo bambae ol man oli tok nogud long Jehova. Plante Kristin oli askem ol elda blong oli givhan long olgeta, mo oli folem ol advaes we oli kasem, from we oli wantem mekem Jehova i glad mo oli wantem stap oltaem long kongregesen.—Ol Sam 141:5; Hibrus 12:5, 6; Jemes 1:15.

18. ?Yu yu gat strong tingting blong mekem wanem?

¹⁸ Wol blong Setan i stap kam moa nogud wetem ol rabis fasin. Be ol Kristin oli wok had blong mekem se tingting blong olgeta i stap klin oltaem. Jehova i tinghae long ol Kristin ya. I gud yumi stap klosap long Jehova, mo yumi folem ol advaes we yumi kasem long Baebol mo long kongregesen. Taem yumi mekem olsem, bambae yumi glad mo yumi gat wan tingting we i klin. (Ol Sam 119:5, 6) Mo long fiuja, taem Setan i no moa stap, bambae yumi laef olwe long wan wol we i klin gud.