YEHOVA ilingi line alaipashanya kuli kacema. Mu Cebo cakwe, Yehova atweba ati: “Ine, ndi no kufwaya impaanga shandi no kushisakamana.”—Esekiele 34:11, 12.

Bushe impaanga sha kwa Yehova ni bani? Bantu abatemwa Yehova kabili abamupepa. Baibolo itila: “Iseni tupepe no kukontama; natufukame pa ntanshi ya kwa Yehova Uwatupangile. Pantu ena ni Lesa wesu, na ifwe tuli bantu bakwe abo acema kabili tuli mpaanga isho atungulula.” (Amalumbo 95:6, 7) Nga filya impaanga shikonka kacema, bakapepa ba kwa Yehova nabo balakonka Kacema wabo. Bushe balipwililika? Iyo. Ababomfi ba kwa Lesa pa nshita shimo balaba nge ‘mpaanga ishasalangana,’ kabili balaba “kwati ni mpaanga ishaluba.” (Esekiele 34:12; Mateo 15:24; 1 Petro 2:25) Na lyo line, umuntu nga aleka ukupepa Yehova, Yehova enekela ukuti akatendeka ukumupepa na kabili.

 Bushe mutontonkanya ukuti Yehova ni Kacema wenu? Bushe Yehova alanga shani ukuti ni Kacema? Natulande pa fintu fitatu ifyo Yehova acita pa kulanga ukuti ni Kacema:

Alatusambilisha. Yehova atila: “Nkashiliishisha umwaba umulemfwe usuma . . . Kulya e ko shikayolwela mu macinka ayasuma, shikalya umulemfwe uwatemfuma pa mpili sha kwa Israele.” (Esekiele 34:14) Lyonse fye Yehova alatusambilisha ifintu ifisuma pa nshita iyalinga. Bushe kuti mwaibukishapo ilyashi mwabelengele, ilyashi ilyalandilwe pa kulongana nelyo vidio iyo mwatambile umo Yehova ayasukile ipepo lyenu? Bushe tafyalengele mwashininkisha ukuti Yehova alamusakamana?

Alatucingilila kabili alatwafwa. Yehova alilaya ukuti: “Ne yauluba nkaibwesha, ne yafunika nkaikaka ne yanakuka nkaikosha.” (Esekiele 34:16) Yehova alakosha abanaka nelyo ababa na masakamika ayengi. Nga filya kacema acita, Yehova alondapa impaanga shakwe kabili abomfya bamunyinefwe ukwafwa impaanga pa kuti shipole. Yehova na kabili alabwesha bonse abaluba e lyo na bacula na masakamika.

Alatusakamana. Yehova atila: “Nkashipokolola na konse uko shasalanganina . . . Iyaluba nkaifwaya.” (Esekiele 34:12, 16) Yehova amona impaanga iyaluba ukutila, kuti yabwelela kuli ena na kabili. Yehova aleshiba impaanga nga nailuba, alaifwaya kabili alasekelela nga aisanga. (Mateo 18:12-14) Yehova eta bakapepa bakwe aba cine ukuti ‘impaanga shandi, isho nsakamana.’ (Esekiele 34:31) Na imwe bene muli mpaanga isho asakamana.

Cinshi Yehova afwaila ukuti mutendeke ukumupepa na kabili? Ni co afwaya muleba ne nsansa. Yehova alilaya ukuti akapaala impaanga shakwe. (Esekiele 34:26) Ifyo Lesa alaya fikacitika kabili nalimo na imwe mwalimona ifyo amupaala.

Ibukisheni ifyacitike ilyo mwatendeke ukusambilila pali Yehova. Bushe muleibukisha ifyo mwaumfwile ilyo mwaishibe ishina lya kwa Lesa ne fyo afwaya ukucitila abantu bakwe? Bushe muleibukisha ifyo caleba ilyo mwalelongana na bamunyinenwe pa kulongana kwa muputule no kwa citungu? Bushe tamwaleumfwa bwino nga mwashimikila umuntu e lyo afwaisha ukumfwa imbila nsuma?

Yehova kuti amwafwa ukuba ne nsansa na kabili. Umubomfi wa kwa Yehova uwa ku kale apepele ati: “Tubwesesheni kuli imwe, mwe Yehova, na ifwe twalabwela. Lengeni cipya cipya inshiku shesu nga ku kale.” (Inyimbo sha Bulanda 5:21) Yehova alyaswike lilya ipepo, kabili abantu balitendeke ukumubombela ne nsansa na kabili. (Nehemia 8:17) Na imwe bene nga mwapepa, Yehova akulayasuka amapepo yenu.

Na lyo line, abantu tacibangukila ukutendeka ukupepa Yehova na kabili. Natulande pa filenga cilekosela abantu ukutendeka ukupepa Yehova na kabili e lyo ne fyo bengacita pa kuti batendeke ukumupepa na kabili.