Kan ɔ laa nun ndɛ kan kle e.

Be wuli min afuɛ 1979 nun Etazinin lɔ. Kɛ n ɲannin afuɛ nsan’n, min si nin min nin be yrali. Min manmin i ngunmin yɛ ɔ tali min-ɔn. E kɔ Zifu’m be Ɲanmiɛn sulɛ wafa kun nun. Yɛ min manmin fali min wlali Zifu’m be suklu kun nun. Kɛ n ɲannin afuɛ nso’n e ko trannin Izraɛli lɔ afuɛ kun. Lɔ’n n kɔ sran akpasua nga be flɛ be kɛ kibuti’n be suklu’n nun. I sin’n, e nin min manmin e ko trannin Mɛksiki lɔ.

Kannzɛ bɔbɔ Ɲanmiɛn sulɛ sua nunman lika sɔ’n nun lɔ’n, sanngɛ m’an yaciman Zifu’m be Ɲanmiɛn sulɛ wafa’n i ninnge’m be yolɛ. Wunmiɛn-lolɛ-cɛn’n nun’n, n sɔ buzi nuan, n kanngan fluwa nga flɛ i kɛ Tora’n nun. Kpɛkun n nian Ɲanmiɛn srɛlɛ fluwa kun nun n srɛ Ɲanmiɛn. Suklu lɔ’n, n se min wiengu suklu ba mun titi kɛ e Ɲanmiɛn sulɛ wafa liɛ’n yɛ ɔ ti i kpafuɛ’n niɔn. Blɛ sɔ’n nun’n, n nin-a kannganman Biblu’n i bue nga be flɛ i kɛ Aenguɛ Uflɛ mɔ kan junman nga Zezi Klisi dili’n, ɔ nin like ng’ɔ kleli’n be ndɛ’n i nun. I kpa bɔbɔ’n, min manmin seli min kɛ nán maan n yo sɔ naan ɔ cɛman w’a saci min ti nun.

?Ngue ti yɛ a fali ajalɛ kɛ á kánngan Biblu’n i bue nga be flɛ i kɛ Aenguɛ Uflɛ’n i nun-ɔn?

Kɛ n ɲannin afuɛ 17 n sali min si Etazinin lɔ naan ń kó guá min suklu’n i bo. Lɔ’n min janvuɛ kun m’ɔ kɔ asɔnun’n ɔ seli min kɛ sɛ n siman Zezi’n nn m’an mlin.

N tɛli i su kɛ: “Be nga be lafi Zezi su’n be yɛ b’a mlin-ɔn.”

Ɔ usali min kɛ: “?W’a kanngan Biblu’n i bue nga be flɛ i kɛ Aenguɛ Uflɛ’n i nun le?”

N tɛli i su kɛ: “Cɛcɛ!”

Ɔ seli min kɛ: “?Like kun mɔ a siman nun mɔ a su kɛn i su ndɛ’n, kɛ a niɛn i sa’n ɔ ti su?”

I ndɛ sɔ’n wluwluli min wun kpa. Afin n se titi kɛ sɛ sran kun siman ndɛ kun nun naan ɔ kan’n, ɔ timan su. N wunnin kɛ i ndɛ yo fɛ. I sɔ’n ti’n, n fɛli i Biblu’n ɔli min awlo yɛ n boli i bue nga be flɛ i kɛ Aenguɛ Uflɛ’n i nun kannganlɛ bo-ɔ.

?Kɛ a kanngannin nun’n, wafa sɛ yɛ i bo guali-ɔ?

Kɛ n kanngannin nun’n, n wunnin i wlɛ kɛ Zifu mun yɛ be klɛli Biblu’n i bue nga be flɛ i kɛ Aenguɛ Uflɛ’n niɔn. Asa ekun’n, kɛ ń kánngan nun kɔ́’n, n wunnin kɛ Zezi ti sran kpa, ɔ ti Zifu kun m’ɔ ti wun ase kanfuɛ-ɔ. Ɔ kunndɛ kɛ ɔ́ úka sran mun, ɔ kunndɛman kɛ be bu be lufle. I sin’n, n ɔli bibliotɛki kun nun n ko fali fluwa wie mɔ be kan Zezi i ndɛ’n. Be nun wie fi kleman kɛ Zezi yɛ ɔ ti Mesi’n niɔn. Be nun wie mun bɔbɔ be waan Zezi yɛ ɔ ti Ɲanmiɛn’n niɔn. I sɔ’n sanngannin min akunndan kan. ?Afin sɛ Zezi yɛ ɔ ti Ɲanmiɛn’n, nn wan yɛ ɔ srɛli i-ɔ? Asa kusu’n Zezi wuli. Kusu nn Biblu’n se kɛ ‘Ɲanmiɛn wuman.’ a

?A yoli sɛ naan w’a wun kosan sɔ’m be su tɛlɛ’n?

