Go long ol haf insaed long hem

Go long lis blong ol haf

Kraes—Hem i Paoa blong God

Kraes​—Hem i Paoa blong God

‘Kraes, hem i paoa blong God.’ 1 KORIN 1:24.

1. ?From wanem Pol i talem se ‘Kraes, hem i paoa blong God’?

JISAS i soemaot bigfala paoa blong Jehova long spesel fasin. Taem Jisas i stap long wol, hem i mekem plante merikel. Yumi save ridim stori blong ol merikel ya long Baebol, mo oli save mekem bilif blong yumi i strong. (Matiu 9:35; Luk 9:11) Yes, Jehova i givim bigfala paoa long Jisas, taswe aposol Pol i talem se: ‘Kraes, hem i paoa blong God.’ (1 Korin 1:24) ?Be olsem wanem ol merikel blong Jisas oli givhan long yumi?

2. ?Yumi lanem wanem long ol merikel blong Jisas?

2 Aposol Pita i talem se Jisas i mekem “ol samting blong sapraes,” no ol merikel. (Ol Wok 2:22) ?Ol merikel ya oli tijim yumi long wanem? Oli soemaot wanem we Jisas bambae i mekem, taem hem rul blong 1,000 yia. Long taem ya, bambae hem i mekem plante moa merikel blong givhan long olgeta man long wol. Mo ol merikel ya oli givhan long yumi blong save gud ol fasin blong Jisas mo Papa blong hem. Long stadi ya, bambae yumi tokbaot 3 merikel blong Jisas, mo bambae yumi  luk olsem wanem oli save givhan long yumi tede mo long fiuja.

MERIKEL WE I TIJIM YUMI BLONG GIVIM SAMTING LONG GLADHAT

3. (1) ?From wanem Jisas i mekem fas merikel ya? (2) ?Long Kena, olsem wanem Jisas i soemaot se hem i givim samting long gladhat?

3 Jisas i mekem fas merikel, taem hem i stap long wan mared, long Kena. Yumi no save from wanem, be long taem ya i no bin gat naf waen blong ol man. Ating tufala we i mared i mas harem nogud, from we tufala nao i mas meksua se i gat inaf samting blong evriwan. Meri mama blong Jisas, hem tu i stap long taem ya. ?Yu ting se Meri i askem long Jisas blong i givhan from we hem i save se Jisas i gat paoa blong mekem merikel? I tru se Meri i mas tingbaot ol profet tok we oli tokbaot pikinini blong hem, mo hem i save se bambae oli singaot pikinini blong hem se “Pikinini blong God ya we i hae we i hae.” (Luk 1:30-32; 2:52) Meri mo Jisas i wantem tumas blong givhan long tufala we i mared. Ale, Jisas i tanem 380 lita blong wota i kam waen we i “beswan.” (Ridim Jon 2:3, 6-11.) ?Olsem wanem? ?Jisas i mas mekem merikel ya? Nogat. Hem i mekem olsem from we hem i kea long ol man, mo hem i folem fasin blong Papa blong hem we i stap givim samting long gladhat blong hem.

Jisas i talem se yumi mas lanem blong ‘givim samting long narafala man’

4, 5. (1) ?Fas merikel blong Jisas i tijim yumi long wanem? (2) ?Merikel long Kena i tijim yumi long wanem long ol samting we bambae oli kam long fiuja?

4 Jisas i mekem wan merikel blong tanem wota i kam waen we i beswan, mo we i naf blong plante man. ?Yu yu luksave samting we merikel ya i tijim yumi long hem? Jehova mo Jisas tufala i no tingbaot tufala nomo, be tufala i gat nambawan fasin blong givim samting long gladhat. Merikel ya i tijim yumi se Jehova mo Jisas tufala i tingbaot filing blong ol man. Mo tu merikel ya i soemaot se long niufala wol, Jehova bambae i yusum paoa blong hem blong givim plante kakae long yumi, nomata weples yumi stap long hem.—Ridim Aesea 25:6.

