Ayaw Pagsarig ha Imo Kalugaringon nga Pagsabot
“Sarig kan Jehova ha bug-os mo nga kasingkasing, ngan ayaw sandig dida ha imo kalugaringon nga pagsabot.”—PROB. 3:5.
1, 2. (a) Ano nga mga sitwasyon an bangin atubangon naton? (b) Kon naatubang hin problema, naghihimo hin desisyon, o naato ha pagsulay, kan kanay kita sadang sumarig, ngan kay ano?
IGINSARA na han tag-iya han kompanya nga gintatrabahoan ni Cynthia a an pipira nga bahin hito ngan gintangtang an iba nga empleyado. Naabat hi Cynthia nga hiya na an sunod nga tatangtangon. Ano an iya bubuhaton kon mawarayan hiya trabaho? Paonan-o niya mababayaran an iya mga baraydan? Hi Pamela naruruyag pagbalhin ha lugar nga daku an panginahanglan hin mga magwarali, pero sadang ba hiya bumalhin? Iba liwat an sitwasyon han batan-on nga hi Samuel. Han bata pa hiya nagkikinita hiya hin pornograpiya. Yana nga sobra 20 anyos na hiya, nasusulay gud hiya nga bumalik hito nga bisyo. Paonan-o niya ito maaatohan?
2 Kan kanay ka nasarig kon naatubang hin mga problema, naghihimo hin importante nga mga desisyon, o naato ha mga pagsulay? Nasarig ka la ba ha imo kalugaringon, o imo ‘iginbubutang an imo dinara ha bawbaw ni Jehova’? (Sal. 55:22) An Biblia nasiring: “An mga mata ni Jehova ngadto ha mga magtadong, ngan binubuka niya iton iya talinga ngadto ha ira singgit.” (Sal. 34:15) Salit importante gud nga bug-os-kasingkasing nga sumarig kita kan Jehova ngan diri ha aton kalugaringon nga pagsabot!—Prob. 3:5.
3. (a) Ano an nahiuupod ha pagsarig kan Jehova? (b) Kay ano nga an iba bangin sumarig ha ira kalugaringon nga pagsabot?
3 Nahiuupod ha bug-os-kasingkasing nga pagsarig kan Jehova an pagbuhat han mga butang uyon ha iya paagi ngan kaburut-on. An nangunguna nga paagi ha pagbuhat hito amo an padayon nga pag-ampo ha iya ngan kinasingkasing nga paghangyo han iya giya. Kondi damu an nakukurian pagsarig hin bug-os kan Jehova. Pananglitan, an Kristiano nga bugto nga hi Lynn nagsiring, “Nakukurian gud ako nga bug-os nga sumarig kan Jehova.” Kay ano? “Waray ako komunikasyon ha akon tatay,” siring niya, “ngan hi Nanay waray manginano ha akon emosyonal o pisikal nga panginahanglan. Salit bata pa la ako, ako na an nagmamangno ha akon kalugaringon.” Tungod han kahimtang ni Lynn, makuri para ha iya nga bug-os nga sumarig ha bisan hin-o. An abilidad ngan kalamposan mahimo liwat makaaghat ha usa nga sumarig ha kalugaringon. An usa nga tigurang bangin sumarig ha iya eksperyensya ha pag-asikaso ha mga butang ha kongregasyon ngan diri mag-ampo ha Dios antes buhaton ito.
4. Ano an aton hihisgotan hini nga artikulo?
4 Kon nag-aampo kita nga buligan kita ni Jehova, naglalaom hiya nga bubuhaton naton an aton gimaopayi ngan magios uyon ha iya kaburut-on. Kon sugad, paonan-o kita magigin timbang ha pagpasa ha iya han aton mga kabaraka ngan ha pagbuhat han aton mahihimo ha pagsulbad han magkuri nga problema? Kon nagdidesisyon, ano an sadang naton likyan? Kay ano nga importante an pag-ampo kon nangangalimbasog kita nga atohan an mga pagsulay? Babatunon naton ini nga mga pakiana pinaagi ha paghisgot han mga ehemplo ha Biblia.
