AN PROBLEMA

“Han pag-ikatarapos ko ha elementarya, waray nakikigsangkay ha akon, ngan masakit ito. Salit han nag-hayskul ako, ginbag-o ko an akon pamostura ngan pamatasan—pero diri para ha kaopayan. Desperado ako magkaada kasangkayan salit nagpadára ako ha akon mga kaeskwela basi la maruyagan ako nira.”—Jennifer, 16. a

Ginpi-pressure ka ba han imo mga kaupod? Kon oo, ini nga artikulo mabulig ha imo ha paglampos hito.

AN SADANG MO HIBAROAN

Bisan kon an usa nga tawo maopay, mahimo hiya makagbuhat hin maraot kon ginpi-pressure.

“An maraot nga mga kaupod nakakadaot han maopay nga pamatasan.”—1 Corinto 15:33.

“Usahay nadadára kita ha pagbuhat hin maraot tungod kay karuyag naton mapalipay an iba!”—Dana.

Diri la an iba an mahimo mag-pressure ha aton, kondi an aton liwat kalugaringon.

“Kon karuyag ko buhaton an husto, an maraot an aadi ha akon.”—Roma 7:21.

“Agsob nga ako la an nagpi-pressure han akon kalugaringon; naaawa man gud ako ha mga butang nga gin-iiristoryahan han akon kasangkayan nga baga hin makaruruyag gud.”—Diana.

An paglampos ha peer pressure o pag-impluwensya han iba mahimo mo ipasigarbo.

“Tipigi an maopay nga konsensya.”—1 Pedro 3:16.

“Hadto, makuri gud para ha akon nga atubangon an pag-pressure han iba, pero yana, diri na ako nahahadlok nga magin iba ngan gintitindogan ko na an akon mga desisyon. Maopay gud an pagkaturog ha gab-i nga limpyo an konsensya.”—Carla.

 AN IMO MAHIMO BUHATON

Kon ginpi-pressure nga magbuhat hin sayop, sarihi ini:

Hunahunaa an resulta. Pakianhi an imo kalugaringon, ‘Ano an mahitatabo kon madakpan ako tungod la kay nagpadára ako ha pag-pressure han iba? Ano an huhunahunaon ha akon han akon mga kag-anak? Ano an akon huhunahunaon ha akon kalugaringon?’—Prinsipyo ha Biblia: Galacia 6:7.

“Ginpapakianhan ako han akon mga kag-anak, ‘Kon magpadára ka, ano an mahitatabo ha imo?’ Iginpapasantop nira ha akon nga kon magpadára ako, madadaot an akon tidaraon.”—Olivia.

Parig-ona an imo mga prinsipyo. Pakianhi an imo kalugaringon, ‘Kay ano nga natoo ako nga makakadaot ha akon o ha iba an pagbuhat hini?’—Prinsipyo ha Biblia: Hebreo 5:14.

“Han bata pa ako, basta la ako nabaribad o nahatag hin halipot nga rason kon kay ano nga ginbubuhat ko o diri ko ginbubuhat an usa nga butang, pero yana, naisasaysay ko na ito hin maopay. Marig-on ako kon ano an akon gintotoohan nga husto ngan kon ano an sayop. An baton tikang ha akon mismo—diri tikang ha iba.”—Anita.

Hunahunaa an imo pagkatawo. Pakianhi an imo kalugaringon, ‘Ano nga klase hin pagkatawo an karuyag ko pagtag-iyahon?’ Katapos, hunahunaa an pressure nga inaatubang mo ngan pakianhi an imo kalugaringon, ‘Ano an bubuhaton han usa nga may sugad nga pagkatawo ha sugad hini nga sitwasyon?’—Prinsipyo ha Biblia: 2 Corinto 13:5.

“Kontento ako ha kon ano ako, salit balewaray la ha akon an ginhuhunahuna han iba mahitungod ha akon. Tutal, naruruyagan man han kadam-an kon hin-o gud ako.”—Alicia.

Hunahunaa an tidaraon. An mga tawo nga karuyag mo maimpres samtang naeskwela ka, bangin paglabay la hin pipira ka tuig, o hin pipira ka bulan, diri na ngani bahin han imo kinabuhi.

“Ginkita ko an usa nga retrato han amon klase, ngan diri ko na ngani mahinumdoman an ngaran han iba ko nga kaklase. Pero han naeskwela pa ako, mas importante ha akon an ira opinyon kay han akon mga prinsipyo. Kalurongan gud adto!”—Dawn, 22 anyos na yana.

Pag-andam. An Biblia nasiring: ‘Mahibaro kamo kon paonan-o mabaton ha tagsa nga tawo.’—Colosas 4:6.

“Ginbubuligan kami nga magbugto han amon mga kag-anak ha paghunahuna hin mga sitwasyon, katapos gindadrama-drama namon ito basi kon umatubang kami hin sugad nga sitwasyon, maaram kami han amon hihimoon.”—Christine.