Mareko 6:1-56

6  Mme a tloga koo a tla mo karolong ya naga ya gagabo, mme barutwa ba gagwe ba mo sala morago.+  E rile go nna sabata, a simolola go ruta mo sinagogeng; mme ba le bantsi ba ba reeditseng ba tshwarwa ke kgakge mme ba re: “Monna yono o tsere kae dilo tseno?+ Mme ke ka ntlha yang fa botlhale jono bo neilwe monna yono, le ditiro tsa maatla tse di ntseng jaana di dirwa ka diatla tsa gagwe?  Yono ke mmetli wa dikgong+ morwa Marea+ le morwarraagwe Jakobe+ le Josefa le Judase le Simone,+ ga ke re? Le bokgaitsadie ba fano le rona, ga ke re?” Jalo ba simolola go kgotšwa ka ntlha ya gagwe.+  Mme Jesu a tswelela a ba raya a re: “Moporofeti o a tlotlwa mme e seng mo karolong ya naga ya gagabo+ le mo go ba losika lwa gagwe le mo ntlong ya gagwe.”+  Jalo o ne a sa kgone go dira tiro epe ya maatla koo fa e se go baya diatla ba ba boboletseng ruri ba le mmalwa le go ba alafa.  Eleruri, o ne a gakgamalela go tlhoka tumelo ga bone. Mme a ya mo tikologong mo metsaneng e e dirang potologo, a ruta.+  Jaanong a bitsa ba ba lesome le bobedi, a simolola go ba roma ka bobedi le bobedi,+ mme a ba naya taolo ya go laola meya e e seng phepa.+  Gape, o ne a ba naya ditaelo tsa gore ba se ka ba tsholela loeto sepe fa e se lore lo le losi, le fa e le senkgwe, le fa e le kgetsana ya dijo,+ le fa e le madi a kopore mo dikgwameng tsa bone tsa moitlamo,+  ba bofe bompaatšhane, mme ba se ka ba apara diaparo tsa kafa teng di le pedi.+ 10  Gape, a ba raya a re: “Gongwe le gongwe fela kwa lo tsenang mo legaeng gone,+ nnang koo go fitlha lo tswa mo lefelong leo.+ 11  Mme gongwe le gongwe kwa lefelong le batho ba se kitlang ba lo amogela kwa go lone le fa e le go lo utlwa, e re lo tswa koo lo tlhotlhoreng lerole le le kafa tlase ga dinao tsa lona gore e nne bosupi mo go bone.”+ 12  Jalo ba bolola mme ba rera gore batho ba tle ba ikwatlhaye;+ 13  mme ba ne ba tle ba leleke madimona+ a le mantsi ba bo ba tlotse batho ba ba boboletseng ruri ba le bantsi ka leokwane+ mme ba ba alafe.+ 14  Jaanong ga fitlha mo ditsebeng tsa ga Kgosi Herode, gonne leina la ga Jesu le ne la itsiwe phatlalatsa, mme batho ba ne ba re: “Johane wa mokolobetsi o tsositswe mo baswing, mme ka lebaka leo ditiro tse di maatla di a dira mo go ene.”+ 15  Mme ba bangwe ba ne ba re: “Ke Elija.”+ Gape ba bangwe ba ne ba re: “Ke moporofeti yo o tshwanang le mongwe wa baporofeti.”+ 16  Mme e rile Herode a utlwa a re: “Johane yo ke neng ka mo kgaola tlhogo, ene yono o tsositswe.”+ 17  Gonne Herode ka boene o ne a rometse gore go tshwarwe Johane mme a mo golega mo kgolegelong ka ntlha ya ga Herodiase mosadi wa ga Filipo morwarraagwe, ka gonne o ne a mo nyetse.+ 18  Gonne Johane o ne a reile Herode kgapetsakgapetsa a re: “Ga go kafa molaong gore o bo o tsere mosadi wa ga morwarrago.”