Jeremáyà 50:1-46

  • Àsọtẹ́lẹ̀ lórí Bábílónì (1-46)

    • Ẹ sá kúrò nínú Bábílónì (8)

    • A ó mú Ísírẹ́lì pa dà wá (17-19)

    • A ó mú kí odò Bábílónì gbẹ (38)

    • Ẹnikẹ́ni kò ní gbé Bábílónì mọ́ (39, 40)

50  Ọ̀rọ̀ tí Jèhófà sọ nípa Bábílónì,+ nípa ilẹ̀ àwọn ará Kálídíà, nípasẹ̀ wòlíì Jeremáyà nìyí:   “Ẹ sọ ọ́ láàárín àwọn orílẹ̀-èdè kí ẹ sì kéde rẹ̀. Ẹ gbé àmì kan dúró,* ẹ sì kéde rẹ̀. Ẹ má fi nǹkan kan pa mọ́! Ẹ sọ pé, ‘Wọ́n ti gba Bábílónì.+ Ìtìjú ti bá Bélì.+ Méródákì wà nínú ìbẹ̀rù. Ìtìjú ti bá àwọn ère rẹ̀. Àwọn òrìṣà ẹ̀gbin rẹ̀* wà nínú ìbẹ̀rù.’   Nítorí orílẹ̀-èdè kan ti wá gbéjà kò ó láti àríwá.+ Ó ti sọ ilẹ̀ rẹ̀ di ohun àríbẹ̀rù;Kò sì sí ẹni tó ń gbé inú rẹ̀. Èèyàn àti ẹranko ti fẹsẹ̀ fẹ;Wọ́n ti lọ.”  “Ní àwọn ọjọ́ yẹn àti ní àkókò yẹn,” ni Jèhófà wí, “àwọn èèyàn Ísírẹ́lì àti àwọn èèyàn Júdà máa kóra jọ.+ Wọ́n á máa sunkún bí wọ́n ṣe ń rìn lọ,+ wọ́n á sì jọ máa wá Jèhófà Ọlọ́run wọn.+  Wọ́n á béèrè ọ̀nà tó lọ sí Síónì, wọ́n á yíjú sí apá ibẹ̀,+ wọ́n á ní, ‘Ẹ wá, ẹ jẹ́ kí a bá Jèhófà dá májẹ̀mú tó máa wà títí láé, tí kò sì ní ṣeé gbàgbé.’+  Àwọn èèyàn mi ti di agbo àgùntàn tó sọ nù.+ Àwọn olùṣọ́ àgùntàn wọn ti kó wọn ṣìnà.+ Wọ́n dà wọ́n lọ sórí àwọn òkè ńlá, wọ́n ń rìn látorí òkè ńlá dórí òkè kékeré. Wọ́n ti gbàgbé ibi ìsinmi wọn.  Gbogbo àwọn tó rí wọn ti pa wọ́n jẹ,+ àwọn ọ̀tá wọn sì ti sọ pé, ‘A ò jẹ̀bi, nítorí wọ́n ti ṣẹ Jèhófà, wọ́n ti ṣẹ ibùgbé òdodo àti ìrètí àwọn baba ńlá wọn, Jèhófà.’”   “Ẹ sá kúrò nínú Bábílónì,Ẹ jáde kúrò ní ilẹ̀ àwọn ará Kálídíà,+Kí ẹ sì dà bí àgbò tó ń ṣíwájú agbo ẹran.   Nítorí wò ó, màá gbé àwọn orílẹ̀-èdè ńlá dìde láti ilẹ̀ àríwáMàá sì mú kí wọ́n gbéjà ko Bábílónì.+ Wọ́n á tò lọ́wọ̀ọ̀wọ́ láti gbógun tì í;Ibẹ̀ ni wọ́n á ti gbà á. Ọfà wọn dà bíi ti jagunjagunTó ń múni ṣòfò ọmọ;+Wọn kì í pa dà wá lọ́wọ́ òfo. 10  Wọ́n á kó Kálídíà bí ẹrù ogun.+ Gbogbo àwọn tó bá ń kó ẹrù látinú rẹ̀ á tẹ́ ara wọn lọ́rùn,”+ ni Jèhófà wí. 11  “Nítorí ẹ̀ ń yọ̀,+ inú yín sì ń dùnNígbà tí ẹ̀ ń kó àwọn tó jẹ́ ogún mi lẹ́rù.+ Nítorí ẹ̀ ń fi ẹsẹ̀ talẹ̀ kiri bí abo ọmọ màlúù lórí koríko,Ẹ sì ń yán bí akọ ẹṣin. 12  Ìtìjú ti bá ìyá yín.