5 !Yu traem tingbaot! I no longtaem, bambae Jehova i givim evri samting we yumi nidim. Wanwan man bambae i gat wan gudfala haos mo gudfala kakae. Yumi wantem talem bigfala tangkiu long Jehova, taem yumi tingbaot ol nambawan samting we bambae hem i givim long yumi long gladhat blong hem, taem wol ya i kam paradaes.

Yumi mekem olsem Jisas taem yumi yusum taem blong yumi blong givhan long narafala (Yu luk haf 6)

6. ?Jisas i yusum paoa blong hem blong mekem wanem, mo yumi save folem fasin blong hem olsem wanem?

6 Jisas i neva yusum paoa blong hem blong mekem i gud long hem wan. Yu traem tingbaot taem ya we Setan i traem Jisas blong hem i jenisim ston i kam bred. Jisas  i no wantem yusum paoa blong hem blong mekem i gud long hem wan. (Matiu 4:2-4) Be Jisas i glad blong yusum paoa blong hem blong givhan long ol narafala. ?Yumi save folem fasin blong Jisas olsem wanem? Jisas i talem se yumi mas lanem blong ‘givim samting long narafala man.’ (Luk 6:38) Yumi save mekem olsem taem yumi singaot ol narafala oli kam kakae wetem yumi. Yumi save spenem taem afta long miting blong givhan long narafala, maet blong lesin long wan brata we i stap lanem tok blong hem. Mo maet yumi save givhan mo trenem ol narafala pablisa long wok blong prij. Yes, yumi folem fasin blong Jisas, taem yumi mekem samting we yumi naf blong mekem from we yumi wantem tumas blong givhan long ol narafala.

“EVRIWAN OLI KAKAE GOGO OLI FULAP GUD”

7. ?Wanem problem we bambae i stap oltaem long wol ya we Setan i rul long hem?

7 Problem ya we man i pua i stat bifo finis. Jehova i talem long ol man Isrel se: “Oltaem bambae i gat ol laen blong yufala we oli puaman.” (Dutronome 15:11) Plante handred yia biaen, Jisas i talem se: “Ol puaman bambae oli stap oltaem wetem yufala.” (Matiu 26:11) ?Jisas i wantem talem se bambae i gat puaman oltaem long wol ya? Nogat. Be hem i wantem talem se long wol ya we Setan i rul long hem, bambae i gat puaman oltaem. !Be laef long niufala wol bambae i defren olgeta! Bambae i no moa gat puaman. !Olgeta man bambae oli gat plante kakae mo bambae evriwan i harem gud!

8, 9. (1) ?From wanem Jisas i fidim plante taosen man? (2) ?Wanem tingting blong yu long merikel ya?

8 Man blong raetem Sam i tokbaot Jehova se: “Yu stap givim plante kakae long olgeta, mo yu stap mekem olgeta evriwan oli harem gud.” (Ol Sam 145:16) Taem Jisas i stap long wol, hem i folem gud fasin blong Papa blong hem. Mo plante taem, hem i givim samting we ol narafala oli nidim. Hem i no mekem ol samting ya blong soemaot se hem i gat paoa, be hem i mekem from we hem i wantem tumas blong givhan long ol man. I gud yumi tokbaot Matiu 14:14-21. (Ridim.) Ol man oli aot long ol taon mo oli wokbaot i go blong luk Jisas. (Matiu 14:13) Long sapa, ol disaepol oli wari long ol man ya from we oli slak mo oli hanggri. Ale oli talem long Jisas blong i sanemaot ol man ya, blong oli go pem kakae blong olgeta. ?Jisas i mekem wanem?

9 Jisas i fidim 5,000 man wetem ol woman mo ol pikinini, long 5 bred mo 2 fis nomo. ?From wanem Jisas i mekem merikel ya? Hemia from we hem i lavem ol man tumas mo i sore long olgeta. I sua se kakae we Jisas i givimaot long ol man ya i plante we i plante, from we ol man ya oli “kakae gogo oli fulap gud.” Mo kakae ya i givhan long olgeta blong oli gat paoa blong wokbaot i gobak long haos blong olgeta. (Luk 9:10-17) Mo afta we oli fulap gud, ol disaepol oli fulumap ol hafkakae long 12 basket.

