Paonan-o Ka Nagsasagdon?

May nangaro na ba hin sagdon ha imo? Pananglitan, may nagpakiana na ba ha imo hin sugad hini: ‘Ano an akon bubuhaton? Makadto ba ako hini nga okasyon? Kakarawaton ko ba ini nga trabaho? Makikig-date ba ako hini nga tawo?’

An sinsero nga mga tawo bangin mangaro ha imo hin bulig ha paghimo hin mga desisyon nga makakaapekto ha ira relasyon ha ira kasangkayan, pamilya, o kan Jehova pa ngani. Diin mo ibabasar an imo baton? Ano an imo nahiaraan nga paagi han pagsagdon? Importante man an iginpapakiana ha imo o diri, “an kasingkasing han matadong nagtutoon pagbaton,” siring han Proberbios 15:28. Tagda kon paonan-o an masunod nga lima nga prinsipyo ha Biblia makakabulig ha imo ha pagsagdon ha iba.

1 Hibaroi an Tinuod nga Sitwasyon.

“Hiya nga nahatag han baton nga diri pa hiya nakakabati, amo an kalurongan ngan kaalohan ha iya.”—PROB. 18:13.

Basi makahatag hin maopay nga sagdon, sadang naton hibaroan an kahimtang ngan panhunahuna han nangangaro hin sagdon. Ha pag-ilustrar: Kon may magtawag ha imo ngan magpakiana kon hain an pinakamaopay nga agian tipakada ha imo balay, ano an kinahanglan mo hibaroan basi makabulig? Maitututdo mo ba an pinakamaopay nga agian kon diri ka anay magpakiana kon hain hiya? Syempre diri! Ha pariho nga paagi, basi makahatag hin husto nga sagdon, kinahanglan hibaroan anay naton an kahimtang ngan panhunahuna han nangangaro hin sagdon. May mga detalye ba mahitungod han iya kahimtang nga diri kita maaram ngan mahimo makaapekto ha aton sagdon? Kon magsasagdon kita nga diri kita maaram han sitwasyon, bangin mas mawurok la lugod an aton ginsasagdonan.—Luk. 6:39.

Hibaroi kon Ano Na an Iya Ginsaliksik. Bangin maaramon liwat nga pakianhan an nangangaro hin sagdon han sugad hini nga mga pakiana: “Para ha imo, ano nga mga prinsipyo ha Biblia an imo maiaaplikar?” “Ano an imo nakikita nga mga bentaha ngan disbentaha ha mga desisyon nga imo ginpipilian?” “Ano na an imo ginsaliksik?” “Ano na nga bulig an iginhatag ha imo han iba, sugad han mga tigurang, imo mga kag-anak, o han nagba-Bible study ha imo?”

An iya mga baton makakabulig ha aton nga hibaroan kon ano na nga pangalimbasog an iya ginhimo ha pamiling hin baton mahitungod ha iya kahimtang ngan kon nangaro na ba hiya hin sagdon ha iba. Masasabtan gihap naton kon namimiling la hiya hin magsaragdon nga magyayakan han mga butang nga karuyag niya mabatian.—2 Tim. 4:3.

  2 Ayaw Dayon Pagbaton.

“An ngatanan nga mga tawo magmaabtik ha pagbati, mahinay ha pagyakan.”—JAK. 1:19.

Tungod kay karuyag naton makabulig, bangin bumaton dayon kita. Kondi maaramon ba ito, labi na kon an gin-iistoryahan waray pa naton mausisa hin maopay? An Proberbios 29:20 nasiring: “Nakita ka han tawo nga mahinanalion ha iya mga pulong? May durodaku nga paglaom para ha usa nga lurong kay ha iya.”

