I Stret Blong Bilif Se Wol Bambae i Kam Wan Paradaes

LONG ol taosen yia we oli pas, plante milian man oli bin bilif se bambae oli lego wol mo oli go long heven. Sam man oli harem se Man we i Wokem yumi i neva gat tingting blong yusum wol olsem hom we bambae yumi laef long hem blong olwe. Ol man Asetik oli go moa. Plante long olgeta oli talem se wol mo olgeta samting long saed blong bodi oli rabis​—oli blokem rod long man blong hem i no save kasem wol blong ol spirit man mo kam klosap long God.

Ol man we oli bilif long samting ya oli no save, no maet oli no wantem save, wanem tingting blong God long saed blong wan paradaes long wol. Tede plante man oli no intres blong faenemaot samting we God i talem insaed long Baebol long saed blong paradaes. (2 Timoti 3:16, 17, NW ) ?Be wanem i moa waes? ?Trastem Tok blong God no bilivim tijing blong man? (Rom 3:4) I moa waes mo i impoten tumas blong trastem God, from we Baebol i givim woning long yumi se wan rabis spirit we yumi no save luk i stap blaenem ol man long saed blong spirit mo naoia hem “i stap giaman long olgeta man long wol, i lidim olgeta oli go krangke.”​—Revelesen 12:9; 2 Korin 4:4.

?From Wanem Ol Man Oli Konfius?

Ol man oli gat defdefren tingting long saed blong sol, mekem se oli konfius mo oli no moa save wanem stamba tingting blong God long saed blong wol. Plante man oli bilif se yumi gat wan sol we i no save ded. Oli se sol ya hem i wan samting we i defren long bodi mo i laef i stap afta we man i ded. Sam narafala oli bilif se sol ya i stap finis bifo we God i wokem bodi blong man. Long wan buk, yumi ridim we Plato, wan man Gris we i lukaot waes blong wol, i ting se sol “i kalabus insaed long bodi, mo hemia wan panis we sol i kasem from ol sin we hem i bin mekem taem hem i stap long heven.” Long sem fasin, wan tija blong skul we i laef long ol yia 200, nem blong hem Origen, i talem se “ol sol oli sin [long heven] bifo we oli joen wetem wan bodi” mo oli “kalabus [insaed long bodi ya long wol] blong kasem panis from ol sin blong olgeta.” Mo plante milian man oli bilif se wol i jes wan ples we man i kam long hem blong kasem traem bifo we hem i go long heven.

Ol man oli gat plante defren tingting tu long saed blong samting we i hapen long sol taem man i ded. Buk ya History of Western Philosophy i talem se ol man Ijip oli ting se “ol sol blong ol dedman oli godaon long hom blong ol dedman.” Biaen ol man we oli lukaot waes blong wol oli agiu se sol blong dedman i no godaon long hom blong ol dedman we i tudak, be i go antap long heven, long ples blong ol spirit man. Ol man oli talem se man ya Socrates blong Gris, i bilif se taem man i ded, sol blong hem “i go long wan ples we yumi no save luk . . . mo i stap ful laef blong hem wetem ol god.”

?Baebol i Talem Wanem?

I no gat wan vas long Baebol we i talem se man i gat wan sol we i no save ded. Plis, ridim vas blong Jenesis 2:7 (King James Version). Vas ya i talem se: “Mo Masta God i wokem man long das blong graon, mo i blu long nus blong hem, i putum win blong laef long hem; mo man ya i kam wan laef sol.” Vas ya i klia nomo. Taem God i wokem faswan man, Adam, Hem i no putum wan spirit samting insaed long hem. Defren olgeta, Baebol i talem se “man ya i kam wan laef sol.” Taswe, man i no gat wan sol insaed long hem: be man nao hem i wan sol.

Taem Jeova i wokem wol wetem olgeta man, hem i no wantem se ol man oli ded samtaem. Long tingting blong God, bambae ol man oli laef  blong olwe long Paradaes long wol. Adam i ded from we hem i no obei long loa blong God. (Jenesis 2:8, 15-17; 3:1-6; Aesea 45:18) ?Taem faswan man i ded, hem i go long ples blong ol spirit man? !Nogat! Hem​—sol ya Adam​—i gobak long graon we God i wokem hem long hem fastaem.​—Jenesis 3:17-19.

