Mekem i Stret Moa Long Narafala

GOD i wantem we yumi glad, yumi gat kwaet tingting, mo yumi mekem i gud long ol narafala. Taswe, hem i talem se ‘yumi mas mekem ol fasin we i stret gud, mo yumi mas soemaot we yumi lavem ol man tumas.’ (Maeka 6:8) ?Olsem wanem blong mekem samting ya? Yumi mas wokem ol fasin we oli save winim ol fasin we oli no stret. Baebol i save givhan long yumi.

YUMI NO MOA WANTEM PLANTE SAMTING TUMAS. Sipos man i wantem winim fasin ya, hem i mas lanem blong lavem ol man. Hemia i no lav ya we ol muvi oli soemaot. Yumi mas lavem narafala from we yumi tingbaot hem fastaem long yumi. Long 1 Korin 13:4, 5, Baebol i talem se, “man we i stap lavem man, . . . hem i gat sore” mo ‘i no tingbaot hem nomo.’ Jisas tu i talem se: “?Yufala i ting se sipos yufala i stap lavem olgeta ya nomo we oli stap lavem yufala, God bambae i givim pei long yufala from?” !Mo hem i talem se ol man we oli no save God, olgeta tu oli stap mekem fasin ya!—Matiu 5:46.

YUMI NO MOA AGENSEM NARAFALA WE I DEFREN LONG YUMI. Ol Wok 10:34, 35 i talem se: “God i stap mekem i sem mak nomo long olgeta man. . . . Sipos wan man i ona long God, mo i mekem ol samting we i stret long fes blong hem, bambae God i glad long hem, i nating we hem i wan laen blong Isrel, no i kamaot long wan narafala laen olgeta.” God i no sevem man from kala blong skin blong hem, no from we hem i haeman, no from we hem i man no i woman. Ol man blong God oli joen gud, mo samting ya i soemaot se i no gat wan i defren long narawan, olsem we ‘sam oli laen blong Isrel, sam oli no laen blong Isrel, sam oli slef, sam oli friman, sam oli man, sam oli woman, nogat.’ (Galesia 3:28) Taem yumi folem fasin blong God, yumi winim tingting ya blong jajem man we i defren long yumi. Yu traem tingbaot Dorothy we i stap long Amerika.

Dorothy i kros tumas taem hem i luk we samfala oli agensem ol blakman. Hem i wantem joen long wan grup we oli karem masket blong faet from ol blakman. Nao hem i go long wan miting blong ol Witnes blong Jehova, mo hem i luk we ol blakman mo ol waetman tu oli mekem i gud long hem. Hem i luksave kwiktaem se God nomo i save jenisim tingting mo fasin blong man. Taem ol Witnes we oli waetman oli soemaot se oli lavem hem, samting ya i tajem hat blong hem, nao hem i krae we i krae. Hemia ol man we fastaem hem i “rere blong kilim olgeta  oli ded, blong givhan long grup ya we i faet from ol blakman.”

YUMI NO MOA MEKEM STRONGHED. Long taem bifo, plante man oli dring bitim mak, oli mekem ol bisnes blong stilim mane, oli mekem ol krangke lafet, mo oli faet. Be God i givhan long sam long olgeta blong oli sakemaot ol fasin ya. Taem oli folem Jisas, oli lanem blong lavem man, oli kaen long narafala, mo oli mekem ol gudfala fasin. (1 Korin 5:11; 6:9-11; Galesia 5:22) Long taem blong yumi tu, plante milian man oli jenisim fasin blong olgeta taem oli stat blong wosipim tru God. Wan long olgeta, nem blong hem Firuddin we i stap long kantri ya Asebaejan.

Firuddin i gruap long wan spesel skul blong ol pikinini we oli no gat papa mo mama. Hem i faet oltaem wetem ol narafala boe. Taem hem i kam bigwan, hem i tijim ol man blong oli faetem narafala man. Hem i talem se: “Mi mi no gat respek, fasin blong mi i nogud, mo mi mi wan man we i raf. Taem mifala i stap kakae, sipos woman blong mi Zahra i foget blong putum wan samting long tebol, nating se wan smol samting nomo be bambae mi mi kilim hem. !Sipos mitufala i wokbaot samples, nao wan man i lukluk hem, mi mi kilim man ya tu!”

