AN PUNTO DE BISTA HAN BIBLIA
Kwarta
An kwarta ba an hinungdan han ngatanan nga karaotan?
“An gugma ha kwarta usa nga gamot han ngatanan nga klase hin nakakadaot nga mga butang.”—1 Timoteo 6:10.
AN GINSISIRING HAN MGA TAWO
An kwarta an hinungdan o “gamot” han ngatanan nga karaotan.
AN GINSISIRING HAN BIBLIA
“An gugma ha kwarta”—diri an kwarta mismo—an hinungdan han “nakakadaot nga mga butang.” Ha Biblia, ginhisgotan han riko nga hi Hadi Solomon an tulo nga nakakadaot nga butang nga agsob naieksperyensyahan han mga tawo nga nahigugma ha kwarta. Kabaraka: “An pagkapuno han bahandianon diri makakatugot ha iya hin pagkaturog.” (Eklesiastes 5:12) Pagin diri kontento: “Hiya nga nahigugma han salapi diri matatablaw han salapi; diri man hiya nga mahigugma han kahuraan matatablaw han tubo.” (Eklesiastes 5:10) Pagsulay ha pagtalapas han balaud: “Hiya nga nag-aapiki ha pagkadato diri kay diri sisirotan.”—Proberbios 28:20.
Ano an gamit han kwarta?
“An kwarta usa nga arayopan.”—Eklesiastes 7:12.
AN GINSISIRING HAN MGA TAWO
An kwarta naghahatag hin seguridad ngan kalipay.
AN GINSISIRING HAN BIBLIA
An ideya nga an kwarta nakakapalit hin kalipay ngan seguridad bahin han “nakakalimbong nga gahum han karikohan.” (Marcos 4:19) Ha gihapon, “an kwarta nabaton han ngatanan nga butang.” (Eklesiastes 10:19) Pananglitan, napapalit hito an imo mga kinahanglan basi mabuhi—sugad han pagkaon ngan medisina.—2 Tesalonica 3:12.
An kwarta nabulig liwat ha pagtagana han panginahanglan han imo pamilya. Ngani, an Biblia nasiring: “Kon may bisan hin-o nga diri nagtatagana ha mga aada ha iya poder, ngan labi na ha mga membro han iya panimalay, iginsasalikway niya an pagtoo.”—1 Timoteo 5:8.
Paonan-o mo magagamit hin maaramon an kwarta?
‘Lingkod [anay] ngan kwentaha an magagasto.’—Lucas 14:28.
AN GINSISIRING HAN BIBLIA
Gamita an kwarta ha paagi nga gin-uuyonan han Dios. (Lucas 16:9) Maaramon nga gamita ito ha responsable ngan tangkod nga paagi. (Hebreo 13:18) Basi diri magkaproblema tungod ha pagkinabuhi nga labaw han imo maaakos, “an [imo] pagkinabuhi mawaray unta gugma ha kwarta.”—Hebreo 13:5.
Bisan kon an Biblia diri nasiring nga sayop an pangutang, ito nagpapahamangno: ‘An parautang surugoon han urutangan.’ (Proberbios 22:7) Likyi an pagpalit nga waray ha plano tungod kay “an tagsa-tagsa nga madinalidalion nagdadagmit la ha kakulangan [kapobrehan].” (Proberbios 21:5) Lugod, ‘paglaín uyon ha [imo] maaakos’ ngan pagtirok para ha importante nga panginahanglan.—1 Corinto 16:2.
Gin-aaghat kita han Biblia nga ‘batasanon an paghatag.’ (Lucas 6:38) Kon karuyag naton mapalipay an Dios, may maopay kita nga hinungdan ha pagin mahinatagon tungod kay “an Dios nahigugma ha malipayon nga nahatag.” (2 Corinto 9:7) Salit, “ayaw hingalimot ha pagbuhat han maopay ngan pagpaangbit ha iba han anoman nga may-ada ka, kay nalilipay gud an Dios ha sugad nga mga halad.”—Hebreo 13:16.
Bangin Maruyagan Mo Liwat
PAGPAMATA!
Timbang nga Panhunahuna ha Kwarta
Pito nga pakiana basi mausisa an imo kalugaringon kon sayop ba an imo panhunahuna ha kwarta.
PAGPAMATA!
Tulo nga Butang nga Diri Napapalit han Kwarta
Tungod ha kwarta napapalit naton an aton mga ginkikinahanglan. Kondi an tinuod nga katagbaw nagtitikang ha mga butang nga diri napapalit hito.
AN BIBLIA NAKAKAGBAG-O HAN KINABUHI
Nabilngan Ko an Tinuod nga Karikohan
Paonan-o nadiskobrehan han usa nga malampuson nga business executive an usa nga butang nga mas importante kay ha karikohan ngan kwarta?
PAGPAMATA!
An Dalan han Kalipay—Pagkakontento Ngan Pagkamahinatagon
Ginsusukol han damu an kalipay pinaagi ha kadamu han ira panag-iya o kwarta. Pero naghahatag ba ito hin nagpapadayon nga kalipay? Ano an iginpapakita han ebidensya?