+ Ìjákulẹ̀ ti bá ẹni tó bí yín lọ́mọ. Wò ó! Òun ló kéré jù láàárín àwọn orílẹ̀-èdè,Aginjù tí kò lómi àti aṣálẹ̀.+ 13  Nítorí ìbínú Jèhófà, ẹnikẹ́ni kò ní gbé inú rẹ̀;+Á sì di ahoro látòkè délẹ̀.+ Ẹnikẹ́ni tó bá ń kọjá lọ lẹ́gbẹ̀ẹ́ Bábílónì á wò ó, ẹ̀rù á bà á Á sì súfèé nítorí gbogbo ìyọnu rẹ̀.+ 14  Ẹ jáde lọ́wọ̀ọ̀wọ́ láti gbógun ti Bábílónì láti ibi gbogbo,Gbogbo ẹ̀yin tó ń tẹ* ọrun. Ẹ ta á lọ́fà, ẹ má ṣe ṣẹ́ ọfà kankan kù,+Nítorí Jèhófà ló ṣẹ̀ sí.+ 15  Ẹ kígbe ogun mọ́ ọn láti ibi gbogbo. Ó ti juwọ́ sílẹ̀.* Àwọn òpó rẹ̀ ti ṣubú, àwọn ògiri rẹ̀ sì ti ya lulẹ̀,+Nítorí ẹ̀san Jèhófà ni.+ Ẹ gbẹ̀san lára rẹ̀. Bí ó ti ṣe síni ni kí ẹ ṣe sí i gẹ́lẹ́.+ 16  Ẹ mú afúnrúgbìn kúrò ní Bábílónì Àti ẹni tó ń lo dòjé ní ìgbà ìkórè.+ Nítorí idà tó ń hanni léèmọ̀, kálukú á pa dà sọ́dọ̀ àwọn èèyàn rẹ̀,Kálukú á sì sá lọ sí ilẹ̀ rẹ̀.+ 17  “Àwọn èèyàn Ísírẹ́lì jẹ́ àwọn àgùntàn tó tú ká.+ Àwọn kìnnìún ti fọ́n wọn ká.+ Ọba Ásíríà ló kọ́kọ́ jẹ wọ́n;+ lẹ́yìn náà, Nebukadinésárì* ọba Bábílónì jẹ egungun wọn.+ 18  Nítorí náà, ohun tí Jèhófà Ọlọ́run àwọn ọmọ ogun, Ọlọ́run Ísírẹ́lì sọ nìyí: ‘Wò ó, màá fìyà jẹ ọba Bábílónì àti ilẹ̀ rẹ̀ bí mo ṣe fìyà jẹ ọba Ásíríà.+ 19  Màá mú Ísírẹ́lì pa dà sí ibi ìjẹko rẹ̀,+ á jẹko ní Kámẹ́lì àti ní Báṣánì,+ á* sì ní ìtẹ́lọ́rùn lórí àwọn òkè Éfúrémù+ àti ti Gílíádì.’”+ 20  “Ní ọjọ́ yẹn àti ní àkókò yẹn,” ni Jèhófà wí,“A ó wá ẹ̀bi Ísírẹ́lì kiri,Ṣùgbọ́n a kò ní rí ìkankan,A kò sì ní rí àwọn ẹ̀ṣẹ̀ Júdà,Nítorí màá dárí ji àwọn tí mo jẹ́ kí ó ṣẹ́ kù.”+ 21  “Lọ gbéjà ko ilẹ̀ Mérátáímù àti àwọn tó ń gbé ní Pékódù.+ Jẹ́ kí wọ́n pa wọ́n ní ìpakúpa, sì jẹ́ kí wọ́n pa wọ́n rẹ́,”* ni Jèhófà wí. “Ṣe gbogbo ohun tí mo ti pa láṣẹ fún ọ. 22  Ìró ogun wà ní ilẹ̀ náà,Àjálù ńlá. 23  Ẹ wo bí wọ́n ṣe ṣẹ́ òòlù irin* gbogbo ayé, tí wọ́n sì fọ́ ọ!+ Ẹ wo bí Bábílónì ṣe di ohun àríbẹ̀rù láàárín àwọn orílẹ̀-èdè!+ 24  Mo ti dẹkùn fún ọ, ó sì ti mú ọ, ìwọ Bábílónì,Ìwọ kò sì mọ̀. Wọ́n rí ọ, wọ́n sì gbá ọ mú,+Torí pé Jèhófà ni o ta kò. 25  Jèhófà ti ṣí ilé ìṣúra rẹ̀,Ó sì ń mú àwọn ohun ìjà ìbínú rẹ̀ jáde.+ Nítorí Olúwa Ọba Aláṣẹ, Jèhófà Ọlọ́run àwọn ọmọ ogun, ní iṣẹ́ kan Ní ilẹ̀ àwọn ará Kálídíà. 