Paggahin hin panahon nga siguruhon nga an imo sagdon uyon gud ha kinaadman han Dios. Pakianhi an imo kalugaringon, ‘An akon ba panhunahuna naimpluwensyahan han panhunahuna ngan “espiritu han kalibotan”?’ (1 Kor. 2:12, 13) Hinumdumi nga diri igo an pagkaada la maopay nga intensyon. Katapos hibaroan ni apostol Pedro an makuri nga toka ni Jesus, nagsagdon hiya kan Jesus: “Ipahirayo ha imo Ginoo; diri mahimo ini ha imo.” Ano nga leksyon an aton hibabaroan ha reaksyon ni Pedro? Nga kon diri kita mag-ikmat, bangin maibasar naton an aton sagdon, diri ha ‘mga bagay han Dios, kondi ha mga bagay han tawo.’ (Mat. 16:21-23) Salit importante gud nga maghunahuna anay kita antes magyakan! Kay kon hunahunaon, diri ba gutiay gud la an aton eksperyensya kon itanding ha kinaadman han Dios?—Job 38:1-4; Prob. 11:2.

3 Mapainubsanon nga Gamita an Pulong han Dios.

“Ha akon ngahaw diri ako nagbubuhat bisan ano, kondi sugad han igintutdo ha akon han Amay akon iginyakan ini nga mga bagay.”—JUAN 8:28.

Masiring ka ba, “Kon ako ha imo, ini an akon bubuhaton . . . ”? Bisan kon baga hin masayon batunon an iginpakiana ha imo, maopay nga subaron an kan Jesus pagkamapainubsanon ngan pagkarawat han iya mga limitasyon. Mas daku gud an iya kinaadman ngan eksperyensya kay han bisan hin-o nga tawo, pero nagsiring hiya: “Ako waray pagyakan tumikang ha akon; kondi an Amay . . . an naghatag ha akon ha usa nga sugo nga amo an akon igsisiring ngan nga amo an akon igyayakan.” (Juan 12:49, 50) An mga igintutdo ngan iginsagdon ni Jesus pirme uyon ha kaburut-on han iya Amay.

Pananglitan, ha Lukas 22:49 aton mababasa nga han aarestuhon na hi Jesus, an iya mga disipulo nagpakiana kon sadang ba hira makig-away. Usa ha ira an ginamit hin espada. Ha kapariho nga asoy ha Mateo 26:52-54 aton maoobserbaran nga bisan hito nga kahimtang, hi Jesus naggahin hin panahon ha pagbulig hito nga disipulo nga masabtan an kaburut-on ni Jehova. Maaram hiya han mga prinsipyo ha Genesis 9:6 ngan han mga tagna ha Salmo 22 ngan Isaias 53, salit nakahatag hiya hin maaramon nga sagdon nga sigurado nga nagtalwas han mga kinabuhi ngan nakapalipay kan Jehova.

  4 Gamita an mga Publikasyon nga Basado ha Biblia.

“Hin-o gud ba an matinumanon ngan maaramon nga uripon nga gintaporan han Agaron ha paghatag hin pagkaon ha husto nga panahon?”—MAT. 24:45, NW.

Hi Jesus nagpili hin matataporan nga uripon ha pagtagana hin importante nga espirituwal nga pagkaon. Kon naghahatag ka hin sagdon ngan instruksyon mahitungod ha importante nga mga butang, naggagahin ka ba hin panahon ha pagsaliksik hin maopay ha mga publikasyon nga basado ha Biblia?

Damu nga impormasyon an aton mabibilngan gamit an Watch Tower Publications Index ngan an Watchtower Library. a Kanugon gud kon diri naton ito gamiton! Nakalista dida an yinukot nga topiko nga may damu nga artikulo nga makakabulig ha usa nga namimiling hin sagdon. Nabubuligan mo ba an iba nga gamiton ito ha pag-aram ngan pag-usisa han mga prinsipyo ha Biblia basi makahimo hin maopay nga desisyon? Sugad la nga an GPS makakabulig ha usa nga tawo nga hibaroan kon hain hiya ngan makakaggiya ha iya ngadto ha iya destinasyon, an mga garamiton ha pagsaliksik makakabulig ha iya nga makita an iya presente nga sitwasyon ngan hibaroan kon paonan-o makakapabilin ha dalan ngadto ha kinabuhi.

