Ohun tí Bíbélì sọ

 Ìwé Ìfihàn sọ̀rọ̀ nípa “obìnrin” kan tó jẹ́ “aṣẹ́wó ńlá,” tí orúkọ rẹ̀ jẹ́ “ohun ìjìnlẹ̀ kan: ‘Bábílónì Ńlá.’ ” (Ìfihàn 17:1, 3, 5) Obìnrin yìí ṣàpẹẹrẹ àgbájọ gbogbo ẹ̀sìn èké tó wà láyé, àwọn ẹ̀sìn tó ti “fi irọ́ pààrọ̀ òtítọ́ Ọlọ́run.” a (Róòmù 1:25) Bó tiẹ̀ jẹ́ pé àwọn ẹ̀sìn yìí yàtọ̀ síra lóríṣiríṣi ọ̀nà, gbogbo wọn ló ń ṣi àwọn èèyàn lọ́nà, kí wọ́n má bàa jọ́sìn Jèhófà, Ọlọ́run tòótọ́.—Diutarónómì 4:35.

Àwọn ohun tá a lè fi dá Bábílónì Ńlá mọ̀

1.   Àmì ni Bábílónì Ńlá jẹ́. Torí pé “àmì” làwọn ohun tó wà nínú ìwé Ìfihàn, ó bọ́gbọ́n mu láti gbà pé Bábílónì Ńlá kì í ṣe obìnrin gidi, àmì ló jẹ́. (Ìfihàn 1:1) Bákan náà, ó “jókòó lórí omi púpọ̀,” èyí tó ṣàpẹẹrẹ “àwọn èèyàn àti èrò rẹpẹtẹ àti àwọn orílẹ̀-èdè àti àwọn ahọ́n.” (Ìfihàn 17:1, 15) Èèyàn ẹlẹ́ran ara ò lè ṣe ohun tí Bíbélì sọ yìí.

2.   Bábílónì Ńlá ṣàpẹẹrẹ ètò kan tó nasẹ̀ dé orígun mẹ́rẹ̀ẹ̀rin ayé. Bíbélì pè é ní “ìlú ńlá títóbi tí ó ní ìjọba kan lórí àwọn ọba ilẹ̀ ayé.” (Ìfihàn 17:18) Torí náà, kárí ayé ni ẹsẹ̀ rẹ̀ ti tólẹ̀.

3.   Ètò ìsìn ni Bábílónì Ńlá, kì í ṣe ètò òṣèlú tàbí ọrọ̀ ajé. Ìlú Bábílónì ayé àtijọ́ gbóná tó bá dọ̀rọ̀ ẹ̀sìn, ìlú tí wọ́n ti ń fi “èèdì” di àwọn èèyàn, tí wọ́n sì ti ń ṣe “iṣẹ́ àjẹ́” làwọn èèyàn mọ̀ ọ́n sí. (Àìsáyà 47:1, 12, 13; Jeremáyà 50:1, 2, 38) Kódà, Jèhófà Ọlọ́run tòótọ́ kọ́ ni wọ́n ń jọ́sìn níbẹ̀, ẹ̀sìn èké ni wọ́n ń ṣe. (Jẹ́nẹ́sísì 10:8, 9; 11:2-4, 8) Agbéraga làwọn tó ń ṣàkóso ní Bábílónì, wọn ò sì ka Jèhófà àti ohun tó jẹ mọ́ ìjọsìn rẹ̀ sí nǹkan kan. (Àìsáyà 14:4, 13, 14; Dáníẹ́lì 5:2-4, 23) Bákan náà, àwọn èèyàn tún mọ Bábílónì Ńlá sí ‘abẹ́mìílò.’ Ìyẹn ló fi hàn lóòótọ́ pé ètò ẹ̀sìn ni.—Ìfihàn 18:23.

    Bábílónì Ńlá ò lè jẹ́ ètò ìṣèlú, torí pé “àwọn ọba ayé” máa ṣọ̀fọ̀ nígbà tó bá pa run. (Ìfihàn 17:1, 2; 18:9) Bẹ́ẹ̀ ni kì í ṣe ètò ọrọ̀ ajé, torí ohun tí Bíbélì sọ fi hàn pé ó yàtọ̀ sí “àwọn oníṣòwò ayé.”—Ìfihàn 18:11, 15.