10. ?Wanem bambae i hapen long puaman long fiuja?

10 Plante taosen man oli pua from we ol  rula blong wol ya oli tingbaot olgeta nomo mo oli gat kruked fasin. Sam Kristin brata mo sista oli no gat naf kakae. Be i no longtaem, ol man we oli obei long Jehova bambae oli laef long wan wol we i no moa gat kruked fasin mo puaman. Jehova i Hae God mo hem i gat paoa blong givim evri samting we man i save harem gud long hem. Mo hem i wantem tumas blong mekem olsem. Hem i promes se i no longtaem, bambae hem i finisim ol nogud samting we i stap mekem man i harem nogud.—Ridim Ol Sam 72:16.

Jisas i wantem yusum paoa blong hem blong mekem i gud long yumi

11. ?From wanem yu sua se Kraes bambae i yusum paoa blong hem blong mekem i gud long man? ?From samting ya, yu yu wantem mekem wanem?

11 Jisas i stap long wol blong 3 yia haf, mo long taem ya, hem i mekem sam merikel, be i no long fulwol. (Matiu 15:24) Be naoia Jisas i King, mo bambae hem i givhan long olgeta man taem hem i rul blong 1,000 yia. (Ol Sam 72:8) Ol merikel we Jisas i mekem, oli mekem yumi suagud se hem i wantem yusum paoa blong hem blong mekem i gud long yumi. I tru se yumi no gat paoa blong mekem ol merikel. ?Be yumi save mekem wanem? Yumi save yusum taem mo paoa blong yumi blong talemaot ol nambawan promes blong Baebol long ol man. Hemia nao wok blong yumi ol Witnes blong Jehova. (Rom 1:14, 15) Taem yumi tingting gud long ol samting we Jisas bambae i mekem i no longtaem, bambae yumi wantem tumas blong go talemaot long ol narafala.—Ol Sam 45:1; 49:3.

JEHOVA MO JISAS I GAT PAOA LONG OLGETA SAMTING

12. ?From wanem Jisas i savegud olsem wanem ol samting oli wok?

12 Taem God i mekem wol ya mo evri samting we i stap long hem, Jisas i ‘stap klosap long hem, olsem nambawan man blong wok blong hem.’ (Ol Proveb 8:22, 30, 31, NW; Kolosi 1:15-17) Taswe Jisas i savegud olsem wanem ol samting blong wol oli wok. Hem i save olsem wanem blong yusum mo bos long ol samting we oli stap raonabaot long yumi.

?Wanem i mekem yu sapraes long paoa blong Jisas blong mekem merikel? (Yu luk haf 13, 14)

13, 14. Yu talem wan stori we i soemaot se Kraes i gat paoa long ol samting we oli stap raonabaot long yumi.

13 Taem Jisas i stap long wol, hem i soemaot se God i givim paoa long hem, taem hem i bos long ol samting we oli stap raonabaot long yumi. Yu traem tingbaot taem ya we Jisas i kwaetem wan bigfala win. (Ridim Mak 4:37-39.) Wan man blong stadi long Baebol i tokbaot Grik tok ya we long buk blong Mak oli tanem i kam “bigfala win,” se i minim strong win no hariken. Hem i wan bigfala win we i kam wetem dak klaod, ol strong win, tanda, mo bigfala ren. Taem bigfala win ya i pas, hem i spolem evri samting. Matiu i tokbaot strong win ya se i “wan bigfala win.”—Matiu 8:24.

14 Yu traem tingbaot taem ya: Ol bigfala wef oli bangem bot mo wota i stap go insaed. Nating se i gat bigfala noes blong win mo bot i muvmuv olbaot, be Jisas i slip from we hem i taed tumas. Be ol aposol oli fraet mo oli wekemap Jisas, oli talem se: “!Yumi lus nao!” (Matiu 8:25) ?Jisas i mekem  wanem? Hem i girap mo i tok long win mo long solwota i se: “!I naf! !Yu stap kwaet!” (Mak 4:39) Nao bigfala win ya i finis, mo “olgeta samting i kwaet.” !Hemia wan nambawan stori we i soemaot se Jisas i gat paoa long ol samting we oli stap raonabaot long yumi!