+ 19  Mme Herodiase o ne a mo tshwere ka pelo+ e bile a batla go mmolaya, mme a sa kgone.+ 20  Gonne Herode o ne a boifa+ Johane thata, ka a ne a itse gore o ne a le monna yo o siameng le yo o boitshepo;+ mme o ne a mmolokile a babalesegile. Ya re a sena go mo reetsa+ a sala a akabetse fela thata a sa itse se a ka se dirang, le fa go ntse jalo a tswelela go mo reetsa ka boitumelo. 21  Mme ga tla letsatsi le le siameng+ le Herode a neng a dira modiro wa dijo tsa maitseboa ka lone ka letsatsi la go tsalwa+ ga gagwe a o direla banna ba gagwe ba maemo a a kwa godimo le balaodi ba sesole le ba ba di gogang kwa pele ba Galalea. 22  Mme morwadie Herodiase yono a tsena a bina mme a itumedisa Herode le ba ba ntseng le ene ka go sekama.+ Kgosi ya raya morweetsana ya re: “Nkope le fa e le eng se o se batlang, mme ke tla se go naya.” 23  Ee, a mo ikanela a re: “Le fa e le eng se o se nkopang, ke tla se go naya,+ go fitlha go sephatlo sa bogosi jwa me.”+ 24  Mme a tswa a raya mmaagwe a re: “Ke kope eng?” A re: “Tlhogo ya ga Johane wa mokolobetsi.”+ 25  Ka yone nako eo a tsena ka potlako kwa kgosing a bolela kopo ya gagwe, a re: “Ke batla gore o nneye gone jaanong jaana mo mogopong tlhogo ya ga Johane Mokolobetsi.” 26  Le mororo kgosi e ne ya hutsafala thata, le fa go ntse jalo e ne e sa batle go mo itlhokomolosa, ka ntlha ya maikano le ba ba neng ba ntse ka go sekama fa tafoleng.+ 27  Jalo kgosi ka yone nako eo ya romela monna wa mosireletsi mme ya mo laela gore a tlise tlhogo ya gagwe. Mme a tswa a ya go mo kgaola tlhogo mo kgolegelong+ 28  mme a tlisa tlhogo ya gagwe e le mo mogopong, a e naya morweetsana, mme morweetsana a e naya mmaagwe.+ 29  E rile barutwa ba gagwe ba utlwa ka gone ba tla ba tsaya setopo sa gagwe ba se latsa mo lebitleng la kgakologelo.+ 30  Mme baaposetoloi ba phuthega fa pele ga ga Jesu mme ba mmegela dilo tsotlhe tse ba neng ba di dirile le tse ba neng ba di ruta.+ 31  Mme a ba raya a re: “Tlang, lona ka bolona, re yeng kwa thoko mo lefelong le le se nang batho+ mme lo ikhutse go sekae.”+ Gonne go ne go na le ba le bantsi ba ba neng ba tla e bile ba tsamaya, mme ba ne ba se na nako ya go iketla le fa e le ya go ja dijo.+ 32  Jalo ba tswa ba tsamaya ka mokoro ba ya kwa lefelong le le se nang batho le go leng bone fela.+ 33  Mme batho ba ba bona ba tsamaya mme ba le bantsi ba utlwa ka gone, mme ba itlhaganelela koo ka dinao ba tswa mo metseng yotlhe mme ba ba raka.+ 34  Ebu, ya re a tswa, a bona boidiidi jo bogolo, mme a tlhotlheletsega go ba tlhomogela pelo,+ ka gonne ba ne ba tshwana le dinku tse di se nang modisa.+ Mme a simolola go ba ruta dilo di le dintsi.+ 35  Mo nakong eno nako e ne e setse e ile, mme barutwa ba gagwe ba tla kwa go ene mme ba re: “Lefelo leno le kwa thoko, e bile nako e setse e ile.