Faswan papa blong yumi Adam i givim sin mo ded long yumi evriwan. (Rom 5:12) Ded ya i min se taem man i ded, hem i no moa stap, hem i no moa save mekem wan samting, i sem mak nomo olsem Adam taem hem i ded. (Ol Sam 146:3, 4) Long ol 66 buk blong hem, Baebol i neva talem se wan samting we i no save ded insaed long bodi i laef i stap afta we man i ded. Defren olgeta, Baebol i talem klia se laef blong wan man i finis olgeta taem hem i ded.​—Prija 9:5, 10.

?Olgeta Samting Long Saed Blong Bodi Oli Rabis?

?Olsem wanem long tingting ya se ol samting long saed blong bodi, wetem wol tu, oli rabis? Ol man we oli folem skul ya Manikeism oli gat bilif ya. Wan man, nem blong hem Mani, i stanemap skul ya long Pesia long ol yia 200 K.T. * The New Encyclopædia Britannica i talem se: “Manikeism i kamaot from we ol man oli wari mo oli trabol.” Mani i bilif se ol man oli laef long wan bodi we i olsem “strenja, oli harem nogud long hem, mo hem i rabis olgeta.” Mo tu, hem i ting se i gat wan rod nomo blong finisim ‘wari mo trabol’ blong man. Rod ya hemia se sol i mas aot long bodi, i mas livim wol, mo i mas laef olsem wan spirit long ples blong ol spirit man.

Defren olgeta, Baebol i talem se long lukluk blong God “olgeta wok ya we hem i mekem” taem i wokem wol wetem ol man, “oli gud we i gud tumas.” (Jenesis 2:1) Long taem ya, i no gat wan samting i blokem fasin fren bitwin ol man mo God. Adam mo Iv tufala i frengud wetem Jeova, olsem Jisas Kraes i frengud wetem Papa blong hem long heven.​—Matiu 3:17.

Sipos faswan papa mama blong yumi, Adam mo Iv, tufala i no bin mekem sin, bambae oli gohed blong frengud wetem Jeova God blong olwe long paradaes long wol. Yumi save se laef blong tufala i stat long Paradaes nomo, from we Baebol i talem se: “Nao long saed i go long is, long wan ples we nem blong hem Iden, Hae God i mekemrere wan gudfala ples, mo i tekem man ya we i bin mekem, i putum hem i stap long hem.” (Jenesis 2:8) Jeova i wokem Iv long gudfala ples ya we i wan paradaes. Sipos Adam mo Iv tufala i no sin, tufala wetem ol pikinini blong tufala bambae oli gat janis blong wok  tugeta gogo oli mekem ful wol i kam wan paradaes. (Jenesis 2:21; 3:23, 24) Yes, sipos tufala i no bin mekem sin, olgeta man tede bambae oli laef long wan Paradaes long wol blong olwe.

?From Wanem Sam Man Oli Go Long Heven?

Nao maet yu askem se: ‘?Oraet, be Baebol i tokbaot sam man we oli go antap long heven, no?’ Yes, i tru. Afta we Adam i sin, Jeova i mekem plan blong stanemap wan Kingdom long heven, mo long Kingdom ya sam pikinini blong Adam “bambae oli king, oli rul long olgeta man long wol” wetem Jisas Kraes. (Revelesen 5:10; Rom 8:17) Taem ol man ya oli ded, God i mekem oli laef bakegen blong kasem gudfala laef we i no save lus samtaem, antap long heven. I gat 144,000 man we bambae oli kasem laef ya, mo ol faswan man we oli kasem laef ya finis, hemia ol disaepol blong Jisas Kraes blong faswan handred yia we oli bin stap tru long hem.​—Luk 12:32; 1 Korin 15:42-44; Revelesen 14:1-5.