Ndɛ nanwlɛ’n ti kunngba. Ɔ maan n fuali kpa kɛ ń sí nanwlɛ’n. I sɔ’n ti’n, n tuli min klun n srɛli Ɲanmiɛn kpa, kɛ ń srɛ́ nn ń sún. Cɛn sɔ’n nun liɛ’n, m’an faman min Ɲanmiɛn srɛlɛ fluwa’n. Kɛ ɔ yoli sɔ’n w’a cɛman sran wie’m be boboli min anuan’n, Zoova i Lalofuɛ mun-ɔn. Be mannin min be fluwa wie mɔ be nin sran’m be fa suan Biblu’n nun like’n. Fluwa sɔ mun ɔ nin yalɛ nga e nin be e kokoli’n be ukali min naan m’an wun i wlɛ kɛ ndɛ nga be kan’n ɔ taka Biblu’n su. I wie yɛle kɛ Zoova i Lalofuɛ’m be seman kɛ Ɲanmiɛn ti atre nsan. Sanngɛ be wun i wlɛ kɛ Zezi ti “Ɲanmiɛn i Wa” b naan ɔ “ti ninnge nga Ɲanmiɛn yili be’n be nun klikli’n.” c

I sin’n, n sali min sin Mɛksiki lɔ. Lɔ’n e nin Zoova i Lalofuɛ mun e suannin Mesi’n i su ndɛ nga Biblu’n kan’n i su like titi. N wunnin kɛ ndɛ sɔ’m be sɔnnin kpa. I sɔ’n boli min nuan. Sanngɛ n usali min wun kɛ: ‘?Zezi kunngba i lika yɛ ndɛ sɔ’m be kpɛnnin su-ɔ? ?Nɛ́n i bɔbɔ yɛ i ɲinfu ɔ yoli naan ndɛ sɔ’m be kpɛn su i lika-ɔ?’

?Ngue yɛ ɔ ukali wɔ kpa-ɔ?

Zoova i Lalofuɛ’m be ukali min naan m’an wun i wlɛ kɛ sran fi kwlá yoman naan ndɛ sɔ’m b’a kpɛn su i lika. I wie yɛle kɛ Ɲanmiɛn nuan ijɔfuɛ Mise seli kɛ bé wá wú Mesi’n Bɛtleɛmun lɔ, Zide mɛn’n nun. d Kɛ ɔ kannin ndɛ sɔ’n afuɛ 700 sinnin ka naan w’a kpɛn su. ?Wan yɛ i bɔbɔ kwla kle lika ng’ɔ fata kɛ be wu i’n niɔn? Ezai kusu ɔ seli kɛ bé wá kún Mesi’n kɛ sa tɛ yofuɛ wie sa, yɛ bé síe i kan be sie aɲanbeunfuɛ’m be lɛ’n. e Sa sɔ’m be kwlaa be kpɛnnin su Zezi i lika.

Like ng’ɔ ukali min kpa ekun’n yɛle osu nga Zezi fin nun’n i su akunndan bulɛ’n. Biblu’n se kɛ Mesi’n ɔ́ fín Famiɛn Davidi i osu’n nun. f Zezi blɛ su’n Zifu’m be klɛ be osu’n nunfuɛ’m be dunman be sie. Ɔ maan sɛ ɔ ti kɛ Zezi finman Davidi i osu’n nun sa’n, nn i kpɔfuɛ’m be kali lɛ be jrɛnnin i sɔ liɛ’n su be seli kɛ ɔ ti gblɛfuɛ. Sanngɛ b’a kwlá yoman sɔ, afin be si kɛ ɔ fin Davidi i osu’n nun sakpa. Sran wie mun bɔbɔ be flɛli i kɛ “Davidi i Wa.” g

Kɛ be kunnin Zezi m’ɔ dili afuɛ 37, yɛle kɛ afuɛ 70 nun’n, Rɔmunfuɛ’m be wa sacili Zerizalɛmun klɔ’n. Yɛ be sacili fluwa nga be klɛ sran’m be osu’n nunfuɛ’m be dunman’n i nun’n wie. Ɔ maan kɛ ɔ ko yo naan b’a wun Mesi’n i osu’n ɔ fata kɛ ɔ yi i wun nglo ka naan afuɛ sɔ’n w’a ju.

?Kɛ a yoli i kwlaa sɔ’n i su ye benin yɛ a ɲɛnnin i-ɔ?

Mmla’n 18:18, 19 seli kɛ Ɲanmiɛn wá fɛ́ i nuan ijɔfuɛ kun m’ɔ ti kɛ Moizi sa’n ɔ́ bá Izraɛli nvle’n nun. Ɲanmiɛn seli kɛ: “Sran ng’ɔ faman min ndɛ ng’ɔ́ kán’n su’n, e nin i e le i.” Kɛ n tuli min klun n suannin Biblu’n i wunmuan’n i nun like kpa’n, n wunnin i wlɛ kɛ Zezi m’ɔ fin Nazarɛti’n yɛ ɔ ti Ɲanmiɛn nuan ijɔfuɛ sɔ’n niɔn.