26  Ẹ wá gbéjà kò ó láti àwọn ibi tó jìnnà.+ Ẹ ṣí àwọn àká rẹ̀.+ Ẹ kó o jọ bí òkìtì ọkà. Ẹ pa á rẹ́.*+ Kó má sì ní ẹnikẹ́ni tó máa ṣẹ́ kù. 27  Pa gbogbo akọ ọmọ màlúù rẹ̀ ní ìpakúpa;+Kí wọ́n sọ̀ kalẹ̀ lọ sí ibi tí wọ́n ti máa pa wọ́n. Wọ́n gbé, nítorí ọjọ́ wọn ti dé,Àkókò ìyà wọn! 28  Ìró àwọn tó ń sá lọ ń dún,Àwọn tó ń sá àsálà láti ilẹ̀ Bábílónì,Láti kéde ẹ̀san Jèhófà Ọlọ́run wa ní Síónì,Ẹ̀san nítorí tẹ́ńpìlì rẹ̀.+ 29  “Ẹ kó àwọn tafàtafà jọ láti gbéjà ko Bábílónì,Gbogbo àwọn tó ń tẹ* ọrun.+ Ẹ pàgọ́ yí i ká; kí ẹnikẹ́ni má ṣe sá àsálà. Ẹ san án fún un gẹ́gẹ́ bí iṣẹ́ ọwọ́ rẹ̀.+ Bí ó ti ṣe sí àwọn èèyàn ni kí ẹ ṣe sí i gẹ́lẹ́.+ Nítorí pé ó ti gbéra ga sí Jèhófà,Sí Ẹni Mímọ́ Ísírẹ́lì.+ 30  Torí náà, àwọn ọ̀dọ́kùnrin rẹ̀ á ṣubú ní àwọn gbàgede rẹ̀,+Gbogbo àwọn ọmọ ogun rẹ̀ á sì ṣègbé* ní ọjọ́ yẹn,” ni Jèhófà wí. 31  “Wò ó! Mo dojú ìjà kọ ọ́,+ ìwọ aláìgbọràn,”+ ni Olúwa Ọba Aláṣẹ, Jèhófà Ọlọ́run àwọn ọmọ ogun wí,“Nítorí ọjọ́ rẹ gbọ́dọ̀ dé, ní àkókò tí màá pè ọ́ wá jíhìn. 32  Ìwọ aláìgbọràn, wàá kọsẹ̀, wàá sì ṣubú,Kò sì sí ẹni tó máa gbé ọ dìde.+ Màá sọ iná sí àwọn ìlú rẹ,Á sì jó gbogbo ohun tó yí ọ ká run.” 33  Ohun tí Jèhófà Ọlọ́run àwọn ọmọ ogun sọ nìyí: “Àwọn èèyàn Ísírẹ́lì àti Júdà ni à ń ni lára,Gbogbo àwọn tó sì mú wọn lẹ́rú kò fi wọ́n sílẹ̀.+ Wọn ò jẹ́ kí wọ́n lọ.+ 34  Àmọ́, Olùtúnrà wọn lágbára.+ Jèhófà Ọlọ́run àwọn ọmọ ogun ni orúkọ rẹ̀.+ Ó dájú pé á gba ẹjọ́ wọn rò,+Kí ó lè fún ilẹ̀ náà ní ìsinmi+Kí ó sì mú rúkèrúdò bá àwọn tó ń gbé ní Bábílónì.”+ 35  “Idà kan wà tó dojú kọ àwọn ará Kálídíà,” ni Jèhófà wí,“Ó dojú kọ àwọn tó ń gbé ní Bábílónì, ó sì dojú kọ àwọn ìjòyè rẹ̀ àti àwọn ọlọ́gbọ́n rẹ̀.+ 36  Idà kan wà tó dojú kọ àwọn tó ń sọ ọ̀rọ̀ asán,* wọ́n á sì hùwà òmùgọ̀. Idà kan wà tó dojú kọ àwọn jagunjagun rẹ̀, jìnnìjìnnì á sì bò wọ́n.+ 37  Idà kan wà tó dojú kọ àwọn ẹṣin wọn àti àwọn kẹ̀kẹ́ ogun wọn,Tó sì dojú kọ onírúurú àjèjì tó wà láàárín rẹ̀,Wọ́n á dà bí obìnrin.+ Idà kan wà tó dojú kọ àwọn ìṣúra rẹ̀, ṣe ni wọ́n á kó wọn lọ.+ 38  Ìparun máa wà yí ká omi rẹ̀, a ó mú kó gbẹ táútáú.