+ 36  Ba neye tsela, gore ba tswe ba ye mo lefelong la selegae le mo metsaneng e e mo tikologong mme ba ithekele sengwe se ba ka se jang.”+ 37  Fa a fetola a ba raya a re: “Ba neyeng sengwe se ba ka se jang.” Foo ba mo raya ba re: “A re tswe re ye go reka dinkgwe tse di jang didenario di le makgolo a mabedi mme re di neye batho bano gore ba je?”+ 38  A ba raya a re: “Lo na le dinkgwe di le kae? Yang go bona!” Fa ba sena go tlhomamisa seno, ba re: “Di le tlhano, le ditlhapi tse pedi.”+ 39  Mme a laya batho botlhe gore ba nne ka go sekama ka ditlhopha+ mo bojannyeng jo bo tala.+ 40  Mme ba nna fa fatshe ka ditlhopha tsa lekgolo le tsa masome a matlhano.+ 41  Ya re jaanong a tsaya dinkgwe di le tlhano le ditlhapi tse pedi a lelalela kwa legodimong a segofatsa,+ mme a ngathoganya+ dinkgwe a ba a simolola go di naya barutwa, gore bano ba di beye fa pele ga batho; mme a kgaoganyetsa botlhe ditlhapi tse pedi. 42  Jalo botlhe ba ja ba bo ba kgora;+ 43  mme ba sela manathwana, a tlala diroto di le lesome le bobedi, kwantle ga ditlhapi. 44  Mo godimo ga moo, ba ba neng ba ja dinkgwe tseno e ne e le banna ba le dikete tse tlhano.+ 45  Mme, kwantle ga tiego, a patelela barutwa ba gagwe gore ba palame mokoro ba tsamaele kwa pele kwa losing lo lo bolebana go ya kwa Bethesaida, fa ene ka boene a phatlalatsa boidiidi.+ 46  Mme fa a sena go ba sadisa sentle a tswa a ya kwa thabeng go ya go rapela.+ 47  E re ka jaanong go ne go setse go le maitseboa, mokoro o ne o le fa gare ga lewatle, mme ene o ne a le esi mo lefatsheng.+ 48  E rile a bona ba tshwarisitswe bothata+ ke go tsamaisa mokoro, gonne phefo e ne e tlhabagana le bone, mo e neng e ka nna tebelo ya bonè ya bosigo a tla kwa go bone, a tsamaya mo lewatleng; mme o ne a batlile a ba feta. 49  Ya re ba tshogana ka ba mmona a tsamaya mo lewatleng ba akanya ba re: “Ke sedimo!” mme ba goela kwa godimo.+ 50  Gonne botlhe ba ne ba mmona mme ba tshwenyega. Mme ka yone nako eo a bua le bone, a ba raya a re: “Nnang pelokgale, ke nna; se boifeng.”+ 51  Mme a palama mokoro le bone, mme phefo ya kokobela. Foo ba gakgamala fela thata,+ 52  gonne ba ne ba sa tlhaloganya se se kaiwang ke dinkgwe, mme dipelo tsa bone tsa nna tsa kgwaralala go ka tlhaloganya.+ 53  E rile ba kgabaganyeditse mo lefatsheng, ba tla mo Genesareta mme ba setlela sekepe fa gaufi.+ 54  Ka bonako fela fa ba tswa mo mokorong, batho ba mo lemoga, 55  mme ba siana le kgaolo eo yotlhe ba simolola go rwalarwala ka malawana ba ba neng ba bobola ba ba isa kwa ba neng ba utlwalela gore o ne a le gone. 56  Mme gongwe le gongwe fela kwa a neng a tsena mo metsaneng kgotsa mo metseng kgotsa mo lefelong la selegae+ gone ba ne ba baya babobodi mo marekisetsong, mme ba ne ba mo rapela gore ba ame+ fela lekantsa+ la seaparo sa gagwe sa kafa ntle. Mme botlhe fela ba ba neng ba le ama ba ne ba fola.+

Dintlha Tse di Kwa Tlase