?From Wanem Papa Mama i No Kasem Save?
Ol Yangfala Oli Askem
?From Wanem Papa Mama i No Kasem Save?
TRAEM TINGBAOT HEMIA:
Long Fraede naet long sikis klok, Jim we i gat 17 yia blong hem, i resis i goaot long doa. Hem i singaot i go long papa mama blong hem, i talem se: “!Lukim yutufala!” Hem i hareap from we i no wantem se tufala i askem sem kwestin we tufala i stap askem oltaem.
Be hem i save se tufala i no save fogetem.
Mama blong hem i talem se: “Jim, ?bambae yu kambak long wanem taem?”
Jim i brek wantaem. Hem i toktok hareap nomo, i se: “Mi no save. Yutufala i no wari long mi.” Jim i openem doa kwiktaem, i resis i go afsaed. Hem i no kasem rod yet, be i harem voes blong papa blong hem we i singaot se: “!Jemes, yu wet!”
Jim i brek bakegen, nao i harem papa blong hem i tok strong se: “Yu save rul ya finis. Ten klok stret. No gat eskius.”
Jim i tanem hem, i lukluk papa blong hem, i talem se: “Tss . . . papa, mi mi sem blong talem long ol fren blong mi se mi mas kambak eli olsem.”
Papa blong hem i no gat sore. Hem i talem bakegen se: “!Ten klok stret! !No gat eskius!”
ATING samtaem yu tu yu fesem samting olsem. Maet papa mama blong yu i putum sam strong rul long stret taem we yu mas kambak long haos, no long miusik we yu lesin long hem, no long ol fren, no long klos blong yu. Tufala i no save jenisim tingting blong tufala. Sam yangfala we oli fesem trabol ya oli talemaot tingting blong olgeta.
Brandon a i talem se: “Mama blong mi i mared bakegen, nao niufala papa blong mi i putum ol strong rul long miusik we mi laekem. !Hem i mekem se mi mas sakemaot olgeta CD blong mi!”
Carol i talem se: “Mama blong mi i tok long mi se mi mas gat sam fren. Be taem mi wantem folem wan fren we mi laekem, hem i talem ‘no’ from we hem i no save hem. !Hem i mekem mi mi kros we!”
Serena i talem se: “Papa blong mi mo niufala mama blong mi tufala i no wantem se mi werem wan sot we i taet. Mo sipos traoses blong mi i no kasem ni blong mi, papa blong mi i talem se mi no save werem.”
Sipos papa mama blong yu i no agri wetem yu, ?bambae yu mekem wanem? ?Bambae yu tokbaot bisnes ya wetem tufala? Joanne we i gat 17 yia, i talem se: “Oltaem papa mama blong mi i no wantem lesin.” Amy we i gat 15 yia, i talem se: “!Taem mi mi luk se papa mama blong mi i no kasem save, mi satem maot blong mi nomo!”
!Be yu no mas mekem olsem! Maet yu sapraes se papa mama blong yu tufala i glad blong lesin.
Yu traem tingbaot: Jehova i stap lesin long ol man taem oli talemaot trabol blong olgeta. Hem i lesin long Moses taem i toktok from ol man Isrel we oli no wantem obei.—Eksodas 32:7-14; Dutronome 9:14, 19.
Maet yu ting se: ‘Be papa mama blong mi tufala i no save kasem save long mi olsem Jehova i kasem save long Moses, tufala i sinman nomo. Mo tu, Moses i toktok from wan bigfala samting. Wan ful neson i save ded. Be mi, mi wantem toktok from smol samting ya nomo se mi no wantem kamhom eli.’ I tru, be i gat wan samting we i sem mak yet.
Sipos yu toktok gud mo yu talem samting we i stret, plante taem papa mama blong yu, no narafala man we i hae moa long yu, i rere blong lesin.
Bigfala samting, se yu mas toktok gud. Ol samting we yumi tokbaot biaen, bambae oli givhan long yu:
1. Luksave problem. Long spes daon, yu traem raetem wanem samting we papa mama blong yu i no agri long hem.
․․․․․
2. Raetemdaon se yu harem olsem wanem. Long spes daon, yu traem raetem sam tok blong soemaot se yu yu harem olsem wanem long samting we papa mama blong yu i talem. Ating yu harem nogud, no yu sore, no yu sem, no yu harem se tufala i no trastem yu, no wan narafala samting olsem. (Jim we yumi tokbaot finis, hem i sem blong talemaot long ol fren blong hem ol rul we papa mama blong hem i putum.)