Kon Naatubang hin Problema
5, 6. Ano an ginbuhat ni Hesekia han gintarhog hiya han hadi han Asirya?
5 Mahitungod kan Hadi Hesekia han Juda, an Biblia nasiring: “Hiya kinmupkop kan Jehova; waray hiya bumaya ha pagsunod ha iya, kondi nagbantay han iya mga sugo, nga kan Jehova iginsugo kan Moises.” Oo, “hiya sinmarig kan Jehova, an Dios ha Israel.” (2 Hadi 18:5, 6) Ano an ginbuhat ni Hesekia han an hadi han Asirya nga hi Senakerib nagpadara ha Jerusalem hin mga representante, upod na hi Rabsake, ngan hin damu hinduro nga kasundalohan? Ginsakop na han gamhanan nga kasundalohan han Asirya an damu nga kinuta nga syudad ha Juda, ngan yana an Jerusalem na an karuyag sakupon ni Senakerib. Hi Hesekia kinadto ha balay ni Jehova ngan nag-ampo: “O Jehova nga amon Dios, luwason mo kami, ako nangangamaya ha imo, tikang ha iya kamot, nga an ngatanan nga ginhadian ha tuna makakilala nga ikaw hi Jehova amo la nga Dios.”—2 Hadi 19:14-19.
6 Hi Hesekia ginios uyon ha iya pag-ampo. Ngani, antes kumadto ha templo basi mag-ampo, ginsugo niya an katawohan nga diri batunon an mga panginsulto ni Rabsake. Nagpadara liwat hi Hesekia hin mga mensahero ngadto kan propeta Isaias basi mangaro hin sagdon. (2 Hadi 18:36; 19:1, 2) Ngan ginbuhat ni Hesekia an nakakapalipay kan Jehova. Hini nga higayon, waray hiya mangalimbasog paghimo hin solusyon nga diri uyon ha kaburut-on ni Jehova pinaagi ha pangaro hin bulig ha Ehipto o ha kahigrani nga nasud. Imbes nga sumarig ha iya kalugaringon nga pagsabot, hi Hesekia sinarig kan Jehova. Katapos patayon han anghel ni Jehova an 185,000 nga kasundalohan ni Senakerib, “linmakat” hi Senakerib ngan binalik ha Ninibe.—2 Hadi 19:35, 36.
7. Paonan-o makakaliaw ha aton an mga pag-ampo ni Hana ngan ni Jonas?
7 Hi Hana nga asawa han Lebihanon nga hi Elkana sinarig liwat kan Jehova han nabibido hiya tungod kay diri hiya nagkakaanak. (1 Sam. 1:9-11, 18) Hi propeta Jonas ginluwas tikang ha tiyan han daku nga isda katapos niya mag-ampo: “Ako nagtawag kan Jehova tungod han akon kagol-anan, ngan hiya nagbaton ha akon; tikang ha tiyan han Sheol ako nagsangpit, ngan ikaw namati han akon tingog.” (Jon. 2:1, 2, 10) Nakakaliaw gud hibaroan nga anoman kakuri an aton kahimtang, mahimo kita ‘manginyupo’ kan Jehova!—Basaha an Salmo 55:1, 16.
8, 9. Ano an importante kanda Hesekia, Hana, ngan Jonas han hira nag-ampo, ngan ano nga leksyon an aton hibabaroan tikang hini?
8 An susbaranan nira Hesekia, Hana, ngan Jonas nagtututdo liwat ha aton hin importante nga leksyon kon ano an diri naton sadang kalimtan kon nag-aampo kita ha panahon nga makuri an aton kahimtang. Hira nga tulo inabat hin kasakit ha emosyon han inatubang hin kakurian. Pero iginpapakita han ira mga pag-ampo nga diri la an ira kalugaringon o an pagkaada solusyon ha ira mga problema an importante ha ira. An ngaran han Dios, an pagsingba ha iya, ngan an pagbuhat han iya kaburut-on amo an pinakaimportante ha ira. Hi Hesekia nasákit gud nga ginpapasiparahan an ngaran ni Jehova. Nagsaad hi Hana nga an anak nga iya gud ginhingyap iya ihahatag ha pag-alagad ha tabernakulo ha Shilo. Ngan hi Jonas nagsiring: “Ako magbabayad hadton akon iginsaad.”—Jon. 2:9.