+ Nítorí ilẹ̀ ère gbígbẹ́ ni,+Wọ́n sì ń ṣe bíi wèrè nítorí àwọn ìran tó ń bani lẹ́rù tí wọ́n ń rí. 39  Nítorí náà, àwọn ẹranko tó ń gbé ní aṣálẹ̀ á máa gbé pẹ̀lú àwọn ẹranko tó ń hu,Inú rẹ̀ sì ni ògòǹgò á máa gbé.+ Ẹnikẹ́ni ò sì ní gbé ibẹ̀ mọ́ láé,Bẹ́ẹ̀ ni kò ní jẹ́ ibi tí àwọn èèyàn á máa gbé láti ìran dé ìran.”+ 40  “Bí Ọlọ́run ṣe pa Sódómù àti Gòmórà+ àti àwọn ìlú tó yí wọn ká run,”+ ni Jèhófà wí, “kò ní sí ẹnì kankan tí á máa gbé ibẹ̀, kò sì ní sí èèyàn kankan tó máa tẹ̀ dó síbẹ̀.+ 41  Wò ó! Àwọn èèyàn kan ń wọlé bọ̀ láti àríwá;Orílẹ̀-èdè ńlá àti àwọn atóbilọ́lá ọba+ ni a ó gbé dìdeLáti àwọn ibi tó jìnnà jù lọ láyé.+ 42  Wọ́n ń lo ọrun àti ọ̀kọ̀.*+ Ìkà ni wọ́n, wọn ò sì lójú àánú.+ Ìró wọn dà bíi ti òkun,+Bí wọ́n ṣe ń gun ẹṣin wọn. Bí ọkùnrin kan ṣoṣo ni wọ́n tò lọ́wọ̀ọ̀wọ́ láti gbógun tì ọ́, ìwọ ọmọbìnrin Bábílónì.+ 43  Ọba Bábílónì ti gbọ́ ìròyìn nípa wọn,+Ọwọ́ rẹ̀ sì rọ.+ Ìdààmú ti bá a,Ìrora bíi ti obìnrin tó ń rọbí. 44  “Wò ó! Ẹnì kan máa wá gbéjà ko àwọn ibi ìjẹko Bábílónì tó wà ní ààbò bíi kìnnìún tó jáde látinú igbó kìjikìji lẹ́gbẹ̀ẹ́ Jọ́dánì, ṣùgbọ́n ní ìṣẹ́jú kan, màá mú kí wọ́n sá kúrò lọ́dọ̀ rẹ̀. Màá sì yan àyànfẹ́ lé e lórí.+ Nítorí ta ló dà bí èmi, ta ló lè sọ pé kí ni mò ń ṣe? Olùṣọ́ àgùntàn wo ló sì lè dúró níwájú mi?+ 45  Nítorí náà, ẹ gbọ́ ìpinnu* tí Jèhófà ṣe lórí Bábílónì + àti ohun tí ó ti rò nípa àwọn tó ń gbé ní Kálídíà. Ó dájú pé, a ó wọ́ àwọn ẹran kéékèèké inú agbo ẹran lọ. Ó máa sọ ibùgbé wọn di ahoro nítorí wọn.+ 46  Nígbà tí wọ́n bá gba Bábílónì, ìró rẹ̀ á mú kí ilẹ̀ mì tìtì,A ó sì gbọ́ igbe ẹkún láàárín àwọn orílẹ̀-èdè.”+

Àlàyé Ìsàlẹ̀ Ìwé

Tàbí “fi òpó ṣe àmì.”
Ó ṣeé ṣe kí ọ̀rọ̀ Hébérù yìí ní í ṣe pẹ̀lú ọ̀rọ̀ tí wọ́n ń lò fún “ìgbẹ́,” wọ́n sì máa ń lò ó fún ohun tí wọ́n bá kórìíra.
Ní Héb., “fi okùn sí.”
Ní Héb., “fi ọwọ́ rẹ̀ fúnni.”
Ní Héb., “Nebukadirésárì,” ọ̀nà míì tí wọ́n ń gbà kọ orúkọ yìí.
Tàbí “ọkàn rẹ̀ á.”
Tàbí “sì pa wọ́n run pátápátá.”
Ìyẹn, hámà ńlá tí àwọn alágbẹ̀dẹ máa ń lò.
Tàbí “pa á run pátápátá.”
Ní Héb., “fi okùn sí.”
Ní Héb., “ni a ó pa lẹ́nu mọ́.”
Tàbí “àwọn wòlíì èké.”
Tàbí “ẹ̀ṣín.”
Tàbí “ìmọ̀ràn.”