15. ?Jehova i soemaot olsem wanem se hem i save bos long ol samting raonabaot long yumi?

15 Jehova nao i givim paoa long Jisas, taswe yumi save se God i gat olgeta paoa blong bos long ol samting raonabaot long yumi. Bifo we Bigfala Wota i ron, Jehova i talem se: “Seven dei nomo i stap, nao bambae mi mekem bigfala ren i kam. Bambae i ren foti dei mo foti naet.” (Jenesis 7:4) Mo tu long Eksodas 14:21, yumi ridim se: “Hae God i mekem is win i blu strong, i kam seraot solwota ya.” Mo tu long Jona 1:4 i talem se: “Hae God i mekem bigfala win i blu, i mekem solwota i raf we i raf we klosap sip ya i brok.” I gud tumas blong save se long niufala wol, Jehova bambae i bos oltaem long olgeta samting raonabaot long yumi.

16. ?From wanem yumi harem gud se Jehova mo Jisas i gat paoa blong bos long ol samting we oli stap raonabaot long yumi?

16 Yumi harem gud tumas blong save se Jehova mo Jisas i gat paoa blong bos long ol samting raonabaot long yumi. Taem Jisas i rul blong 1,000 yia, olgeta man we oli  laef long wol bambae oli stap gud, we i no gat wan samting i save spolem olgeta. Bambae i no moa gat wan disasta we i save spolem ol man, olsem hariken, tsunami, volkeno mo etkwek. Bambae yumi no moa fraet long ol disasta from we “God i mekem ples blong hem wetem ol man.” (Revelesen 21:3, 4) Yumi sua se Jehova bambae i givim paoa long Jisas blong i bos long ol samting raonabaot long yumi, taem hem i rul blong 1,000 yia.

YUMI FOLEM FASIN BLONG GOD MO KRAES

17. ?Yumi save mekem wanem blong yumi folem fasin blong God mo Kraes?

17 I tru se yumi no save blokem ol disasta. Jehova mo Jisas nomo tufala i save mekem. Be i gat wan samting we yumi save mekem. Yumi save mekem samting we Ol Proveb 3:27 i talem. (Ridim.) Taem ol Kristin brata blong yumi oli harem nogud, yumi save givim ol samting we oli nidim long laef mo yumi leftemap tingting blong olgeta blong oli save harem gud bakegen. (Ol Proveb 17:17) Yumi save givhan long olgeta afta we wan disasta i kasem olgeta. Wan wido woman we hariken i spolem haos blong hem i talem se: “Mi mi glad tumas blong stap long ogenaesesen blong Jehova, from we hem i givim samting we mi nidim long laef mo tu ol samting we oli save mekem bilif blong mi i strong.” Wan narafala sista we i no mared, hem i harem nogud tumas taem bigfala win i spolem haos blong hem. Afta we ol brata oli wokem gud haos blong hem, hem i talem se: “!Mi mi harem gud tumas! I no gat wan tok we mi save talem blong eksplenem glad blong mi.” Hem i talem se: “!Tangkiu Jehova!” Yes, yumi harem gud tumas we ol brata mo sista blong yumi oli kea gud long ol narafala. Be antap moa, yumi harem gud tumas se Jehova mo Jisas tufala i kea gud long yumi.

18. ?Wanem i mekem yu sapraes taem yu luk fasin blong Jisas blong yusum paoa blong hem?

18 Taem Jisas i stap long wol, hem i pruvum se hem nao i “paoa blong God.” Be hem i neva yusum paoa blong hem blong mekem ol narafala oli sapraes no blong mekem i gud long hem nomo. Defren olgeta, Jisas i yusum paoa blong hem blong mekem ol merikel from we hem i lavem ol man. Bambae yumi tokbaot moa long nekis stadi.