9 Kon nag-aampo para hin bulig nga makatalwas ha makuri nga kahimtang, maaramon nga usisahon naton an aton mga motibo. Importante la ba ha aton nga masulbad an aton problema, o ginhuhunahuna naton hi Jehova ngan an iya katuyoan? Tungod han aton mga pag-antos bangin diri na naton mahunahuna an espirituwal nga mga butang. Kon nag-aampo ha Dios para hin bulig, isentro naton an aton hunahuna kan Jehova, ha pagbaraan han iya ngaran, ngan ha pagbindikar han iya pagkasoberano. An pagbuhat hito makakabulig ha aton nga magpabilin nga positibo bisan kon diri mahitabo an aton ginlalaoman nga solusyon ha aton problema. An baton ni Jehova ha aton mga pag-ampo bangin amo an paghatag ha aton hin kusog basi mailob an aton kahimtang.—Basaha an Isaias 40:29; Filipos 4:13.
Kon Naghihimo hin mga Desisyon
10, 11. Ano an ginbuhat ni Jehosapat han inatubang hiya hin sitwasyon nga diri hiya maaram han iya bubuhaton?
10 Paonan-o ka naghihimo hin magbug-at nga desisyon? Nagdidesisyon ka ba anay ngan katapos nag-aampo kan Jehova nga bendisyonan ito nga imo desisyon? Tagda an ginbuhat ni Jehosapat nga hadi han Juda han ginsulong hira han gintampo nga kasundalohan han mga Moabitanhon ngan Amonitanhon. An Juda waray kapas ha pag-ato ha ira. Ano an ginbuhat ni Jehosapat?
11 “Hi Josapat nahadlok, ngan nag-andam ha iya ngahaw pangita kan Jehova,” siring han Biblia. Iginsugo niya nga magpuasa an ngatanan nga taga-Juda ngan gintirok an katawohan “ha pangita hin tabang ni Jehova.” Katapos tinindog hiya ha atubangan han katawohan han Juda ngan han Jerusalem ngan nag-ampo. Nanginyupo hiya: “O amon Dios, diri ba nimo hira huhukman? Kay waray kami kusog patok hini nga daku nga panon nga nakanhi patok ha amon; diri ngani kami maaram kon ano amon bubuhaton: kondi an amon mga mata aada ha imo.” Ginpamatian han tinuod nga Dios an pag-ampo ni Jehosapat ngan milagroso nga gintalwas hira. (2 Kron. 20:3-12, 17) Kon naghihimo hin mga desisyon, labi na adton makakaapekto han aton espirituwalidad, diri ba sadang kita sumarig kan Jehova imbes nga ha aton kalugaringon nga pagsabot?
12, 13. Ano nga susbaranan an iginpakita ni Hadi David ha paghimo hin mga desisyon?
12 Ano an sadang naton buhaton kon naatubang kita hin mga sitwasyon nga baga hin masayon la sulbaron—bangin tungod kay naeksperyensyahan na naton ito salit nakakahunahuna dayon kita hin solusyon? May kalabotan hini, may hibabaroan kita nga leksyon ha usa nga asoy mahitungod kan Hadi David. Han ginsulong han mga Amalekanhon an syudad han Siklag, ginbihag nira an mga asawa ngan mga anak ni David pati na an mga asawa ngan mga anak han iya surugoon nga kalalakin-an. Hi David nagpakiana kan Jehova: “Lalanaton ko ba adto nga mga parasulong?” Hi Jehova binaton: “Lanata; kay ha waray ruhaduha, hiaabotan mo hira, ngan ha waray kulang mababawi mo an ngatanan.” Ginsunod ito ni David, ngan “nabawi [niya] an ngatanan nga nakuha han mga Amalekanhon.”—1 Sam. 30:7-9, 18-20; Maopay nga Sumat.