․․․․․
3. Tingbaot se yu nao yu papa no mama. Yu traem tingbaot sipos yu yu gat wan yangfala blong yu we i fesem trabol we yu raetem long namba 1. ?Bambae yu wari moa long wanem samting? ?From wanem yu wari long samting ya? (Ating papa mama blong Jim, tufala i fraet se wan nogud samting bambae i hapen long hem.)
․․․․․
4. Skelem problem bakegen. I gud yu ansa long ol kwestin ya:
?Wanem gudfala samting we i save kamaot sipos mi folem tingting blong papa mama blong mi?
․․․․․
?Mi save mekem wanem blong daonem wari blong tufala?
․․․․․
5. Storian wetem papa mama blong yu mo traem faenem rod blong winim trabol ya. I gud yu folem ol advaes we yumi tokbaot finis, mo ol tok long bokis ya “Advaes Blong Storian Gud.” Nao maet yu luk se yu save storian wetem papa mama blong yu olsem we yu bigman finis. Kellie i mekem olsem. Hem i talem se: “Sipos yu rao, yu no winim wan samting. Mo bambae yu no stretem problem tu. Mi mi luk se i gud blong storian wetem papa mama blong mi. Mifala i rere blong jenisim sam tingting blong mifala, nao mifala i faenem wan rod we mifala evriwan i agri long hem.”
[Futnot]
a Mifala i jenisim sam long ol nem ya.
[Bokis blong pija long pej 17]
ADVAES BLONG STORIAN GUD
“I moagud yu lesin i bitim we yu singaot strong. Sipos yu lesin long papa mama blong yu mo yu traem kasem save long tingting blong tufala, bambae tufala i glad moa blong lesin long yu.”—Rianne. Ridim Filipae 2:3, 4.
“!Yu no mas tokbak! Fastaem mi mi tokbak oltaem, gogo mi luksave se sipos mi bos long tang blong mi, bambae i no gat rao mo bambae mi no kasem panis tu.”—Danielle.
Ridim Ol Proveb 17:27; 21:23.
“Yu mas wet gogo tingting blong yufala evriwan i kwaet. Long taem ya nao, bambae papa mama blong yu i rere blong lesin.”—Collette.
Ridim Ol Proveb 15:23.
“Papa mama blong yu tufala i mas luksave se yu yu respektem tufala mo yu stap lesin gud long tufala. Taswe, bifo we yu talemaot tingting blong yu, yu mas soemaot long tufala se yu stap lesin long wanem we tufala i talem mo yu kasem save.”—Emily.
[Bokis blong pija long pej 17]
LAEF I OLSEM NAO
I no evri problem we yu mas tokbaot wetem papa mama blong yu. Samtaem ‘i gud yu stap kwaet, yu tingting gud long samting ya.’ (Ol Sam 4:4) Yangfala Beatrice i talem se: “Samtaem mi tingbaot se: ‘?Tumora, bambae mi mi tingbaot trabol ya yet?’ Sipos nogat, mi fogetem nomo.”
[Bokis blong pija long pej 18]
I GUD YU ASKEM LONG PAPA MO MAMA BLONG YU
?Taem yutufala i yangfala, yutufala i mekem wanem blong stretem ol problem wetem papa mama blong yutufala? ?Sipos yutufala i save kam yangfala bakegen, bambae yutufala i mekem i defren? ?Wanem samting we bambae yutufala i jenisim?
[Bokis/Foto blong pija long pej 18]
SAMTING WE OL NARAFALA YANGFALA OLI TALEM
Wyndia—Mi traem tingting gud bifo we mi toktok. Mi traem kasem save long tingting blong papa mama blong mi. Mo bifo we mi talem wan samting, mi prea. Sipos mi save se samting we mi wantem talem bambae i statem wan rao, mi stap kwaet nomo, gogo mi mi naf blong talemaot tingting blong mi we mi no rao.
Ron—Taem mi harem se kros i stap kam antap, mi tingbaot se mi save harem nogud blong fuldei sipos mi statem wan rao blong nating nomo. Taswe, naoia mi no moa kam kros kwik olsem bifo.
Ramona—Mi luk se i waes blong lesin long papa mama blong mi fastaem. Plante taem mi faenemaot se tingting blong tufala i klosap sem mak long tingting blong mi. Maet trabol ya i no bigwan nating.