Damu nga tigurang an nagbabansay hin mga magwarali ha pamiling hin mga artikulo gamit an Index o an Watchtower Library, salit nabubuligan nira an kabugtoan nga magdesisyon uyon ha Kasuratan. Nabulig ito ha mga magwarali nga masulbad an ira mga problema ngan mabatasan liwat an pagsaliksik ngan pagsarig ha espirituwal nga mga tagana ni Jehova. Hito nga paagi, an ira abilidad ha paghunahuna nababansay ha “pagkilala han maopay ngan han maraot.”—Heb. 5:14.

5 Ayaw Pagdesisyon Para ha Iba.

“An tagsa-tagsa magdadara han iya kalugaringon nga darad-on.”—GAL. 6:5.

Ha kataposan, an kada tagsa kinahanglan magdesisyon kon hain nga sagdon an iya susundon. Kita ngatanan gintagan ni Jehova hin kagawasan ha pagdesisyon kon magpapagiya ba kita ha iya mga prinsipyo o diri. (Deut. 30:19, 20) May mga sitwasyon nga damu nga prinsipyo ha Biblia an nahidadabi, ngan ha urhi, an indibiduwal nga nangangaro hin sagdon an magdidesisyon. Depende ha problema o ha edad han nangangaro ha aton hin sagdon, bangin kinahanglan liwat naton pakianhan an aton kalugaringon, ‘May katungod gud ba ako ha pagsagdon may kalabotan hini?’ May mga kahimtang nga mas maopay nga idaop ha mga tigurang o ha mga kag-anak kon batan-on an nagpakiana.

[Footnote]

[Kahon/Retrato ha pahina 8]

Proyekto Para ha Pagsingba han Pamilya

Sugad nga proyekto para ha pag-aram, kay ano nga diri magsaliksik basi hibaroan an baton ha mga bag-o pa la nga iginpakiana ha imo? Ano nga mga artikulo ngan mga prinsipyo ha Biblia an imo bibilngon nga makakabulig ha nagpapakiana? Pananglitan usa nga bugto an nagpakiana mahitungod ha pakig-date ha usa nga bangin karuyag niya magin asawa. Kon ginagamit an Index o an Watchtower Library, pamilnga siyahan an topiko nga direkta nga may kalabotan hito. Pananglitan, puydi mo kitaon an “Dating” o “Marriage.” Katapos kitaa an mga subtopiko nga may kalabotan ha iya kahimtang. Kon ginkikita an nangunguna nga topiko, kitaa kon may nakabutang nga “See also” nga bangin mag-unabi hin topiko nga mas direkta nga may kalabotan ha imo ginbibiling.

[Kahon ha pahina 9]

Mapasalamaton kita nga tungod han mga tagana ni Jehova pinaagi han iya organisasyon, makakahatag ngan makakakarawat kita han gimaopayi nga sagdon. An Eklesiastes 12:11 (Maopay nga Sumat) nasiring: “An mga puplonganon han mga may kinaadman sugad hin tais nga mga tabog nga ginagamit han mga magmarangno hin pagtugway han mga karnero, ngan an tinirok nga mga darahonon napabilin ha hunahuna sugad hin mga raysang nga ginpadulot hin maupay. Iginhatag ini han Dyos nga amo la nga Magmarangno ha aton ngatanan.” Sugad hin “tais nga mga tabog” nga ginagamit ha paggiya ha pantrabaho nga mga hayop, an mahigugmaon ngan maopay nga sagdon naggigiya ha sinsero nga mga tawo ha husto nga direksyon ha kinabuhi. An “mga raysang nga ginpadulot hin maupay” nagpaparig-on han mga istraktura. Ha pariho nga paagi, an paghatag hin maopay nga sagdon mahimo magkaada mag-opay ngan nagpapadayon nga resulta. An mga maaramon nalilipay gud pag-usisa han “tinirok nga mga darahonon” nga nagpapakita han kinaadman han ira “amo la nga Magmarangno,” hi Jehova.

Subara hi Jehova kon nagsasagdon. Daku nga pribilehiyo an pagpamati ngan paghatag hin mapulsanon nga sagdon ha kada panahon nga puydi kita magsagdon! Kon an aton sagdon basado gud ha mga prinsipyo ha Biblia, magigin maaramon ito ngan makakabulig para ha waray kataposan nga kaopayan han ginsagdonan.