Fọ́tò yìí jẹ́ nípasẹ̀ ìyọ̀ǹda British Museum

4.   Àpèjúwe tí Bíbélì ṣe nípa ẹ̀sìn èké bá Bábílónì Ńlá mu. Ṣe ni ẹ̀sìn èké ń mú káwọn èèyàn máa jọ́sìn àwọn ọlọ́run míì dípò kó máa kọ́ wọn bí wọ́n á ṣe túbọ̀ sún mọ́ Jèhófà, Ọlọ́run tòótọ́. Bíbélì pe ohun tí wọ́n ń ṣe yìí ní “àgbèrè” ẹ̀sìn. (Léfítíkù 20:6, Bíbélì Mímọ́; Ẹ́kísódù 34:15, 16) Ìlú Bábílónì ayé àtijọ́ ni àwọn ẹ̀kọ́ bíi Mẹ́talọ́kan àti àìleèkú ọkàn ti wá, títí kan àṣà fífi ère jọ́sìn. Àwọn àṣà àti ẹ̀kọ́ yẹn ò kúrò nínú ẹ̀sìn èké títí dòní. Àwọn ẹ̀sìn yìí tún ń ṣèyí-ṣọ̀hún, wọ́n láwọn ń jọ́sìn, wọ́n tún ń nífẹ̀ẹ́ ayé. Ìwà àìṣòótọ́ nìyẹn, Bíbélì sì fi wọ́n wé alágbèrè.—Jémíìsì 4:4.

    Bíbélì fi Bábílónì Ńlá wé obìnrin tó wọ “aṣọ aláwọ̀ rírẹ̀dòdò àti aláwọ̀ pọ́pù,” wọ́n sì “fi wúrà, àwọn òkúta iyebíye àti péálì ṣe é lọ́ṣọ̀ọ́.” Àfiwé yìí bá ìsìn èké mu torí ó lọ́rọ̀, ó sì fi ń yangàn. (Ìfihàn 17:4) Bábílónì Ńlá ni orísun “àwọn ohun ìríra ayé” tàbí àwọn ẹ̀kọ́ àti ìwà tí inú Ọlọ́run ò dùn sí. (Ìfihàn 17:5) Àwọn tó wà nínú ẹ̀sìn èké ni “àwọn èèyàn àti èrò rẹpẹtẹ àti àwọn orílẹ̀-èdè àti àwọn ahọ́n” tó ń ti Bábílónì Ńlá lẹ́yìn.—Ìfihàn 17:15.

 Bábílónì Ńlá ló fa ikú “gbogbo àwọn tí wọ́n pa ní ayé.” (Ìfihàn 18:24) Ọjọ́ pẹ́ tí ẹ̀sìn èké ti ń rúná sí ogun, tí wọ́n sì ń kọ́wọ́ ti àwọn apániláyà, bẹ́ẹ̀ ni wọn ò fi òtítọ́ nípa Jèhófà, Ọlọ́run ìfẹ́ kọ́ àwọn èèyàn. (1 Jòhánù 4:8) Ohun tí wọ́n ṣe yìí ti mú kí wọ́n fi ẹ̀mí ọ̀pọ̀lọpọ̀ èèyàn ṣòfò.

Báwo ni àwọn ohun tí Bábílónì Ńlá ń ṣe ṣe rí lára Ọlọ́run?

 Lójú Ọlọ́run, “àwọn ẹ̀ṣẹ̀ [Bábílónì Ńlá] ti ga dé ọ̀run.” (Ìfihàn 18:4, 5) Inú ń bí Ọlọ́run sí ẹ̀sìn èké torí pé wọn ò kọ́ àwọn èèyàn ní òótọ́ nípa Ọlọ́run, wọ́n sì ń hùwà àìdáa sáwọn ọmọ ẹ̀yìn wọn.

Kí ló máa ṣẹlẹ̀ sí Bábílónì Ńlá?

 Bíbélì sọ pé “Ọlọ́run ti kéde ìdájọ́” sórí Bábílónì Ńlá. (Ìfihàn 18:20) Ohun tí Bíbélì ń sọ ni pé Ọlọ́run máa pa gbogbo ẹ̀sìn èké run. (Ìfihàn 18:8) Ó máa mú kí ẹranko aláwọ̀ rírẹ̀dòdò kan, tó ṣàpẹẹrẹ ètò òṣèlú kan tó lágbára, kẹ̀yìn sí ẹ̀sìn èké, á sì pa á run pátápátá. (Ìfihàn 17:16, 17) “Báyìí la ṣe máa yára ju Bábílónì ìlú ńlá náà sísàlẹ̀, a ò sì ní rí i mọ́ láé.” (Ìfihàn 18:21) Torí náà, ó bọ́gbọ́n mu pé kí àwọn tó fẹ́ máa ṣe ohun tínú Ọlọ́run dùn sí rí i dájú pé àwọn “jáde kúrò láàárín wọn,” kí wọ́n má sì ní ohunkóhun ṣe pẹ̀lú ẹ̀sìn èké.—2 Kọ́ríńtì 6:14-17.