Wan dei, Firuddin i ridim long Baebol se Jisas i askem long God blong i fogivim ol soldia we oli nilim hem long pos. Samting ya i tajem hat blong hem. (Luk 23:34) Hem i tingting se: ‘Pikinini blong God nomo i save mekem fasin ya.’ Long taem ya hem i stat blong lukaot God. Ol Witnes blong Jehova oli talem long hem se oli glad blong stadi Baebol wetem hem, mo hem i agri. I no longtaem, fasin blong hem i stat blong jenis. Hem i kaen long woman blong hem, nao hem tu i stat blong stadi Baebol. Naoia tufala tugeta i wosipim tru God mo tufala i joen gud.

I tru, sipos sam man oli jenisim fasin blong olgeta, hemia bambae i no jenisim fulwol. Be God i gat tingting blong mekem wol ya i kam niuwan we i gat stret fasin nomo i stap long hem. !Hem i gat paoa blong mekem olsem! Yu traem tingbaot: Yumi ridim finis 2 Timoti 3:1-4 we i talemaot klia ol fasin blong ol man long taem blong yumi. Ol fasin ya oli kamtru stret olsem profet tok i talem. Plante narafala profet tok blong Baebol tu oli kamtru finis. I no krangke blong bilif long promes blong God se bambae hem i finisim ol fasin we oli no stret. !Tingting blong God bambae i kamtru! ?Bambae i kamtru olsem wanem?

[Bokis blong pija long pej 7]

HEM I TRAEHAD BLONG JENISIM FASIN WE I NO STRET

Wan woman long Amerika, nem blong hem Heide, i talem se: “Mi mi harem nogud taem mi luk we ol blakman mo ol waetman oli no joen gud, mi luk ol faet, ol puaman, mo ol narafala fasin we oli no stret. Mi mi wantem faenem wan rod blong stretem ol trabol ya. Ale mi joenem wan grup we i stap wok blong olgeta man oli kasem samting we oli gat raet long hem. Biaen, mi joenem wan pati blong politik. Be mi luk we tufala rod ya evriwan oli no save stretem ol nogud fasin.

“Mi ting se i mas gat wan bigfala jenis i kamaot. Long taem ya, sam man we oli no wantem folem fasin blong laef blong ol narafala man oli kam plante, oli singaot olgeta se ‘ol hipi.’ Mi ting se maet ol hipi nao bambae oli jenisim ol samting. Be i no longtaem, mi kasem save se olgeta oli no naf. Mi luk we oli wantem moa blong slip olbaot, mo tekem drag, mo danis long miusik we i gat strong bit, i winim we oli jenisim ol nogud fasin. Tingting blong mi i foldaon. Wan dei, mi storian wetem wan Witnes blong Jehova. Hem i soem ol vas long Baebol we oli tokbaot bigfala jenis we God bambae i mekem. Hem i soem Revelesen 21:3, 4 we i talem se God bambae i ravemaot wota blong ae blong ol man, bambae i no moa gat man i krae mo man we i harem nogud long bodi blong hem. Hemia ol samting we oli kamaot taem man i mekem i no stret long narafala. Mi stap tingbaot se maet ol promes ya oli kamtru.

“Bilif blong mi long ol promes ya i no moa hafhaf taem mi ridim Baebol. Mi luk se God i gat bigfala paoa mo i lavem ol man. Bilif blong mi i kam strong moa taem mi haremsave se ol Witnes blong Jehova oli lavem mi. Naoia mi stap wet nomo blong ol promes ya blong God oli kamtru.”

[Tok blong pija long pej 6]

Sipos yumi folem fasin blong God blong lavem ol man, yumi no moa agensem man we i defren long yumi

[Tok blong pija long pej 6]

Firuddin wetem woman blong hem Zahra