Be fastaem God i no gat tingting ya blong tekem ol gudfala man oli aot long wol blong go laef long heven. Taem Jisas i stap long wol hem i talem se: “I no gat man we i go antap long heven samtaem. Mi, mi Pikinini blong Man, mi nomo mi kamaot long heven, mi kamdaon.” (Jon 3:13) God i givim “Pikinini blong Man,” hemia Jisas Kraes, olsem wan ransom blong pemaot ol man we oli bilif long sakrefaes blong Kraes, blong oli kasem laef we i no save finis. (Rom 5:8) ?Be ol milian man ya we oli gat bilif bambae oli laef wea?

Stamba Tingting Blong God Bambae i Kamtru

I tru se God i plan blong tekem sam man oli go long heven blong oli rul wetem Jisas Kraes long Kingdom blong hem. Be i no min se olgeta gudfala man bambae oli go long heven. Jeova i wokem wol blong i kam wan Paradaes, i kam hom blong olgeta man. Klosap nao bambae God i mekem stamba tingting ya blong hem i kamtru.​—Matiu 6:9, 10.

Taem bambae Jisas Kraes i rul wetem ol 144,000 long heven, fulwol bambae i stap long pis mo ol man bambae oli harem gud. (Ol Sam 37:9-11) Olgeta man we God i stap tingbaot olgeta yet, bambae God i mekem olgeta oli laef bakegen mo oli kam stretgud olgeta. (Ol Wok 24:15) From we oli stap tru long God, ol man we oli obei long God bambae oli kasem presen ya we faswan papa mama blong yumi oli bin lusum​—oli kam stretgud olgeta mo oli kasem laef we i no save finis long paradaes long wol.​—Revelesen 21:3, 4.

Jeova i neva mestem blong mekem ol promes blong hem oli kamtru. Tru long profet Aesea, hem i talem se: “Tok blong mi i olsem sno mo ren, we i aot long skae, i folfoldaon long graon blong wasem ol ples, blong mekem ol garen oli gru gud, nao i gat plante kakae i stap blong ol man oli kakae, mo blong oli planem garen bakegen. Tok blong mi bambae i wok long sem fasin. Bambae hem i mekem olgeta samting we mi mi mekem plan se i mas mekem, we i no mestem wan long olgeta, bambae hem i mekem evri samting we mi mi sanem hem blong i mekem.”​—Aesea 55:10, 11.

Buk blong Aesea i tokbaot laef long Paradaes long wol se bambae hem i olsem wanem. Bambae i no gat man i talem se “hem i sik.” (Aesea 33:24) Ol anamol bambae oli no moa mekem trabol long man. (Aesea 11:6-9) Bambae ol man oli bildim naesfala haos mo oli stap long hem, oli planem garen mo oli gat plante kakae. (Aesea 65:21-25) Mo tu, God “bambae i mekem we ded bambae i go lus olgeta. Bambae hem i ravemaot wota blong ae” blong olgeta man.​—Aesea 25:8.

Bambae i no longtaem, ol man we oli obei long God oli kasem ol nambawan blesing ya. Bambae “oli fri olgeta, we bambae oli no moa mekem sin, panis ya bambae i finis, nao olgeta samting ya we God i mekem bambae oli fri olgeta, olsem ol pikinini blong hem.” (Rom 8:21) !Bambae i gud tumas blong laef long wol long Paradaes we God i promes blong givim long yumi! (Luk 23:43, NW ) Bambae yu save stap long Paradaes ya sipos naoia, yu mekem laef blong yu i laenap wetem save blong Baebol mo yu soem bilif long Jeova God mo long Jisas Kraes. Tru ya, i stret blong bilif se wol ya bambae i kam wan paradaes.

[Futnot]

[Tok blong pija long pej 5]

God i wokem Adam mo Iv blong tufala i laef foreva long wan paradaes long wol

 [Tok blong pija long pej 7]

Long Paradaes long wol bambae . . .

oli bildim haos

oli planem plantesen blong grep

Jeova i blesem olgeta

[Foto Credit Line blong pija long pej 4]

U.S. Fish & Wildlife Service, Washington, D.C./NASA