13 Pipira ka panahon katapos sulungon han mga Amalekanhon an Israel, ginsulong ito han mga Pilisteohanon. Hi David nagpakiana na liwat kan Jehova, ngan ini an matin-aw nga iginbaton ha iya: “Kadto na; kay ha pagkatinuod akon itutubyan an mga Pilisteohanon ngada ha imo kamot.” (2 Sam. 5:18, 19) Waray pag-iha katapos hito, ginsulong na liwat hira han mga Pilisteohanon. Ano an bubuhaton ni David hini nga higayon? Puydi unta hiya mangatadongan: ‘Duha ka beses na ako inatubang hin sugad hini nga sitwasyon. Makikig-away ako ha mga kaaway han Dios sugad han akon ginbuhat hadto.’ O mangangaro ba hiya han giya ni Jehova? Hi David waray sumarig ha iya eksperyensya han naglabay. Nag-ampo na liwat hiya kan Jehova. Sigurado nga mapasalamaton gud hiya nga ginbuhat niya ito! Hini nga higayon, iba na an mga instruksyon nga iginhatag ha iya. (2 Sam. 5:22, 23) Kon naatubang kita hin sitwasyon o problema nga naeksperyensyahan na naton, kinahanglan mag-ikmat kita nga diri sumarig ha aton la eksperyensya han naglabay.—Basaha an Jeremias 10:23.
14. Ano nga leksyon an aton hibabaroan ha ginbuhat ni Josue ngan han katigurangan han Israel may kalabotan ha mga Gibeonitanhon?
14 Tungod kay diri hingpit, kita ngatanan—bisan an eksperyensyado nga mga tigurang—kinahanglan pirme mangaro kan Jehova hin giya kon naghihimo hin mga desisyon. Tagda an ginbuhat han sinaliwan kan Moises nga hi Josue ngan han katigurangan han Israel han ginlimbongan hira han mga Gibeonitanhon nga nagpakunokuno nga tikang ha hirayo nga lugar. Hi Josue ngan an iya mga kaupod waray magpakiana kan Jehova antes magdesisyon. Nakigmurayaw hira ha mga Gibeonitanhon ngan naghimo hin kauyonan ha ira. Bisan kon ha urhi ginsuportahan ni Jehova ito nga kauyonan, iya ginsiguro nga mairekord ha Kasuratan an diri nira pagpangaro ha iya hin giya basi mahibaro kita hin leksyon tikang hito.—Jos. 9:3-6, 14, 15.
Kon Nangangalimbasog Pag-ato ha mga Pagsulay
15. Isaysay kon kay ano nga an pag-ampo importante ha pag-ato ha pagsulay.
15 Tungod kay aadi ha aton an “balaud han sala,” kinahanglan maniguro gud kita pag-ato ha tendensya nga makasala. (Roma 7:21-25) Mahimo kita maglampos hini. Paonan-o? Ginsidngan ni Jesus an iya mga sumurunod nga an pag-ampo importante ha pag-ato ha pagsulay. (Basaha an Lukas 22:40.) Bisan kon magpabilin la gihapon an sayop nga mga hingyap o panhunahuna katapos naton mag-ampo ha Dios, kinahanglan padayon kita nga ‘mangaro ha Dios’ hin kinaadman basi malamposan ini nga pagsari. Ginpapasarig kita nga hiya “mahatagon ha ngatanan ngan diri mabadlungon.” (Jak. 1:5) Hi Jakobo nagsurat liwat: “Masakit ba [ha espirituwal] an iba ha iyo? Tawagon niya an mga ansiano han singbahan, ngan mag-ampo hira tungod ha iya, nga paghirogan hiya hin lana ha ngaran han Ginoo: ngan an pag-ampo han pagtoo makakaluwas ha masakit.”—Jak. 5:14, 15.
16, 17. Kon nangangaro hin bulig ha pag-ato ha pagsulay, san-o an pinakamaopay nga panahon ha pag-ampo?
16 An pag-ampo importante ha pag-ato ha pagsulay, pero kinahanglan maaram kita kon san-o an husto nga panahon ha pag-ampo. Tagda an kahimtang han usa nga batan-on nga lalaki nga gin-unabi ha Proberbios 7:6-23. Han tikagab-i na, naglalakat hiya ha kalsada diin kilala nga naukoy an usa nga imoral nga babaye. Nalimbongan hiya han magtam-is nga pulong han babaye ngan nadani han iya pag-ulog-ulog salit inupod hiya ha babaye, sugad hin baka nga napakadto ha pangihawan. Kay ano nga kinadto didto ini nga batan-on nga lalaki? Tungod kay hiya “waray sarabotan,” o waray eksperyensya, posible nga nangangalimbasog hiya pag-ato ha sayop nga mga hingyap. (Prob. 7:7) San-o unta an pinakamaopay nga panahon nga mag-ampo hiya? Syempre, an pag-ampo ha bisan ano nga oras durante hito nga pagsulay makakabulig gud ha iya. Pero an pinakamaopay nga panahon nga mag-ampo hiya dida unta han siyahan nga iya nahunahuna nga umagi hito nga kalsada.
17 Yana, an usa nga lalaki bangin nangangalimbasog gud nga likyan an pagkita hin pornograpiya. Kondi ano man kon abrihan niya an mga web site nga maaram hiya nga damu an maglaw-ay nga retrato o video? Diri ba magigin pariho hiya han batan-on nga lalaki nga gin-unabi ha Proberbios kapitulo 7? Delikado gud an paglakat ha sugad hito nga “kalsada”! Basi maatohan an pagsulay nga magkita hin pornograpiya, an usa kinahanglan mangaro hin bulig kan Jehova pinaagi ha pag-ampo antes magtikang pag-agi hito nga “kalsada” ha Internet.
18, 19. (a) Kay ano nga diri masayon an pag-ato ha pagsulay, pero paonan-o ka maglalampos? (b) Ano an imo determinasyon?
18 Diri masayon an pag-ato ha pagsulay o paglampos ha magraot nga bisyo. ‘An kaipa han unod nakontra ha espiritu,’ siring ni apostol Pablo, ‘ngan an espiritu nakontra ha kaipa han unod.’ Salit ‘diri naton nabubuhat an mga bagay nga aton gintitinguha.’ (Gal. 5:17) Basi malamposan ini, kinahanglan sinsero nga mag-ampo kita ha siyahan nga higayon nga nagkakaada kita sayop nga panhunahuna o nasusulay, ngan katapos, kinahanglan buhaton naton an aton igin-ampo. “Waray pagsulay nga maabot ha [aton] nga diri sadang maantos han tawo,” ngan ha bulig ni Jehova, makakapabilin kita nga matinumanon ha iya.—1 Kor. 10:13.
19 Naatubang man kita hin problema, naghihimo hin mabug-at nga desisyon, o nangangalimbasog pag-ato ha pagsulay, hi Jehova naghatag ha aton hin maopay hinduro nga regalo—an birilhon nga tagana nga pag-ampo. Kon nag-aampo kita, iginpapakita naton nga nasarig kita ha iya. Kinahanglan padayon liwat nga mangaro kita ha Dios han iya baraan nga espiritu, nga naggigiya ngan nagpaparig-on ha aton. (Luk. 11:9-13) Pirme kita sumarig kan Jehova ngan diri ha aton kalugaringon nga pagsabot.
[Footnote]
a Ginbag-o an mga ngaran.
Nahihinumdoman Mo Ba?
• Ano nga leksyon mahitungod han pagsarig kan Jehova an imo hinbaroan kanda Hesekia, Hana, ngan Jonas?
• Paonan-o ginpapabug-atan han ehemplo ni David ngan ni Josue nga kinahanglan magin mabinantayon kita kon naghihimo hin mga desisyon?
• San-o an pinakamaopay nga panahon nga mag-ampo basi makaato ha mga pagsulay?
[Mga Pakiana]
[Retrato ha pahina 9]
Ha pag-ato ha pagsulay, san-o an pinakamaopay nga panahon ha pag-ampo?
